HPAJI NINGLI 1:16 - Jinghpaw Common Language Bible 2009

¹⁶ Ngai gaw nye hkraw e, “Ngai gaw nye a shawng e Yerusalem hpe up nga ai ni kadai hta mung hpaji byeng-ya grau lu la ai hte galu kaba ai masha langai tai wa ni ai. Hpaji byeng-ya hte machye machyang hpaji gaw teng teng hpa rai nga ai hpe ngai chye ni ai,” ngu nna tsun ni ai.

Jinghpaw Hanson Version Bible

¹⁶ Ngai gaw, Yerusalem mare hta e, nye a shawng e nga nga ai ni mahkra hta hpaji byeng-ya grau lu la nngai; gaja wa nye a myit masin gaw, zai byeng-ya, hpaji hparat hte chye chyang kaba rawng li ai, nga nna nye a kraw e ngai tsun nngai.

HPAJI NINGLI 1:16 ပူးပေါင်းရင်းမြစ်များ

1 HKAWHKAM 10:7

Rai ti mung nye a myi hte chyaw dai lam ni yawng hpe ngai n sa yu lu dingsa, dai lam hpe ngai kam lu nga nngai n rai. Yu u, de a chyen mi hpe pyi ngai n na yu nngai; na a hpaji byeng-ya hte sut gan gaw ngai hpe tsun dan yu ai hta pyi grau nna law nga ai.

1 HKAWHKAM 4:30

Shawlumon gaw Sinpraw maga de na hpaji rawng ai ni hte Egutu mung na hpaji rawng ai masha ni yawng hta grau nna hpaji rawng nga ai.

1 HKAWHKAM 5:9

Nye a masha ni mung Lebanon kaw nna panglai du hkra mailung ni hpe garawt shayu la nna, dai ni hte wawn shachyaw nhtawm nang lata san da ai shara na hkin-gau de du hkra ngai shayawng yu wa na nngai. Dai yang e, nye a masha ni wawn run nna na a masha ni mahtang dai ni hpe hkap hparan lajang na rai nga ai. Na a maga hku na chyawm gaw nye a masha ni a matu ra ai lusha hpe karum madi shadaw la ya na ngai ra nngai.

2 HKAWHKAM 5:20

Elisha a shangun ma Gehazi gaw, “Nye a madu gaw arai hpa mung n jaw shangun ai sha dat kau nga nu hka! Suri masha wa shi hpe sak jaw ai kumhpa hpe shi la ging nga ai. Dai re ai majaw ahkrung nga ai dai Madu hta shi kaw na arai lama ma sha pyi la lu hkra, shi hpang de ngai hkan kagat nang na nngai,” ngu nna kraw kata e tsun nga ai.

2 HKAWHKAM LABAU 2:12

Sumsing lamu hte ginding aga hpe hpan tawn da ai dai Madu Israela a Karai Kasang hpe shakawn kungdawn mu. Shi gaw dai Madu a matu Nawku Htingnu hte shi a matu hkawhkam htingnu ni hpe ya gap na nga, chye na hkawn hkrang ai nyan hte kung kyang nna hpaji byeng-ya rawng ai kasha Hkawhkam Dawi hpe jaw nu ai.

SHAKAWN KUNGDAWN 4:4

Hkrit gari ai hte yubak galaw ai lam hpe jahkring kau mu; nanhte a yupku ni a ntsa e, azim sha kaleng nga ai shaloi, dai lam hpe sung sung myit yu mu.

SHAKAWN KUNGDAWN 77:6

Ngai shana tup sung sung myit sumru yu nna nga shalai kau nngai; ngai myit aru yu ai hte, ndai lam hpe nye hkum ngai san yu nngai;

HPAJI NINGLI 2:1

Kabu gara ai lam hpe ngai nan ra sharawng ai hte mu tam la na matu daw dan da nngai. Rai ti mung dai mung kaman lila rai nga ai hpe ngai mu ni ai.

HPAJI NINGLI 2:15

Ngai gaw nye a kraw kata e, “Angawk ai ni hta byin wa ai sha, ngai hta mung byin nga ai. Dai re ai majaw hpaji byeng-ya grau rawng ai hta na hpa baw lu la sahka?,” ngu nna tsun ni ai. Ngai chyawm gaw, “Kaman lila hkrai rai nga ai, arai langai mung n rai nga ai,” ngu nna htan we ai.

HPAJI NINGLI 2:9

Rai sa, ngai gaw galu kaba nga ni ai, Yerusalem hta shawng nga nga sai ni mahkra hta grau galu kaba nga nngai; nye a hpaji byeng-ya gaw ngai hpe galoi mung hkrat sum shangun ai n rai.

HPAJI NINGLI 3:17

Ngai gaw nye hkum hpe, “Karai Kasang gaw ding man ai hte n hkru ai amu hpe mung jeyang na ra ai, hpa majaw nga yang, amu shagu, arawn alai shagu gaw shi a masat da ai aten hta byin wa na ra ai,” ngu nna tsun nngai.

YEREMIA 22:14

“Ngai gaw ntsa htap na dam lada ai gawk ni rawng ai nta kaba hpe ngai hkum nan gaw gap na nngai,” ngu nna tsun ai wa gaw dingnye hkrum nga ai. Dai rai nna, shi gaw shi a nta hta hkuwawt waw nhtawm arit hpun hte dai hpe kum nna hkyeng ai tsi hte chya da nga ai.

Daniela 4:30

shi gaw, “Yu u, Babelon mung gaw kade wa galu kaba nga a hka! Dai gaw nye a hpung dagu, n-gun atsam, hpung shingkang dan hkung ai hte hpung rawng ai lam madun dan na matu nye a mare daju shatai na ngu, ngai de da ai mare rai nga ai,” ngu nna tsun wu ai.

HEBRE 5:14

Ja ai shahpa chyawm gaw kaba sai ni a matu rai nna, shanhte gaw hkan sa galaw shaman ai hku nna kaja ai hte n kaja ai hpe ginhka maram chye ai ni rai ma ai.