HOSEA 7:7 - Jinghpaw Common Language Bible 2009

⁷ “Shanhte a pawt sindawng ai gaw kahtet kang nga ai rai nna, shanhte gaw shanhte a up hkang du ni hpe sat kau ma ai. Shanhte a hkawhkam ni langai hpang langai lagyim sat kau hkrum nga manu ai, rai ti mung kadai mung karum la na matu ngai kaw akyu n hpyi ma ai.”

Jinghpaw Hanson Version Bible

⁷ Shanhte nlang hte gaw, wan htung zawn kahtet nga nna, tinang a tara agyi ni hpe hkru kau manu ai; shanhte a hkawhkam ni yawng, kadawng mat masai: shanhte hta na, ngai hpe shaga ai wa langai mi n nga ai.

HOSEA 7:7 ပူးပေါင်းရင်းမြစ်များ

1 HKAWHKAM 15:28

Yuda Hkawhkam Asa hkaw dung ai masum ning rai jang, dai lam byin wa ai rai nna, Basha gaw Israela Hkawhkam Nadab a hkang hta hkaw galai dung nga ai.

1 HKAWHKAM 16:18

Dai mare hkrat mat ai hpe Zimri mu jang, hkawhkam htingnu a kata hpyen dap de shang sa nhtawm dai hkawhkam htingnu hpe nat kau ai hte shi mung dai wan shinglet hta galip si mat wu ai.

1 HKAWHKAM 16:22

Hpang jahtum e, Omri a masha ni mahtang dang kau ma ai; Tibni si mat sai rai nna Omri mahtang hkawhkam tai wa sai.

2 HKAWHKAM 10:14

Yehu gaw shi a masha ni hpe, “Shanhte hpe chyahkrung rim la mu!,” ngu nna hkang dat wu ai. Dai rai nna shanhte mung wang rim la nhtawm dai yang na nhkun makau e yawng hkra marai mali shi lahkawng hta na langai mi hpe mung n shalawt kau dat ai sha, sat sharu kau mu ai.

2 HKAWHKAM 10:7

Yehu a laika lu la shajang ai shaloi, Samari mare na ningbaw ni gaw Ahab a amyu matu sanit shi hte yawng hpe sat kau nhtawm shanhte a ningbaw ni hpe ka hta bang nna Yezrela mare Yehu hpang de shagun dat mu ai.

2 HKAWHKAM 15:10

Yabesha a kasha Shalum gaw Hkawhkam Zehkaria hpe mayun maw mawn nhtawm Iblim shara e shi hpe sat kau nna shi a hkang hta hkaw galai dung let hkawhkam tai wa sai.

2 HKAWHKAM 15:14

Gadi a kasha Menahem gaw Tiza mare kaw nna Samari de lung wa nhtawm Shalum hpe gyam sat kau nga ai. Shi gaw shi a hkang hta hkaw dung let hkawhkam tai wa sai.

2 HKAWHKAM 15:25

Shi a hpyen du, Remalia a kasha Peka gaw Gilead mung na masha manga shi hte rau shi hpe gumlau na maw mawn nhtawm Samari mare na hkawhkam htingnu kata na dap kata e Pekahia hpe gyam sat kau wu ai. Shi gaw dai wa a hkang hta hkaw galai dung nna hkawhkam tai wa sai.

2 HKAWHKAM 15:30

Yuda Hkawhkam Uzia a kasha Yohtam hkaw dung ai hkun ning hta, Ela a kasha Hoshea gaw Hkawhkam Peka hpe gumlau rawt nna shi hpe mayun gyam sat kau nhtawm hkaw galai dung let hkawhkam tai wa sai.

2 HKAWHKAM 9:24

Yehu wa gaw shi a ndan hpe n-gun mahkra hte gap dat wu yang, pala gaw Yoram a shingma hku shang mat wa nhtawm salum e wa hkra ya nga ai. Yoram gaw shi a hpyen leng hta kadawng si mat wu ai.

2 HKAWHKAM 9:33

Yehu gaw shanhte hpe, “Shi hpe kabai jahkrat dat mu!,” ngu nna tsun wu ai. Shanhte mung kabai jahkrat dat mu ai rai nna shi a asai gaw nta shakum hta mung, gumra ni hta mung gamang hkra nga ai. Yehu gaw shi a gumra hte rau shi a mang ntsa hku gawt lai mat wa nhtawm,

YOBA 36:13

Karai kata ni gaw masin apawt nga nna shanhte ari jaw hkrum yang pyi, karum la na matu akyu hpyi ma ai n rai.

SHAKAWN KUNGDAWN 14:4

Madu gaw, “Shanhte n chye na ma ai kun? Ndai n hkru n shawp ai amu galaw ai ni yawng hte wa gri magra re ai ni rai nga ma ai kun? Shanhte gaw nye a amyu masha ni hpe hpya sha let nga nga ma ai, ngai kaw galoi mung akyu n hpyi yu ma ai,” nga nna san nga ai.

ESAIA 43:22

Dai Madu gaw, “Rai ti mung Israela e, nang nye a lam hki ba mat nit dai; nang gaw ngai hpe nawku ndai n rai.

ESAIA 64:4

Shi hpe myit mada nga ai ni a matu dai zawn re ai magam amu galaw ai nang hte bung ai Karai Kasang hpe kadai galoi mung n mu yu, n na yu ga ai.

ESAIA 64:6

Anhte yawng gaw yubak mara kap ai ni rai nga saga ai; anhte a kaja htum ai magam bungli ni pyi npawt kaw nna ndung hkren matsat shabat amu hkrai rai nga ai. Anhte galaw shut ai yubak mara ni a majaw, anhte gaw nyui mat nna nbung e shapoi kau ai hpun lap ni zawn rai nga ga ai.

ESAIA 64:7

Akyu hpyi let nang kaw kayin wa ai masha kadai n nga nga ai; karum la na matu nang kaw kadai n sa nga ai. Nang gaw na hkum hpe anhte kaw na makoi kau nhtawm anhte galaw ai yubak mara ni a majaw anhte hpe kau da nga nit dai.

ESAIA 9:13

Chyahtum Chyalai N-gun rawng ai dai Madu gaw shanhte hpe ari jaw tim pyi, Israela amyu masha ni myit malai ma ai n rai, shanhte shi kaw nhtang wa ma ai n rai.

EZEKELA 22:30

Nye a masin kahtet ai gaw dai mung hpe jahten kau na matu hkyen nga ai shaloi, ngai gaw bunghku gaw gap lu na masha langai ngai, daw agrawp mat sai bunghku shara ni hta tsap lu ai masha langai ngai hte mungdan hpe makawp maga lu ai masha langai ngai hpe tam yu nngai, rai ti mung ngai gaw kadai hpe mung n mu nngai.

Daniela 9:13

Mawshe a Tara hta ka da ai ari ahpri yawng anhte hpe jaw nga ndai. Rai ti mung, ya chyawm gaw, O Madu anhte a Karai Kasang e, anhte a yubak ni kaw nna kayin mat wa nhtawm na a teng man ai lam hta hkan sa ai hku nang hpe awng sharawng shangun ga ai n rai.

HOSEA 13:10

Nanhte gaw hkawhkam langai hte ningbaw ni hpe hpyi myit dai; rai ti mung amyu baw hpe shanhte kaning rai hkye la lu na rai ma ta?

HOSEA 5:15

“Ngai gaw shanhte shut kau ai yubak ni a matu law ram hkra re ai nni nkri hkam sha ai hte ngai hpe hkan tam wa ai aten du hkra, nye a amyu masha ni hpe kau da na nngai. Shanhte hkam sha ai nni nkri a majaw shanhte ngai hpe mahkoi tam shakut wa na ma ai nhten.”

HOSEA 7:10

Israela amyu masha ni a myit tsaw myit dap ai gaw shanhte a matu sari jahpoi hkrum na lam rai nga ai. Lam magup byin hkrum hkra nga ma tim, shanhte gaw dai Madu shanhte a Karai Kasang ngai hpang de n kayin wa ma ai.

HOSEA 7:14

Shanhte gaw ngai kaw myit malang ai hte akyu n hpyi ma ai, rai ti mung shing rai na malai, shanhte gaw ga de gum dagup nhtawm tara maigan masha ni galaw ai zawn hkrap agru ma ai. Shanhte gaw nai mam nsi naisi hte sabyi hpyi ma ai shaloi, shanhte hkum hpe tara maigan ni zawn gadoi jahpye ma ai. Shanhte hpa baw gumlau nga ma hka!

HOSEA 8:4

“Nye a amyu masha ni hkawhkam ni hpe lata la nga ma ti mung, shanhte myit ra ai hku galaw ma ai. Shanhte gaw ningbaw ni hpe san da ma ti mung, nye a myit ra ai hku n rai ma ai. Shanhte gaw hten byak ai hkrum hkra nga, aja, gumhpraw ni hpe la shapraw nna hpara sumla ni galaw ma ai.

MIHKA 2:1

Masu magaw ga tsun ai ni hte n kaja ai hku maw mawn nga ai ni a matu dai gaw kade sha hkrit hpa rai nga a hka! Shanhte gaw ahkaw ahkang pru wa ai hte rau, jahpawt nhtoi htoi wa yang shanhte maw mawn da ai n hkru n kaja ai amu ni hpe galaw ma ai.