KASA 13:23 - Jinghpaw Common Language Bible 2009

²³ Karai Kasang gaw, shi a ga sadi nga ai hte maren, Israela amyu masha ni a matu hkye hkrang la ai Yesu hpe Dawi wa a amyu matu kaw na paw pru shangun wu ai.

Jinghpaw Hanson Version Bible

²³ Dai wa a amyu matu hta na, Karai Kasang gaw, ga ndat nga ai hte maren, Israela masha ni a matu, Hkye hkrang la ai Madu Yesu hpe, paw pru shangun wu ai.

KASA 13:23 ပူးပေါင်းရင်းမြစ်များ

2 SAMUELA 7:12

Nang si mat nna na a nji nwa ni hte rau lup makoi kau ai hkrum jang, na a shadang sha langai ngai hpe hkawhkam shatai ya let shi a mungdan hpe ngai shagrin shangang ya na we ai.

SHAKAWN KUNGDAWN 132:11

Dai Madu gaw, “Ngai na a nsha ni hta na marai langai ngai hpe hkawhkam shatai na we ai, shi gaw na a hkang hta up hkang na ra ai. Lama rai nna, na a nsha ni nye a ga shaka hte shanhte hpe ngai jaw ai hkang da ai ga ni hpe, hkan sa nga ai rai yang chyawm gaw shanhte a kasha ni hpe mung, na a hkawhkam hkringhtawng hta prat dingsa hkawhkam tai lu na mara ai,” nga nna Dawi hpe nang dagam ga sadi tawn da nit dai hpe nang bai nhtang dawm kau na ndai n rai.

ESAIA 11:1

Dawi a hkawhkam amyu matu gaw kran kadawng kau hkrum ai hpun hte bung nga ai; rai ti mung ndu kaw nna nnaw nnan prut lung wa ai zawn hkawhkam nnan langai mi gaw Dawi a matu mara ni kaw na paw pru wa na ra ai.

ESAIA 11:10

Dawi a hkawhkam aru asai kaw nna hkawhkam nnan gaw masha amyu baw ni a matu masat kumla tai na ra ai nhtoi gaw du wa nga ai. Shanhte gaw shi a hkawhkam htingnu mare hta zup hpawng nna shi hpe shagrau sha-a na mara ai.

ESAIA 43:11

“Ngai chyu sha dai Madu rai nga nngai, ngai chyu sha nang hpe hkye la lu ai wa rai nga nngai.

ESAIA 45:21

Tara rung hta na a amu sa shawn u; mara shut ai ni gaw shanhte shada da jahkrup hkat mu ga. Moi chyaloi nhkoi kaw nna byin mat wa sai lam ni hpe kadai tau tsun lu a ni? Shi a amyu masha ni hpe hkye la ai Karai Kasang ngu ai dai Madu ngai wa rai nga ai, n rai ni? Karai shaje n nga nga ai.

ESAIA 7:13

Dai lam hpe Esaia gaw, “Ya chyawm gaw Hkawhkam Dawi a matu mara ni e, madat mu. Masha a hkam sharang ai hpe myit shadaw ya ai gaw n kaja nga ai-nanhte gaw Karai Kasang a hkam sharang ai hpe mung myit shadaw ya mayu nga myit ni?

YEREMIA 30:9

Shing rai na malai, shanhte gaw shanhte a Madu Karai Kasang rai nga ai ngai hpe mung, hkawhkam hku nna hkaw shadun hkrum na Dawi a aru arat hpe mung daw jau wa na mara ai.

AMO LAIKA (AMOS) 9:11

Dai Madu gaw, “Ngai gaw daw hten mat ai nta langai zawn rai nga ai Dawi a mungdan hpe bai gaw gap da ai shaloi dai nhtoi du wa na ra ai. Ngai gaw de a bunghku ni hpe bai lajang ai hte dai hpe bai gaw gap da na nngai. Ngai gaw dai hpe bai gaw gap ai hte moi na zawn bai de da na nngai.

ZEHKARIA 9:9

Ziun amyu masha ni e, kabu gara nga mu, kabu gara nga mu! Yerusalem amyu masha ni e, kabu gara jahtau garu nga mu! Yu mu, nanhte a hkawhkam wa gaw nanhte hpang de sa wa nga ai! Shi gaw padang ninglaw hte awng dang ai lam lu la nga ai, rai ti mung shagrit shanem ai myit hte lawze ntsa e jawn nga ai- lawze kasha langai a ntsa e, lawze kanu a kasha a ntsa e jawn nga ai.

MAHTE 1:1

Ndai gaw Abraham a aru arat rai nga ai Dawi a matu mara Yesu Hkristu a labau gawn ai hta lawm ai kaji kawa ni a mying jahpan rai nga ai.

MAHTE 1:21

Shi gaw shadang sha shangai na ra ai rai nna, nang shi a mying hpe, Yesu ngu nna shamying lu na rai nga ai; hpa majaw nga yang, shi a amyu hpe tinang a yubak mara kaw na hkye hkrang la na shi rai nga ai,” ngu wu ai.

MAHTE 21:9

Yesu a shawng e sa wa ai ni hte hpang e hkan nang ai masha wunawng ni gaw, “Dawi a Kasha a hpung shingkang hpe shakawn mu! Madu a mying nsang hte du sa ai wa gaw a nga ai law! Karai Kasang a hpung shingkang hpe shakawn kungdawn nga mu law!,” nga nna jahtau garu ma ai.

MAHTE 22:42

“Nanhte gaw Meshia a lam kaning ngu myit nga myit ta? Shi gaw gade a kasha rai nga a ta?,” ngu nna san mu ai. Shanhte gaw, “Dawi a Kasha rai nga ai,” ngu mu ai.

LUKA 1:69

Shi a shangun ma Dawi a aru arat hta na anhte a matu n-gun atsam rawng ai Hkye la Madu jaw ya mani ai.

YAWHAN 4:42

Dai masha ni gaw, dai num sha hpe, “Ya gaw na a ga majaw sha kam sham ai n rai saga ai, shi a mungga hpe anhte nan na la lu nna, ndai wa gaw mungkan ga a hkye hkrang la ai Madu majing rai nga ai hpe anhte chye saga ai,” ngu mu ai.

YAWHAN 7:42

Meshia gaw, Dawi a amyu lakung kaw na rai na ra ai, nga nna mung Dawi nga lai wa ai Betlehem mare kaw na she paw pru na ra ai, nga nna mung, Chyum Laika hta tsun nga ai n rai ni?,” nga nna tsun hkat ma ai.

KASA 13:32

Lahkawng ngu na Shakawn Kungdawn laika hta, ‘Nang gaw ngai Sha rai nga ndai; Dai ni nan nang hpe kasha aya ngai jaw sade ai,’ nga nna ka da nga ai hte maren,

KASA 2:30

Dai wa gaw myihtoi langai mi rai nga ai rai nna shi a amyu matu hta na langai wa mi hpe Hkawhkam tai na matu san da na nga nna Karai Kasang dagam ga shaka tawn da sai lam shi chye wu ai majaw,

KASA 3:26

Dai rai nna nanhte langai hte langai tinang a n hkru n shawp ai lam ni hta na myit malai kayin wa ai hte shaman chyeju hkam la lu mu ga nga Karai Kasang gaw shi a shangun ma hpe paw pru shangun ai hte nanhte hpang de shawng shangun dat ya sai,” ngu nna tsun mu ai.

KASA 4:12

Shi hta shaje hkye hkrang la ai lam n nga sai. Anhte hkye hkrang la ai kaw du lu na matu sumsing lamu a npu shinggyim masha ni hta jaw ya ai mying nsang shaje kanang mung n nga sai,” ngu nna htan wu ai.

ROMA 1:3

Dai Kabu Gara Shiga gaw Karai Kasang shi a Kasha anhte a Madu Yesu Hkristu a lam rai nga ai. Dai Madu gaw shinggyim masha labau hku gawn yang, Dawi a aru arat kaw na rai nga ai.

ROMA 11:26

Shing rai Israela masha ni yawng hte gaw hkye hkrang la ai hkrum na mara ai. Dai hte maren Chyum Laika hta, “Ziun kaw na hkye hkrang la ai wa paw pru na ra ai rai nna Yaku a aru arat ni kaw na n hkru n shawp ai lam mahkra hte hpe yeng seng kau na ra ai.

TITU 1:4

Madu Yesu hpe anhte hte maren kam sham ai hta rau rum nga ai ngai sha majing re ai Titu hpang de ngai ndai laika hpe ka shana dat nngai. Kawa Karai Kasang hte anhte a hkye hkrang la ai Madu Yesu Hkristu gaw nang hpe chyeju hte ngwi pyaw ai lam jaw ya u ga law.

2 PETRU 1:1

Yesu Hkristu a mayam hte, kasa tai nga ai, ngai Simun Petru gaw, anhte a Karai Kasang hte hkye hkrang la ai Madu Yesu Hkristu a ding hpring ai lam hta anhte zawn hpu la ai makam masham lu la nga ai ni hpang de ga shana dat nngai.

2 PETRU 1:11

Dai lam hku hkan sa myit yang gaw, anhte a Madu hte hkye hkrang la ai Yesu Hkristu a htani htana re ai mungdan de shang lu na ahkang nanhte hpe hpring hpring tsup tsup jaw ya na marin dai.

2 PETRU 2:20

Lama rai nna masha ni gaw nanhte a hkye hkrang la ai Madu Yesu Hkristu hpe chye chyang ai a marang e mungkan ga a matsat shabat n-gun atsam kata na lawt lu sai hpang kalang mi bai matsat shabat lam e dang kau hkrum ai rai yang, dai ni a hpang na byin da gaw shawng na hta grau sawng mat wa sai.

2 PETRU 3:18

Nanhte gaw anhte a hkye hkrang la ai Madu Yesu Hkristu a chyeju hte shi hpe chye chyang ai lam hta matut nna galu kaba kunghpan sa wa myit ga; ya e mung, htani htana prat ding sa e mung, Yesu Hkristu kaw hpung shingkang anga nga u ga law.

2 PETRU 3:2

Chyoi pra ai myihtoi ni moi shawng de tsun dan ai ga hpe mung, nanhte a kasa ni a lata hku nna hkye hkrang la ai Madu hkang da ai ga ni hpe mung ngai nanhte hpe bai myit dum shangun mayu nga nngai.

1 YAWHAN 4:14

Mungkan ga a hkye hkrang la ai Madu tai u ga, Kawa gaw dai Kasha hpe shangun dat wu ai lam anhte mu lu sagaw ai hte sakse hkam ga ai.

YUDA 1:25

anhte a langai sha rai nga ai Karai Kasang hkye hkrang la ai Madu kaw anhte a Madu Yesu Hkristu a marang e, hpung shingkang daru magam hpung dagu hte ahkang aya, chyi nma pri npra aten kaw nna, ya e rai ti mung, htani htana prat dingsa e rai ti mung anga nga u ga law. Amen.

SHINGRAN 22:16

“Ngai Yesu gaw, Hpung kata hta nga nga ai nanhte hpe ndai lam ni tsun shana sakse hkam ya u ga, ngu nna nye a lamu kasa hpe ngai shangun dat nngai. Ngai gaw Dawi a lakung kaw na yu hkrat wa ai wa re. Htoi tu ai jahpawt manap na nhtoi gintawng rai nngai.