KASA 17:18 - Jinghpaw Common Language Bible 2009

¹⁸ Epikuri lam hte Sto-i lam hkan ai hpaji sara ni nkau mi shi hte dangrang hkat ma ai. Nkau mi gaw, “Ndai chye shakawng ai du ladi masha wa hpa tsun shakut nga ai kun?,” nga nna san ma ai. Nkau mi gaw, “Maigan masha ni a hpara ni a lam tsun dan ai wa rai sam ai,” nga nna mung htan shajang ma ai, shanhte shing nga tsun ai gaw, Kasa Pawlu gaw Yesu Hkristu hte si ai kaw na bai hkrung rawt wa ai lam hkaw tsun nga ai majaw rai nga ai.

Jinghpaw Hanson Version Bible

¹⁸ Dai rai nna, Epikuri lam hte Sto-i lam hkan ai hpaji sara ni nkau mi, shi hte dangrang hkat ma ai rai nna, nkau mi gaw, “Ndai baw law ai wa hpa tsun mayu nga ai kun?” nga nna mung, nkau mi gaw, “Hpara kaga ni a lam tsun dan ai wa rai sam ai,” nga nna mung, tsun shajang ma ai: dai gaw, shi Yesu a lam hte bai hkrung rawt wa ai lam tsun dan ai majaw rai nga ai.

KASA 17:18 ပူးပေါင်းရင်းမြစ်များ

GA SHAGAWP 23:9

Angawk ai wa hpe lachyum sung ai ga, tsun dan na hkum shakut et; shi gaw dai hpe manu chye shadan lu ai n rai.

GA SHAGAWP 26:12

Shi hpa n tai nga ai shaloi, hpaji rawng nga nngai nga nna marai langai ngai myit la ai wa hta, angawk htum ai wa gaw grau kaja nga ai.

MARKU 9:14

Yesu hte sape ni marai masum gaw kaga sape ni nga ai shara de du wa ma yang, shanhte a grup yin masha wunawng kaba nga nga ma ai hte Tara Sara nkau mi shanhte hte ndang kalang hkat nga ma ai hpe wa mu ma ai.

LUKA 11:53

Dai shara na pru wa yang, tara sara ni hte Hparishe ni gaw, shi hpe aja awa dinglun ai hku ndang kalang galaw bang wa ma ai.

KASA 26:23

Meshia gaw nni nkri hkrum lu na hte si ai ni kaw na shawng hkrung rawt wa nna, Israela amyu masha ni hte maigan masha ni hpe hkye hkrang la ai nhtoi hkaw tsun shana ya na ra ai ngu ai lam myihtoi ni hte Mawshe hkaw tsun lai wa sai hte maren byin wa na ra ai ngu ai lam rai nga ai,” ngu wu ai.

KASA 4:2

Kasa yan gaw Yesu si ai kaw na bai hkrung rawt wa sai lam hkaw tsun nga ma ai majaw Saduke ni pawt bu nga ma ai. Hpa majaw nga yang Madu Yesu hkrung rawt wa ai lam gaw, si mat ai ni bai hkrung rawt wa na mara ai ngu ai lam teng nga ai hpe sakse madun nga ai.

KASA 5:42

Shing rai shanhte gaw, shani shagu nawku Htingnu hta mung, nta hkan e mung, Yesu gaw Meshia rai nga ai, nga nna Kabu Gara Shiga hpe matut hkaw tsun sharin nga ma ai.

KASA 6:9

Rai ti mung Kureni mung hte Alexandru mare na Yuda ni lawm ai ‘Shanglawt’ ngu ai tara jawng hte seng ai ni, bai, shanhte hte rau Kiliki hte Asi kaji mung na Yuda amyu masha nkau mi rawt nna Stehpan hte ndang kalang hkat hpang wa ma ai.

ROMA 1:22

Shanhte gaw shanhte a hkum hpe hpaji chye ai ni rai ga ai ngu nna tsun ma ai rai ti mung shanhte gaw angawk angak re ai ni rai nga ma ai.

1 KORINHTU 3:18

Kadai rai ti mung tinang hkum hpe hkum hkalem nga myit ga. Nanhte hta na marai langai ngai ndai mungkan a madang hku nna tinang hkum hpe hpaji byeng-ya rawng nga nngai nga nna grang a yang gaw, hpaji byeng-ya rawng ai wa majing tai na matu angawk angak re ai masha tai wa u ga.

1 KORINHTU 4:10

Hpa majaw nga yang, anhte gaw Hkristu a majaw mana angawk ni rai nga ga ai, nanhte mahtang Hkristu hte langai sha rai nga ai hpaji rawng ai ni rai nga myit dai! Anhte gaw n-gun n ja ga ai, nanhte mahtang n-gun ja myit dai; anhte arawng hpoi saga ai, nanhte mahtang hpung rawng ai ni rai nga myit dai.

KOLOSE 2:8

Hkristu a hkang da ai kaw na n re ai sha, shinggyim masha ni a matsun maroi ga hkan nna akyu n rawng ai myit sawn hpaji hku nna hkalem hkalau ai lam hte mung, lamu ganghkau n-gawn tawa hta nga ai nat hpara ni kaw na pru ai sharin shaga ai lam ni hte mung, kadai mung nanhte hpe mayam n shatai myit ga, sadi nga mu.