HOSEA 2:20 - Jinghpaw Common Language Bible 2009

²⁰ Ngai gaw nye a ga sadi hpe shatup na nngai, nang hpe nye a matu shatai da na nngai, nang gaw ngai hpe dai Madu hku yin la na rai ndai.

Jinghpaw Hanson Version Bible

²⁰ Dai shani e ngai shanhte a matu, pa ga na matse labye ni, ntsa malen pyen ai u ni, ga e gumrawt hkawm ai baw hte, ga shaka tawn da nna, dai mungdan hta na, ndan ri nhtu, hpyen majan jasim kau ai hte, shanhte hpe apyaw alaw yup shangun na mawe ai.

HOSEA 2:20 ပူးပေါင်းရင်းမြစ်များ

NINGPAWT NINGHPANG 9:10

hkrung mahkrung yawng hte mung, ntsa malen u ni hte dusat yam nga ni yawng hte nang hte rau sanghpaw li kaw na pru wa ai amyu shagu hte hte mung, nye a ga shaka hpe tawn da nga nngai.

ESAIA 2:4

Shi gaw galu kaba ai masha amyu baw ni a lapran na ndang kalang lam ni hpe jeyang ya na ra ai. Shanhte gaw shanhte a nhtu ni hpe najawn ni, shanhte a nri ni hpe gadoi nhkyi ni dup kau na mara ai. Amyu baw ni majan galoi mung bai baw na n rai, majan a matu galoi mung bai hkyen na mara ai n rai.

ESAIA 62:4

Nang gaw galoi mung “Mare Dingsa” ngu bai shaga hkrum na sai n rai, Na a mungdan gaw “Kabai Da Hkrum Ai Madu Jan,” ngu nna tsun hkrum sana n rai. Na a mying nnan gaw “Karai Kasang gaw shi hpe awng sharawng nga ai,” ngu na ra ai. Na a mungdan gaw “Kabu gara ai hte hkungran la sai,” ngu shaga hkrum na ra ai; Dai Madu gaw nang hta awng sharawng nga ai majaw, Na a mungdan gaw madu wa langai zawn tai na ra ai.

YEREMIA 24:7

Ngai gaw dai Madu rai nga nngai hpe chye na matu, chye mayu ai myit shanhte hpe ngai jaw na nngai. Shaloi, shanhte gaw myit masin mahkra hte ngai hpang de kayin wa na mara ai majaw, shanhte gaw nye a amyu masha ni tai nna, ngai mung shanhte a Karai Kasang tai na nngai.

YEREMIA 30:10

Nye a amyu masha ni e, hkum hkrit nga myit; Israela amyu masha ni e, hkum hkrit gari nga myit. Ngai gaw nanhte hpe sumtsan mung hte nanhte bawng dung hkrum ai mungdan kaw nna hkye mawai la na nngai. Nanhte gaw dum nta de bai nhtang wa nna, ngwi pyaw sim sa ai hte nga lu na rai myit dai; nanhte gaw shim lum nga lu nna, kadai mung nanhte hpe jahkrit shama lu na mara ai n rai.

YEREMIA 32:41

Ngai gaw shanhte a matu mai kaja ai amu galaw ai lam hta ngai awng sharawng nga na nngai, ngai gaw shanhte hpe ndai mung hta e prat ting shagrin shangang da na nngai.

YEREMIA 9:24

Marai langai ngai gumrawng mayu ai rai yang, shanhte ngai hpe chye nna, chye na hkawn hkrang ai ni chyu sha gumrawng na mai ang nga ai, hpa majaw nga yang, nye a tsaw ra myit gaw tut nawng agrin nga ai hte ngai galaw ai amu mung teng man ai hte ding man nga ai. Dai amu ni gaw ngai hpe awng sharawng shangun nga ai. Dai Madu ngai nan tsun ni ai,” ngu nna tsun ai.

EZEKELA 16:62

Ngai gaw nang hte tawn da ai ga shaka hpe ningnan bai galaw da na nngai. Ngai gaw dai Madu rai nga nngai hpe nang chye wa lu na rai ndai.

EZEKELA 16:8

“Dai lam hku ngai kalang bai lai hkawm yang, na a matu sumtsaw sumra chye myit ai aten du nga sai hpe ngai mu lu nngai. Ngai gaw na a singgu krin re ai hkum hpe nye a palawng galu hte magap da nna, nang hpe tsaw ra nga na, ga sadi tawn da ni ai. Rai sa, ngai gaw nang hte hkungran ga shaka tawn da ni ai hte nang gaw nye a matu tai wa nit dai.” Dai gaw Tsaw Htum ai dai Madu tsun ai mungga rai nga ai.

EZEKELA 34:25

Ngai gaw shanhte a shim lum lam jaw ya lu ai ga shaka shanhte hte shagrin da na nngai. Mungdan kata na hkrit tsang ra ai matse labye ni hpe mung yeng seng kau na nngai, shaloi nye a sagu ni pa layang ni hta shim ai hte shanu nga lu nna maling kata hkan e mung yup nga lu na mara ai.

EZEKELA 34:27

Hpun ni asi si wa nna yi sun hkauna ni nsi naisi ni shapraw ya na mara ai; kadai mung tinang a lamu ga hta shim lum ai hte shanu nga lu na mara ai. Nye a amyu masha ni a hpri saidawng ni hpe agrawp daw kau ya nna shanhte hpe mayam shatai nga ai ni a lata kaw na shalawt dat ai shaloi, ngai nan dai Madu rai nga nngai hpe shanhte chye lu na mara ai.

EZEKELA 38:23

Ndai lam hku nna ngai gaw galu kaba ai hte chyoi pra nga nngai hpe masha amyu baw ni yawng hpe madun dan na nngai. Dai shaloi, ngai nan dai Madu rai nga nngai hpe shanhte chye lu na mara ai.

HOSEA 13:4

Dai Madu gaw, “Ngai gaw nanhte hpe Egutu mung kaw nna woi shapraw wa ai dai Madu nanhte a Karai Kasang rai nga nngai. Ngai hta lai, nanhte Karai Kasang n lu myit dai. Ngai chyu sha nanhte a hkye la Madu rai nga nngai.

HOSEA 2:19

Israela e, ngai gaw nang hpe nye a madu jan shatai na nngai; Ngai gaw teng man ai hte sadi dung nga na nngai; ngai gaw nang hpe dinggrin tsaw ra myit hte matsan dum ai myit madun nga na nngai nang hpe nye a matu htani htana shatai da na nngai.

HOSEA 6:6

Ngai gaw nanhte a yam nga shagu hkungga ni hpe n rai, nanhte a dinggrin tsaw ra myit hpe ra nngai. Ngai gaw nye a matu wan nat hkungga nawng ya na hta amyu masha ni ngai hpe chye na mahtang ngai grau nna hkam la mayu nga nngai.

JAW JAU 26:5

Nanhte a nsi naisi ni grai ja kat na rai nna, sabyi si di ai aten hta nsi naisi ni hpe nanhte naw dan nhtawm nsi naisi ni hpe gat hkai ai aten hta mung sabyi si ni naw di la ra na rai myit dai. Nanhte sha mayu ai lusha yawng hkam la lu ai hte nanhte a mungdan hta shim lum ai hku nga lu na rai myit dai.

JAW JAU 26:6

“Ngai nanhte hpe nanhte a mungdan hta ngwi pyaw sim sa lam jaw ya na nngai, nanhte gaw kadai hpe mung n hkrit n tsang ra ai sha, myit mu myit hkut let yup lu na rai myit dai. Dai mung e nga ai matse labye ni hpe mung ngai yeng kau nna dai mung hta hpyen majan hpa mung nga sana n rai.

MIHKA 4:3

Shi gaw masha amyu baw ni a lapran e mung, ni ai tsan ai shara na daru magam n-gun kaba lu ai ni a lapran e mung ndang kalang lam ni hpe daw dan ya na ra ai. Shanhte gaw shanhte a nhtu ni hpe najawn, shanhte a nri ni hpe nhkyi kasha ni dup kau na mara ai. Masha amyu baw ni majan de galoi mung pru sa na ma ai n rai, majan a matu galoi mung bai hkyen na mara ai n rai.

ZEHKARIA 9:10

Dai Madu gaw, “Hpyen leng ni hpe Israela kaw na la kau nhtawm Yerusalem na gumra ni hpe seng kau na nngai; majan hta lang ai ndan ni hpe jahten kau na nngai. Nanhte a hkawhkam wa gaw masha amyu baw ni a lapran e ngwi pyaw sim sa shangun nna, shi gaw panglai kaw nna panglai du hkra, Uhprat hka nu kaw nna ginding aga a jahtum du hkra up na ra ai,” ngu nna tsun ai.

MAHTE 11:27

Nye Wa gaw arai yawng mayawng ngai hpe ap ya ni ai; Wa hta kaga, dai Kasha hpe kadai mung n chye lu ai: dai Kasha hte, dai Kasha shadan dan mayu ai ni hta kaga kadai n chye lu ai.

LUKA 10:22

“Nye Wa gaw arai yawng mayawng ngai hpe ap ya ni ai, Kasha wa kadai rai nga ai hpe Wa hta kaga kadai mung n chye ai, Wa kadai re ai mung, Kasha wa hte dai Kasha e shadan dan na matu lata la ai wa hta kaga kadai mung n chye nga ai.”

YAWHAN 17:3

Htani htana asak ngu ai chyawm gaw, langai sha rai nga ai, teng man ai Karai Kasang hpe mung, nang shangun dat ai Yesu Hkristu hpe mung, chye chyang lu ai hpe ngu ai rai nga ai.

YAWHAN 8:55

Rai ti mung nanhte shi hpe n chye myit dai, ngai chyawm gaw chye nngai. Lama shi hpe n chye nngai ngu yang gaw, nanhte zawn masu ai wa ngai rai na ra ai. Rai ti mung ngai shi hpe chye nga nngai rai nna, shi a ga hpe madat mara hkan sa nga nngai.

2 KORINHTU 4:6

Yesu Hkristu a myi man hta htoi tu ai hpung shingkang a lam nanhte chye chyang u ga, anhte a myit masin hta nhtoi jahtoi ya ai Karai Kasang gaw, “Nsin hta na nhtoi htoi na ra ai,” nga nna tsun ai Karai Kasang shi nan rai nga ai.

HPILIPI 3:8

Dai hta n-ga, nye a Madu Yesu Hkristu hpe chye chyang lu ai lam gaw, lam shagu hta grau nna chyahtum chyalai hpu reng nga ai amyat re ai majaw, dai hpe lu la na matu arai yawng mayawng hpe tsep kawp asum hku ngai sawn la nngai. Ngai gaw shi a matu arai yawng mayawng hpe kabai kau ni ai. Hkristu ngu ai amyat hpe lu la na matu hte Hkristu hte langai sha tai lu na matu nga manga hpe shanut shanaw zawn ngai nawn kau ni ai.

KOLOSE 1:10

Shing rai yang nanhte gaw, Karai Kasang a myit ra ai hku asak hkrung lu nna shi a sharawng awng ai lam hpe tut nawng e nanhte hkan sa galaw lu na marin dai. Dai shaloi nanhte a asak hkrung lam gaw mai kaja ai magam bungli shagu hta asi si wa nna, Karai Kasang hpe chye chyang ai lam hta jat galu kaba wa na marin dai.

2 TIMOHTI 1:12

Dai lam a majaw ndai nni nkri ru yak jam jau ni hpe ngai hkam jan nngai, Rai ti mung nye a kam hpa ai myit gaw ngai hta naw hpring chyat nga ai. Hpa majaw nga yang, ngai kadai wa hpe kam manoi nga nngai gaw ngai chye nga ai hte ngai hpe kam nna nye a lata hta ap tawn da sai dai Kabu Gara Shiga hpe tara jeyang ai Shani Nhtoi du hkra makawp maga mahkyu da ya lu ai n-gun atsam shi hta rawng nga ai ngu nna ngai myit mu myit hkut nga nngai.

HEBRE 8:11

Shanhte hta na kadai wa mung tinang a mungchying sha shada hpe mung, tinang a hpu nau shada hpe mung, Karai Kasang hpe chye chyang wa hkra sharin achyin ya ra na ma ai n rai. Hpa majaw nga yang, kaji htum ai kaw nna kaba htum ai du hkra shanhte nlang hte gaw ngai hpe chye chyap na mara ai.

1 YAWHAN 4:6

Rai ti mung anhte gaw Karai Kasang a maga na ni rai nga ga ai: Karai Kasang hpe chye chyang ai ni kadai mung, anhte a ga hpe madat mara nga ma ai; Karai Kasang a maga na n re ai ni chyawm gaw, anhte a ga hpe madat mara ai n rai. Ndai hku nna anhte gaw teng man ai Wenyi hkam la ai hte shut ai wenyi hkam la ai ni a shai hkat ai lam hpe tsun lu ga ai.

1 YAWHAN 5:20

Karai Kasang a Kasha gaw du sa ra ai rai nna, teng man ai Karai Kasang hpe chye chyang lu ai myit, shi anhte hpe jaw da mi ai hpe anhte chye ga ai. Anhte gaw Kasha Yesu Hkristu hte langai sha tai nna hkrung nga ga ai majaw, teng man ai Karai Kasang hte mung langai sha tai nna hkrung nga ga ai. Dai wa gaw teng man ai Karai Kasang hte n htum n wai asak mung rai nga ai.