LUKA 7:39 - Jinghpaw Common Language Bible 2009

³⁹ Yesu hpe shaga ai Hparishe wa dai mu jang, “Ndai wa kaja wa myihtoi langai mi rai yang gaw, ndai num gaw kadai re ai, shi hpe kadai wa sa hkra nga ai, ndai num gaw kaning re ai yubak kap ai jan rai nga ai mung, shi chye na wu ai,” nga nna shi a kraw e myit nga ai.

Jinghpaw Hanson Version Bible

³⁹ Yesu hpe shaga ai Hparishe wa dai mu jang, Ndai wa dai myihtoi rai yang gaw, shi hpe hkra ai numsha gaw, kadai hte kaning re ai numsha re ai mung, yubak kap ai jan rai nga ai mung, shi chye na wu ai, nga nna shi a kraw e myit nga ai.

LUKA 7:39 ပူးပေါင်းရင်းမြစ်များ

2 HKAWHKAM 5:20

Elisha a shangun ma Gehazi gaw, “Nye a madu gaw arai hpa mung n jaw shangun ai sha dat kau nga nu hka! Suri masha wa shi hpe sak jaw ai kumhpa hpe shi la ging nga ai. Dai re ai majaw ahkrung nga ai dai Madu hta shi kaw na arai lama ma sha pyi la lu hkra, shi hpang de ngai hkan kagat nang na nngai,” ngu nna kraw kata e tsun nga ai.

GA SHAGAWP 23:7

Shi gaw, “Sa rit, lu ga, sha ga, jat sha ga,” nga nna tsun ti mung, shi gaw dai hku myit rawng ai n rai, shi kraw e myit ai hte maren shi rai nga ai.

ESAIA 65:5

Dai hpang shanhte gaw kaga ni hpe, ‘Anhte kaw na kran rai mat mu; Anhte gaw nanhte a matu nau wa chyoi pra nga ga ai majaw ahtawk hkra lu na myit dai n rai!,’ ngu nna tsun ma ai. Ngai gaw dai zawn re ai masha ni hpe n sharang lu nngai-shanhte hpe ninghkap na nye a masin kahtet ai gaw galoi mung n krip mat ai wan zawn rai nga li ai.

MAHTE 20:16

Dai hpang Yesu gaw, “Dai rai nna, hpang hkrat ai ni shawng na mara ai; shawng ai ni mahtang hpang hkrat na mara ai,” ngu nna tsun hpungdim wu ai.

MAHTE 21:11

Shawa masha ni mahtang, “Ndai wa gaw, Galile mung Nazaret mare na Yesu ngu ai myihtoi wa rai nga ai,” nga nna htan ma ai.

MARKU 7:21

Hpa majaw nga yang, masha a myit kata de nna n kaja ai myit mang ai lam ni pru wa nna, dai gaw shi hpe n hkru n kaja ai arawn alai lam ni hkan sa galaw na, masha arai lagu na, masha sat na,

LUKA 12:17

Dai wa gaw shi a myit hta, ‘Nye a nsi naisi ni hpe shinggyin bang da na shara n lu nngai, ngai hpa galaw yu na i?,’ nga ai.

LUKA 15:2

Hparishe ni mung, Tara sara ni mung, “Ndai wa gaw Yubak kap ai ni hpe hkap la nna, shanhte hte rau lu, rau sha nga ai!,” nga nna aput angun nga ma ai.

LUKA 16:3

Shangun ma wa gaw, ‘Nye a madu ngai hpe bungli kaw na jahkrat kau ni ai, ngai kaning rai na i? Ga htu, ga chye na mung ngai n-gun n rawng nna n di lu nngai, hpyi sha na mung ngai kaya nngai.

LUKA 18:4

Rai ti mung tawng marang wa mi na hkra, shi n jeyang ya hkraw ai, timung jahtum e shi gaw, ‘Ngai Karai Kasang hpe mung n hkrit, masha hpe mung n agam nngai.

LUKA 3:8

Dai majaw nanhte a yubak mara ni kaw na myit malai kayin wa sai ngu nna tsun lu hkra re ai lam hkan sa galaw mu. Abraham gaw anhte a ji wa rai nga ai, nga nna nanhte shada da hkum tsun myit; nanhte hpe ngai tsun made ga, Karai Kasang gaw ndai nlung ni hpe la nna shi a matu kashu kasha ni hpe hpan shapraw dat lu ai.

LUKA 7:16

Masha yawng hte mung hkrit let mau mat shajang ma ai rai nna, Karai Kasang hpe shagrau sha-a let, “Myihtoi kaba anhte kaw paw pru ra ai, nga nna mung; Karai Kasang gaw shi a amyu hpe hkye la na matu du sa ra ai, nga nna mung,” shanhte tsun gara ma ai.

LUKA 7:37

Ya dai mare kaw yubak kap ai numsha langai mi nga ai rai nna, Yesu gaw Hparishe a nta e shat sha dung nga ai lam shi na wu ai. Shing rai shi gaw, manam pyaw ai baw mura sau hpring hkra rawng ai lunghpraw ndum langai mi la sa nhtawm,

LUKA 7:38

Shingdu maga, Yesu a lagaw nhpang e hkrap tsap nga let, Madu a lagaw hpe myi prwi hte madit ya wu ai, dai hpang shi a kara hte katsut kau ya wu ai, shi a lagaw hpe mung pup nhtawm, manam pyaw ai mura hte chya ya wu ai.

LUKA 7:40

Yesu gaw htan let shi hpe tsun wu ai gaw, “Simun e, ngai nang hpe tsun na lam lama mi lu nngai,” ngu wu ai. Simun gaw, “Rai sa, sara e, tsun rit,” ngu wu ai.

YAWHAN 4:19

Shaloi dai numsha gaw, “Madu e nang myihtoi rai nga ndai hpe ngai dum chye se ai.

YAWHAN 7:12

Shawa masha ni hta mung shi a lam gadum gahte nga ai lam grai law ai hte, nkau mi gaw, “Shi gaw masha kaja rai nga ai,” nga ma ai. Bai nkau mi gaw, “N rai, mung masha ni hpe lam shadam nga ai,” nga shajang ma ai.

YAWHAN 9:24

Dai re ai majaw, dai hkritung nna myi n mu ai wa hpe lahkawng lang ngu na bai shaga la nhtawm, “Karai Kasang a man e teng man ai ga tsun na nngai ngu nna ga sadi jaw u, dai wa gaw yubak mara lu ai wa rai nga ai hpe anhte chye ga ai,” ngu nna shi hpe tsun mu ai.