MAHTE 16:28 - Jinghpaw Common Language Bible 2009

²⁸ Ngai nanhte hpe teng teng tsun made ga, nang e tsap nga ai ni nkau mi, dai Masha Kasha gaw Hkawhkam hku du sa wa ai hpe garai n mu mu gaw, si ai n hkrum na ma ai,” ngu mu ai.

Jinghpaw Hanson Version Bible

²⁸ Ngai nang hpe teng teng tsun made ga, nang e tsap nga ai ni nkau mi, dai Masha Kasha gaw shi a mungdan hta du wa ai hpe, garai n mu mu gaw, si ai n hkrum na ma ai,” ngu mu ai.

MAHTE 16:28 ပူးပေါင်းရင်းမြစ်များ

MAHTE 10:23

Mare langai mi hta nanhte hpe zingri zingrat myit yang gaw, kaga de hprawng sa mu. Nanhte hpe ngai teng teng tsun made ai gaw, Israela mare nga manga hte hta nanhte galaw ra ai amu n ngut kre shi yang, dai Masha Kasha gaw du na ra ai.

MAHTE 16:13

Ya, Yesu gaw Kesare Hpilip mare a ginwang hkan e du wa yang, “Dai Masha Kasha hpe, masha ni kadai wa rai nga ai, nga nga ma ta?,” ngu nna shi a sape ni hpe san mu ai.

MAHTE 24:3

Yesu gaw Tsanlun Bum ntsa e dung nga yang, shi a sape ni hkrai shi kaw sit sa nna, “Dai hte gaw galoi me byin wa na rai ta? Nang bai du na aten hte mungkan ga htum mat na aten hpe madun dan ai hku nna hpa baw lamik kumla ni byin pru wa na ra ta? Anhte hpe tsun dan mi,” ngu mu ai.

MAHTE 24:34

Ya pra nga ai ni yawng garai n si mat ma yang, dai lam yawng mayawng hte byin wa na ra ai hpe dum chye nga mu.

MAHTE 24:42

“Dai rai nna, nanhte a Madu gaw gara shani e du sa na hpe nanhte n chye myit dai majaw, amaja nga mu.

MAHTE 26:64

Yesu gaw, “Nang tsun ai hte maren rai nga ai. Rai ti mung ngai nanhte yawng hpe tsun made ga, ya kaw nna dai Masha Kasha gaw daru magam ahkang aya lu ai wa a hkra maga e dung nga nna lamu na sumwi ni hte du sa ai hpe nanhte mu na marin dai!,” ngu nna shi hpe tsun wu ai.

MAHTE 8:20

Yesu gaw, “Chyahkyawn ni nhkun lu ma ai, ntsa malen pyen ai u ni mung u tsip ni lu ma ai, dai Masha Kasha chyawm gaw baw tawn na shara pyi n lu nga ai,” ngu shi hpe tsun wu ai.

MARKU 13:26

Dai shaloi e, Masha Kasha gaw daru magam hpung shingkang kaba hte sumwi ni hta e du sa ai hpe mu lu na mara ai.

MARKU 8:38

Masha langai mi gaw, ndai Karai kata nna tara n nga, n hkru n kaja ai prat aten hta e, ngai hte ngai sharin shaga ai mungga hpe kaya nga a yang gaw, dai Masha Kasha gaw shi a Kawa a hpung shingkang dagraw nna chyoi pra ai lamu kasa ni hte nawng du sa wa yang, dai wa hpe kaya kau na ru ai,” ngu nna shanhte hpe tsun mu ai.

MARKU 9:1

Shi matut nna bai tsun mu ai gaw, “Nanhte hpe ngai teng teng tsun made ga, ya nang e tsap nga ai ni nkau mi, Karai Kasang a Mungdan gaw hpung shingkang n-gun atsam hte de da ai hpe garai n mu mu gaw, si ai n hkrum na ma ai,” ngu mu ai.

LUKA 18:8

Nanhte hpe ngai tsun made ga, shanhte hpang maga alawan tara dara ya na mu ai. Rai ti mung Masha Kasha du sa ai nhtoi hta, ndai mungkan ntsa e makam masham nga nga ai hpe mu lu na a kun?,” ngu mu ai.

LUKA 2:26

Shi gaw dai Madu a ga sadi hte du sa na ra ai Meshia hpe garai n mu yang, si na n rai nga nna, Chyoi Pra ai Wenyi e madun dan ai lu la wu ai.

LUKA 9:27

Nanhte hpe ngai teng teng tsun made ga, nang e lawm nga ai ni hta na nkau mi, Karai Kasang a Mungdan garai n mu mu gaw, si ai n hkrum na ma ai.

YAWHAN 21:22

Yesu gaw, “Ngai du sa ai nhtoi du hkra ngai shi hpe asak hkrung nga shangun mayu yang, hkrung nga shangun na nngai, dai nang hte hpa seng a ta? Nang gaw nye a hpang hkan nang rit!,” ngu nna htan wu ai.

YAWHAN 8:51

Nanhte hpe ngai kaja wa teng teng tsun made ga, nye a sharin shaga ai hpe madat mara hkan sa ai wa gaw galoi mung n si na ra ai,” ngu nna bai htan mu ai.

YAWHAN 8:52

Yuda masha ni gaw, “Nang nat shang ai wa rai nga ai gaw, ya anhte hkrak chye saga ai! Abraham hte myihtoi ni pyi si mat wa masai, dai rai yang, nang chyawm gaw, ‘nye a sharin shaga ai ga madat mara hkan sa ai wa gaw galoi mung n si na ra ai,’ nga nna tsun lu ndai.

KASA 1:11

“Galile masha ni e, nanhte dai kaw hpa rai tsap nga nna lamu de naw dawng yu nga myit ta? Dai Yesu gaw nanhte a man na sumsing lamu de shalun la ai zawn, dai hku bai du na ra ai,” ngu nna tsun mu ai.

1 KORINHTU 15:23

Rai ti mung, langai hte langai tinang ang ai hku hkrung rawt wa na mara ai; Hkristu gaw yawng a shawng e hkrung rawt wa ai, dai hpang Hkristu bai du sa ai shaloi e, shi hte seng ai ni hkrung rawt wa na mara ai.

1 HTESALONI 1:10

sumsing lamu de na du sa na ra ai Karai Kasang a Kasha hpe ala nga myit dai hpe mung, dai masha ni yawng tsun kajai nga ma ai. Dai Kasha Yesu gaw, si mat ai kaw na Karai Kasang e hkrung sharawt la nna, du na ra ai Karai Kasang a pawt sindawng ai kaw na anhte hpe mawai la ai wa rai nga ai.

HEBRE 2:9

Rai ti mung anhte mu lu ai wa gaw Karai Kasang a chyeju a majaw yawng mayawng a matu si hkam lu hkra aten ladaw chyahkring mi laman sha lamu kasa ni hta shagrit da hkrum ai Yesu Hkristu nan rai nga ai. Dai Madu chyawm gaw si hkrung si htan a nni nkri hkam la wu ai majaw, ya hpung shingkang hte arawng sadang janmau shagup da nga ai hpe anhte mu lu ga ai.

YAKU 5:7

Dai re ai majaw hpu nau ni e, dai Madu du sa ai du hkra hkam sharang nga mu. Yi sun hkauna galaw sha ai wa langai mi gaw shi a lamu ga kaw na hpu ging ai nsi naisi ni shapraw ya na ra ai hpe gara hku ala nga ai hpe yu yu mu! Shi gaw myit galu ai hte marang nhpaw hte marang shadoi htu ai ten du hkra ala nga ai.

2 PETRU 1:16

Anhte a Madu Yesu Hkristu a hpung shingkang atsam hte du sa ai lam nanhte hpe chye shangun na matu anhte gaw masha e gyin shalat la ai maumwi hta shamyet shanat ai lam n galaw saga ai. Anhte a myi hte nan shi a galu kaba hkik hkam ai lam hpe mu lu saga ai.

1 YAWHAN 2:28

Rai sa shu sha ni e, shi dan pru ai shaloi nanhte gaw hkrit kaya nna gawp makoi mat n ra ai sha shi a man e nden ja ai hte tsap nga lu na matu shi hte langai sha arai nga mu.