LUKA 10:20 - Jinghpaw Common Language Bible 2009

²⁰ Rai ti mung, nat ni nanhte a ga madat ai majaw, hkum kabu myit, nanhte a mying ni hpe sumsing lamu hta ka da sai majaw she, kabu nga mu,” ngu nna tsun mu ai.

Jinghpaw Hanson Version Bible

²⁰ Rai timung, nat ni nanhte a ga madat ma ai majaw, hkum kabu myit; nanhte a amying sumsing lamu hta ka da nga ai majaw she, kabu nga mu,” ngu nna shanhte hpe tsun mu ai.

LUKA 10:20 ပူးပေါင်းရင်းမြစ်များ

SHAKAWN KUNGDAWN 69:28

Asak laika buk kaw na shanhte a amying ni hpe arut kau ya u ga; na a amyu masha ni a jahpan hta shanhte n lawm lu mu ga.

PRU MAT 32:32

Dai rai nna shanhte a yubak hpe chyeju hte raw dat kau ya u; rai ti mung nang n dat ya mayu ai rai yang chyawm gaw na a amyu masha ni a mying ni hpe nang ka da ai laika kaw na nye a mying hpe shaprai kau ya e law,” ngu nna tsun wu ai.

ESAIA 4:3

Naw ngam nga na matu Karai Kasang e lata da sai Yerusalem e ngam da hkrum sai masha shagu hte gaw chyoi pra ai ni ngu shaga hkrum na mara ai.

YEREMIA 17:13

Madu e, nang gaw Israela a myit mada shara rai nga ndai; nang hpe kau da ai ni yawng kaya kahpa hkrum na mara ai. Shanhte gaw asak hka hpawk ngu ai nang Madu hpe kau da nga masai majaw ga nhpu hta ka da ai amying ni zawn shanhte hkoi mat wa na mara ai.

EZEKELA 13:9

N teng n man ai myit shingran mu ai myihtoi ni hte lam woi shadam ai myihtoi ga tsun ai myihtoi nanhte hpe ngai ari jaw na nngai. Nye a amyu masha ni daw dan ai lam galaw na matu shinggyin wa ai shaloi, nanhte a amying ni dai Israela amyu jahpan hta lawm lu na ra ai n rai. Nanhte gaw Israela mungdan de galoi mung nhtang wa lu na myit dai n rai. Ngai gaw Tsaw Htum ai Dai Madu rai nga nngai hpe nanhte chye lu na rai myit dai.

Daniela 12:1

Lachyit nba hpun da ai dai lamu kasa gaw, “Dai aten hta, na a amyu masha ni hpe bau sin nga ai lamu kasa kaba Mihkaela dan pru wa na ra ai; shaloi masha amyu baw ni nga pra hpang wa ai aten kaw nna yak dik htum ai ru tsang hkrum aten du wa na ra ai. Dai aten du jang, Karai Kasang a jahpan laika hta mying rawng ai na a amyu masha ni yawng gaw hkye la ai hkrum na mara ai.

MAHTE 10:1

Madu Yesu gaw shi a sape shi lahkawng hte hpe shaga la nna, n seng ai nat ni hpe shaden kau lu mu ga hte, ana ahkya amyu myu, machyi makaw amyu myu hpe shamai shatsai lu na ahkang shanhte hpe jaw mu ai.

MAHTE 26:24

Chyum laika hta ka da nga ai hte maren, dai Masha Kasha gaw si hkam na matu sa wa lu na rai nga ai; rai ti mung dai Masha Kasha hpe ap kau ai wa gaw dingnye lu na ra ai. Dai masha n shangai taw gaw shi a matu grau kaja nga ai!,” ngu wu ai.

MAHTE 27:5

Shaloi dai gumhpraw hpe Nawku Htingnu hta e shi kabai tawn da nna pru mat wa nhtawm, shi dai shi dau si mat ai.

HPILIPI 4:3

Nye a nrum ntau share manang hku nna mung dai num yan hpe karum la na hpe ngai ra sharawng nga nngai; hpa majaw nga yang dai Kabu Gara Shiga hkaw tsun ai lam hta ngai hte rau nhki nsang amu galaw shakut shaja lawm ma ai. Shing rai galaw lai wa ai ni hta Klemen hte Karai Kasang a asak jahpan laika hta tinang a mying lawm ai nye a shingdep shingtau kaga ni mung lawm ma ai.

HEBRE 12:23

Nanhte gaw Sumsing lamu na jahpan hta lawm ai kasha alat ni a kabu gara hpawng de nga ai hpawng de du nga manit dai. Masha amyu yawng hpe tara dara ai wa ngu ai Karai Kasang hpang de mung, jahkum shatsup hkrum sai ding hpring ai ni a wenyi ni hpang de mung, du nga manit dai.

SHINGRAN 13:8

Sat kau hkrum sai Sagu Kasha a asak laika hta, ginding aga garai n pra kaw nna amying ka da lawm sai mungkan masha nlang hte hta lai nna, mungkan ntsa e nga ai masha yawng gaw dai matse labye hpe nawku na mara ai.

SHINGRAN 17:8

Nang mu ai matse labye gaw, moi shawng de asak hkrung nna nga yu sai rai tim ya asak n hkrung sai. Shi gaw dai sung htum ai nhkun kaw nna lung wa magang ra ai rai nna, jahten kau hkrum na shara de sa wa na ra ai. Ginding aga nnan lat kaw nna tinang a mying ni hpe asak laika hta n ka shalawm da ai, ga ntsa e nga ai masha ni gaw, dai matse labye hpe mu ai hte yawng mayawng mau mahka na mara ai. Shi gaw shawng de kalang mi asak hkrung nga yu sai, ya asak n hkrung sai, rai ti mung hpang e kalang mi bai asak hkrung pru wa na ra ai.

SHINGRAN 20:12

Si mat wa sai ni mung, kaji kaba n nga, tingnyang a man e tsap nga ma ai hpe ngai mu nngai. Laika ni hpe hpaw tawn nga ai. Asak laika ngu ai kaga Laika hpe mung hpaw tawn nga ai. Si mat wa sai ni gaw, shanhte galaw lai wa sai amu hte maren, laika ni hta ka da nga ai hta hkan nna tara daw dan ai hkrum ma ai.)

SHINGRAN 20:15

Asak laika hta amying n ka da lawm ai wa kadai mung, dai wan nawng hta jahkrat bang kau ai hkrum ma ai.

SHINGRAN 21:27

Rai ti mung, awu asin re ai hpa mung dai mare de shang lu na n rai. Matsat shabat awu asin amu galaw ai wa, masu magaw lam hkan ai wa mung dai mare hta galoi mung shang lu na n rai. Sagu Kasha a asak laika hta amying ka lawm ai ni chyu sha dai mare hta shang lu na mara ai.

SHINGRAN 3:5

Awng padang lu ai ni gaw ning re ai hpraw ai hpun palawng bu hpun lu na mara ai; shanhte a amying ni hpe asak laika hta na ngai shaprai kau ya na n rai. Nye Wa a man e mung, shi a lamu kasa ni a man e mung, shanhte gaw ngai hte seng ai ni rai ma ai ngu nna, dan dan leng leng ngai tsun shana yin la na nngai.