MIHKA 7:8 - Jinghpaw Common Language Bible 2009

⁸ Anhte a gumlau hpyen ni gaw anhte a ntsa e lachyum kata, yu kabu nga ma ai. Anhte kataw mat ai rai ti mung bai rawt wa lu na ga ai. Ya, anhte nsin kata hta rawng nga ga ti mung, dai Madu gaw anhte hpe nhtoi jaw ya na ra ai.

Jinghpaw Hanson Version Bible

⁸ Hpyen wa e, nye a lam hkum yu kabu et; ngai kataw timung, bai rawt na nngai; ngai nsin kata e dung nga timung, Yehowa nye a nhtoi rai na ra ai.

MIHKA 7:8 ပူးပေါင်းရင်းမြစ်များ

YOBA 31:29

Nye a gumlau hpyen ni nni nkri hkrum sha yang, ngai galoi mung kabu nngai n rai; shanhte ru yak tsin-yam tsindam hkrum yang, ngai galoi mung ra sharawng nga nngai n rai.

SHAKAWN KUNGDAWN 112:4

Matsan chye dum ai, n-gaw n wai myit hte teng man nga ai mai kaja ai masha ni a matu, nhtoi gaw nsin hta htoi tu ya nga ai.

SHAKAWN KUNGDAWN 143:3

Nye a gumlau hpyen wa ngai hpe hkan shachyut dep ni ai hte; ngai hpe atsai awai di nna dang kau nu ai. Shi gaw ngai hpe sin mak ai shara hta sharen da ai rai nna, moi na ten hta si mat wa sai ni zawn ngai rai nga nngai.

SHAKAWN KUNGDAWN 20:8

Shanhte ahtu ai hte kadawng mat wa ma ti mung, anhte rawt nna ngang ngang tsap nga lu na ga ai.

SHAKAWN KUNGDAWN 27:1

Madu gaw nye a nhtoi hte hkye hkrang la ai wa rai nga ai; kadai hpe mung ngai n hkrit na nngai. Dai Madu gaw hkrithpa shara yawng kaw na ngai hpe makawp maga la nga ai rai nna; ngai galoi mung hkrit na nngai n rai.

SHAKAWN KUNGDAWN 35:19

Masu magaw ai nye a gumlau hpyen ni gaw ngai hpe dang kau lu ma ai majaw gumrawng ai lam hkum byin shangun et! Lachyum n pru ai sha, ngai hpe n ju n dawng ai ni, ngai yawn hkyen hkrum ai hpe mu nna, hkrum sha sahka, nga nna hkum kabu shangun et!

SHAKAWN KUNGDAWN 37:21

Tara n lang ai masha wa gaw arai shap la ti mung, galoi mung nhtang ya nga ai n rai; rai ti mung, mai kaja ai wa gaw shi a kumhpaw kumhpa ni hpe ndaw nhta jaw ya nga ai.

SHAKAWN KUNGDAWN 37:24

Shanhte kataw ai lama rai yang, shanhte kataw nan nga na mara ai n rai; kaning rai nme law, Madu gaw shanhte hpe sharawt la na ra ai.

SHAKAWN KUNGDAWN 38:16

Nye a gumlau hpyen ni, nye a myit ru myit tsang ai lam hta hkum yu kabu shangun nga et; nye a hkrat sum mat ai lam hta mung, shanhte hpe hkum gumrawng shangun nga et!

SHAKAWN KUNGDAWN 84:11

Madu gaw anhte hpe makawp maga ai wa hte hpung shingkang hte hpring ai hkawhkam wa rai nna; matsan dum ai myit hte arawng sadang anhte hpe shaman ya nga ai. Shi gaw teng man ai amu galaw ai ni hpe mai kaja ai lam hpa hpe mung jaw ya na, ningdang ai n rai.

SHAKAWN KUNGDAWN 97:11

Ding hpring ai wa a ntsa e, nhtoi hpe jahtoi ya nna; mai kaja ai ni a ntsa e, kabu gara ai lam tawn da ya nga ai.

ESAIA 2:5

Ya chyawm gaw, Yaku a matu mara ni e, dai Madu anhte hpe jaw ai nhtoi hta anhte hkawm nga saga!

ESAIA 49:9

Ngai gaw bawng dung ai masha ni hpe, ‘Ndut ndang pru wa manu!,’ ngu nna mung, nsin kata e rawng nga ai ni hpe, ‘Nhtoi de pru wa marit!,’ ngu nna mung tsun na nngai. Shanhte gaw kawng ni hkan ushat sha nga ai sagu ni zawn tai na mara ai,

ESAIA 50:10

Dai Madu hpe shagrau sha-a ai nanhte yawng gaw shi a shangun ma wa a n-gup aga ni hpe madat mara nga ai, nang hkawm sa ai lam gaw kaja wa nsin sin chye nga ai, rai ti mung dai Madu hpe kam hpa nna, na a Karai Kasang hta shamyet shanat nga u.

ESAIA 9:2

Nsin kata hta hkawm nga ai amyu masha ni gaw nhtoi kaba hpe mu lu manu ai. Shanhte gaw si hkrung si htan mung na shingnip ni hta nga nga ma ai, rai ti mung ya chyawm gaw dai nhtoi shanhte a ntsa e htoi leng nga sai.

YEREMIA 48:27

Moba e, nang gaw Israela amyu masha ni hpe kaning rai ashu kau nit ta? Dai hpe dum nga u. Shanhte gaw mya lu mya sha ai damya hpung mi a lata hta rim hkrum ma ai zawn nang shanhte hpe di kau nit dai.

YEREMIA 50:11

Dai Madu gaw, “Babelon mung masha ni e, nang gaw nye a amyu hpe hpya sha kau nit dai; nanhte gaw mam kabye nga ai dumsu shing n rai shabam ai gumra zawn kabu gara ai hte kayin hkawm nga myit dai,

YEREMIA 8:4

Dai Madu gaw shi a amyu masha ni hpe ning ngu tsun na matu tsun wu ai: “Marai langai ngai kataw ai shaloi shi bai n rawt lu a ni? Marai langai ngai lam yit ai rai yang, shi bai nhtang wa ai n rai ni?

EZEKELA 25:6

“Ndai gaw Tsaw Htum ai dai Madu tsun ai mungga rai nga ai: Nang gaw lahpawk dum let kabu gumhtawn hkawm nga ndai. Nang gaw Israela mungdan hpe n kaw n law di kau nga ndai.

EZEKELA 35:15

Ngai madu tawn ai Israela a hten run ai hpe nang yu kabu nga ndai hte maren, Seira bum ni e, rai sa, Edom mungdan yawng gaw katsi katsang shara tai mat na ra ai. Masha shagu hte gaw ngai nan dai Madu rai nga nngai hpe chye lu na mara ai,” ngu nna tsun wu ai.

EZEKELA 36:5

“Grup yin masha amyu baw ni, grau nna Edom amyu masha ni hpe hkap daw na, Tsaw Htum ai dai Madu ngai nan nye a sindawng kahtet ai myit hte tsun shapraw dat ni ai. Shanhte gaw nye a mungdan hpe kabu gara ai myit hte mung, pagawn mi n gawn n sawn re ai myit hte mung ka-up la nna dai mung na udat shara ni hpe madu la nga ma ai.

AMO LAIKA (AMOS) 9:11

Dai Madu gaw, “Ngai gaw daw hten mat ai nta langai zawn rai nga ai Dawi a mungdan hpe bai gaw gap da ai shaloi dai nhtoi du wa na ra ai. Ngai gaw de a bunghku ni hpe bai lajang ai hte dai hpe bai gaw gap da na nngai. Ngai gaw dai hpe bai gaw gap ai hte moi na zawn bai de da na nngai.

OBEDIA 1:12

Yuda mung na na a jinghku ni a n kaja ai gam maka hpe nang yu sharawng mai nga ndai n rai. Shanhte hten run hkrum ai shani e, nang yu kabu mai nga ndai n rai. Shanhte myit ru myit yak hkrum nga ma ai shaloi, nang shanhte hpe mani asawng mai nga ndai n rai.

MIHKA 4:10

Yerusalem masha ni e, shinggyim machyi ai num zawn kasha shangai na matu manai madai nga u. Hpa majaw nga yang, nang gaw ndai mare kaw nna pru mat wa ra ai hte pa ga de sa nga ra na ra ai. Nang gaw Babelon mung de du hkra sa mat wa ra nga tim, dai Madu gaw nang hpe dai shara na na a gumlau hpyen ni a lata kaw na mawai la na ra ai.

MIHKA 7:10

Dai hpang, anhte a gumlau hpyen ni dai lam hpe mu wa nna kaya kahpa hkrum wa na mara ai. Dai gumlau hpyen ni gaw anhte hpe, “Na a Madu Karai Kasang kanang nga nga lit ta?,” nga nna san ashu ai ni gaw lam ka-ang na hkumpup zawn kabye hkrum ai hte sum kadawng mat ai hpe anhte mu lu na ga ai.

ZEHKARIA 12:8

Dai aten hta dai Madu gaw Yerusalem hta shanu nga ai ni hpe makawp maga ya na ra ai rai nna, shanhte hta na n-gun kya htum ai wa pyi Dawi zawn n-gun ja ai wa tai wa na ra ai. Dawi a amyu matu ni gaw dai Madu a lamu kasa zawn, rai sa Karai Kasang shi hkum nan zawn shanhte hpe lam woi na mara ai.

MALAHKI 4:2

Rai ti mung nye a ga madat ai nanhte a matu hkye hkrang la lu ai nye a daru magam n-gun gaw nanhte a ntsa e ajan zawn rawt wa nna, jan a shingkang ni zawn shamai shatsai ai lam du pru wa na ra ai. Nanhte gaw shalawt dat ai hkrum nna, ulawng kaw na pru wa ai dumsu kasha ni zawn kabu gara na rai myit dai.

MAHTE 4:16

nsin kata e nga pra nga ai masha ni gaw, nhtoi kaba hpe mu lu na mara ai, si ai mung hte de a shingnip kata e nga pra nga ai ni a ntsa de nhtoi dawng pru na ra ai,” nga nna htawn tsun ai.

YAWHAN 16:20

Ngai nanhte hpe kaja wa teng teng tsun made ga, nanhte gaw hkrap ngu hkrap ngoi ai hte sharung shayawt ai hkrum na marin dai. Mungkan masha ni chyawm gaw kabu gara lu na mara ai; nanhte gaw yawn hkyen ai hkrum na marin dai; rai ti mung nanhte a yawn hkyen ai gaw kabu gara ai bai tai na ra ai.

YAWHAN 8:12

Yesu shanhte hpe bai tsun mu ai gaw, “Ngai gaw mungkan ga a nhtoi rai nga nngai. Nye a hpang hkan nang ai wa gaw asak a nhtoi hpe lu la na ra ai rai nna nsin hta galoi mung n hkawm n sa na ra ai,” ngu mu ai.

KASA 26:18

Ngai hpe kam sham ai a marang e shanhte yubak mara ni raw dat kau ai hkrum nna Karai Kasang a lata la ai amyu hta lawm lu mu ga, n sin kata nna nhtoi de, Satan a atsam kata nna Karai Kasang hpang de shanhte kayin wa lu hkra nang shanhte a myi jahpaw ya na rai ndai,’ nga nna ngai hpe tsun nngai.

2 KORINHTU 4:6

Yesu Hkristu a myi man hta htoi tu ai hpung shingkang a lam nanhte chye chyang u ga, anhte a myit masin hta nhtoi jahtoi ya ai Karai Kasang gaw, “Nsin hta na nhtoi htoi na ra ai,” nga nna tsun ai Karai Kasang shi nan rai nga ai.

2 KORINHTU 4:9

Anhte hpe hpyen ai ni law law nga ma ai. Rai ti mung jinghku langai mi pyi n lu mat ai sha galoi n nga yu ga ai; kalang lang grai machyi hkrum ga ai, rai ti mung jahten shaza kau hkrum ga ai n rai.

SHINGRAN 21:23

Dai mare hpe jahtoi ya na matu jan, shata mung n ra nga ai. Hpa majaw nga yang, Karai Kasang a hpung shingkang gaw dai mare hpe jahtoi ya nna, Sagu Kasha gaw de a pyengdin rai nga ai.

SHINGRAN 22:5

Dai mare hta shana mung n nga na ra ai; pyengdin a nhtoi mung, jan a nhtoi mung, shanhte n ra ma ai: hpa majaw nga yang, dai Madu Karai Kasang gaw shanhte hpe nhtoi jaw na mu ai; dai hta n ga, shanhte gaw, hkawhkam tai nna htani htana prat dingsa up nga lu na mara ai.