MARKU 4:31 - Jinghpaw Common Language Bible 2009

³¹ Dai gaw ndai hte bung nga ai. Mungkan hta kaji htum ai nli tum rai nga ai chyinghkrang tum langai mi hpe masha langai mi e la nna ga hta gat dat wu ai.

Jinghpaw Hanson Version Bible

³¹ Dai gaw chyinghkrang tum zawn rai nga ai; ga ntsa e gat dat jang ga ntsa na tum amyu mahkra hta kaji htum dam timung,

MARKU 4:31 ပူးပေါင်းရင်းမြစ်များ

ESAIA 53:12

Dai rai nna, ngai gaw shi hpe galu kaba nna daru magam n-gun rawng ai ni a lapran e arawng sadang shara langai jaw na we ai. Shi gaw sharawng awng ai myit hte shi a asak jaw nna n hkru ai masha ni a hpang jahtum na lam hpe mung garan ya nga ai. Shi gaw yubak kap ai masha law law ni a yubak hpe gun kau ya nna shanhte mara raw dat ai hkrum mu ga, akyu hpyi ya nga sai,” ngu nna tsun ai.

ESAIA 53:2

Dai gaw dai Madu a myit ra ai hku galaw nga sai shi a shangun ma rai nna shi gaw hkun hkraw ai lamu ga hta ru ru ai hkai bawng zawn tu nga ai. Shi hta sari sadang n nga, tsawm htap ai mung n nga, shi hpe yu matsing na zawn re ai nsam n nga nga ai. Shi hpe yu tsaw ra na zawn re ai myi man ningchya hpa mung n nga nga ai, anhte a myit hpe gang la lu ai yu ra shingni shi hta hpa mung n nga nga ai.

ESAIA 60:22

Kaji htum ai hte grit htum ai na a dinghku pyi Galu kaba nna daru magam n-gun rawng ai amyu baw tai wa na mara ai. Dai aten du ai shaloi, Ngai gaw ndai lam hpe lawan shabyin dat na nngai. Ngai gaw dai Madu rai nga nngai!”

ESAIA 9:7

Shi a hkawseng daru magam n-gun gaw matut nna galu kaba wa na ra ai; shi a mungdan tut nawng ngwi pyaw sim sa na ra ai. Shi gaw Hkawhkam Dawi a hkringhtawng dagraw ai wa zawn up hkang nna, shi a daru magam n-gun gaw ding man ai hte teng man rap ra ai hta rudi nga ai rai nna, ya kaw nna jahtum ai aten du hkra agrin nga na ra ai. Chyahtum Chyalai N-gun rawng ai dai Madu gaw ndai amu yawng galaw na matu daw dan da nga sai.

ZEHKARIA 12:8

Dai aten hta dai Madu gaw Yerusalem hta shanu nga ai ni hpe makawp maga ya na ra ai rai nna, shanhte hta na n-gun kya htum ai wa pyi Dawi zawn n-gun ja ai wa tai wa na ra ai. Dawi a amyu matu ni gaw dai Madu a lamu kasa zawn, rai sa Karai Kasang shi hkum nan zawn shanhte hpe lam woi na mara ai.

ZEHKARIA 2:11

Dai aten e, masha amyu baw law law ni dai Madu hpang de sa wa nna, shi a amyu masha ni tai wa na mara ai. Shi gaw nanhte a ka-ang hta shanu nga nna, nanhte hpang de ngai hpe shi shangun dat ai hpe nanhte chye lu na marin dai.

MALAHKI 1:11

Mungkan a jahtum shara mi kaw nna kaga shara mi de du hkra nga ai masha ni ngai hpe shagrau sha-a ma ai. Shanhte gaw ngai hpe manam pyaw ai baw hpe shara shagu hkan nat ai hte hkam la mai ai shagu hkungga ni nawng ya ma ai. Shanhte yawng gaw ngai hpe shagrau sha-a nga ma hka!

MARKU 4:30

“Karai Kasang a Mungdan gaw hpa hte bung ai ngu nna anhte tsun na rai ta? Dai hpe shaleng dan na matu hpa ga shadawn lang na rai ta?

MARKU 4:32

Gade n na ai hpang, dai gaw tu kaba wa nna shat mai hpun amyu ni mahkra hta grau kaba wa ai. Dai gaw lakung lakying kaba ni gungdam pru wa nna, ntsa malen u ni sa nhtawm de a shingnip hta e shanhte a tsip ni hpe tsip da ma ai,” ngu nna tsun mu ai.

LUKA 17:6

Madu gaw, “Nanhte hta kam sham ai myit chyinghkrang tum langai daram rawng myit yang gaw, ndai labri hpun hpe, hpun e, aru hte nawng baw nna panglai e sa tu nga u law!,” ngu yang nanhte a ga madat na ra ai.

KASA 19:20

Shing rai Karai Kasang a hpung shingkang hte dai Madu a mungga gaw chyam bra wa nna n-gun atsam rawng galu kaba maden jat wa nga ai.

KASA 2:41

Shanhte hta law law wa shi a ga hpe kam sham hkap la nna hkalup hkam la shajang nhtawm dai shani e masha hkying masum dang jat bang wa ma ai.

KASA 21:20

Shing nga tsun dan ai hpe na jang shanhte yawng Karai Kasang hpe shagrau sha-a ma ai. Dai hpang shanhte gaw Pawlu hpe, “Hpu wa e Yuda masha ni hta na kam sham ai ni gade hkying mun law nga ma ai lam, shanhte yawng dai jep ai Tara hta myit jung ai hkrai rai nga ma ai lam nang chye nga ndai.

KASA 4:4

Rai ti mung, mungga na la ai ni law law wa kam sham ma ai rai nna, kam sham ai la sha yawng hkying manga daram jat wa ai.

KASA 5:14

Rai ti mung, Karai Kasang hpe hkap la kam sham ai numsha, lasha hpung kaba grau grau nna dai hpung hta jat bang wa ma ai.

SHINGRAN 11:15

Dai hpang sanit ngu na lamu kasa gaw shi a pahtau dum dat wu ai. Shaloi sumsing lamu hta e nsen kaba ngoi pru wa ai gaw, “Mungkan ga na mungdan hpe up na ahkang aya gaw, anhte a Madu Meshia a lata de rai nga sai rai nna, shi gaw htani htana prat dingsa e a up nga na sai law!,” nga nna tsun nga ai.