LUKA 12:19 - Jinghpaw Common Language Bible 2009

¹⁹ Dai hpang, nye a myit masin hpe ning ngu na we ai, gam kaja ai masha wa e! Law law ning a matu nang ra ai arai kaja law law nang shinggyin da lu nit dai rai nna, asak hkrung ai lam hta asan apan rai nga nu, lu nu, sha nu, pyaw pyaw rai nga nu, ngu na we ai,’ nga nna shi hkum hpe shi tsun wu ai.

Jinghpaw Hanson Version Bible

¹⁹ nye a myit masin hpe ning ngu na we ai, ‘Myit masin e, law law ning a matu arai kaja law law nang shinggyin da nit dai: asan apan rai nga nu, lu nu, sha nu, pyaw pyaw rai nga nu’ ngu na we ai,” nga ai.

LUKA 12:19 ပူးပေါင်းရင်းမြစ်များ

YOBA 14:1

Anhte yawng gaw n-gun kya ai hte shangai wa nna matsan mayan hkrum ai ni hkrai rai nga ga ai. Yawng gaw aprat kadun nna ruyak tsin-yam tsindam hte hpring ai asak hkrun lam hkrai rai nga ai.

SHAKAWN KUNGDAWN 49:18

Masha langai wa mi gaw ndai prat hta e, myit dik dum nna, shi awng dang ai amu hta shakawn ai hkrum sha nga tim pyi,

SHAKAWN KUNGDAWN 62:10

Kabring kabrawng du daw sai hkaw re ai amu hpe nang hkum kam hpa nga et; mya lu mya sha nna lu la ai arai hpa hpe rai tim, hkum myit mada nga et, nang sut su wa ti mung, dai ni hta myit hkum manoi nga et.

GA SHAGAWP 10:2

N ding n man ai hte lu tam ai sut gan gaw nang hpe hpa mung akyu n jaw nga ai, rai ti mung, myit malang ai gaw na a asak hpe hkye hkrang la nga ai.

GA SHAGAWP 14:24

Hpaji rawng ai masha ni gaw sut gan hte shagrau hkam la nga ma ai; angawk ai masha ni chyawm gaw shanhte a angawk angak lam hta gumhkawng nga ma ai.

GA SHAGAWP 18:11

Tsaw ai hte ngang ai bunghku ni gaw mare hpe grup hkra kum gawan da ai zawn, sut su ai masha ni mung, shanhte a sut gan gaw shanhte hpe makawp maga ya nga ai nga nna myit nawn la nga ma ai.

GA SHAGAWP 23:5

Na a ja gumhpraw gaw singkaw tu wa ai zawn rai nna, galang zawn pyen mat wa na ra ai.

GA SHAGAWP 27:1

Ya jahkring mi hta pyi, hpa byin wa na nang n chye nga ai majaw, hpawt ni na lam hpe galoi mung hkum grang dakat nga et.

HPAJI NINGLI 11:9

Ramma ni e, nanhte a ram prat hpe kabu gara nga mu. Ramma naw rai nga yang kabu gara nga mu. Nang galaw mayu ai amu hpa hpe mung galaw u. Na a myit sharawng awng ai hku hkan u. Rai ti mung nang galaw ai lam a majaw Karai Kasang nang hpe jeyang na ra ai hpe adum nga u.

HPAJI NINGLI 2:24

Anhte galaw lu ai kaja htum ai amu gaw lu lu sha sha hte anhte galaw lu ai amu hta kabu gara na lam sha rai nga ai. Ti mung, dai pyi Karai Kasang kaw na rai nga ai hpe ngai dum hprang nngai.

ESAIA 22:13

Shing rai na malai, nang gaw mani sumsai hte masat poi galaw nga ndai. Nang gaw sha na matu sagu, dumsu ni sat nna sabyi lu nga ndai. Nang gaw, “Anhte mung sha ga, lu ga! Hpawt ni sha anhte si wa na saga ai,” ngu nna tsun ndai.

ESAIA 5:11

Nanhte gaw dingnye hkrum nga myit dai! Nang gaw jahpawt manap jau jau rawt nna chyaru lu hpang ai hte, shana du hkra chyaru nang let aten shama hkawm nga ndai.

ESAIA 5:8

Nanhte gaw dingnye hkrum nga myit dai! Nanhte gaw nanhte hkam la lu sai hta jat nna dum nta ni hte yi sun ni hpe grau mari da nga myit dai. Kade n na yang, dai shara hta marai langai mi nga na shara nga na ra ai n rai, nang chyu sha dai lamu ga hta nga na rai ndai.

ESAIA 56:12

Ndai chyaru ya ni gaw, ‘Anhte sabyi ntsin shapraw ga, anhte dang lu ai made yawng lu ga! Hpawt ni pyi gaw dai ni na hta grau pyaw na ra ai!,’” ngu nna tsun ma ai.

HOSEA 12:8

Shanhte gaw, ‘Anhte lu su ai ni rai ga ai; anhte gaw ngamu ngamai hkra galaw saga ai. Kadai mung anhte hpe n teng n man ai hku sut su nga ai nga nna mara shagun lu nga ma ai n rai,’ ngu nna tsun ma ai.

AMO LAIKA (AMOS) 6:13

Nanhte gaw Lodeba mare hpe gasat la lu ai majaw shakawng nga myit dai. Nanhte gaw, “Karnaim hpe lu la na matu n-gun law nga ga ai,” nga nna gumrawng myit dai.

HABAKU 1:16

Shanhte gaw shanhte a sumgawn ni hpe pyi nawku ai hte dai ni hpe shagu hkungga nawng ya ma ai, hpa majaw nga yang shanhte a sumgawn ni gaw kaja htum ai arung arai shagu hte shanhte hpe madi shadaw nga ai.

LUKA 12:18

Bai shi gaw, ‘Ngai ndai hku galaw na we ai; nye a dum dingsa ni hpe ngai run kau nna grau kaba ai ni hpe galaw na we ai, dai ni hta nye a nsi naisi hte kaga sut rai ni mahkra hpe ngai shinggyin da na we ai.

LUKA 16:19

“Kalang mi na sahti wa langai mi nga ai. Shi gaw, hpu ging dik ai, hpun palawng bu hpun nna shani shagu pyaw pyaw ning ngai nga ai.

LUKA 21:34

“Nanhte gaw, lu lai, sha lai, chyaru nang ai, dinghta asak hkrung lam a matu myit ru myit tsang ai lam ni hte nanhte hpe n ka-up dang kau u ga, sadi hte nga nga mu. Dai n rai yang, dai tara dawdan ai nhtoi gaw mahkam htim ai zawn nanhte a ntsa e akajawng sha dan pru na ra ai.

1 KORINHTU 15:32

Lama wa ngai shinggyim masha a maw mawn ai myit hte sha mungkan akyu hpe myit mada let Ehpesu Mare na matse labye dusat ni hte gasat hkat nngai rai yang gaw, nye a matu hpa akyu nga na a ta? Si mat ai ni bai n hkrung rawt wa na rai yang gaw, masha ni tsun ga ai ga, “Anhte lu ga, sha ga, pyaw pyaw rai nga ga, hpawt ni anhte si na ga ai,” nga ai hte maren sha rai na rai nga ai.

HPILIPI 3:19

Dai ni gaw ngarai hta shanhte a lam htum na mara ai; hpa majaw nga yang dai ni a karai gaw shanhte a akan ngu ai hkum shan a marin marit ai lam tai nga ai. Shanhte gaw kaya kahpa lam hta gumrawng shara shatai ma ai hte ndai dinghta ga na arai hpe hkrai sha myit tsang nga ma ai.

1 TIMOHTI 5:6

Rai ti mung arawn alai hten nna pyaw hpa lam sha tam ai gaida jan chyawm gaw, shi naw hkrung nga ninglen chyasi rai nga ai.

1 TIMOHTI 6:17

Ndai dinghta asak hkrung nga ai prat a sut gan ngamu ngamai ai lam ni hta gumrawng gumtawng n rai mu ga hte n grin ai ngamu ngamai ai lam ni hta shanhte a myit mada kam hpa shara n shatai ai sha anhte kabu gara hkam la na matu arai yawng mayawng hpe n daw n hta jaw ya ai Karai Kasang hta myit mada ala nga na matu hkang da u.

2 TIMOHTI 3:4

mayun gumlau ai ni, sadi n dung nna kam mara re ai ni, myit tsaw myit dap nna gumrawng myit kaba ai ni rai nna, shanhte gaw Karai Kasang hpe tsaw ra na malai tinang a pyaw daw lam hpe grau ra sharawng ai ni rai na mara ai.

YAKU 5:5

Ndai ga ntsa e nanhte a asak hkrung lam gaw hkum hkrang myit masin hpe shangwi shapyaw ya ai arung arai kaja ni hte pyaw daw lam hkrai hpring chyat rai nga malit dai. Nanhte gaw sat kau hkrum na nhtoi a matu nanhte a hkum ni hpe hpum sau hkra kawn da nga myit dai.

1 PETRU 4:3

Nanhte gaw lai wa sai aten hta ram ram wa na hkra maigan masha ni galaw mayu ai baw hkan galaw lai wa manit dai. Nanhte a asak hkrung lam hpe tara n hkan ai n htap n htuk ai amu, marin marit ai amu, chyaru nang ai, n se n sa galaw ai, nang ai baw malu masha sha ai, tsa lu poi ni galaw ai, hta jai lang manit dai. Dai ni hta grau matsat shabat hkyet rung hpa gaw, sumla ni hpe nawku ai lam rai nga ai.

SHINGRAN 18:7

Tinang hkum hpe shagrau shareng nna ningngai lu sai shadawn shadang hte maren, shi hpe dai yawn hkyen ai hte nni nkri lam htang jaw mu. Hpa majaw nga yang, shi gaw, ‘Ngai hkawhkam jan nang e hkaw dung nga nngai! Ngai gaida jan n rai, ngai galoi mung yawn hkyen ai n hkrum na nngai!,’ nga nna tinang dai atsun nga ai.

1 SAMUELA 30:16

Shi mung Dawi hpe shanhte hpang de sa nna woi madun kau wu ai. Majan shang gasat ai ni gaw Hpilisti hte Yuda mung na shanhte rim la lu ai lanep arai sumpum kaba ni a majaw lu let, sha let, poi galaw nna dai shara ni hta pri rai jawng nga ma ai.