MIHKA 2:12 - Jinghpaw Common Language Bible 2009

¹² “Rai ti mung, nanhte Israela amyu masha ni hta na naw ngam nga ai ni yawng hte hpe ngai shinggyin da na we ai. Sagu ni gaw shanhte a ulawng de nhtang wa ma ai zawn, ngai nang hpe bai jahpawng la na nngai. Sagu ni hte hpring nga ai udat shara zawn na a lamu ga gaw masha law law hte kalang mi bai hpring chyat wa na mara ai.”

Jinghpaw Hanson Version Bible

¹² Yaku e, na amyu ting hpe, ngai teng teng shinggyin la na nngai; gaja wa, Israela hta naw ngam nga ai ni hpe, ngai jahpawng da na nngai: Bozra mung na sagu ni hte, tinang a udat shara na sagu hpung hpe zawn, ngai shanhte hpe hpawng nga shangun na nngai; masha law ai majaw wu kadu nga ai.

MIHKA 2:12 ပူးပေါင်းရင်းမြစ်များ

ESAIA 11:11

Dai nhtoi du ai shaloi, dai Madu gaw shi a daru magam n-gun hpe kalang mi bai lang nna, Asuri, Egutu, Pahtro, Ehtiopi, Elam, Babelon hte Hamat mung, panglai hkin-gau mayan hte panglai zunlawng ni hkan naw ngam nga ai shi a amyu masha ni hpe buga de woi wa na ra ai.

ESAIA 27:12

Dai shani e, Uhprat hka nu kaw nna Egutu mung jarit du hkra, dai Madu gaw shi a amyu masha masha langai hpang langai hpe chyarang kaw nna hkaulan mam gu hte nsan hpe ginhka la ai zawn shinggyin la na ra ai.

ESAIA 34:6

Shi a nhtu gaw hkungga nawng ya ai sagu bainam ni a asai hte asau ni zawn sai hkru nga nna sau abya taw nga na ra ai. Dai Madu gaw Bozra mare e ndai hkungga nawng ya na ra ai; shi gaw Edom mung hta e sat poi kaba galaw na ra ai.

ESAIA 5:17

Hten run mat sai mare ni hta, sagu kasha ni tsing makret sha nna, bainam kasha ni udat shara mu tam na mara ai.

YEREMIA 23:3

Ngai shanhte hpe shabra kau dat ai mungdan ni kaw nna naw ngam nga ai nye a amyu masha ni hpe ngai shinggyin la na nngai, shing rai ngai gaw shanhte hpe shanhte a daidaw buga de bai woi wa na nngai. Shanhte gaw kashu kasha law law mayat maya wa nna law htam wa na mara ai.

YEREMIA 3:18

Israela gaw Yuda hte matut nna shanhte gaw dingdung maga na mungdan hta bawng dung hkrum nga ai kaw na wa nhtawm prat dingsa madu nga na matu na a nji nwa ni hpe ngai jaw da sai lamu ga de nhtang wa na mara ai.

EZEKELA 34:11

“Ngai nan nye a sagu ni hpe hkan yu nna shanhte hpe lanu lahku na nngai ngu nna Tsaw Htum ai dai Madu ngai nan nanhte hpe tsun nga nngai.

EZEKELA 34:13

Ngai gaw maigan mungdan hkan nga nga ai ni hpe shinggyin la nna shanhte a mungdan de bai woi wa na nngai. Israela bum ga de mung, hka shi shara hkan e mung, shanhte hpe woi nhtang wa nna ngwi pyaw ai udat shara ni hta shanhte hpe rem na nngai.

EZEKELA 34:22

Rai ti mung, ngai gaw nye a sagu ni hpe mawai la nna shanhte hpe galoi mung ru yak jahkrum shangun na n rai. Ngai gaw kaja ai hte n kaja ai nye a sagu shagu ni hpe ginhka nna jeyang na nngai.

EZEKELA 34:31

“Nye a sagu ni e, ngai bau rem ai sagu hpung nanhte gaw nye a amyu masha ni rai nga myit dai; ngai gaw nanhte a Karai Kasang rai nga nngai,” ngu nna Tsaw Htum ai dai Madu tsun ai.

EZEKELA 36:37

Tsaw Htum ai dai Madu gaw, “Ngai gaw karum la na matu ngai hpe hpyi ai Israela amyu masha ni a nsen hpe kalang mi bai madat ya na nngai. Dai hpang, ngai gaw shanhte hpe sagu hpung zawn shalaw jahtam shangun na nngai.

EZEKELA 37:21

Dai hpang, Tsaw Htum ai dai Madu ngai nan amyu baw ni hta bra nga ai nye a amyu masha ni yawng hpe ngai shapraw la nna shanhte hte rau sha shinggyin la let shanhte a mungdan majing de woi nhtang wa na lam, htawn tsun u.

HOSEA 1:11

Yuda amyu masha ni hte Israela amyu masha ni rau bai zup hpawng wa na mara ai. Shanhte gaw shanhte a matu ningbaw langai sha lata san da nna, shanhte a mungdan hta rawt kaba wa nhtawm ngamu ngamai wa na mara ai. Rai sa, Yezrela a shani gaw galu kaba ai shani tai na ra ai!

AMO LAIKA (AMOS) 1:12

Dai rai nna, ngai gaw Teman mare a ntsa e wan jahkrat dat nna Bozra a hpyen dap ni hpe jahkru kau na we ai,” ngu nna tsun ai.

MIHKA 2:13

Karai Kasang gaw shanhte a matu lam hpaw ya na ra ai; shanhte hpe bawng dung ai kaw nna woi lakawn wa na ra ai. Shanhte gaw mare chyinghka ni hpe adawt agrawp kau na mara ai hte ndut ndang hkawm sa lu na mara ai. Shanhte a hkawhkam rai nga ai dai Madu shi nan shanhte hpe woi shapraw wa na ra ai.

MIHKA 4:8

Yerusalem na nang Karai Kasang gaw sagu rem wa gaw langchyi ntsa kaw nna yu nga ai zawn shi a amyu masha ni hpe yu mada nga ai; dai mare gaw shawoi na zawn mungdan a mare daju kalang mi bai tai wa lu na ra ai.

MIHKA 5:7

Naw hkrung nga ai Israela amyu masha ni gaw masha amyu baw law law a matu dai Madu kaw na hkrat ai n-gun awai la shangun ai numri hte tu kaba wa ai hkai bawng ntsa e htu ai marang zawn tai na mara ai. Shanhte gaw masha hpe n rai, Karai Kasang hpe kam hpa wa na mara ai.

MIHKA 5:8

Naw ngam nga ai ni gaw masha amyu baw ni a ka-ang e nam mali shing n rai udat shara hkan lu sha tam gyam sha nga ai hkanghkyi zawn tai na ra ai. Shi gaw sagu ni a lapran de shang nna adaw achyen di gang amya je kau na ra ai; dai shara hta mawai la na matu myit mada shara nga na n rai.

MIHKA 7:14

Madu e, nang lata san da sai na a amyu masha ni a matu sagu rem wa tai nga u. Shanhte gaw nam mali kata hkan dumbri dumbra rai nga nga ma ti mung, dai shara hta ga sau kaja ai lamu ga gaw shanhte hpe gawan da nga ai. Bashan hte Gilead mung na udat shara hta lai sai aten shanhte nga ningngai lu ma ai zawn shanhte sa nna sha lu mu ga.

MIHKA 7:18

Madu e, nang hte bung ai kaga karai kadai mung n nga nga ai; naw ngam nga ai na a amyu masha ni a yubak ni hpe raw dat kau ya nna htani htana masin kahtet nga ndai n rai tim, anhte hpe madun dan nga ai dinggrin tsaw ra myit hta nang awng sharawng nga ndai.

ZEHPANI 3:20

Aten gaw du wa nga sai! Ngai gaw bra ayai hkawm nga ai amyu masha ni hpe dum nta de woi wa na nngai; Ngai gaw nanhte hpe mungkan ting hta kajai gumhkawng ai amyu shatai na mawe ai nanhte hpe kalang mi bai ngamu ngamai shangun na we ai.” Dai Madu nan tsun nu ai.