MAHTE 21:33 - Jinghpaw Common Language Bible 2009

³³ “Ga shadawn kaga langai mi hpe mung naw madat la mu. Kalang mi na sun madu langai mi gaw sabyi sun langai mi hkai sharam da nna, de a grup yin e nhpan kum da ai hte, dai hta e sabyi shup na htung htu da nhtawm, langchyi langai mi mung gap da nu ai. Dai hpang, sun galaw sha ai masha ni hpe shap ya nna kaga mungdan de bu hkawm sa mat wa ai.

Jinghpaw Hanson Version Bible

³³ Ga shadawn kaga hpe naw madat la mu; Nta madu langai mi tsabyi sun hkai sharam da nna, de a grup yin e nhpan kum da ai hte, dai hta e tsabyi htung htu da nna, langchyi gap da nhtawm, sun galaw ai masha hpe shap ya nna, kaga mung de sa nga mat ai.

MAHTE 21:33 ပူးပေါင်းရင်းမြစ်များ

1 HKAWHKAM 22:19

Mihkaia gaw ning ngu nna matut tsun wu ai: “Dai Madu hpa tsun ai ga hpe ya madat u! Dai Madu gaw sumsing lamu na shi a tingnyang hta dung nga nna, shi a lamu kasa ni yawng mung shi a makau e tsap nga ma ai hpe ngai mu nngai.

ESAIA 1:10

Yerusalem e, na a mung du ni hte na a amyu masha ni gaw Sodom hte Gomora masha ni zawn rai ma ai. Dai Madu nang hpe tsun nga ai ga madat u. Anhte a Karai Kasang nang hpe sharin ya nga ai lam hpe madat mara nga u.

YEREMIA 19:3

Dai Madu gaw ngai hpe, “Yuda mung na hkawhkam ni hte Yerusalem masha ni e, Chyahtum Chyalai N-gun Rawng ai dai Madu Israela a Karai Kasang ngai tsun ai ga hpe madat mu. Ngai gaw ndai shara hta dai zawn re ai tsin-yam tsindam hpe shapraw dat na nngai, shaloi dai lam hpe na ai ni langai hte langai gaw hkrit kajawng mat na mara ai.

YEREMIA 2:21

Ngai gaw nang hpe grai kaja htum ai nli tum kaw na sabyi ru hpe hkai da ni ai. Rai ti mung, nang hpa baw tai mat nga nit dai hpe yu yu u! Nang gaw yat mat nna manu n dan ai sabyi ru zawn rai nga ndai.

HOSEA 4:1

Dai Madu gaw ndai mung hta nga nga ai amyu masha ni hpe mara shagun ninghkap na amu rawng nga ai. Israela e, shi tsun ai ga hpe madat mu: “Ndai mungdan hta kangka ai hte tsaw ra myit n nga sai rai nna amyu masha ni mung ngai hpe Karai Kasang zawn n yin la hkraw nga ma ai.

MAHTE 13:18

“Dai rai nna, nli gat ai ga shadawn a lachyum hpe madat la mu.

MAHTE 20:1

“Sumsing lamu a Mungdan gaw, sabyi sun madu langai mi hkrum katut ai mabyin masa hte bung nga ai. Kalang mi na sabyi sun madu langai mi gaw, shi a sabyi sun hta amu galaw na masha saw bang na matu jahpawt jau jau e pru sa wa ai.

MAHTE 21:28

“Ya, nanhte kaning ngu myit da mu ta? Kalang mi na masha langai mi shadang sha lahkawng lu ai. Kasha alat hpang de shi sa nna, ‘Sha e, dai ni sabyi sun de bungli sa galaw su,’ ngu wu ai.

MAHTE 23:2

“Tara sara ni hte Hparishe ni gaw Mawshe a jep ai Tara hpe lachyum htai dan na ahkaw ahkang lu da ai ni rai ma ai.

MARKU 13:34

Dai gaw, tsan ai ga de dum nta kaw na pru hkawm sa wa na masha langai mi, shi a nta hpe shangun ma ni a lata hta ap da nhtawm, shanhte langai hte langai galaw na bungli garan ya ngut jang, chyinghka sin ai wa hpe mung maja nga na matu hkang da ai hte bung nga ai.

LUKA 19:12

Dai majaw shi gaw, “Kalang mi na arawng lu ai masha langai mi nga ai. Shi gaw tsan ai mungdan langai mi de hkawhkam aya sa hkam la na sa wa na maw nga ai, dai hpang shi a nta buga de bai wa na hkyen nga ai.

YAWHAN 15:1

Yesu tsun ai gaw, “Ngai gaw teng man ai sabyi ru rai nga nngai, nye Wa gaw sabyi sun galaw ai wa rai nga ai.

TARA JAHPRANG 16:18

“Dai Madu nanhte a Karai Kasang nanhte hpe jaw ai mare shagu hta tara agyi ni hte kaga du salang ni hpe san tawn na rai myit dai. Dai masha ni gaw amyu masha ni hpe myi man n lata ai sha, tara jeyang na rai ma ai.