KASA 13:31 - Jinghpaw Common Language Bible 2009

³¹ Bai shi gaw Galile mung kaw nna Yerusalem de shi hte rau lung wa ai ni hpe, nhtoi tsawmra wa na hkra shi hkum shadan dan mu ai. Shanhte gaw ya shi a Israela amyu masha ni a man e shi a matu sakse ni tai nga ma ai.

Jinghpaw Hanson Version Bible

³¹ Galile mung kaw nna Yerusalem mare de shi hte rau lung wa ai ni ngu ai, mung masha ni a man e ya shi a sakse tai nga ai ni, nhtoi tsawmra na hkra shi hpe mu lu masai.

KASA 13:31 ပူးပေါင်းရင်းမြစ်များ

MAHTE 28:16

Dai sape shi langai hte gaw, Yesu shanhte hpe hkang da ai Galile mung na bum de lung wa ma ai.

LUKA 24:48

Nanhte ni gaw ndai lam ni a sakse ni rai nga myit dai.

YAWHAN 15:27

Nanhte mung, shawng nnan kaw nna ngai hte rau nga nga manit dai majaw, nye a lam sakse hkam ya na marin dai, ngu mu ai.

KASA 1:11

“Galile masha ni e, nanhte dai kaw hpa rai tsap nga nna lamu de naw dawng yu nga myit ta? Dai Yesu gaw nanhte a man na sumsing lamu de shalun la ai zawn, dai hku bai du na ra ai,” ngu nna tsun mu ai.

KASA 1:22

Dai wa gaw hkalup sara Yawhan a hkalup hte seng ai mungga hkaw tsun ai ten kaw nna, sumsing lamu de Madu Yesu hpe anhte kaw na shalun la hkrum ai ten du hkra Madu Yesu hte, rau hkawm rau sa ai anhte ni hta lawm ai wa langai mi rai ra ai.”

KASA 1:3

Yesu gaw si hkam ngut ai hpang, nhtoi mali shi ya laman kasa ni hpe law law lang shi a hkum shadan dan nna, shi asak hkrung nga ai lam kam ging ai sakse ni hpe madun dan sai. Kasa ni mung shi hpe mu nna, shi shanhte hpe Karai Kasang a Mungdan lam hkaw tsun dan mu ai.

KASA 1:8

Rai ti mung dai Chyoi Pra ai Wenyi nanhte a ntsa e du jang, nanhte n-gun atsam lu la na marin dai rai nna, nanhte gaw Yerusalem mare hte Yuda mung ting, Samari mung hte lamu ga shingjut shingnaw ni htum hkra nye a sakse ni tai na marin dai,” ngu nna shanhte hpe tsun mu ai.

KASA 10:39

Israela mungdan hta mung, Yerusalem mare hta mung, Madu shi galaw hkawm sa ai amu ni yawng mayawng a sakse ni, anhte rai nga ga ai. Dai wa hpe nan shanhte hpun hta hpri hte dit nna jen sat kau nu ai.

KASA 10:41

Shing rai shadan dan ai gaw masha shagu hpe n rai, sakse a matu nga nna Karai Kasang e tau hkrau nna lata san da ai anhte ni a man e sha shadan dan mi ai. Anhte gaw shi si ai kaw na bai hkrung rawt wa ai hpang shi hte rau lu rau sha ai ni rai ga ai.

KASA 2:32

Dai Yesu hpe Karai Kasang jahkrung sharawt la wu ai rai nna anhte yawng mung dai lam a sakse ni rai nga ga ai.

KASA 3:15

Nanhte gaw asak jaw ya lu ai wa hpe gaw sat kau myit dai, rai ti mung Karai Kasang gaw shi hpe si ai kaw na sharawt la nu ai rai nna anhte gaw dai lam a sakse ni rai nga ga ai.

KASA 5:32

Anhte mung ndai lam ni a sakse rai nga ga ai; Shi a mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte a sakse rai nga ai,” ngu mu ai.