KASA 9:17 - Jinghpaw Common Language Bible 2009

¹⁷ Dai majaw Anani sa nna Shawlu nga ai nta de shang nhtawm Shawlu a ntsa e lata mara let, “Hpu nau Shawlu e, nang myi bai mu lu nna Chyoi pra ai Wenyi hpring lit ga nga, nang sa wa ai lam e nang hpe shadan dan ai Yesu nan, ngai hpe shangun dat ni ai,” ngu wu ai.

Jinghpaw Hanson Version Bible

¹⁷ Shaloi Anani du sa nna, dai nta de shang nhtawm, Shawlu a ntsa e lata mara let, “Hpunau Shawlu e, nang myi bai mu lu nna, Chyoi pra ai Wenyi hpring lit ga nga, nang sa wa ai lam e, nang hpe shadan dan ai Madu Yesu gaw, ngai e shangun dat ni ai,” ngu wu yang,

KASA 9:17 ပူးပေါင်းရင်းမြစ်များ

NINGPAWT NINGHPANG 45:4

Dai hpang Yosep gaw shanhte hpe, “Chyeju hte sit sa wa marit,” ngu nna tsun wu yang, shanhte mung shi a makau de sit sa wa ma ai. Shi gaw, “Ngai gaw nanhte Egutu mung de dut kau hkrum ai nanhte a kanau Yosep rai nga nngai.

MAHTE 19:13

Masha nkau mi gaw, ma kaji ni a ntsa e lata mara da nna akyu hpyi ya mu ga nga nna, Yesu hpang de shanhte hpe woi sa mu ai. Sape ni mahtang shanhte hpe hkap daru kau mu ai.

MARKU 5:23

“Nye a shayi sha kaji grai machyi nna si wa magang nga ai. Shi mai tsai wa nna hkrung nga u ga, shi a ntsa e lata mara ya na matu sa wa rit!,” ngu nna akroi anoi hpyi nem wu ai.

MARKU 6:5

Shi gaw dai mare hta machyi makaw re ai masha nkau mi a ntsa e lata mara nna shamai ya ai hta kaga, dai yang e lamik kumla hpa mung shi n galaw lu wu ai.

LUKA 1:41

Mari hkrum shaga ai ga Elisabet na jang, shi a hkritung na ma gaw gumlawt nga ai.

LUKA 1:67

Shaloi Yawhan a kawa Zahkaria gaw Chyoi pra ai Wenyi hte hpring wa nna, myihtoi ga hku tsun wu ai gaw:

LUKA 1:76

“Ma e, nang gaw Tsaw Htum Ai Wa a myihtoi ngu nna shamying ai lam hkam la nna, shi a lam lajang na matu, shi a shawng numshawn e sa wa na rin dai.

LUKA 15:30

Shawa num ni hte kanawn nna, na a sut rai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka!,’ ngu nna shi a kawa hpe htan wu ai.

LUKA 15:32

Rai ti mung, anhte poi galaw nna pyaw pyaw rai kabu gara mai nga ai, hpa majaw nga yang, ndai na nnau wa gaw si mat sai, ya bai hkrung ra ai, mat mat sai mung, ya bai mu la saga ai,’ ngu nna shi hpe nem wu ai,” ngu mu ai.

LUKA 2:11

Dai ni na nhtoi hta Hkye Hkrang La ai Wa Hkristu ngu ai Madu gaw, Dawi a mare e nanhte a matu shangai wa sai.

KASA 10:36

Nga yawng nga pra a Madu rai nga ai Yesu Hkristu hku nna Israela amyu masha ni hpang de Karai Kasang ndau shana shagun jaw dat ai ngwi pyaw sim sa ai hte seng ai Kabu Gara Shiga hpe nanhte chye nga myit dai.

KASA 13:3

Dai hte maren shanhte gaw lusha gam let, akyu hpyi nna shan a ntsa e lata mara jaw ngut jang, shan hpe dat dat mu ai.

KASA 13:52

Antioki mare na sape ni chyawm gaw, kabu gara ai hte Chyoi Pra ai Wenyi hpring nga ma ai.

KASA 19:6

Ya Pawlu shanhte a ntsa e lata mara ya jang Chyoi pra ai Wenyi shanhte a ntsa e du nna shanhte laklai ai ga, myu kaga shaga nna Karai Kasang a mungga hpe mung tsun shana ma ai.

KASA 2:4

Shanhte nlang hte mung, Chyoi Pra ai Wenyi hpring shajang nna, Wenyi e shadut mu ai hte maren ga amyu kaga ga hku shaga wa ma ai.

KASA 21:20

Shing nga tsun dan ai hpe na jang shanhte yawng Karai Kasang hpe shagrau sha-a ma ai. Dai hpang shanhte gaw Pawlu hpe, “Hpu wa e Yuda masha ni hta na kam sham ai ni gade hkying mun law nga ma ai lam, shanhte yawng dai jep ai Tara hta myit jung ai hkrai rai nga ma ai lam nang chye nga ndai.

KASA 26:15

Shaloi ngai gaw, ‘Madu e, nang kadai rai nga n ta?,’ ngu nna san we yang Madu gaw, ‘Nang zingri zingrat ai Yesu rai nga nngai.

KASA 4:31

Shing rai akyu hpyi ngut jang, shanhte hpawng nga ai shara gaw gari ashun wa nna shanhte nlang hte hta Chyoi Pra ai Wenyi hpring wa ai hte Karai Kasang a mungga hpe nden ja ai myit hte tsun dan hpang wa ma ai.

KASA 6:6

Dai hpang shanhte hpe kasa ni a man de jashawn dat nna dung nga shangun mu ai, kasa ni akyu hpyi ngut jang, shanhte a ntsa e lata mara jaw da mu ai.

KASA 8:17

Dai rai nna Petru yan Yawhan shanhte a ntsa e lata mara ya jang, shanhte dai Chyoi Pra ai Wenyi hkam la lu ma ai.

KASA 9:18

Dai shaloi jang Pawlu a myi hta na asep zawn re ai gaw hkrat mat nna shi a myi bai mu lu ai. Shaloi shi rawt nna hkalup hkam la wu ai.

ROMA 15:7

Dai rai nna Karai Kasang a hpung shingkang dan hkung wa na matu, Hkristu gaw nanhte hpe hkap hkalum la manit dai hte maren nanhte shada da hkalum la mu.

1 KORINHTU 15:47

Shawng na masha Adam gaw ga hte hpan da ai rai nna, dinghta ga na rai nga ai; hpang na Adam chyawm gaw sumsing lamu na du sa ai rai nga ai.

1 KORINHTU 15:8

Hpang jahtum e, ngai nhtoi n-gu ai shangai wa ai ma zawn re ai wa kaw mung, shi shadan dan ni ai.

1 KORINHTU 9:1

Ngai gaw shanglawt lu ai wa langai mi n rai nga a ni? Kasa langai mi mung rai nga nngai n rai ni? Anhte a Madu Yesu hpe mu yu ni ai n rai ni? Nanhte mung, ngai Madu a matu gun hpai ai magam bungli kaw na pru wa ai apu asi ni n rai nga myit ni?

1 TIMOHTI 4:14

Myihtoi ni hkaw tsun ai hte hpung woi ni na a ntsa e lata mara sari dang da ya ai shaloi nang hpe jaw da nna nang hta rawng nga ai wenyi hte seng ai chyeju kumhpa hpe n gawn n sawn di nna hkum hprai kau nga u.

1 TIMOHTI 5:22

Madu a magam bungli gun hpai na matu kadai hpe mung lata mara nna aya dang ya na hkum tin et. Kaga masha ni yubak galaw ai lam hta hkum lawm et; nang nan mara n kap hkra san seng nga u.

2 TIMOHTI 1:6

Dai re ai majaw ngai nang hpe lata mara nna aya dang ya ai shaloi Karai Kasang kaw na nang hkam la sai chyeju kumhpa hpe ahkrung nga shangun na matu nang hpe ngai bai shadum dat de ai.

HPILEMON 1:16

Ya shi gaw yu maya mayam sha n rai mat sai, masha a hkum shan lam hku yu yang mung, madu a lam hku yu yang mung, mayam madang hta jan ai tsaw ra ai Hkristan hpu nau langai mi tai wa sai: shi gaw nye a matu hte na a matu mayam langai mi hku nna mung, Hkristu hta hpu nau langai mi hku nna mung, grau nna hpu reng nga ai.

HEBRE 6:2

hkalup hkam ai lam, lata mara aya dang ai lam, si ai kaw na bai rawt wa ai lam hte htani htana daw dan hkrum ai lam ni hpe bai sharin kahtap npawt gaw na n ra saga ai.

2 PETRU 3:15

Anhte tsaw ra ai hpu nau Pawlu mung, Karai Kasang jaw ai hpaji byeng-ya hte nanhte hpang de ka dat sai hte maren anhte a Karai Kasang hkam sharang let la ding da nga ai lam gaw nanhte Hkye Hkrang la hkrum na matu ahkaw ahkang jaw ai lam she rai nga ai hpe mu chye nga mu.