NEHEMIA 2:17 - Jinghpaw Common Language Bible 2009

¹⁷ Rai ti mung ya chyawm gaw ngai shanhte hpe, “Yerusalem hten run mat nna de a chyinghka ni hten za mat sai majaw kaning re ai tsin-yam tsindam anhte hkrum sha nga ga ai hpe yu yu mu! Anhte gaw mare hpe bai de da ai hte anhte a sari hpoi hkrum ai amu hpe jahtum kau saga,” ngu nna tsun we ai.

Jinghpaw Hanson Version Bible

¹⁷ Dai hpang ngai shanhte hpe, “Anhte hkrum ai tsin-yam tsindam, Yerusalem mare katsi katsang rai nga ai hte, de a chyinghka ni hkru mat nga ai hpe nanhte mu manit dai: sa marit, htawm hpang e anhte aroi arip n hkrum u ga, Yerusalem bunghku ni hpe anhte sharawt ga,” ngu nna shanhte hpe tsun dan let,

NEHEMIA 2:17 ပူးပေါင်းရင်းမြစ်များ

EZRA 9:9

Anhte gaw mayam ni rai nga ga tim, nang gaw anhte hpe mayam amu hta kau da nga ndai n rai. Yuda mung hte Yerusalem mare hta shim lum ai lam mu tam la nhtawm matut nna shanu nga lu na ahkang mung, hten run mat sai na a Nawku Htingnu hpe bai gaw gap na matu mung, Persi hkawseng a jaw e nang anhte hpe myi man pa shangun nga nit dai.

NEHEMIA 1:3

Shanhte gaw ngai hpe naw ngam nga ai ni hte bum ga dum nta de nhtang wa nga ai ni gaw ru yak tsin-yam tsindam kaba hkrum ai hte, makau mayang hkan nga ai maigan masha ni mung shanhte hpe yu kaji nga ma ai ngu nna tsun dan ma ai. Shanhte gaw Yerusalem bunghku ni hten run mat ai hte mare chyinghka ni hkru mat sai lam tsun dan ma ai.

NEHEMIA 2:13

Ngai gaw shana e naw rai nga yang sinna maga na Kadit Chyinghka lam hku mare kaw nna pru mat wa nhtawm, dingda maga Baren Hka Hpawk hte Maza Chyinghka lam de du hkra lai yu wa nngai. Ngai lai hkawm wa ai shaloi, daw agrawp mat sai mare bunghku ni hte wan hkru mat sai chyinghka ni hpe san jep yu nngai.

NEHEMIA 2:16

Ninghtawn du salang ni kadai mung ngai kade hkawm kau da let hpa galaw ai lam n chye shajang ma ai. Nye a Yuda kahpu kanau ni rai nga ai hkinjawng ni, ningbaw ni, du salang ni hte magam bungli rau galaw wa na masha kadai ni hpe mung ya du hkra ngai hpa n tsun dan yu nngai.

NEHEMIA 3:15

Hkolahoze a kasha Mizpa ginwang up ai Shalum gaw Hka Hpawk Chyinghka hpe galaw wu ai. Shi gaw chyinghka lam hpe galup nna, chyinghka ni hpe shara hte shara tawn da nna shingla ni hte htinggrang ni hpe shakap da nga ai. Hkawhkam sun makau na Shela Hka Lawng bunghku hpe Dawi a Mare kaw nna yu wa ai lakang du hkra galaw da nga ai.

SHAKAWN KUNGDAWN 102:15

Amyu baw ni Madu hpe hkrit hkungga wa na mara ai, mungkan ga na hkawhkam ni yawng hte gaw shi a daru magam n-gun hpe hkrit kamyin wa na mara ai.

SHAKAWN KUNGDAWN 44:13

Anhte a htingbu ni gaw nang anhte hpe kaning di kau sai lam hpe mu nga ma ai rai nna, shanhte gaw anhte hpe ashu ai hte mani asawng nga ma ai.

SHAKAWN KUNGDAWN 44:14

Amyu baw ni a ka-ang e, nang anhte hpe mani chyai hpa galaw kau nit dai rai nna; shanhte gaw shanhte a baw kanga let, anhte hpe jahpoi asawng nga ma ai.

SHAKAWN KUNGDAWN 79:12

Madu e, maigan mungdan ni a n kaw n law re ai hte nang hpe kabai tawn nga ma ai majaw, shanhte hpe sanit lang ari bai htang jaw u.

SHAKAWN KUNGDAWN 79:4

Htingbu mungdan amyu masha ni mung anhte hpe asawng asang di mi ai; anhte hpe mani ai hte n kaw n law di da mi ai.

YEREMIA 24:9

Mungkan ga na masha amyu baw ni yawng hkrit gari mat hkra, dai zawn re ai tsin-yam tsindam shanhte a ntsa e ngai shapraw na we ai. Ngai shanhte hpe shabra kau ai shara shagu hkan e, mung masha ni gaw shanhte hpe mani asawng ai, shatu asan ai, jahpoi jahpyak ai hte shanhte a amying mung dagam dala ga tsun hkrum na mara ai.

SHARUNG SHAYAWT 2:2

Dai Madu gaw Yuda mung hta nga ai mare shagu hpe matsan n dum ai sha jahten sharun kau nu ai, Mungdan hpe makawp maga ai hpyen dap ni hpe mung ashep ashin di kau nu ai. Shi gaw mungdan hte de a mungdu ni hpe jahpoi jahpyak lam shapraw nu ai.

SHARUNG SHAYAWT 3:51

Ndai mare na numsha ni a byin hkrum sha ai hpe ngai mu mada ai shaloi, nye a myit masin yawn nga li ai.

EZEKELA 5:14

Na a grup yin e lai hkawm nga ai masha amyu baw ni hta na masha shagu hte gaw nang hpe ashu kau ai hte shingran katsi kau shangun na nngai.

MIHKA 7:11

Yerusalem masha ni e, mare bunghku bai gaw gap da ai aten du wa ra ai. Dai aten e, na a lamu ga jarit ni maden jat wa na ra ai.

1 SAMUELA 11:2

Nahasha chyawm gaw, “Ngai gaw masa lam langai hta mahta nna nanhte hte ga shaka tawn da na nngai; masha shagu hte a hkra maga na myi ni hpe ngai malawk kau ya nhtawm, Israela amyu ting hpe jahpoi asawng kau lu na rai myit dai,” ngu nna htan wu ai.