HPILIPI 2:15 - Jinghpaw Common Language Bible 2009

¹⁵ Shing rai yang she nanhte gaw arawn alai hten run nna yubak lu ai ni nga ai ndai mungkan hta mara n kap nna myit masin san seng ai Karai Kasang a kashu kasha majing ni zawn tai wa na myit dai. Shing rai nanhte gaw asak jahkrung ya ai mungga hpe hkaw tsun nga let lamu ting hpe jahtoi ya ai ahtoi hkum ni zawn shanhte a ka-ang e htoi tu nga lu na rai myit dai.

Jinghpaw Hanson Version Bible

¹⁵ shing rai yang mara n rawng nna yubak n kap ai sha, ndai ja la nna myit magaw ai prat a ka-ang e agang chyalang n re ai Karai Kasang a kashu kasha ni nanhte tai wa ai hte,

HPILIPI 2:15 ပူးပေါင်းရင်းမြစ်များ

SHAKAWN KUNGDAWN 122:5

Ndai mare gaw Israela Hkawhkam ni hkaw dung nna, shanhte a amyu masha ni hpe tara jeyang na shara rai nga ai.

PRU MAT 34:35

shanhte gaw shi a myi man ahpraw htoi kabrim nga lu ai hpe mu nga ma ai. Dai hpang dai Madu hpe ga shaga na matu bai shang sa ai aten du hkra, shi a myi man magap hte man magap da da di wu ai.

GA SHAGAWP 4:18

Ding hpring ai ni a hkrun lam gaw jan pru wa ai zawn rai nga ai; dai gaw shani nhtoi hkung wa ai aten du hkra, grau grau nna, htoi leng wa nga ai.

GA SHAGAWP 8:8

Ngai tsun ai lam yawng mayawng hte mung teng nga ai rai nna, n shut hpyit ai hte numshe shang ai lam hpa mung n nga nga ai.

ESAIA 60:1

Yerusalem e, rawt u, ajan zawn htoi tu u; Dai Madu a hpung shingkang gaw na a ntsa e htoi tu nga ai!

Daniela 6:4

Dai hpang kaga reng hkang ai yan hte munggyi ni gaw mungdan ting hpe up hkang nga ai Daniela hta shut ai mara lama mi mu tam lu hkra nga shakut ma ai, rai ti mung Daniela gaw kamhpa mai ai hte myit magaw let galaw shut kau ai amu hpa mung n nga nga ai majaw mara n mu tam ma ai.

MAHTE 10:16

“Madat mu! chyahkyawn ni a ka-ang de sagu hpe zawn, ngai nanhte hpe shangun dat made ai. Dai rai nna nanhte gaw lapu zawn hpaji rawng nna hkrudu zawn myit sumnung shingdi nga mu.

MAHTE 17:17

Yesu htan nna, “Nanhte gaw makam masham n rawng ai hte nhtan shai ai amyu she rai nga myit hka! Nanhte hte rau ngai galoi du hkra nga lu na rai ta? Galoi du hkra, ngai nanhte hpe sharang nga lu na rai ta? Dai la kasha ma hpe ngai hpang de woi sa wa marit,” ngu wu ai.

MAHTE 5:45

Shing rai yang gaw, sumsing lamu e nga ai nanhte a Kawa a kasha ni nanhte tai na marin dai; hpa majaw nga yang, shi gaw n kaja ai ni hte kaja ai masha ni a ntsa e maren sha shi a jan hpe shi mai ya nga ai rai nna, kaja ai galaw ai ni hte n kaja ai galaw ai ni a ntsa e marang jahtu ya mu ai.

MAHTE 5:48

Dai majaw sumsing lamu na nanhte a Kawa gaw kup tsup nga ai hte maren, nanhte mung kup tsup nga mu.

LUKA 1:6

Dai yan gaw Karai Kasang a man e ding hpring ai yan rai nga ma ai. Shan gaw Madu a jep ai tara nga manga hte hkang da mada yawng hpe htep lahti hkan nang ma ai.

LUKA 6:35

Nanhte chyawm gaw, nanhte a hpyen ni hpe tsaw ra mu; hpa mung lu la na n myit mada ai sha hkoi shap ya mu. Shing rai yang, nanhte shabrai kaba lu na hte, Tsaw Htum ai Karai Wa a kasha ni mung nanhte tai na marin dai; hpa majaw nga yang shi gaw chyeju malap kau ai ni hte, n hkru n hkra re ai ni hpe chyeju galaw mu ai.

YAWHAN 5:35

Yawhan gaw pyengdin langai mi zawn tu grung ai hte htoi nga ai rai nna, nanhte gaw shi a nhtoi hta tawng marang mi kabu pyaw nga mayu myit dai.

KASA 2:40

Petru gaw ga kaga law law hte mung sakse hkam nna, “Nanhte gaw nanhte a hkum hpe ndai n hkru ai masha ni hkrum sha nga ai ari hta na lawt pru lu myit ga law!,” ngu nna shanhte hpe shadut shadum jahprang wu ai.

KASA 20:30

Nanhte hta na masha nkau mi gaw masu hkalem ai ga tsun nna kam sham ai ni hpe shanhte hpang de lau la ai aten mung du na ra ai.

ROMA 16:19

Nanhte gaw dai Kabu Gara Shiga hta gade daram myit jung kam sham sadi dung nga myit dai lam masha shagu na chye nga masai. Dai majaw nanhte a matu ngai kabu gara nga nngai. Rai ti mung, nanhte gaw mai kaja ai lam gara re ai hpe chye chyang ai hpaji rawng ai ni tai nhtawm n hkru n kaja ai lam hte tsan gang nna mara n kap ai ni nanhte hpe naw tai shangun mayu nngai.

1 KORINHTU 1:8

Anhte a Madu Yesu Hkristu bai du sa nna tara daw dan ai Nhtoi hta, mara shagun shara n nga hkra, shi nanhte hpe shangang shakang na marin dai.

2 KORINHTU 6:17

Dai rai nna Madu gaw, “Nanhte gaw shanhte hpe tawn kau da lu na hte shanhte kaw na kaga lak nanhte a hkum ni hpe garan jahka kau mu. Awu asin re ai hpe hpa hkum hkra mu, shaloi ngai nanhte hpe hkap la na made ai.

EHPESU 5:27

dai hpung gaw shi hkum nan a matu ap nawng kau ai shaloi e shi a nga manga hta agang chyalang hte kapum kapam re ai hpa mung n lawm ai sha, chyoi pra ai mara n rawng nna hpung shingkang rawng ai hte tsawm htap na matu rai nga ai.

TARA JAHPRANG 32:5

Rai ti mung nanhte mahtang sadi n dung, shi a amyu masha tai na n ging nga myit dai; yubak kap nna masu hkalem ai amyu rai nga myit dai.

HPILIPI 1:10

Dai shaloi she nanhte gaw Hkristu bai du sa ai nhtoi hta n san n seng awu asin re ai lam shagu hta na lawt nna mara n rawng ai ni rai na myit dai.

HPILIPI 3:6

Myit lawm shakut sharang ai lam hpe tsun ga nga yang ngai gaw hpung hpe zingri zingrat ai wa rai nngai. Masha langai mi gaw jep ai Tara hpe hkan sa shadik nna ding hpring ai hpe lu la lu ai nga yang ngai hta mara n kap ai.

1 HTESALONI 5:23

Anhte hpe ngwi pyaw sim sa ai lam jaw ya ai Karai Kasang gaw, nanhte hpe lam shagu hta shachyoi shapra nna, anhte a Madu Yesu Hkristu bai du sa ai shaloi e, nanhte a Wenyi, myit masin hte hkum hkrang ting gaw, mara n kap hkra bau maka nga u ga.

1 TIMOHTI 3:10

Shanhte gaw shawng nnan e chyam dinglik yu ai hkrum nna mara n rawng ai sha awng lawt lai lu ma yang gaw, hpungtau amu gun hpai mu ga.

1 TIMOHTI 3:2

Hpung a ningbaw ningla langai mi gaw, mara n kap ai wa, madu jan langai sha lu ai wa, sadi sahka re ai wa, tinang hkum hpe hkang lu ai wa, masa hte hkrak rai nna asak hkrung ai wa, shi a nta hta tsasam manam ni hpe hkap hkalum daw jau na sharawng ai wa; sharin shaga chye ai wa, rai ra ai.

1 TIMOHTI 5:14

Dai rai nna hpyen ni gaw anhte a lam n kaja ai hku tsun na lam ginjang n nga hkra aprat kaji ai gaida jan ni gaw hkungran nna kashu kasha shangai ai hte shanhte a kun dinghku ni hpe yu lajang nga na hpe ngai grau ra sharawng nga nngai.

1 TIMOHTI 5:20

Kaga ni hkrit kang mat mu ga, mara galaw ai ni yawng hpe shawa a man e daru sharin kau mu.

1 TIMOHTI 5:7

Shanhte hpe kadai mung mara shagun shara n nga u ga, ndai hkang da ai ga ni hte shanhte hpe shadum shahprang nga u.

TITU 1:6

Dai hpung salang wa gaw mara n rawng ai wa, num langai sha lu ai wa, rai ra ai. Shi a kasha ni gaw Madu Yesu hpe kam sham ai ni rai ra ai. Zai ai arawn alai hte ga n madat ai lam hta mying pru ai kashu kasha lu ai wa n rai na.

TITU 2:10

lagu masun la ai baw n galaw mu ga. Shing rai na malai, shanhte gaw galoi mung kaja reng ai hte kangka sadi dung ai ni re ai lam madun dan lu na rai ma ai. Ndai lai ladat hku nna, shanhte gaw tinang galaw ai lam nga manga hta anhte a hkye hkrang la ai Karai Kasang a mungga a ningja hpe shapraw shadan dan lu na rai ma ai.

TITU 2:15

Nang gaw ndai lam ni hpe hkaw tsun sharin shaga u. Nang n-gun jaw shadum shahprang sharin shaga ai shaloi nang lu ai ahkang aya nga manga jai lang u; kadai mung nang hpe n gawn n sawn, n yu kaji mu ga.

HEBRE 7:26

Dai rai nna Yesu gaw anhte hta byin nga ai ra kadawn ai lam ni hpe karum kapa ya ai, anhte a matu hkrak ai Hkinjawng Agyi Kaba wa rai nga ai. Shi gaw chyoi pra san seng nna shi hta shut ai lam shing n rai yubak mara hpa mung n rawng nga ai; shi gaw yubak lu ai ni hta n lawm ai sha ginhka la nna sumsing lamu du hkra shagrau shatsaw da hkrum ai wa rai nga ai.

1 PETRU 2:12

Tara maigan de na ni nanhte hpe n hkru n kaja ai lam galaw ai ni re ngu nna shadu myit yang, nanhte a kaja ai amu mu lu nna dai Madu bai du sa ai Nhtoi hta Karai Kasang hpe shakawn shagrau mu ga, nanhte gaw shanhte a man e nanhte a arawn alai lam hta tsawm htap kup tsup nga myit ga law.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.

2 PETRU 3:14

Dai re majaw nye a manang ni e, nanhte dai nhtoi hpe la nga ai ten hta Karai Kasang a man e nanhte a myit masin san seng nna mara n kap u ga hte shi hta ngwi pyaw sim sa nga lu na matu atsam htum hkra shakut shaja nga mu.

SHINGRAN 2:5

Dai rai nna nang gade daram di hkrat yu mat wa sai lam hpe myit yu u! Na a yubak mara ni kaw na kayin wa nna shawng de na zawn bai hkan sa galaw u. Na a yubak mara ni kaw na bai n kayin wa yang gaw, ngai nang kaw du nna na a pyengdin hpe de a shara na sit kau ya na de ai.

SHINGRAN 3:9

Yu u! Tinang dai Yuda masha rai ga ai nga ti mung Yuda n teng ai sha, Satan a hpung hta lawm ai dai masu ai ni hpe na a lagaw nhpang e ngai shanhte hpe sa naw dingnyawm shangun na mawe ai rai nna, ngai nang hpe tsaw ra nga ai gaw, shanhte chye lu na mara ai.