HPAJI NINGLI 5:1 - Jinghpaw Common Language Bible 2009

¹ Nawku Htingnu de sa wa yang, sadi sahka rai nga u. Dai de sa nna sharin hkam la ai gaw kaja ai hte n kaja ai hpe n chye nna angawk ai ni a nawng jau ai shagu hkungga ni hta grau kaja nga ai.

Jinghpaw Hanson Version Bible

¹ Karai Kasang a nta de shang yang, na a lagaw hpe hkang nga u: kaning rai nme law, madat mara na matu sit sa ai gaw, angawk ai ni a shagu hkungga hta grau kaja nga ai: shanhte gaw tinang galaw ai mara hpe n dum ma ai.

HPAJI NINGLI 5:1 ပူးပေါင်းရင်းမြစ်များ

2 HKAWHKAM LABAU 26:16

Rai ti mung Hkawhkam Uzia gaw n-gun rawng wa jang, myit tsaw myit dap wa ai rai nna dai gaw shi hkrat sum na lam de woi mat wa nga ai. Shi gaw tawn hkungri ntsa e manam pyaw ai baw hpe nat nawng na nga Nawku Htingnu kata de shang nna dai Madu shi a Karai Kasang hpe hkap daw wu ai.

YOBA 22:12

Karai Kasang gaw tsaw htum ai sumsing lamu ni hta nga nga nna; tsaw ai shara hta nga nga ai shagan ni hpe pyi shi naw gum yu nga ai n rai ni?

SHAKAWN KUNGDAWN 89:7

Nang gaw chyoi pra ai ni a hpawng hta hkrit hkungga ai lam hkam la lu nga ndai; shanhte yawng hte gaw nang hpe mau mahka let tsap nga ma ai.

PRU MAT 3:5

Karai Kasang gaw, “Nang de kachyi mi mung hkum sit shanang sa nga et. Nang gaw chyoi pra ai ga ntsa e tsap nga ndai majaw na a kyepdin raw kau u.

PRU MAT 30:18

“Magri mang jarung langai hte hpawn shadun na magri mang ku langai mi mung galaw na rai ndai. Dai hpe Sum hte tawn hkungri lapran hta tawn da nna, hka ja bang na rai nga ai.

GA SHAGAWP 10:19

Ga law law nang shaga magang, yubak shalaw la na grau loi magang rai nna; nang lama, hpaji rawng ai wa rai yang, nang atsin sha nga na ndai.

GA SHAGAWP 15:8

Dai Madu gaw mai kaja ai masha ni a akyu hpyi ga hta awng sharawng nga ai; tara n lang ai masha ni la sa ai shagu hkungga ni hpe shi n dawng nga ai.

GA SHAGAWP 21:27

Tara n lang ai masha ni dai Madu hpe shagu hkungga nawng jau ya ai shaloi, shi dai hpe n dawng nga ai; dai hta grau nna n hkru ai myit akyang hte shanhte nawng jau ai rai yang grau n dawng nga ai.

ESAIA 66:3

“Dai amyu masha ni gaw shanhte awng sharawng ai hte maren galaw ma ai. Shanhte gaw dumsu usu hpe shagu hkungga shatai na matu mung, shinggyim masha hpe shagu hkungga shatai na matu mung sat ma ai; shanhte gaw sagu kasha hpe shagu hkungga nawng nna gwi a du hpe gang daw ma ai; shanhte gaw shadung hkungga nawng ya ma ai, wa asai hpe mung nawng ya ma ai; shanhte gaw manam pyaw ai baw hkungga nawng ma ai, hpara sumla kaw akyu hpyi ma ai. Shanhte gaw matsat shabat re ai nawku lai ni hta sharawng awng ma ai. Dai ni yawng gaw shanhte a matu maren sha rai nga ai.

JAW JAU 10:3

Dai hpang Mawshe gaw Arun hpe, “Da ndai gaw, ‘Ngai hpe daw jau ai ni yawng nye a chyoi pra ai ban hpe hkungga lu na rai nna, nye a amyu masha ni hpe nye a hpung shingkang madun dan na we ai,’ nga nna dai Madu tsun ai gaw ndai zawn re ai lam hpe shi tsun ai re,’” ngu nna tsun wu ai. Rai ti mung Arun mahtang atsin sha nga nga wu ai.

KASA 10:33

Dai majaw, shaloi jang ngai nang hpang de shangun dat nna, ya nang du ai gaw mai kaja nga ai dai rai nna, dai Madu nang hpe hkang da mada hte hpe madat mara la na matu ya anhte yawng ndai kaw Karai Kasang a man e rai nga saga ai,” ngu nna tsun wu ai.

KASA 17:11

Dai mare masha ni gaw Htesaloni masha ni hta grau myit su, myit dam lada ma ai rai nna Pawlu hkaw tsun ai mungga hpe grai shareng hkungga nna myit lawm ai hte madat la ma ai. Shanhte gaw Pawlu yan Sila hkaw tsun dan ai ga hte maren teng n teng chye lu hkra, Chyum Laika hpe shani shagu asawk hti yu nga ma ai.

1 KORINHTU 11:22

Ataw, sha na lu na matu tinang a nta n lu myit ni? Shing n rai Karai Kasang a Hpung hpe n gawn n sawn jahpoi asawng nna, n lu n su ai ni hpe kaya jahkrum ai ga rai myit ni? Ngai nanhte hpe ndai lam hte seng nna kaning ngu tsun na ra ai ngu nna nanhte myit mada myit ta? Ngai nanhte hpe shakawn na rai ni? Kaja wa nanhte hpe ngai shakawn na made ai n rai.

HEBRE 10:26

Hpa majaw nga yang, anhte gaw dai teng man ai lam hpe chye na hkam la ngut sayang me, yubak hpe dingsang galaw dingyang rai nga ga yang gaw, anhte a yubak mara a matu nawng ya na shagu hkungga naw nga sana n rai.

YAKU 1:19

Nye a tsaw ra ai hpu nau ni e, ndai lam matsing tawn da nga mu! Nanhte langai hte langai gaw na la na mahtang lawan nna tsun shaga na hte masin pawt na lam hta hkum tin nga mu.

YAWSHU 5:15

Dai Madu a hpyen luksuk hpe up hkang ai dap up wa gaw shi hpe, “Na a kyepdin raw kau u; nang gaw dai chyoi pra ai ga ntsa e tsap nga ndai,” ngu nna tsun wu ai. Yawshu mung shi tsun ai hte maren galaw wu ai.