JAW JAU 17:7 - Jinghpaw Common Language Bible 2009

⁷ Israela amyu masha ni gaw prang yang hkan e shanhte a yam nga ni sat let bainam nat matse ni hpe nawng jau ai hku dai Madu hta sadi sahka loi mi pyi n nga lu na myit dai n rai. Israela amyu masha ni gaw ndai hkang da ai matsun maroi ga hpe prat mi hte prat mi madat mara shadik shatup lu na rai ma ai.

Jinghpaw Hanson Version Bible

⁷ Dai hta kaga, namla hpe tinang a hkungga sa jaw nna, hpye ai amu hkan galaw ai zawn, htawm hpang de galaw lu na n rai. Dai gaw, shanhte a shu mashi shu masha prat dingsa madat mara nga na ga matsun rai nga ai.

JAW JAU 17:7 ပူးပေါင်းရင်းမြစ်များ

2 HKAWHKAM LABAU 11:15

Yeroboam gaw tara maigan masha ni a nawku shara ni hta daw jau na matu mung, nat matse ni hpe nawku na matu hte dumsu usu hkrang hte shi galaw da ai hpara sumla ni hpe nawku daw jau na matu shi a hkinjawng ni hpe nan san tawn da wu ai.

SHAKAWN KUNGDAWN 106:37

Shanhte gaw shanhte a shayi shadang sha ni hpe shagu hkungga hku nna; Hkanan hpara sumla ni hpe nawng ya mu ai.

SHAKAWN KUNGDAWN 106:39

Shanhte galaw ai amu ni hte shanhte hkum hpe awu asin di kau nna; Karai Kasang hta sadi sahka myit n dung mat nga masai.

PRU MAT 22:19

“Yamnga hte kanawn ai wa kadai mung sat kau ai hkrum na rai wu ai.

PRU MAT 22:20

“Dai Madu Ngai hta lai nna hpara shaje hpe shagu hkungga nawng jau ai wa kadai mung si ari daw dan ai hkrum na rai wu ai.

PRU MAT 27:21

Nye a hpung shingkang shanu nga ai Sum kata, Ga Shaka Sumpu a man e grang ai nba grang a shinggan maga e, Arun hte shi a shadang sha ni, dai pyengdin amu hpajang lu na rai ma ai. Dai hpe nye a hpung shingkang shanu nga ai shara hta shana de nna jahpawt du hkra shatu na rai nga ai. Ndai gaw Israela masha ni hte shanhte a matu mara ni htani htana hkan sa na hkang da lam rai nga ai.

PRU MAT 32:8

Shanhte hkan sa na matu ngai hkang da ai lam hta na dam mat wa nhtawm ja shabyawng la let dumsu usu kasha langai galaw la nna dai hpe nawku ai hte shagu hkungga nawng jau ya nga masai. Shanhte gaw dai gaw Egutu mung kaw na shanhte hpe woi shapraw wa ai shanhte a hpara rai nga ai ngu tsun nga masai.

PRU MAT 34:15

Dai mung na masha ni hte jinghku ga shaka hkum tawn da myit; shanhte mahtang tara maigan hpara ni hpe nawku nna dai ni hpe hkungga nawng jau ma ai majaw shanhte hte kanawn na matu, nanhte hpe saw shaga ai hte shanhte a hpara ni hpe nawng jau ya ai lusha hte lau la ai hkrum na rai myit dai.

YEREMIA 3:1

Dai Madu gaw, “Lasha langai ngai gaw shi a madu jan hpe jahka kau nna, num dai gaw shi kaw na pru mat wa ai hte kaga masha wa a madu jan tai ai rai yang, shi gaw dai numsha hpe bai la lu na n rai. Dai zawn re ai amu gaw lamu ga hpe tsep kawp awu asin di nga ai. Rai ti mung, Israela e, nang chyawm gaw sumtsaw law law lu yu nga ndai, ya chyawm gaw nang ngai hpang de nhtang wa mayu nga nit hka!

EZEKELA 23:3

Shan gaw hkawn ram prat e, Egutu mung hta shanu nga ma ai, shaloi shan a hkawn jet ai maka gaw hten mat ai hte shawa num tai wa masai.

EZEKELA 23:8

Shi gaw shi a hkawn jet ai hpe jahten kau nna Egutu mung e shawa num amu galaw hpang ai hte matut galaw nga wu ai. Shi a hkawn ram prat kaw nna lasha ni shi hte rau yup nna shi hpe shawa num zawn di ma ai.

JAW JAU 17:8

Israela masha kadai rai ti mung, shanhte kaw nga nang ai maigan masha kadai rai ti mung, Sum a shang wa chyinghka lam hta jan nna kaga shara hkan dai Madu hpe wan nat hkungga hte kaga shagu hkungga nawng ya ai wa kadai mung,

JAW JAU 20:5

dai wa hte shi a dinghku masha ni hpe mung, ngai hta sadi n dung ai sha shi hte matut mahkai nna Molek hpara hpe nawku ai ni yawng hpe mung ngai hpyen tai nna shi hpe nye a amyu masha ni hta na sumri dan kau na we ai.

JAW JAU 3:17

Israela amyu masha ni kadai mung sau man hte asai sha lu na n rai; dai gaw Israela amyu masha ni yawng shanu nga ai shara shagu hta prat tup hkan galaw shadik shatup na hkang da ai ga matsun rai nga ai.

YAWHAN 12:31

Ndai mungkan ga gaw, ya jang pyi tara jeyang ai hkrum, nga sai. Ya ndai mungkan up ai Duwa gaw shinggan de kabai kau ai hkrum na rai sai.

YAWHAN 14:30

Ya kaw nna ngai nanhte hte ga law law n tsun lu na ni ai; hpa majaw nga yang, mungkan ga a du wa gaw du magang ra ai; dai wa chyawm gaw nye a ntsa e hpa ahkang mung n lu na wu ai.

1 KORINHTU 10:20

Dai hku ngai n tsun mayu nngai. Maigan tawn hkungri kaw nawng jau ai hkungga gaw, Karai Kasang hpe nawng jau ai n rai, nat ni hpe nawng jau nga ma ai, ngu nna ngai tsun mayu nngai. Ngai gaw nanhte hpe nat ni hte kanawn mazum nga ai ni n tai shangun mayu nngai.

2 KORINHTU 4:4

Ndai mungkan ga a n hkru n kaja ai karai wa ngu ai Nat Satan wa gaw shanhte a myit ni hpe ningsin hte ka-up shamak tawn kau ya manu ai majaw, shanhte n kam n sham ma ai. Shi gaw dai Karai Kasang a hkrang bung sumla nan rai nga ai. Hkristu a hpung shingkang a lam dai Kabu Gara Shiga kaw na pru ai nhtoi hpe n mu lu shangun mu ai.

EHPESU 2:2

Dai ten hta nanhte gaw mungkan a n hkru n kaja ai lam hta hkan sa nna lamu ganghkau hpe up ai wenyi numla hte seng ai n- gun atsam a npu e taw nga myit dai. Karai Kasang hpe n madat n mara ai ni gaw, ya ten hta dai wenyi numla a hkang ai kata hta nga nga ma ai.

TARA JAHPRANG 31:16

Dai Madu gaw Mawshe hpe, “Nang gaw kade n na yang si wa na sha rai nit dai. Nang si mat ai hpang amyu masha ni nye a ntsa e sadi sahka myit n rawng mat nna shanhte hte tawn da ai nye a ga shaka hpe jahten kau na mara ai. Shaloi shanhte ngai hpe kau da nhtawm shanhte shang sha na mungdan hta nawku ai maigan hpara ni hpe nawku wa na mara ai.

TARA JAHPRANG 32:17

Shanhte gaw karai jet n re ai ni hpe mung, shanhte a kaji kawa ni galoi mung n chye ai hpara ningnan ni hpe mung, Israela ni galoi mung n madat n mara yu ai hpara ni hpe mung hkungga nawng ya ma ai.

SHINGRAN 9:20

Ndai tsin-yam tsindam hta na lawt lu nna naw ngam nga ai shinggyim masha ni gaw, shanhte galaw ai amu kaw na myit malai n lu ma ai. Shanhte gaw jinat ni hpe mung, myi n mu, na n na lu ai hte n chye hkawm ai, ja, gumhpraw, magri, nlung hte hpun sumla ni hpe nawku ai lam hpe mung n jahkring kau ma ai.