KOLOSE 1:13 - Jinghpaw Common Language Bible 2009

¹³ Shi gaw anhte hpe n hkru n kaja ai nsin a n-gun atsam kata kaw na hkye mawai la nna shi a tsaw ra ai Kasha a mungdan hta shashawn mi ai.

Jinghpaw Hanson Version Bible

¹³ Dai Kawa gaw, nsin a ahkang aya kaw na anhte hpe mawai la nna, shi a tsawra ai Kasha a mungdan hta jashawn mi ai:

KOLOSE 1:13 ပူးပေါင်းရင်းမြစ်များ

ESAIA 42:1

Dai Madu gaw, “Ndai gaw ngai n-gun shaja ya ai nye a shangun ma- ngai lata la ai wa, ngai sharawng awng ai wa rai nga ai. Ngai gaw shi hpe nye a Wenyi hte jahpring ya ni ai, shi gaw masha amyu baw shagu hpang de teng man rap ra ai tara la sa ya na ra ai.

ESAIA 53:12

Dai rai nna, ngai gaw shi hpe galu kaba nna daru magam n-gun rawng ai ni a lapran e arawng sadang shara langai jaw na we ai. Shi gaw sharawng awng ai myit hte shi a asak jaw nna n hkru ai masha ni a hpang jahtum na lam hpe mung garan ya nga ai. Shi gaw yubak kap ai masha law law ni a yubak hpe gun kau ya nna shanhte mara raw dat ai hkrum mu ga, akyu hpyi ya nga sai,” ngu nna tsun ai.

ESAIA 60:2

Kaga masha amyu baw ni gaw nsin hte ka-up da hkrum na mara ai, Rai ti mung dai Madu a nhtoi gaw na a ntsa e htoi tu na ra ai; Shi a htoi kabrim ai hpung shingkang gaw nang hte rau nga nga na ra ai.

ZEHKARIA 9:9

Ziun amyu masha ni e, kabu gara nga mu, kabu gara nga mu! Yerusalem amyu masha ni e, kabu gara jahtau garu nga mu! Yu mu, nanhte a hkawhkam wa gaw nanhte hpang de sa wa nga ai! Shi gaw padang ninglaw hte awng dang ai lam lu la nga ai, rai ti mung shagrit shanem ai myit hte lawze ntsa e jawn nga ai- lawze kasha langai a ntsa e, lawze kanu a kasha a ntsa e jawn nga ai.

MAHTE 17:5

Petru ga naw shaga nga yang, htoi tu ai sumwi gaw shanhte a ntsa e ka-up mu ai hte dai sumwi hta na nsen ngoi pru nna, “Ndai wa gaw ngai sharawng awng ai, ngai tsaw ra ai ngai sha rai nga ai; shi a ga madat mara mu,” nga ai.

MAHTE 25:34

Shaloi dai Hkawhkam wa gaw, shi a hkra maga de nga ai ni hpe, ‘Nye a Wa kaw na shaman ya ai lu la ai ni e! Sa marit! Ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu.

MAHTE 3:17

Dai hpang, “Ndai wa gaw ngai sharawng awng nga ai, ngai tsaw ra ai Kasha rai nga li ai,” nga nna lamu de na nsen ngoi pru wa ai.

LUKA 13:24

Yesu gaw, “Gyip ai chyinghka hku shang lu na nanhte shakut shaja mu, hpa majaw nga yang, masha law law wa shang na matu kaja wa shakut na mara ai, rai ti mung, n shang lu na mara ai.

LUKA 22:53

Ngai shani shagu Nawku Htingnu e, nanhte hte rau nga nga yang, nanhte ngai hpe hpa rai n rim myit ta? Rai ti mung ndai ahkying gaw nanhte a ahkying rai nga ai hte nsin a n-gun atsam up ai aten mung rai nga ai,” ngu mu ai.

YAWHAN 17:24

Wa e! Ginding aga garai n lat kaw nna nang ngai hpe tsaw ra nga ndai majaw, ngai e jaw ai nye a hpung shingkang hpe ngai e ap ya da ai masha ni mu lu mu ga, ngai nga ai shara hta shanhte hpe mung nga shangun mayu nngai.

YAWHAN 3:35

Kawa gaw Kasha hpe tsaw ra wu ai rai nna ahkang aya yawng mayawng shi a lata hta ap ya nu ai.

YAWHAN 5:24

Ngai nanhte hpe teng teng tsun made ga, nye a ga madat mara nna ngai hpe shangun dat ai wa hpe kam sham ai wa kadai mung, htani htana asak lu la wu ai. Shi gaw tara daw dan ai n hkrum ai sha, si ai kaw na asak hkrung ai de kawt lai wa ai wa rai nga ai.

KASA 26:18

Ngai hpe kam sham ai a marang e shanhte yubak mara ni raw dat kau ai hkrum nna Karai Kasang a lata la ai amyu hta lawm lu mu ga, n sin kata nna nhtoi de, Satan a atsam kata nna Karai Kasang hpang de shanhte kayin wa lu hkra nang shanhte a myi jahpaw ya na rai ndai,’ nga nna ngai hpe tsun nngai.

ROMA 14:17

Hpa majaw nga yang, Karai Kasang a Mungdan gaw sha sha, lu lu rai nga na hku n re ai sha, Chyoi Pra ai Wenyi e jaw ya ai shaman chyeju ni rai nga ai, ding hpring ai ngwi pyaw ai hte kabu gara ai lam ni hte seng nga ai.

2 KORINHTU 11:14

Ning rai galaw ai gaw mauhpa n rai nga ai! Satan pyi gaw nhtoi a lamu kasa hkrang hpe naw masu dagraw lu nga ai!

2 KORINHTU 4:4

Ndai mungkan ga a n hkru n kaja ai karai wa ngu ai Nat Satan wa gaw shanhte a myit ni hpe ningsin hte ka-up shamak tawn kau ya manu ai majaw, shanhte n kam n sham ma ai. Shi gaw dai Karai Kasang a hkrang bung sumla nan rai nga ai. Hkristu a hpung shingkang a lam dai Kabu Gara Shiga kaw na pru ai nhtoi hpe n mu lu shangun mu ai.

EHPESU 1:6

Shi a tsaw ra ai kasha a marang e manu jahpu n hpyi ai sha anhte hpe jaw ai hpung shingkang rawng ai shi a chyeju a majaw Karai Kasang hpe shakawn kungdawn ga law!

EHPESU 4:18

Shanhte a chye chyang ai nyan sin mak nga nna tsep kawp angawk angak re ai hte du ja nga ma ai majaw, Karai Kasang jaw ai asak kamhtaw hta n lawm mat ai ni rai nga ma ai.

EHPESU 5:5

Hpye ai wa, kaya n chye sari n rawng ai wa, nammak lawhpa ai wa, kadai rai ti mung, Hkristu hte Karai Kasang yan a mungdan hta sali kamhtaw galoi mung hkam la lu na n re ai hpe nanhte hkrak chye nga myit dai. (Hpa majaw nga yang nammak lawhpa ai lam gaw, sumla nawku ai lam amyu mi rai nga ai)

EHPESU 5:8

Moi shawng de nanhte mung ningsin hta nga lai wa yu manit dai; rai ti mung ya e Madu a masha ni tai wa manit dai rai nna nhtoi de du shang manit dai. Dai re ai majaw, nanhte gaw nhtoi a kashu kasha ni zawn hkan galaw nga mu.

EHPESU 6:12

Hpa majaw nga yang, anhte shinggyim masha ni hte gasat hkat nga ai n rai; sumsing lamu lahta tang e nga ai n hkru n hkra ai nat luksuk ni hte mung, ndai sin mak ai mungkan hpe up hkang nga ai du ni, ahkang aya lu ai ni hte gasat gala hkat nga ga ai.

1 HTESALONI 2:12

Anhte gaw nanhte hpe n-gun jaw ai lam hte shadaw shalan ai lam galaw saga ai. Shi a mungdan hta shang sha lu na hte hpung shingkang hkam la lu mu ga, nanhte hpe shaga la ai Karai Kasang hpe sharawng awng shangun ai asak hkrung lam hta e hkawm sa nga na matu anhte matut manoi shadut jahkat saga ai.

HEBRE 2:14

Kasha ni ngu nna shi shanhte hpe shamying wu ai hte maren, asai ashan dagraw ai masha ni rai nga ma ai. Yesu shi hkum nan mung shanhte zawn asai ashan dagraw ai shinggyim masha hkum hkrang rau rum hkam la wu ai. Shing rai hkam la ai lam gaw si hkrung si htan hpe up ai nat wa a atsam hpe jahten shabyak kau na matu rai nga ai.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.

2 PETRU 1:11

Dai lam hku hkan sa myit yang gaw, anhte a Madu hte hkye hkrang la ai Yesu Hkristu a htani htana re ai mungdan de shang lu na ahkang nanhte hpe hpring hpring tsup tsup jaw ya na marin dai.

1 YAWHAN 2:8

Rai ti mung ngai ya nanhte hpang de ka dat ai hkang da ai ga gaw lam mi hku nna ningnan rai nga ai; shing rai ningnan re ai lam teng nga ai hpe Hkristu a asak hkrung lam hta mung, nanhte a mahkrum madup lam ni hta mung, mu lu nga ai. Hpa majaw nga yang, ndai nsin gaw hkoi mat wa nna dai teng man ai nhtoi gaw ya e pyi htoi tu nga ai.

1 YAWHAN 3:14

Anhte hpu nau ni hpe tsaw ra nga ga ai majaw, anhte si ai kaw nna hkrung ai de kawt lu sagaw ai hpe anhte chye ga ai. Kahpu kanau ni hpe n tsaw ra ai wa gaw dai si ai a n-gun atsam kata e sha anga nga ai wa rai nga ai.

1 YAWHAN 3:8

Yubak sha naw agalaw shanang nga ai wa kadai rai ti mung, Nat hte seng ai wa rai nga ai, hpa majaw nga yang, Nat gaw shawng npawt kaw nna yubak galaw nu ai. Dai rai nna Nat a amu bungli hpe sharun jahten kau na matu, Karai Kasang a Kasha gaw paw pru wa sai.