MAHTE 23:13 - Jinghpaw Common Language Bible 2009

¹³ “Hpyi hpun ai tara sara ni hte Hparishe ni e, nanhte dingnye lu myit dai! Nanhte gaw masha ni a man e sumsing lamu a chyinghka hpe pat da mu ai. Nanhte nan mung n shang myit dai hte, shang na matu shakut ai ni hpe mung shang na ahkang n jaw myit dai.

Jinghpaw Hanson Version Bible

¹³ Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw masha ni a man e, sumsing lamu a mungdan lam hpe pat da mu ai: nanhte nan n shang myit dai hte, shang wa ai ni, shang na pyi, n hkraw myit dai.

MAHTE 23:13 ပူးပေါင်းရင်းမြစ်များ

ESAIA 33:14

Yubak kap ai Ziun a amyu masha ni gaw hkrit gari nga ma ai. Shanhte gaw, “Karai Kasang a tara jeyang ai gaw htani htana agrung nga ai wan zawn rai nga ai. Anhte hta na kadai wa dai zawn re ai wan hta asak hkrung lu nga a ta?,” ngu nna tsun ma ai.

ZEHKARIA 11:17

Dai manu n dan ai sagu rem wa gaw dingnye hkrum nga ai! Shi gaw shi a sagu hpung hpe kau da nga ai rai nna, hpyen majan gaw shi a daru magam n-gun hpe tsep kawp jahten kau na ra ai. Shi a lahpum nyui mat nna, shi a hkra maga na myi, kyaw mat na ra ai,” ngu nna tsun wu ai.

MAHTE 23:16

Myi kyaw let lam madun ai ni e, nanhte dingnye lu myit dai! ‘Kadai rai ti mung, Nawku Htingnu mying gang nna dagam yang gaw, dai ga hpe shi n hkan shatup ra ai. Rai ti mung dai Nawku Htingnu na ja hpe lakap nna dagam ai wa gaw, shi a dagam da ai ga n shatup n mai rai na rai nga ai, nga nna nanhte sharin myit dai.

MAHTE 23:23

“Hpyi hpun ai tara sara ni hte Hparishe ni e, nanhte dingnye lu myit dai! Nanhte gaw shingtawn pan, pan soi, hpakkyi tum, re ai ni hta na, htam shi hta na htam mi, Karai Kasang kaw sak nawng myit ti mung, dai jep ai Tara a kaja wa nan grau ahkyak ai sharin shaga ai lam ni rai nga ai tara rap ra ai, matsan dum ai hte kam sham ai lam hte hpe nanhte n madat n mara hprai kau myit dai. Nanhte gaw htam shi alu jaw ai hpe mung, dai jep ai Tara a sharin shaga ai lam hpe mung, n hprai ai sha hkan shadik na mai nga ai.

MAHTE 23:25

“Hpyi hpun ai Tara sara ni hte Hparishe ni e, nanhte dingnye lu myit dai! Nanhte gaw nanhte a gawm hte shat wan re ai ni a shinggan maga hpe jasan jaseng mu ti mung, nanhte a myit kata de gaw kashun kashe hte tinang a akyu tam ai n tara ai hte hpring chyat rai nga malit dai.

MAHTE 23:27

“Hpyi hpun ai tara sara ni hte Hparishe ni e, nanhte dingnye lu myit dai! Nanhte gaw namhtun hpraw chya ai lup hte bung nga myit dai; dai ni gaw shinggan de tsawm dam ti mung, kata de n ra hte mang chyayat ni hte hpring nga ai.

MAHTE 23:29

“Hpyi hpun ai tara sara ni hte Hparishe ni e, nanhte dingnye lu myit dai! Nanhte gaw myihtoi ni a lup ni hpe gaw shatsawm da mu ai hte ding hpring ai ni a lup jarawp ni hpe mawn ya nhtawm,

MAHTE 3:7

Hparishe ni hte Saduke ni law law wa hkalup hkam la na nga nna shi kaw sa wa ma ai hpe Yawhan mu wu yang, shi shanhte hpe, “Pu htum amyu ni e, Karai Kasang kaw na du magang ra ai ari hta na hprawng lawt mat lu myit ga, nanhte hpe kadai tsun shadum da myit ta?,” ngu nna tsun mu ai.

LUKA 11:52

“Tara sara ni nanhte dingnye lu myit dai! Hpaji nta hpaw ai sumsaw gaw nanhte kyem tawn da myit htawm, nanhte nan mung n shang, shang mayu ai ni hpe mung, nanhte hkum shingdang da myit dai, ngu mu ai.”

YAWHAN 9:22

Shi a kanu yan kawa gaw Yuda masha ni hpe hkrit ma ai majaw shing ngu tsun mu ai. Hpa majaw nga yang, Yesu gaw Meshia re, nga nna kam sham yin la ai wa kadai hpe rai ti mung, tara jawng na shapraw kau na nga nna Yuda masha ni myit hkrum da masai.

YAWHAN 9:24

Dai re ai majaw, dai hkritung nna myi n mu ai wa hpe lahkawng lang ngu na bai shaga la nhtawm, “Karai Kasang a man e teng man ai ga tsun na nngai ngu nna ga sadi jaw u, dai wa gaw yubak mara lu ai wa rai nga ai hpe anhte chye ga ai,” ngu nna shi hpe tsun mu ai.

YAWHAN 9:34

Shanhte gaw, “Nang gaw hkritung nna pyi mara kap ai hte kaba wa ai wa rai nga nhtawm me anhte hpe sharin nga n ni?,” ngu nna jawm htan nhtawm, dai wa hpe kanawng shapraw kau mu ai.

KASA 13:8

Rai ti mung (Grik ga hku Eluma) mying ai Lakle sara wa gaw munggyi wa Hkristan makam masham hpe n kam n sham n hkap la hkra Pawlu yan Barnaba hpe ninghkap shingdang ma ai.

KASA 5:28

“Nanhte hpe dai amying hte n sharin shaga na matu anhte aja awa hkang da saga ai. Rai ti mung nanhte hpa galaw manit dai lam yu yu mu! Nanhte gaw nanhte a sharin shaga ai lam hpe Yerusalem mare ting shachyam shabra dat manit dai rai nna, dai wa si ai gaw anhte a majaw re ngu nna nanhte shadu mayu nga myit dai,” ngu nna tsun mu ai.

KASA 5:40

Shanhte gaw kasa ni hpe shaga jashawn la nna kayat nhtawm, Yesu a mying hte n sharin n shaga lu na lam hkang da ngut jang, dat dat mu ai.

KASA 8:1

Shawlu mung dai masha sat ai amu hta awlaw lawm nga ai. Dai shani kaw nna Yerusalem mare na hpung gaw zingri zingrat kaba laja lana hkrum hpang wa sai. Kasa ni hta lai nna kam sham ai ni yawng gaw, Yuda mung, Samari mung, shara magup hkan e bra ayai mat wa ma ai.

2 TIMOHTI 3:8

Yanne yan Yambre gaw Mawshe hpe nhtan shai ninghkap ai hku galaw ma ai hte maren, ndai masha ni mung, dai teng man ai lam hpe ninghkap ningdang ma ai. Dai masha ni gaw shanhte a myit sawn sumru ai lam n nga mat sai rai nna makam masham hta hten za sum hkrum ma ai.

2 TIMOHTI 4:15

Nang nan shi hpe sadi makran nga u; hpa majaw nga yang shi gaw anhte hkaw tsun ai mungga hpe aja awa tsun ninghkap kau ya ai wa rai nga ai.