HOSEA 8:5 - Jinghpaw Common Language Bible 2009

⁵ Ngai gaw Samari mare masha ni nawku ai ja dumsu hpe n dawng nngai. Ngai dai ni hpe masin yu kahtet nngai. Shanhte gaw shanhte a hpara sumla nawku htung lai len hpe galoi du hkra n kau ai nga nga na ma ai kun?

Jinghpaw Hanson Version Bible

⁵ Samari e, na a dumsu kasha hpe shi kau da nu ai; nye a pawt sindawng ai myit, nawku ai ni hpe kahtet nga ai: shanhte gaw gaten du hkra, san seng ai myit n rawng na ma hka?

HOSEA 8:5 ပူးပေါင်းရင်းမြစ်များ

2 HKAWHKAM LABAU 13:8

Ya mung nanhte gaw Dawi a amyu matu ni hpe dai Madu jaw tawn da ai hkawhkam ahkang aya hpe hkap daw na maw mawn nga myit dai. Nanhte gaw luksuk kaba lu nga myit dai hte nanhte a karai ni tai ya na matu Yeroboam galaw da ai aja dumsu kasha lahkawng mung nanhte hte rau rai nga myit dai.

SHAKAWN KUNGDAWN 19:13

Myit shadang ai yubak mara ni kaw na mung, ngai hpe shim hkra bau sin ya e; dai ni gaw ngai hpe n up lu mu ga. Shing rai, ngai gaw hkum tsup wa nna n hkru ai yubak kaw na mung lawt lu na nngai.

GA SHAGAWP 1:22

“Angawk ai masha ni e! Nanhte gaw gade na hkra, angawk angak rai mayu nga myit ni? Nanhte gaw gade na hkra, machye machyang hpaji hpe mani asawng ai hta kabu sharawng nga na ngu nga myit ni? Nanhte gaw galoi mung n hprang sana manit dai kun?

ESAIA 45:20

Dai Madu gaw, “Hkrat mat ai hkawseng mungdan hta naw ngam nga ai masha amyu baw ni e, sa hpawng marit; jep sagawn na matu nanhte nan du marit! Shanhte a hpun hpara sumla ni hte hpai madun ai ni hte shanhte hpe n hkye lu ai karai ni kaw akyu hpyi ai ndai amyu masha ni gaw hpa nan n chye nga ma hka!

YEREMIA 13:27

Shi gaw nang galaw ai shi n dawng ai amu ni hpe mu nu ai. Htingbu wa a madu jan hpe hkan asoi yu nna ngang katu ai lasha wa zawn mung, gumra u yi hpang hkan ai lau gung zawn mung, kawng ni a ntsa hkan hte pa layang hkan e gap da ai tara maigan hpara ni hpang de nang hkan nga ai hpe shi mu nu ai. Yerusalem amyu masha ni e, nang gaw dingnye hkrum nga ndai! Galoi mi she nang san pra wa na rai nga n ta?

YEREMIA 4:14

Yerusalem e, na a myit masin kaw na n hkru ai hpe kashin kau u, shaloi hkye hkrang la hkrum na ndai. Nang gaw kade na hkra yubak hte seng ai myit mang lam ni hpe matut myit na ngu wu ni?

YEREMIA 48:13

Dai hpang, Israela amyu masha ni gaw shanhte kam hpa nga ai Behtela hpara hta kaya dum ma ai zawn, Moba masha ni mung shanhte a Hkemosha hpara a majaw kaya dum na mara ai.

HOSEA 10:5

Samari mare hta shanu nga ai masha ni gaw hkrit gari nna Behtela mare na ja dumsu mat mat ai majaw sharung shayawt na mara ai. Shanhte hte hpara sumla daw jau ai hkinjawng ni mung dai hta hkrap ngu hkrap ngoi na mara ai. De a hkik hkam ai aja shingkang hkoi mat jang, shanhte hkrap agru na mara ai.

HOSEA 10:8

Israela amyu masha ni nawku ai hpara sumla ni hpe tawn da ai Awen kawng pungding nawku shara ni mung jahten kau ai hkrum na ra ai. Tawn hkungri ntsa hkan e mung ju hpun ni hte tsingdu tu lim kau na ra ai. Shaloi amyu masha ni gaw bum ni hte kawng ni e, “Anhte hpe makoi da mi! Anhte hpe ka-up da mi!,” ngu nna jahtau tsun na mara ai.

HOSEA 13:2

Shanhte gaw masha a myit hte kumla shapraw nna masha a lata hte galaw da ai gumhpraw hpara sumla ni, nawku na matu nhprang arai ni hte galaw ai hkrang sumla ni hpe galaw let yubak hpe naw matut shut nga ma ai. Dai hpang shanhte gaw, “Shanhte hpe shagu hkungga nawng ya mu!,” ngu nna tsun ma ai. Masha gaw ndai hpara sumla ni hte mung, dumsu usu hkrang re ai hpara sumla ni hpe kaning rai pup lu na rai hka!

HOSEA 8:6

Lata sama hpaji rawng ai Israela masha langai mi hpara sumla galaw nga ai. Dai gaw kaja wa karai kasang langai n rai nga a hka! Samari mare hta nawku ai aja dumsu agrawp mani kau ai hkrum na rai hka!

AMO LAIKA (AMOS) 8:14

Samari a hpara sumla ni hte dagam ai ni gaw, ‘Dan a hpara shing n rai Berasheba a hpara hte ndai amyu masha ni hkrat mat nna bai n rawt wa lu na mara ai,” nga nna tsun ma ai.

MIHKA 1:7

Shi a manu dan hpara sumla ni yawng, adaw atang rai mat hkra agrawp kau hkrum nna, htingnu na shawa num ni hpe jaw da ai arai yawng wan hta nat kau nhtawm de a hpara sumla ni yawng katsi katsang sumpum mat na ra ai. Samari gaw shi a ngamu ngamai lam a matu ndai ni yawng hpe lu tawn ai rai tim, ya gaw, shi a gumlau hpyen ni htingnu na shawa num ni hpe shara shagu hkan shachyam na matu shanhte hpe woi shapraw mat wa na mara ai,” ngu nna tsun ai.

KASA 7:41

Dai hpang shanhte gaw dumsu kasha sumla galaw nna dai sumla hpe hkungga jaw let shanhte galaw ai amu hpe shagrau sha-a ai kabu gara poi kaba galaw ma ai.

TARA JAHPRANG 32:22

Nye a masin kahtet ai gaw wan zawn grung wa nna, ginding aga ntsa na arai shagu hpe hkru kau na ra ai. Dai gaw mungkan ga a lawu tsang de du hkra dep nna, bum ni a npawt nhpang ni hpe hkru kau na ra ai.