MAHTE 6:2 - Jinghpaw Common Language Bible 2009

² “Dai rai nna ra kadawn nga ai masha langai mi hpe lama ma alu jaw n-yang gaw, masha ni zawn, tara jawng ni hte lam hkan e tinang hkum dan dawng hkra pahtau hkum dum myit. Ngai nanhte hpe teng teng tsun made ga, shanhte gaw tinang a shabrai yawng lu la manu ai,

Jinghpaw Hanson Version Bible

² Nang alu jaw n-yang gaw, masha ni a shakawn ai ga lu la lu u ga, tara jawng ni hta, lam hkan e mung, sawt ai masha ni galaw ai zawn, na a man e pahtau hkum dum shangun u: nanhte hpe ngai teng teng tsun made ai gaw, shanhte gaw, tinang a shabrai lu la manu ai.

MAHTE 6:2 ပူးပေါင်းရင်းမြစ်များ

SHAKAWN KUNGDAWN 112:9

Shi gaw ra kadawn nga ai wa hpe nhpaw n-ya jaw ya nna, shi a matsan dum ai lam galoi mung yawm mat ai n rai; Shi gaw daru magam n-gun jat wa ai hte hkungga lara ai hkrum na ra ai.

SHAKAWN KUNGDAWN 37:21

Tara n lang ai masha wa gaw arai shap la ti mung, galoi mung nhtang ya nga ai n rai; rai ti mung, mai kaja ai wa gaw shi a kumhpaw kumhpa ni hpe ndaw nhta jaw ya nga ai.

GA SHAGAWP 19:17

Matsan mayan wa hpe nang jaw ai gaw dai Madu hpe hkoi ya ai hte bung nga ai rai nna; dai Madu gaw nang hpe bai htang jaw na ra ai.

GA SHAGAWP 20:6

Masha hkum shagu hte gaw, shi gade sadi dung ai hte kangka nga ai hpe tsun shana nga ma ai; teng teng dai zawn re ai wa hpe kadai mu tam lu nga a hka!

HPAJI NINGLI 11:2

Na a arang ni hpe shara shagu, shara law law hkan arang bang u; hpa majaw nga yang, ndai mungkan ga hta n kaja ai baw amu hpa byin na hpe nang galoi mung n chye lu nga ndai.

ESAIA 10:6

Ngai gaw ngai hpe masin shapawt ai amyu masha, karai kata ai amyu baw hpe gasat na matu Asuri hpe shangun dat nngai. Ngai gaw shanhte hpe lanep hta, arai lagu na hte lam nmaw na ga nhpu hpe zawn amyu masha ni hpe kabye anut kau na matu dat dat nngai,” ngu nna tsun wu ai.

ESAIA 58:7

Na a lusha hpe kawsi kyet ai wa hpe karan ya u, dum nta n lu ai matsan mayan masha ni shang wa lu mu ga, na a nta ni hpe hpaw tawn u. Bu hpun na hpa mung n lu ai ni hpe hpun palawng jaw u, na a makyin jinghku ni hpe karum na hkum ningdang et.

ESAIA 9:17

Dai rai nna Amyu masha ni yawng gaw karai kata ai hte n hkru nna shanhte tsun ai lam magup n hkru nga ai majaw Madu gaw shabrang langai mi hpe pyi shalawt dat na wu ai n rai; shi gaw gaida gaina ni hte jahkrai nmai ni kadai hpe mung matsan dum ai myit madun dan na wu ai n rai. Dai rai tim pyi, dai Madu a masin kahtet ai gaw kawp mat na n rai, rai ti mung shi a lata gaw ari jaw na matu naw ladawn da nga na ra ai.

HOSEA 8:1

Dai Madu gaw ning nga tsun ai: “Pahtau dum dat mu! Gumlau hpyen ni gaw nye a mungdan de galang ni zawn htim yu wa ma hka! Nye a amyu masha ni gaw shanhte hte ngai tawn da ai ga shaka hpe jahten kau nhtawm nye a sharin shaga ai ga hpe gumlau kau manu ai.

MAHTE 15:7

Sawt ai ni e! Nanhte hte seng nna Karai Kasang gaw Esaia a n-gup hku nna,

MAHTE 16:3

Bai, jahpawt manap jau e lamu hkyeng nna sin nga ai rai yang, ‘Lamu marang wa na ra ai, nga nna nanhte tsun ga myit dai.” Shing rai, lamu a man hpe yu nna lamu marang a lam hpe nanhte chye tau tsun lu myit dai, rai ti mung ndai prat na aten a kumla ni hpe n chye htai ginhka la myit dai.

MAHTE 22:18

Yesu mahtang, shanhte a n hkru n kaja ai hku maw mawn ai lam hpe chye ya mu ai majaw, “Sawt ai ni e nanhte ngai hpe hpa rai chyam yu nga myit ta?

MAHTE 23:5

Shanhte galaw ai amu bungli mahkra hpe, masha ni mu lu mu ga, nga nna galaw ma ai. Shanhte a lahtan ni hte lata lahpum ni hta chyum ga ka shakap tawn ai lakhpoi pa kaba kaba galaw la nna hkawn shakap tawn nga ma ai hpe yu mu! Shanhte a palawng kaba ni hta banbyau ni hpe mung galu lu di nna myin jahkram chywi hpun ma ai.

MAHTE 23:6

Poi hkan na grau reng ai dung shara ni hte tara jawng ni hta grau reng ai tingnyang ni hta dung mayu ma ai.

MAHTE 24:51

shi a madu gaw shi hpe azat aza di kau nhtawm, sawt ai ni hkam la ga ai ari shi hpe mung garan hkam la shangun na ra ai rai nna, dai yang e shi gaw hkrap ngu hkrap ngoi ai hte wa udik urin ai rai na ra ai.

MAHTE 5:18

Nanhte hpe ngai teng teng tsun made ga, lamu hte aga she anga nga dingsa gaw, dai jep ai tara hta na ga kanu langai mi hte kaji dik ai ga madin langai mi pyi n dik n tup ai sha lai mat wa lu na n rai.

MAHTE 6:16

“Nanhte lusha gam myit yang, sawt ai masha ni zawn yawn kanyung ai myi man nsam hkum shapraw myit. Shanhte gaw tinang lusha gam nga ai lam shadan dan mayu nna, shanhte a myi man hpe jasum ma ai. Nanhte hpe ngai teng teng tsun made ga, shanhte tinang a shabrai yawng lu la manu ai.

MAHTE 6:3

Nang mahtang alu jaw n-yang gaw, na a hkra lata galaw ai amu hpe na a pai lata n chye lu u ga;

MAHTE 6:5

Nanhte akyu hpyi myit yang, sawt ai masha ni zawn hkum rai myit! Shanhte gaw masha shagu shanhte hpe mu lu mu ga, tara jawng ni hta, mare lam mashe ni hta tsap nga nna akyu hpyi nga na tsaw nga ma ai. Nanhte hpe ngai teng teng tsun made ai gaw, shanhte tinang a shabrai lu la manu ai.

MAHTE 7:5

Sawt ai wa e, na a myi hta na hpun tawng hpe shawng lai kau u; dai hpang na a nhpu nnau wa a myi hta na nbun hpe lai kau ya na matu, nang asan sha mu lu na rin dai.

MARKU 12:39

Tara jawng ni hta grau reng ai tingnyang ni hpe mung, poi hkan e kaja dik ai shara ni hpe mung ra nga ma ai.

MARKU 7:6

Yesu gaw, “Nanhte a lam, Esaia myihtoi htoi da ai ga gaw kaja wa teng nga a hka! Nanhte gaw sawt ai masha ni rai nga myit dai. Dai majaw shi gaw: ‘Ndai amyu ni gaw, tinang a nten hte ngai hpe hkungga lara ma ti mung, shanhte a myit masin gaw kaja wa ngai hte tsan gang nga malu ai.

LUKA 11:41

Rai ti mung, nanhte a gawm hte ban ni hta rawng ai arai ni hpe matsan mayan ni e jaw kau mu, shing rai galaw yang, nanhte a matu nga manga san pra wa na malit dai.

LUKA 11:43

“Hparishe ni e, nanhte dingnye lu myit dai! Tara jawng ni hta grau reng ai, san da ai dung shara ni hpe mung, gat hkan e hkungga ai hte shachyen shaga hkam na hpe nanhte ra sharawng la myit dai.

LUKA 12:33

Nanhte lu ai arai ni yawng dut kau nna lu ai gumhpraw, matsan mayan ni hpe karan jaw mu, tinang a matu dingsa n chye ai gumhpraw jan galaw nna, lagut n du, manut e mung n jahten kau lu ai, sumsing lamu e n htum n wai chye ai sutgan kyem da nga mu.

LUKA 12:56

Sawt ai masha ni e, lamu hte ga man a lam yu nna du hkra ladaw hpe chye tak maram ginhka lu myit dai, dai re ai mi, ndai prat na lachyum hpe hpa rai n chye na lu myit ta?

LUKA 13:15

Shaloi, dai Madu gaw shi hpe, “Sawt ai masha ni nanhte hta na kadai mung, Bansa Nhtoi e tinang a dumsu, lawze ni hpe ntsin shayaw na matu wulawng kaw na raw dat nna woi sa ga myit dai.

LUKA 20:46

Tara Sara ni hpe sadi nga mu, shanhte palawng galu bu hpun let hkawm sa mayu nna, gat hkan hkungga let shachyen shaga la na hpe ra ma ai hte tara jawng hkan na reng grau ai dung shara ni hte lusha poi hta kaja htum ai shara ni hta dung na sharawng ai hta n ga,

LUKA 6:24

“Rai ti mung, sut su ai ni nanhte gaw hkrithpa dingnye lu myit dai: hpa majaw nga yang nanhte gaw ndai prat hta grai pyaw ai hku nga lu manit dai!

LUKA 6:42

Tinang a myi hta rawng ai hpuntawng hpe n mu lu ai wa mi, ‘Hpu nau wa e, na a myi hta rawng ai nbun hpe ngai naw lai kau ya de ga!,’ nga nna hpu nau wa hpe kaning rai tsun lu n ta? Sawt ai wa e! Na a myi hta na hpuntawng hpe shawng la kau u; dai hpang na nhpu nnau wa a myi hta rawng ai nbun hpe lai kau ya na matu nang asan sha mu na rin dai.

YAWHAN 13:29

Yuda gaw gumhpraw jan jum ai wa rai nga ai majaw, Yesu gaw shi hpe, poi a matu ra ai arai ni sa mari u, nga sam ai nga nna mung, matsan mayan ni hpe lama ma sa jaw u, nga sam ai ngu nna mung, shanhte hta na nkau mi myit ma ai.

YAWHAN 5:41

Ngai gaw masha e shakawn shagrau ai hkam la na lam tam nga nngai n rai.

YAWHAN 5:44

Nanhte gaw shada da shakawn shagrau nna arawng sadang jaw ai hpe hkam la mayu myit dai, rai ti mung langai sha rai nga ai Karai Kasang e jaw ai shakawn shagrau ai hpe hkam la na matu gaw nanhte n shakut myit dai, dai re ai mi nanhte gaw ngai hpe kaning rai kam sham lu na myit ta?

YAWHAN 7:18

Tinang myit hte tsun ai wa gaw, tinang a arawng sadang tam ai wa rai nga ai. Rai ti mung shi hpe shangun dat ai wa a arawng sadang hpe tam ai wa chyawm gaw, teng man nga ai rai nna, shi hta n ding n man ai n rawng lu ai.

KASA 10:2

Shi gaw tara hkungga ai wa rai nna shi hte shi a nta dinghku masha ni yawng Karai Kasang hpe hkrit hkungga nawku daw jau ma ai. Shi gaw matsan mayan re ai Yuda masha ni hpe mung alu law law jaw ai hte karum madi shadaw let Karai Kasang kaw tut tut akyu hpyi nga ai.

KASA 10:31

‘Korneli e, na a akyu hpyi ai ga Karai Kasang na ya sai, na a alu jaw ai lam hpe mung Karai Kasang matsing da nu ai.

KASA 10:4

Shi gaw hkrit let dai lamu kasa hpe azi yu nna, “Madu e hpa lam rai ta?,” ngu nna san wu ai. Shaloi lamu kasa gaw, “Na a akyu hpyi ai hte alu jaw ai lam hpe Karai Kasang sharawng awng ya nga ai rai nna nang hpe htan ya na jin nga chyalu rai nga ai.

KASA 11:29

Sape ni gaw, Yuda mung na kahpu kanau ni hpang de langai hte langai rai lu ai made karum dat na nga, myit daw dan da ma ai.

KASA 24:17

“Shing rai Yerusalem mare kaw na pru mat wa ai tsawmra ning lai ai hpang, nye a amyu masha ni a matu alu gumhpraw la wa ya na matu dai mare de ngai wa nngai.

KASA 9:36

Ya, Yopa mare hta Tabihta mying ai kam sham ai; numsha langai mi nga ai. (Shi a mying hpe Grik ga hku Dorka ngu ai rai nna de a lachyum “Chyahkyi” ngu ai re.) Shi gaw shi a aten hpe kaja ai amu bungli galaw nna matsan mayan ni hpe karum madi shadaw alu jaw ai lam hta jai lang nga ai.

ROMA 12:8

shadum shahprang n-gun jaw chye ai chyeju kumhpa rai yang gaw shadum shahprang n-gun jaw ga. Masha hpe karan kachyan alu jaw chye ai atsam rai yang gaw n daw n hta jaw u ga, up hkang na ahkang aya chyeju kumhpa lu ai wa gaw shakut shaja let kasang kalang up hkang nga u ga, matsam dum chye ai wa gaw kabu gara ai myit hte galaw u ga.

1 KORINHTU 13:3

Ngai lu ai nye a arai yawng hte hpe ngai gam kau nna nye a hkum hpe nat kau na matu ap kau rai ti mung, tsaw ra ai myit n rawng yang gaw, ngai hta hpa akyu nga na n rai.

GALATI 2:10

Shanhte gaw anhte hpe matsan mayan ni a ra ai lam hta karum la na matu n malap na hpe sha htet dat mi ai hte ndai lam gaw ngai grai shakut gun hpai mayu ai amu nan rai nga ai.

EHPESU 4:28

Lagu ga ai wa gaw, lagu lagut amu tawn kau nna bai hkum lagu u ga, ra kadawn nga ai ni hpe karum la lu hkra tinang a matu teng man ai kan bau ai asak hkrung lam lu la hkra amu galaw hpang u ga.

1 HTESALONI 2:6

Anhte gaw nanhte kaw na mung, kaga ni kaw na mung, masha kadai kaw na mung shakawn shagrau ai lu la hkra shakut ga ai n rai.

1 TIMOHTI 6:18

Mai kaja ai galaw na matu mung, mai kaja ai bungli ni hta sut su na matu mung, masha kaga ni hpe karan kachyan jaw jahproi ai lam hta mung, n daw n hta jaw ya na matu jin jin rai nga mu ga shanhte hpe sharin shaga nga u.

HPILEMON 1:7

Hpu nau wa e, na a tsaw ra ai myit a majaw ngai grai wa kabu gara ai hte myit n-gun lu la nngai law! Nang gaw Karai Kasang a chyoi pra ai masha ni yawng hte a myit masin hpe shangwi shapyaw ya lu nit dai.

HEBRE 13:16

Mai kaja ai amu galaw na nanhte shada da karum shingtau hkat na lam hpe hkum malap kau myit, hpa majaw nga yang, shing re ai hkungga ni gaw Karai Kasang hpe sharawng awng shangun nga ai.

1 PETRU 4:11

Marai langai ngai hkaw tsun a yang gaw, Karai Kasang a mungga hpe hkaw tsun u ga, marai langai ngai daw jau a yang gaw Karai Kasang jaw da ai n-gun lagaw hte maren galaw daw nga u ga; shing rai yang she galaw ai amu yawng mayawng a majaw Madu Yesu a marang e Karai Kasang a hpung shingkang hpe shakawn kungdawn ai lam tai na rai nga ai. Yesu Hkristu hta hpung shingkang hte daru magam n-gun atsam gaw htani htana prat dingsa e anga nga ai law. Amen.

1 SAMUELA 15:30

Shawlu gaw, “Ngai shut kau ni ai; rai ti mung, nye a amyu masha ni a ningbaw ni hte Israela yawng a man e, ngai hpe dik dik hkungga lara ai lam naw madun dan mi. Dai Madu na a Karai Kasang hpe ngai nawku lu n-ga, ngai hte rau nhtang wa ga,” ngu nna tsun htang wu ai.