MAHTE 23:23 - Jinghpaw Common Language Bible 2009

²³ “Hpyi hpun ai tara sara ni hte Hparishe ni e, nanhte dingnye lu myit dai! Nanhte gaw shingtawn pan, pan soi, hpakkyi tum, re ai ni hta na, htam shi hta na htam mi, Karai Kasang kaw sak nawng myit ti mung, dai jep ai Tara a kaja wa nan grau ahkyak ai sharin shaga ai lam ni rai nga ai tara rap ra ai, matsan dum ai hte kam sham ai lam hte hpe nanhte n madat n mara hprai kau myit dai. Nanhte gaw htam shi alu jaw ai hpe mung, dai jep ai Tara a sharin shaga ai lam hpe mung, n hprai ai sha hkan shadik na mai nga ai.

Jinghpaw Hanson Version Bible

²³ Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw shingtawn pan, pansoi, hpakgyi tum re ai ni hta na, htamshi hta htammi lahkawn la ninglen, dai jep ai tara hta lawm ai grau akyu rawng ai, dinghpring ai, matsan dum chye ai hte kamsham ai lam hte hpe nanhte lai kau da myit dai: shawng de na hpe mung galaw lu nna, hpang de na hpe mung n lai kau taw gaw, mai nga ai.

MAHTE 23:23 ပူးပေါင်းရင်းမြစ်များ

GA SHAGAWP 21:3

Teng man ai hte rap ra ai amu ni hpe galaw nga u; dai gaw shagu hkungga la sa ya ai hta grau nna Madu hpe ra sharawng shangun nga ai.

ESAIA 28:25

Shanhte gaw ga sau lajang da ngut ai hte pan soi hte shingtawn pan zawn re ai tsi tai ai namlaw namlap hpun hkai ma ai. Shanhte gaw hkaulan mam hte muk-yaw mam ni hpe yan hte yan hkai nna, shanhte a yi shingnawm hkan e kaga manggawng si ni hpe gat hkai da ma ai.

YEREMIA 22:3

“Dai Madu ngai nan teng man ai hte ding hpring ai amu galaw na matu nang hpe hkang da ni ai. Shi hpe maw sha mawp sha nga ai wa kaw nna maw sha mawp sha n hkrum mat hkra dai masha wa hpe makawp maga nga u. Malet nhprang manam ni, chyahkrai nmai ni hte gaida gaina ni hpe lam hkum shadam myit, adip arip mung hkum rai myit; ndai chyoi pra ai shara hta mara n kap ai masha ni hpe hkum sat myit.

HOSEA 6:6

Ngai gaw nanhte a yam nga shagu hkungga ni hpe n rai, nanhte a dinggrin tsaw ra myit hpe ra nngai. Ngai gaw nye a matu wan nat hkungga nawng ya na hta amyu masha ni ngai hpe chye na mahtang ngai grau nna hkam la mayu nga nngai.

JAW JAU 27:30

Nai mam rai ti mung, namsi namsaw rai ti mung dai lamu ga hta na pru ai yawng a htam shi hta na htam mi gaw dai Madu a matu rai nga ai.

MIHKA 6:8

N rai law, dai Madu gaw anhte hpe mai kaja ai amu galaw na matu she hkang da sai. Anhte kaw na shi hpyi ai gaw ndai lam rai nga ai: “Teng man ai amu galaw na lam, dinggrin tsaw ra myit madun dan na lam, anhte a Karai Kasang hte kanawn mazum ai hta myit grit myit nem hte asak hkrung hkawm nga na lam ni hpe sha, shi hpyi nga ai.”

MAHTE 12:7

‘Dusat hkungga jaw ai lam n rai, matsan dum ai lam hpe sha ngai ra nngai,’ nga nna Chyum laika hta ka da ai ga a lachyum hpe nanhte kaja wa chye mu taw gaw, mara n kap ai ni hpe nanhte mara shagun na myit dai n rai.

MAHTE 23:13

“Hpyi hpun ai tara sara ni hte Hparishe ni e, nanhte dingnye lu myit dai! Nanhte gaw masha ni a man e sumsing lamu a chyinghka hpe pat da mu ai. Nanhte nan mung n shang myit dai hte, shang na matu shakut ai ni hpe mung shang na ahkang n jaw myit dai.

MAHTE 9:13

Dai rai nna, ‘Dusat hkungga jaw ai lam n rai, matsan dum ai lam sha ngai tsaw nga nngai,’ nga ai chyum ga a lachyum hpe chye lu myit ga, sa hkan tam sharin la mu; hpa majaw nga yang, ding hpring ai ni hpe shaga na matu n rai, yubak kap ai ni hpe shaga na matu she ngai sa du ring ngai,” ngu mu ai.

LUKA 11:42

“Hparishe ni e, nanhte dingnye lu myit dai! Hpa majaw nga yang, nanhte gaw shingtawn pan, shinglim pan ni hte shatmai lap amyu myu hta na htam shi kaw na htam mi Karai Kasang hpe sak jaw myit dai. Rai ti mung, nanhte gaw tara rap ra ai hte Karai Kasang hpe tsaw ra ai lam hpe gaw hprai kau nga myit dai. Nanhte gaw htam shi hta htam mi alu jaw ai hta n ga, tara rap ra ai hte Karai Kasang hpe tsaw ra ai hta mung hkan sa galaw ang myit dai.

LUKA 18:12

Bat mi hta lahkawng ya lusha gam nngai; ngai lu la ai yawng hta na htam shi hta na htam mi alu jaw nngai,’ nga nna hpyi nga ai.

1 SAMUELA 15:22

Samuela gaw, “Dai Madu gaw hpa hpe mahtang ra sharawng a ni? Madat mara ai hpe kun? Shing n rai wan nat hkungga ni hte shagu hkungga ni hpe kun? Shi hpe kaja htum ai sagu nawng jau ya ai hta shi a ga madat mara na gaw grau nna mai kaja nga ai.