NAHUM 1:3 - Jinghpaw Common Language Bible 2009

³ Dai Madu gaw loi loi hte masin pawt ai n rai, rai ti mung shi gaw daru magam n-gun rawng nga ai hte mara lu ai wa hpe ari n jaw ai sha galoi mung dat dat ai n rai. Dai Madu hkawm ai shara hta, laru ru nga ai; sumwi ni gaw shi a lagaw a npu na ga nhpu rai nga a hka!

Jinghpaw Hanson Version Bible

³ Yehowa gaw myit galu kaba nna, n-gun atsam ja nga ai: shi gaw mara kap ai wa hpe shalawt dat na n rai: Yehowa gaw bungsha hte laru marang hta yu wa nna, sumwi ni gaw shi a lagaw npu na ga nhpu rai nga ai.

NAHUM 1:3 ပူးပေါင်းရင်းမြစ်များ

2 SAMUELA 22:10

Shi gaw sumsing lamu hpe gang je nna yu wa nhtawm, shi a lagaw npu e htat ai nsin rai nga ai.

NEHEMIA 9:17

Shanhte gaw ga n madat ma ai; shanhte gaw nang galaw ai amu yawng mayawng hpe malap kau ma ai; shanhte gaw nang galaw dan sai mauhpa amu ni hpe malap kau manu ai. Shanhte gaw gumrawng ai myit hte mayam tai nga ai Egutu mung de shanhte hpe woi nhtang sa wa na matu ningbaw langai san da ma ai. Rai ti mung nang gaw mara dat ya ai Karai Kasang rai nga ndai; nang gaw chyeju myit rawng nna tsaw ra ai hte hkam sharang lu ai wa rai nga ndai. Na a matsan dum ai myit gaw galu kaba nga nna; nang gaw shanhte hpe kau da nga ai n rai.

YOBA 10:14

Ngai yubak galaw yang, nang ngai hpe azi yu ndai; ngai hpe mara dat ya na nang n hkraw nga ndai.

YOBA 38:1

Dai hpang dai Madu gaw Yoba hpe nbung laru kaw nna ga shaga wu ai.

YOBA 9:4

Karai Kasang gaw hpaji grai rawng ai hte daru magam n-gun rawng nga ai; kadai mung shi hpe gumlang lu ai n rai.

SHAKAWN KUNGDAWN 103:8

Dai Madu gaw matsan dum ai, tsaw ra ai, myit galu kaba ai hte dinggrin tsaw ra myit hpring nga ai wa rai nga ai.

SHAKAWN KUNGDAWN 104:3

lamu madin hta nga ai hka ni a ntsa e, na a nta hpe gap da nga ndai. Nang gaw sumwi ni hpe na a gumra leng zawn, nang akyu jashawn nna; nbung a singkaw ntsa e, nang jawn nga ndai.

SHAKAWN KUNGDAWN 145:8

Madu gaw tsaw ra ai hte matsan dum ai wa rai nga nna; shi gaw pawt sindawng ai hpe hkam sharang ai hte dinggrin tsaw ra myit hte hpring nga ai.

SHAKAWN KUNGDAWN 147:5

Anhte a Madu gaw galu kaba nga nna chyahtum chyalai n-gun hte hpring nga ai wa rai nga ai; shi a nyan hpaji hpe shadawn lu nga ai n rai.

SHAKAWN KUNGDAWN 50:3

Anhte a Karai Kasang sa wa nga ai rai tim, atsin sha du sa nga ai n rai; shi a man e wan shinglet ni hkru nga nna shi a makau mayang hkan e, laru kaba ru nga ai.

SHAKAWN KUNGDAWN 62:11

Madu hta daru magam n-gun rawng nga ai hpe mung, shi a tsaw ra myit dinggrin rai nga ai hpe mung, Karai Kasang tsun ai ga dai hpe law law lang, ngai na ni ai.

SHAKAWN KUNGDAWN 66:3

“Nang galaw ai amu ni gaw kade wa mauhpa rai nga a hka! Na a daru magam n-gun grai galu kaba nga ai majaw, na a gumlau hpyen ni gaw na a man e, hkrit ai hte gum dagup nga ma ai.

ESAIA 19:1

Ndai gaw Egutu mung hte seng ai mungga rai nga ai. Dai Madu gaw sumwi ntsa e jawn nna Egutu mung de tin tin sa wa nga ai. Egutu hpara sumla ni shi a man e gari ashun nna Egutu masha ni nden marai sum mat ma ai.

ESAIA 29:6

Chyahtum Chyalai N-gun rawng ai dai Madu gaw mu ngoi kadu ai laru kaba hte nnang nawn ai hte rau nanhte hpe hkye mawai la na ra ai. Shi gaw nbung laru hte wan mawru ni hpe dat dat na ra ai;

ESAIA 66:15

Dai Madu gaw wan hte rau du sa wa na ra ai. Shi gaw shi pawt sindawng ai ni hpe ari jaw na matu nbung laru a singkaw ni a ntsa e jawn sa wa na ra ai.

YEREMIA 4:13

Yu u, gumlau hpyen gaw sumwi ni zawn sa wa mara ai. Shanhte a majan hpyen leng ni gaw nbung bung hpoi zawn rai nga ai, shanhte a hpyen gumra ni gaw galang ni hta grau nna lawan nga ma ai. Anhte sum mat saga ai! Anhte daw dan ai hkrum saga ai!

Daniela 7:13

Shana e ndai shingran mu nga ai laman, shinggyim masha hte bung ai langai mi ngai mu nngai. Shi gaw ngai kaw shani sa wa nna, sumwi ni hte gawan da let htani htana ahkrung nga sai wa hpang de sa nhtawm shi a man e nga nga ai.

HOSEA 8:7

Shanhte nbung gat hkai ai shaloi, nbung laru shu la na mara ai! Yi hkauna na n myin ai nsi naisi gaw galoi mung muk n lu shapraw ya nga ai. Dai hta rawng tim pyi, maigan masha ni sha kau na mara ai.

YOELA 2:13

Nanhte a yawn hkyen ai hpe madun dan lu hkra nanhte a myit masin agrawp shadaw kau mu; hpun palawng gang je kau ai hte sha ram ai n rai,” ngu nna tsun wu ai. Dai Madu nanhte a Karai Kasang hpang de nhtang wa marit. Shi gaw matsan chye dum ai hte n-gaw n wai ai myit hpring hkra rawng nga ai; shi gaw myit galu kaba ai hte shi a ga sadi ni hpe shatup nga ai; shi gaw ari jaw na matu n rai, mara dat ya na matu, tut nawng jin jin rai nga ai wa rai nga ai.

YONA 4:2

Dai rai nna shi gaw, “Madu e, ngai nta kaw na garai n pru sa wa yang, nang ndai hku galaw na nit dai ngu nna ngai tsun ni ai n rai ni? Dai re ai majaw nye a matu kaja htum ai lam rai u ga ngu nna Spain mung de hprawng mat wa nngai! Nang gaw tsaw ra ai, matsan dum ai, myit galu kaba ai, n gaw n wai ai hte galoi mung ari jaw na hkyen ai myit hpe galai kau na jin nga chyalu re ai Karai Kasang rai nga ndai.

ZEHKARIA 9:14

Dai Madu gaw shi a amyu masha ni a ntsa e dan pru nna; shi gaw shi a pala ni hpe myihprap gala ai zawn gap dat na ra ai. Tsaw Htum ai dai Madu gaw pahtau dum dat na ra ai; shi gaw dingda maga de na nbung laru hta hkawm sa wa na ra ai.

BU HKAWM 14:18

tsaw ra myit kaba hte sadi sahka ai hpe madun dan nhtawm yubak mara hte tara tawt nna gumlang ai lam hpe mara dat ya ai wa rai nga nngai. Rai ti mung kanu kawa ni shut kau ai yubak mara a majaw shanhte a kashu kasha ni hpe ban masum, ban mali du hkra ari n jaw ai sha nga na nngai n rai,’ ngu nna tsun nit dai.

MAHTE 26:64

Yesu gaw, “Nang tsun ai hte maren rai nga ai. Rai ti mung ngai nanhte yawng hpe tsun made ga, ya kaw nna dai Masha Kasha gaw daru magam ahkang aya lu ai wa a hkra maga e dung nga nna lamu na sumwi ni hte du sa ai hpe nanhte mu na marin dai!,” ngu nna shi hpe tsun wu ai.

YAKU 1:19

Nye a tsaw ra ai hpu nau ni e, ndai lam matsing tawn da nga mu! Nanhte langai hte langai gaw na la na mahtang lawan nna tsun shaga na hte masin pawt na lam hta hkum tin nga mu.

SHINGRAN 1:7

Yu mu! Shi gaw sumwi ni hta jawn nna du sa wa ra ai; Madu hpe nri hte galun baw ai ni hte hpawn masha yawng gaw shi hpe mu lu na mara ai. Dinghta ga na amyu nlang hte gaw, shi a majaw yawn hkyen sharung shayawt na mara ai. Dai hte maren byin wa u ga law!