MARKU 8:31 - Jinghpaw Common Language Bible 2009

³¹ Dai shaloi Yesu gaw, “Dai masha Kasha gaw nni nkri law law wa hkrum nna, agyi salang ni, hkinjawng agyi ni hte tara sara ni e nyet kau ai hkrum na ra ai. Shi hpe sat kau na mara ai, rai ti mung masum ya nhtoi a hpang e shi bai hkrung rawt wa na ra ai,” ngu nna shi a sape ni hpe sharin achyin ya hpang mu ai.

Jinghpaw Hanson Version Bible

³¹ Dai shaloi e, Dai Masha Kasha gaw nni nkri law law wa hkrum nna, agyi salang ni, hkinjawng agyi ni hte laika ka ai sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa lu na lam, shi shanhte hpe sharin achyin hpang mu ai.

MARKU 8:31 ပူးပေါင်းရင်းမြစ်များ

SHAKAWN KUNGDAWN 118:22

Nta gaw ai ni lata kau sai nlung gaw, yawng hta grau ahkyak htum ai ningjut nlung tai wa ai.

ESAIA 53:3

Anhte shi hpe n kaw n law di ga ai, shi hpe ningdang kau ga ai; shi gaw nni nkri hte nchyi nmu hpe hkam sha nga ai. Kadai mung shi hpe pyi n yu mada nga ai- anhte gaw shi hpe hpa n re ai wa hpe zawn nawn kau ga ai.

HOSEA 6:2

Lahkawng masum ya rai jang, shi anhte hpe shaprawn la na ra ai, anhte gaw shi a man e nga lu na ga ai.

YONA 1:17

Dai Madu hkang da ai ga hte maren, nga kaba langai gaw Yona hpe mayu kau ai rai nna shi gaw nga kan kata hta masum ya masum na rawng nga ai.

MAHTE 12:40

Yona gaw shani masum ya hte shana masum na du hkra, dai nga kaba a kan kata e rawng nga ai hte maren, dai Masha Kasha mung, shani masum ya hte shana masum na du hkra ga a sung ai kata e rawng nga na ra ai.

MAHTE 21:42

Yesu shanhte hpe tsun mu ai gaw, “Wahpang galaw ai ni akyu n rawng ai ngu nna lata kau ai nlung gaw, ningjut jahtum na ahkyak dik ai nlung tai wa sai. Dai gaw, Madu a majaw byin wa sai rai nna, anhte a man e mauhpa amu nan rai nga ai, nga ai ga hpe, nanhte dai laika hta lang mi pyi n hti yu myit ni?

MAHTE 27:63

“Madu e, ndai masu hkalem ai wa naw hkrung nga yang, masum ya nhtoi hta e ngai bai hkrung rawt wa na nngai, nga nna shi tsun ai hpe anhte dum sagaw ai.

MARKU 12:10

‘Wahpang gaw ai ni akyu n rawng sai ngu nna lata kau ai nlung gaw, yawng hta ahkyak dik ai njut jahtum na nlung tai wa sai.

LUKA 17:25

Rai ti mung, dai garai n byin yang, shawng nnan shi gaw nni nkri law law hte, ndai prat na masha ni e nyet ndang kau ai naw hkrum na rai nga ai.

LUKA 24:26

Meshia gaw shi a hpung shingkang hta garai n shang ningngai yang, shing re ai nni nkri hpe hkam ra ai n rai ni?,” ngu nna tsun mu ai.

LUKA 24:44

Shaloi Yesu gaw, “Mawshe a Tara hta mung, myihtoi ni a laika ni hta mung, nye a lam hte seng nna ka da nga ai lam ni yawng mayawng, dik wa lu na ra ai, ngu nna nanhte hte rau nga nga yang, ngai nanhte hpe tsun ni ai,” ngu nna shanhte hpe tsun mu ai.

YAWHAN 12:48

Ngai hpe n hkap la ai hte nye a ga n hta la ai wa hpe jeyang na wa kaga mi nga ai; ngai tsun ai mungga e nan hpang jahtum na nhtoi hta dai wa hpe jeyang na ru ai.

YAWHAN 2:19

Yesu gaw, “Ndai Nawku Htingnu hpe hpya kau u, masum ya laman e, ngai dai hpe bai sharawt na we ai,” ngu nna shanhte hpe htan mu ai.

KASA 7:35

Mawshe gaw, Israela masha ni e n hkap la ai ndang kau hkrum ai wa rai nga ai. Shanhte gaw, “Nang hpe anhte a ntsa e du hte tara gyi tai na kadai san da a ta?,” nga nna san ma ai. Dai wa nan dai singwum hkru ai shara e dan pru ai lamu kasa a karum ai hte amyu masha ni hpe up hkang ai hte shalawt dat na matu Karai Kasang dat dat ai wa rai nga ai.

1 KORINHTU 15:4

lup makoi ai shi hkrum nhtawm, Chyum Laika ni tsun ai hte maren, masum ya nhtoi hta e bai hkrung rawt wa sai lam;

1 SAMUELA 10:19

Nanhte a ru yak tsin-yam tsindam hte mayak manghkang lam yawng hta na nanhte hpe hkye mawai shaw la ai wa mung, nanhte a Karai Kasang ngai nan rai nga nngai; rai ti mung dai ni nanhte ngai hpe ningdang kau nhtawm hkawhkam jaw ya mi, nga nna ngai kaw san myit dai. Rai sa, dai gaw grai kaja nga ai, dai rai nna dai Madu a man e amyu bawsang hte bawsang, lakung lama hte lakung lama rai nanhte nan hpawng nga mu,’” ngu nna tsun wu ai.

1 SAMUELA 8:7

dai Madu gaw, “Amyu masha ni nang hpe tsun ai lam magup hpe madat u, shanhte nang hpe kau ai n rai; shanhte a hkawhkam n tai na hku shanhte kau ai gaw ngai mahtang she rai nga nngai.