MAHTE 26:63 - Jinghpaw Common Language Bible 2009

⁶³ Yesu mahtang atsin sha nga nga ai. Bai Hkinjawng Agyi Kaba wa gaw, “Nang gaw Karai Kasang a Kasha ngu ai Meshia rai nga ndai kun? Anhte hpe tsun dan mi ga, ngu nna ahkrung nga ai Karai Kasang a mying nsang hta ya ngai nang hpe dagam da de ai,” ngu nna shi hpe tsun wu ai.

Jinghpaw Hanson Version Bible

⁶³ Yesu mahtang atsin sha nga nga ai. Bai, hkinjawng agyi wa gaw, “Karai Kasang a Kasha, ngu ai Hkristu gaw, nang rai nga ndai kun, anhte hpe tsun dan n ga, ngu nna ahkrung nga ai Karai Kasang hta ngai nang hpe dagam da de ai,” ngu nna shi hpe tsun wu ai.

MAHTE 26:63 ပူးပေါင်းရင်းမြစ်များ

1 HKAWHKAM 22:16

Rai ti mung Ahab gaw, “Dai Madu a mying ningsang hte nang ngai hpe ga shaga ndai shaloi teng man ai ga hpe tsun u! Dai lam ngai nang hpe gade lang tsun shadum ra na rai ta?,” ngu nna tsun htang wu ai.

2 HKAWHKAM LABAU 18:15

Rai ti mung Ahab gaw, “Dai Madu a mying ningsang hta nang ngai hpe ga shaga ndai shaloi teng man ai ga hpe tsun u! Dai lam ngai nang hpe kade lang tsun shadum ra na rai ta?,” ngu nna tsun htang wu ai.

SHAKAWN KUNGDAWN 42:2

Ahkrung nga ai Karai Kasang e, ngai nang hpe shagroi gara nga nngai; ngai gaw na a man e, galoi wa mi she, sa wa lu nna, nawku daw jau lu na rai nga a ta?

GA SHAGAWP 29:24

Lagut wa a manang tai ai wa gaw tinang hkum a n kaja dik ai hpyen rai nga ai. Tara rung e, teng man ai sakse ga tsun yang, ari jaw ai hkrum na rai nna, n teng ai hku tsun yang mung, Karai Kasang dagam ai hkrum na ra ai.

ESAIA 53:7

“Shi adip arip hkrum nga ai, rai ti mung dai hpe shagrit shanem ai hte hkam sharang nga ai; shi gaw ga hkum mi pyi galoi mung shaga ai n rai. Sat na matu hkyen ai sagu kasha langai zawn, mun rep hkyen nga ai sagu langai zawn, shi gaw ga hkum mi pyi galoi mung shaga ai n rai.

Daniela 3:16

Shadrak, Meshak hte Abednego ni gaw, “Madu hkawhkam wa e, anhte chyawm gaw anhte a matu makawp maga la mayu nga ga ai n rai.

JAW JAU 5:1

Htingrai htingrat hkungga galaw ra ai amu ni gaw lawu de na hte maren rai nga ai. Masha langai ngai tara rung e sakse sa hkam na matu tara shang shaga da hkrum nna shi mu ai hte na a amu lama ma a lam hpe shiga n jaw ai rai yang, de a mara shi hkam sha lu na rai nga ai.

MAHTE 16:16

Simun Petru gaw htan nna, “Nang gaw Meshia ngu ai ahkrung nga ai Karai Kasang a Kasha rai nga ndai,” ngu wu ai.

MAHTE 26:62

Shaloi Hkinjawng Agyi Kaba wa gaw rawt nna Yesu hpe, “Ndai nang hpe mara shagun nga ai lam hte seng nna nang hta hpa ga htan na n nga sani?,” ngu nna tsun wu ai.

MAHTE 27:12

Rai ti mung Hkinjawng agyi ni hte salang ni shi hpe mara shagun ai lam ni hpe shi hpa mung n htan ya mu ai.

MAHTE 27:14

Rai ti mung Yesu gaw ga hkaw mi mung n htan wu ai. Shing re ai a majaw munggyi gaw ja ja wa mau mat nga ai.

MAHTE 27:40

Nawku Htingnu hpe run kau nna, masum ya laman bai gaw gap da na nga ai wa e, na hkum hpe nang hkye la u, nang Karai Kasang a Kasha rai n yang gaw, wudang hta na yu hkrat wa u!,” ngu mu ai.

MAHTE 27:43

Shi gaw Karai Kasang hpe kam hpa nna, ‘Ngai gaw Karai Kasang a Kasha rai nngai!,’ nga nna shi tsun ai. Rai sa, dai rai yang gaw ya Karai Kasang shi hpe hkye la mayu nga ai kun? Anhte yu yu ga!,” nga ma ai.

MAHTE 27:54

Ya hpyen la dap kung langai mi up ai du wa hte shi hte rau Yesu hpe sin nga ai hpyen la ni gaw nnang nawn hte byin mabyin ni hpe mu mu yang, shanhte hkrit kahpra nna, “Kaja wa ndai wa gaw Karai Kasang a Kasha nan rai nga ai,” nga ma ai.

MAHTE 4:3

Shaloi, dai gunglau ai Nat shi kaw du nna, “Nang Karai Kasang a Kasha rai n-yang gaw, ndai nlung ni hpe muk tai mu ga, tsun u!,” ngu wu ai.

MARKU 14:61

Rai ti mung Yesu gaw atsin sha nga nna ga hkaw mi mung n htan wu ai. Bai Hkinjawng Agyi Kaba wa gaw, “A lu ai Karai Kasang a Kasha, Meshia nang rai nga n ni?,” ngu nna shi hpe san wu ai.

YAWHAN 1:34

ngu tsun ai hte maren byin wa sai hpe ngai mu se ai,” nga ai. Matut nna Yawhan gaw, “Bai ngai nanhte hpe tsun made ga, ndai wa gaw Karai Kasang a Kasha rai nga ai,” nga tsun ai.

YAWHAN 1:49

Nahtanela gaw, “Sara e, nang gaw Karai Kasang a Kasha rai nga ndai,” ngu nna shi hpe htan wu ai.

YAWHAN 10:24

Dai shaloi Yuda masha ni gaw shi kaw sa shinggrup nna, Nang galoi du hkra anhte hpe kam shut shangun nga na n ta? “Nang kaja wa Meshia rai n yang gaw, anhte hpe teng ai lam leng leng tsun dan mi,” ngu ma ai.

YAWHAN 10:30

Ngai hte nye Wa gaw langai sha rai nga ai,” ngu tsun wu ai.

YAWHAN 10:36

Ngai chyawm gaw, nye Wa ngai hpe lata la nna ndai mungkan de shangun dat ni ai. Dai rai yang, Ngai gaw Karai Kasang a Kasha rai nngai,’ nga nna tsun ai shaloi, ngai gaw Karai Kasang hpe shatan nhkan ai wa re, ngu nna nanhte gara hku tsun lu myit ta?

YAWHAN 18:37

Dai re ai majaw Pilat gaw, “Rai taw, nang hkawhkam langai mi rai nga n ni?,” ngu nna san wu ai. Yesu gaw, “Ngai hkawhkam langai mi re ai nga nna nang tsun nga ndai. Ngai gaw dai teng man ai lam hkaw tsun na yaw shada ai lam langai mi a matu ngai shangai chyinghkai wa ni ai hte mungkan ga de du sa ring ngai. Dai teng man ai hte seng ai ni nlang hte gaw, nye a ga nsen madat ma ai,” ngu nna htan wu ai.

YAWHAN 19:7

Shaloi Yuda masha ni gaw, “Dai wa gaw shi hkum hpe Karai Kasang a Kasha rai nngai nga nna hpyi hpun ai ga tsun ai majaw, si ging ai ngu nna anhte a tara hta tsun da nga ai,” ngu nna shi hpe htan mu ai.

YAWHAN 19:9

Dai rai nna htingnu nhku de bai shang nhtawm, Yesu hpe, “Nang kanang na sa wa n ta?,” ngu nna san wu ai. Rai ti mung Yesu gaw ga hkaw mi mung n htan wu ai.

YAWHAN 20:31

Rai ti mung, Yesu gaw Karai Kasang a Kasha ngu ai Meshia rai nga ai hpe, nanhte kam sham lu nna, shi hpe kam sham ai a marang e asak hkrung ai lu la myit ga, ngu nna ndai hte wa ka tawn da nga ai.

YAWHAN 6:69

Nang gaw Karai Kasang kaw na du sa ai chyoi pra ai Wa rai nga ndai hpe anhte kam sham ai hte chye lu saga ai,” ngu nna shi hpe htan wu ai.

YAWHAN 8:25

Shanhte gaw, “Nang kadai rai nga n ta?,” ngu nna shi hpe san mu ai. Yesu gaw, “Ngai kadai wa re ai gaw shawng shawng kaw nna ngai nanhte hpe tsun mase ai.

2 KORINHTU 1:19

Hpa majaw nga yang, nanhte hpe ngai hte Sila yan Timohti hkaw dan sai Karai Kasang a kasha Hkristu Yesu gaw, “Re ai hte n re ai,” kayau kaya re ai wa n rai. Kaja wa nga yang shi gaw Karai Kasang a myit ra ai lam hpe, “Re ai,” ngu nna tsun ai Madu rai nga ai.

1 PETRU 2:23

Shi roi asawng hkrum ai shaloi, shi bai roi asawng htang ai n rai; shi nni nkri hkam ai shaloi shi jahkrit sharim ai lam n galaw ai sha teng man ai tara agyi Karai Kasang a lata hta shi a myit mada ai lam ni ap da nu ai.

1 SAMUELA 14:24

“Nye a gumlau hpyen ni hpe ngai matai garai n htang lu yang, dai ni na nhtoi hta lusha sha ai wa kadai mung dagam dala hkrum u ga,” ngu nna Shawlu dagam shaka nna hkang da nu ai majaw dai shani e Israela amyu masha ni kawsi hpang gara hkrum nna n-gun kya nga ma ai. Kadai mung dai shani tup hpa mung n lu n sha nga ma ai.

1 SAMUELA 14:26

Shawlu a dagam dala ga hpe shanhte yawng hkrit nga ma ai majaw, hpun ni hta lagat ntsin hpring hkra rawng nga ti mung, dai hpe kadai mung n sha lu ma ai.

1 SAMUELA 14:28

Rai ti mung, masha langai mi gaw, “Anhte yawng kawsi hpang gara hkrum nna n-gun kya nga saga ai, rai ti mung na nwa mahtang anhte hpe, ‘Dai ni na nhtoi hta, lusha sha ai wa kadai mung dagam dala hkrum u ga,’ ngu mi ai,” ngu nna tsun ma ai.