HOSEA 7:1 - Jinghpaw Common Language Bible 2009

¹ “Ngai gaw nye a Israela amyu masha ni hpe shamai shatsai nna shanhte hpe bai ngamu ngamai shangun mayu ai aten shagu, ngai mu mada ai lam yawng gaw shanhte a n shawp n kap ai amu hte shanhte galaw ai n hkru lam hkrai rai nga ai. Shanhte shada da masu hkalem hkat ma ai; shanhte gaw nta shang hpya nna arai lagu la ma ai; shanhte gaw nmaw lam hkan nga ai masha ni hpe kashun kashe hpya sha nga ma ai.

Jinghpaw Hanson Version Bible

¹ Ngai gaw Israela hpe shamai ya mayu yang, Ehprim a n shawp ai hte, Samari n hkru ai lam dan pru nga ai; kaning rai nme law, shanhte gaw masu matsa lam hkan nna, lagu lagut wa kata de shang ai hte, damya hpung ni, shinggan de hpya lu hpya sha ma ai.

HOSEA 7:1 ပူးပေါင်းရင်းမြစ်များ

ESAIA 28:1

Israela mungdan gaw dingnye hkrum nga sai! Dai mung a arawng sadang gaw chyaru ya ningbaw ni a abaw ntsa na nampan janmau ni zawn nyui mat nga sai. Shanhte a gumrawng gumtawng ai abaw ni gaw manam pyaw bat hawm nga ai, rai ti mung shanhte gaw n dum ndam rai lu nang gumpye taw nga ma ai.

ESAIA 59:12

Madu e, nang hte nhtan shai ai anhte a ru hka amu ni gaw law la nga ai. Anhte a yubak mara ni anhte hpe mara shagun nga ai. Anhte gaw dai lam yawng mayawng hpe kaja wa sadi maja nga ga ai.

ESAIA 59:13

Anhte gaw nang hpe gumlau kau saga ai, nang hpe ningdang kau saga ai, na a hpang hkan na matu nyet kau saga ai. Anhte gaw kaga ni hpe dip gamyet sha kau saga ai hte na a man kaw na kayin mat wa saga ai. Anhte a myit mang ai lam ni gaw shut nga ai; anhte tsun ai ga ni gaw masu magaw ga ni hkrai rai nga ai.

ESAIA 59:14

Teng man rap ra ai tara gaw kanut mat wa sai, ding hpring ai gaw ni sa lu ai n rai. Teng man ai gaw shawa ginra hta ahtu kataw mat sai, myit malang ai hpe dai shara hkan e n mu tam nga sai.

YEREMIA 51:9

Dai mung hta shanu nga ai maigan masha ni gaw, ‘Babelon hpe karum la na matu anhte shakut ga ti mung, dai gaw grai hpang hkrat mat sai. Ya chyawm gaw anhte tawn kau da nna tinang a buga dum nta de wa mat saga. Karai Kasang gaw shi a chyalai n-gun mahkra hte Babelon hpe ari jaw nu ai, dai mung hpe atsai awai shamyit kau nu ai,’” ngu nna tsun ma ai.

EZEKELA 16:46

“Na a kana hte shi a mare gaw dingdung maga de nga ai Samari rai nga ai. Na a kanau hte shi a mare gaw dingda maga de nga ai Sodom rai nga ai.

EZEKELA 23:4

Kana a amying gaw Ohola rai nna (dai gaw Samari a malai rai nga ai), kanau a amying gaw Oholiba rai nna (dai gaw Yerusalem a malai rai nga ai.) Ngai gaw shan lahkawng yan hpe hkungran la ni ai, shan mung nye a matu kashu kasha shangai ya ma ai.

EZEKELA 24:13

Yerusalem mare e, na a nse nsa ai arawn alai ni gaw nang hpe awu asin di kau nit dai. Nang hpe ngai jasan shapra na shakut ti mung, nang awu asin naw hkrum nga ndai. Nye a n-gun tup sindawng kahtet ai hpe nang n hkam sha dingsa, jasan jaseng hkrum na ndai n rai.

HOSEA 10:5

Samari mare hta shanu nga ai masha ni gaw hkrit gari nna Behtela mare na ja dumsu mat mat ai majaw sharung shayawt na mara ai. Shanhte hte hpara sumla daw jau ai hkinjawng ni mung dai hta hkrap ngu hkrap ngoi na mara ai. De a hkik hkam ai aja shingkang hkoi mat jang, shanhte hkrap agru na mara ai.

HOSEA 11:12

Dai Madu gaw, “Israela amyu masha ni gaw ngai hpe masu magaw ga ni, hkalem hkalau ga ni hte wang gawan tawn da mi ai. Yuda amyu masha ni mung sadi dung ai hte chyoi pra ai Karai Kasang ngu na ngai hpe naw gumlau nga ma ai.

HOSEA 11:8

“Israela e, Ngai nang hpe kaning rai tawn kau da lu na rai ta? Ngai nang hpe kaning rai kabai kau da lu na rai ta? Ngai gaw nanhte hpe Adma mare hpe di ai zawn kaning rai shamyit kau lu na rai ta? Zeboim hpe di ai zawn nanhte hpe kaning rai di lu na rai ta? Nye a myit masin mung ngai hpe dai hku galaw shangun nga ai n rai! Nanhte a matu nye a tsaw ra ai myit gaw nau wa n-gun ja nga li ai.

HOSEA 12:1

Israela amyu masha ni a jahpawt kaw nna shana de du hkra galaw ai amu magup gaw akyu n rawng ai hte hten byak lam rai nga ai. Gumle gumlau ai hte kashun kashe du daw sai hkaw amu gaw shanhte hta grau nna law jat nga ai. Shanhte gaw Asuri ni hte ga shaka tawn da nhtawm Egutu masha ni hte hpaga bungli jawm galaw ma ai.”

HOSEA 12:2

Dai Madu gaw Yuda amyu masha ni hpe mara shagun na lam naw nga nga ai: shi gaw Israela hpe mung, shi galaw ai arawn alai hte maren ari jaw na ra ai. Shanhte galaw manu ai amu hte maren, shi shanhte hpe htang jaw na rai wu ai.

HOSEA 4:17

Israela amyu masha ni gaw hpara sumla ni a myit shalen la ai hkrum nga ma ai. Shanhte a lam hta shanhte myit ra ai hku hkan nga manu ga.

HOSEA 4:2

Shanhte gaw ga sadi tawn da ma ai, dai ni hpe jahten kau ma ai; shanhte gaw masu magaw ai, masha sat ai, lagu ai, hte num shaw la shaw amu galaw ma ai. Ru hka amu law jat wa ai hte dai mung e masha sat ai amu kahtap gala byin nga ai.

HOSEA 5:1

Nanhte hkinjawng ni e, ndai lam na la mu! Israela amyu masha ni e, madat mu! Hkawhkam htingnu na dinghku hte seng ai ni e, na la mu! Nanhte gaw teng man ai hku jeyang hkrum na zawn nawn nga myit dai; dai rai nna tara jeyang ai gaw nanhte a ntsa e du na ra ai! Nanhte gaw Mizpa mare e mahkam tai nna, Tabora Bum ntsa e sumgawn kahpyan tawn ai hte

HOSEA 6:4

Rai ti mung dai Madu gaw, “Israela hte Yuda e, ngai nanhte hte hpa galaw na rai nga a ta? Nye a matu nga nna nan madun ai tsaw ra myit gaw alawan hkoi mat ai jahpawt manap na sai wan hte mung, shani jau jau tsai mat wa ai numri hte mung bung nga ai.

HOSEA 7:13

“Shanhte gaw dingnye hkrum nga ma hka! Shanhte gaw ngai hpe kau da ai hte ngai hpe gumlau ma ai. Shanhte gaw shamyit kau ai hkrum na rai ma ai. Ngai shanhte hpe hkye la mayu nngai, rai ti mung shanhte ngai hpe nawku ai lam gaw n jaw nga malu ai.

HOSEA 8:5

Ngai gaw Samari mare masha ni nawku ai ja dumsu hpe n dawng nngai. Ngai dai ni hpe masin yu kahtet nngai. Shanhte gaw shanhte a hpara sumla nawku htung lai len hpe galoi du hkra n kau ai nga nga na ma ai kun?

HOSEA 8:9

Israela amyu masha ni gaw lawze shazai ni zawn du ja nga ma ai hte shanhte ra ai hku hkawm ma ai. Shanhte gaw Asuri mung de karum la lam sa tam ma ai; shanhte hpe makawp maga ai amyu baw ni hpe kumhpa jaw ma ai.

AMO LAIKA (AMOS) 3:10

Dai Madu gaw, “Ndai masha ni gaw shanhte a nga shara ni hta ru hka amu hte kashun kashe du daw sai hkaw amu ni hte jahpring da nga ma ai. Shanhte pyi gara hku ding man na lam hpe n chye nga ma ai.

AMO LAIKA (AMOS) 3:9

Egutu hte Ashdod na hkawhkam htingnu ni hta nga ai ni hpe ning ngu tsun ndau mu: “Samari makau grup yin na kawng ni hta hpawng shinggyin ai hte dai shara na kaba ai kabring kabrawng amu hte shut hpyit kau ai ru hka amu ni hpe yu yu mu.”

AMO LAIKA (AMOS) 8:14

Samari a hpara sumla ni hte dagam ai ni gaw, ‘Dan a hpara shing n rai Berasheba a hpara hte ndai amyu masha ni hkrat mat nna bai n rawt wa lu na mara ai,” nga nna tsun ma ai.

MIHKA 6:16

Hkawhkam Omri hte shi a kasha Hkawhkam Ahab ni a n hkru ai amu ni hta nang hkan galaw nga ndai majaw ndai lam byin wa na ra ai. Nang gaw shanhte a myit masa hta matut nna hkan nang nga ai majaw ngai nang hpe jahten kau na nngai; masha hkum shagu nang hpe asawng asang di kau na mara ai. Shara shagu hkan na amyu masha ni gaw nang hpe n kaw n law matsat kau na mara ai,” ngu nna tsun ai.

MAHTE 23:37

“Yerusalem e, Yerusalem e, myihtoi ni hpe sat kau kau rai nna, nang hpang de shangun dat ai ni hpe nlung hte kabai sat sat re ai mare e! U kanu gaw u hkai ni hpe singkaw npu e jahpawng da ai zawn, na nshu nsha ni hpe ngai gade lang jahpawng da mayu ti mung, nang n hkraw nga ndai.

LUKA 13:34

“Yerusalem e, Yerusalem e, myihtoi ni hpe sat kau kau rai nna, nang hpang de Karai Kasang shangun dat ai kasa ni hpe mung nlung hte kabai sat kau ndai. U kanu gaw, uhkai ni hpe, shi a singkaw npu e jahpawng da ai zawn, na a amyu masha ni yawng hpe ngai gade lang jahpawng da mayu timung, nang n hkraw ndai.

LUKA 19:42

“Mare nang e, ngwi pyaw sim sa ai lam lu la na matu hpa baw ra nga ai ngu ai hpe dai ni nang chye lu wu taw gaw law! Rai ti mung ya gaw nang dai hpe n mu n chye lu ndai!