MAHTE 17:17 - Jinghpaw Common Language Bible 2009

¹⁷ Yesu htan nna, “Nanhte gaw makam masham n rawng ai hte nhtan shai ai amyu she rai nga myit hka! Nanhte hte rau ngai galoi du hkra nga lu na rai ta? Galoi du hkra, ngai nanhte hpe sharang nga lu na rai ta? Dai la kasha ma hpe ngai hpang de woi sa wa marit,” ngu wu ai.

Jinghpaw Hanson Version Bible

¹⁷ Yesu htan nna “Makam masham n rawng ai hte nhtan shai ai amyu e, ngai nanhte hte rau gaten du hkra nga nga lu na rai ta? gaten du hkra, nanhte hpe sharang nga lu na rai ta? ngai hpang de shi hpe woi sa marit,” ngu wu ai.

MAHTE 17:17 ပူးပေါင်းရင်းမြစ်များ

SHAKAWN KUNGDAWN 95:10

Ngai gaw mali shi ning tup, dai amyu masha ni hpe n yu ra mat nngai. ‘Shanhte gaw kade wa sadi n dung nga ma hka! shanhte gaw nye a hkang da ai tara ni hpe ndang kau ai ni rai ma ai.’

PRU MAT 10:3

Dai rai nna Mawshe yan Arun gaw hkawhkam wa kaw shang nna shi hpe, “Hebre masha ni a Madu Karai Kasang mahtang, ‘Nang gaw galoi aten du hkra nye a ga n madat na ngu nga n ta? Nye a amyu masha ni hpe sa wa shangun u, shaloi shanhte ngai hpe nawku lu na rai ma ai.

PRU MAT 16:28

Dai hpang, dai Madu gaw Mawshe hpe, “Nanhte gaw galoi du hkra nye a hkang da ai tara ni hpe n hkan ai nga nga na ngu nga myit ta?

GA SHAGAWP 1:22

“Angawk ai masha ni e! Nanhte gaw gade na hkra, angawk angak rai mayu nga myit ni? Nanhte gaw gade na hkra, machye machyang hpaji hpe mani asawng ai hta kabu sharawng nga na ngu nga myit ni? Nanhte gaw galoi mung n hprang sana manit dai kun?

GA SHAGAWP 6:9

Lagawn ai wa gaw galoi aten du hkra, galeng gum kan nga na ngu nga n ta? Shi gaw galoi aten hta rawt wa na rai nga a ta?

ESAIA 19:14

Dai Madu gaw shanhte hpe shanut shanat rai nga ai hpaji jaw nu ai. De a akyu gaw, chyaru nang ai wa gaw tinang a nhpat hta bai galwi la ai zawn Egutu mung gaw lam shagu hta shut hpyit amu galaw ai hte ndi nda rai nga ai.

YEREMIA 4:14

Yerusalem e, na a myit masin kaw na n hkru ai hpe kashin kau u, shaloi hkye hkrang la hkrum na ndai. Nang gaw kade na hkra yubak hte seng ai myit mang lam ni hpe matut myit na ngu wu ni?

BU HKAWM 14:11

Dai Madu gaw Mawshe hpe, “Ndai amyu masha ni galoi aten du hkra ngai hpe n hkap la na rai ma ta? Shanhte hpe ngai galaw dan sai mauhpa lamik kumla law law hpe mu nga ninglen ngai hpe kam sham na matu galoi aten du hkra shanhte ningdang nga na rai ma ta?

BU HKAWM 14:27

“Ndai n hkru ai amyu masha ni galoi aten du hkra ngai hpe aput shatsang na rai nga ma ta? Dai zawn nga ai aput angun ga ni hpe ngai na jin ni ai!

MAHTE 13:58

Shanhte kam sham ai myit n rawng nga ma ai majaw, dai shara e lamik kumla law law wa shi n galaw nu ai.

MAHTE 16:8

Shing nga tsun nga ai hpe Yesu chye wu ai rai nna, “Ai n kam ai ni e, nanhte muk n gun ai lam hpe nanhte shada da hpa rai tsun bawng nga myit ta?

MAHTE 17:16

Na sape ni hpang de ngai shi hpe woi sa we ai rai ti mung, shanhte n shamai ya lu ma ai,” ngu wu ai.

MAHTE 17:18

Yesu gaw dai nat hpe daru kau wu ai rai nna, dai ma gaw shaloi jang mai mat lu ai.

MAHTE 6:30

Karai Kasang hta kam sham ai myit n law ai masha baw e! Dai ni nga nna, hpawt de wan mang hta kabai bang kau ai nam na tsingdu hpe pyi Karai Kasang shing rai jahpun da ai rai yang gaw, dai hta grau nna nanhte hpe jahpun na myit dai n rai ni?

MAHTE 8:26

Shi gaw, “Kam sham myit n law la ai ni e, hpa rai hkrit nga myit ta?,” ngu nna shanhte hpe tsun mu ai. Shaloi shi rawt nna nbung ni hte hkaleng ni zim mat na matu hkang da wu ai, shing rai nachying atsin sim rai nga ai.

MARKU 16:14

Yawng a hpang jahtum e Yesu gaw sape shi langai hte hpe shanhte shat sha nga ma yang shadan dan mu ai. Shi si ai kaw na bai hkrung rawt wa sai lam mu lu ai ni a ga hpe nan n kam ma ai hte myit ja nga ma ai majaw shanhte hpe daru kau wu ai.

MARKU 9:19

Dai rai nna Yesu gaw, “Makam masham n rawng ai amyu e! Gade na hkra ngai nanhte hte rau nga nga lu na rai ta? Gade na hkra ngai nanhte hpe hkam sharang nga lu na rai ta? Dai ma hpe ngai hpang de woi sa wa marit,” ngu nna tsun mu ai.

LUKA 24:25

Dai shaloi Yesu gaw, “Myihtoi ni htawn tsun ai ga mahkra hpe kam sham na matu myit bawnu lanyan dik ai masha angawk ni e!

LUKA 9:41

Yesu gaw, “Makam masham n rawng ai hte, shut hpyit ai amyu ni e, ngai nanhte hte rau gade na hkra nga nga nna hkam sharang ya lu na rai nga a ta?,” ngu nna htan wu ai. Dai hpang shi gaw, “Na nsha hpe nang de woi sa rit,” ngu nna dai masha wa hpe tsun wu ai.

YAWHAN 20:27

Shaloi Yesu gaw Htawma hpe, “Na a layung nang e shawn yu nna, nye a lata ni hpe yu u; na a lata ladawn nna, nye a garep hpe mung manaw yu u; n kam hkum rai et, kam sham nga u!,” ngu wu ai.

KASA 13:18

shaning mali shi ning tup nam mali hkan e shanhte a akyang hpe hkam sharang ya mu ai.

KASA 2:40

Petru gaw ga kaga law law hte mung sakse hkam nna, “Nanhte gaw nanhte a hkum hpe ndai n hkru ai masha ni hkrum sha nga ai ari hta na lawt pru lu myit ga law!,” ngu nna shanhte hpe shadut shadum jahprang wu ai.

2 KORINHTU 11:1

Ngai loi mi angawk ai mara hpe nanhte sharang ya mi ga ngai ra nga nngai. Chyeju hte kaja wa sharang ya mi.

TARA JAHPRANG 32:5

Rai ti mung nanhte mahtang sadi n dung, shi a amyu masha tai na n ging nga myit dai; yubak kap nna masu hkalem ai amyu rai nga myit dai.