HOSEA 2:13 - Jinghpaw Common Language Bible 2009

¹³ Ngai gaw shi ngai hpe malap kau nna Bala hpara hpe manam pyaw ai baw nat nawng nna shi hkum hpe ja lung seng ni hte mawn sumli nna shi a sumtsaw ni hpang hkan mat wa ai aten ni a matu ari jaw na nngai.

Jinghpaw Hanson Version Bible

¹³ Dai hta n-ga, ngai gaw, shi a kabu gara ai lam mahkra hte, shi a poi shani, shata praw shani, laban nhtoi ni hte, madat da ai shawa hpawng nlang hte hpe, jahtum kau na nngai.

HOSEA 2:13 ပူးပေါင်းရင်းမြစ်များ

2 HKAWHKAM 1:2

Israela Hkawhkam Ahazia gaw Samari mare e nga ai shi a hkawhkam htingnu ntsa htap na nbang pinra kaw na di hkrat mat wu ai majaw grai sawng mat hkra machyi mat wu ai. Dai rai nna shi bai hkam kaja wa na, n kaja na lam chye lu hkra nga, Hpilisti karai Balazebu hpe san yu na matu shi a kasa nkau mi hpe Ekron mare de shangun dat wu ai.

2 HKAWHKAM 10:28

Dai gaw Israela mung na Bala nawku ai lai hpe Yehu kaning rai shamyit jahtum kau ai lam rai nga ai.

2 HKAWHKAM 21:3

Shi a kawa Hezekia run jahten kau sai tara maigan masha ni a nawku shara ni hpe shi bai de da nna, Israela Hkawhkam Ahab galaw nu ai hte maren, Bala hpe nawku na tawn hkungri ni hpe shi galaw nna Ashera karai num a gawkngu sumla hpe mung galaw nu ai. Manashe gaw shagan ni hpe nawku wu ai.

YOBA 8:13

Karai Kasang hpe n kam ai masha ni gaw dai mai-aw ni zawn rai nga ai, shanhte a myit mada shara htum mat nga ai, Karai Kasang hpe kalang mi bai malap kau na ma ai.

SHAKAWN KUNGDAWN 106:13

Rai ti mung, shanhte gaw shi galaw dan sai amu ni hpe alawan malap kau ya mu ai hte; shi a hpaji jaw ai lam ni hpe n la nga ai sha, galaw kau manu ai.

SHAKAWN KUNGDAWN 106:21

Egutu mung hta shi a mauhpa magam amu ni hte shanhte hpe hkye hkrang da ai Karai Kasang hpe shanhte malap kau mu ai.

SHAKAWN KUNGDAWN 78:11

Shanhte gaw shi galaw dan sai magam amu ni hte shanhte mu yu sai mauhpa lamik kumla ni hpe malap kau manu ai.

PRU MAT 32:34

Ya chyawm gaw ngai nang hpe tsun na shara de ndai amyu masha ni hpe woi sa su. Nye a lamu kasa nang hpe lam madun la na ra ai hpe adum nga u; rai ti mung shanhte shut hpyit kau ai yubak a matu ndai amyu masha ni hpe ngai ari jaw na aten gaw du na ra ai,” ngu nna tsun wu ai.

ESAIA 17:10

Israela e, nang gaw nang hpe hkye mawai la ai hte ja ai lunghkrung zawn nang hpe makawp maga ai Karai Kasang hpe malap kau nga nit dai. Shing rai na malai, nang gaw maigan karai hpe nawku na nga, chyoi pra ai sun ni hpe hkai da nga ndai.

ESAIA 65:7

shanhte a kaji kawa ni a yubak ni a matu chyawm gaw shanhte hpe bai htang jaw na nngai. Shanhte gaw tara maigan masha ni a kawng ntsa na nawku shara ni hta manam pyaw ai baw nat nna ngai hpe n shawp ai ga tsun ma ai. Dai re ai majaw, lai sai aten na shanhte a arawn alai hte maren, shanhte hpe ngai ari jaw na we ai.”

YEREMIA 11:13

Yuda amyu masha ni gaw shanhte a mare ni law nga ai made karai ni mung law nga ma ai; Yerusalem mare masha ni mung mare kata hta nmaw lam ni law nga ai zawn matsat shabat re ai Bala hpara hpe shagu hkungga nawng jau ya na matu tawn hkungri ni hpe gaw sharawt da nga manu ai.

YEREMIA 18:15

Timung, nye a amyu masha ni ngai hpe malap kau manu ai; shanhte gaw hpara sumla ni hpe manam pyaw ai baw nat nawng ma ai. Shanhte gaw shanhte hkawm sa ang ai hkrun lam hta ahtu kataw mat ma ai; shanhte gaw moi na lam dingsa hta loi mi mung n hkan mat ma ai; shanhte gaw n san da ai lam ntsa hkan e she, hkawm nga ma ai.

YEREMIA 2:32

Numsha mahkawn gaw shi a ja rai, num nnan gaw shi a hkungran hpun palawng hpe malap da mai nga a ni? Rai ti mung, nye a amyu masha ni chyawm gaw ngai hpe malap kau ai nhtoi ni n dang hti hkra law nga sai.

YEREMIA 23:2

Da ndai gaw dai Madu Israela a Karai Kasang shi a amyu masha ni hpe yu bau sin ang ai up hkang du ni hpe lakap nna tsun ai ga rai nga ai: “Nang gaw nye a amyu masha ni hpe n yu ndai; nang gaw shanhte hpe shabra kau ai hte shaden kau nit dai. Ya chyawm gaw nang galaw tawn sai n hkru ai amu ni a majaw, ngai nang hpe ari jaw na de ai.

YEREMIA 7:34

Mungdan gaw katsi katsang shara tai mat wa na ra ai; Yuda mare ni hte Yerusalem mare lam ni hta kabu gara ai nsen hte hkungran lusha poi galaw ai ni a nsen ni hpe ngai jasim kau na we ai.

YEREMIA 7:9

Nang gaw arai lagu ai, masha sat ai, numshaw lashaw amu shut hpyit ai, masu ga tsun nna dagam ai, Bala hpara hpe shagu hkungga nawng jau ai, shawng de nang garai n chye yu ai karai ni hpe nawku nga ndai.

SHARUNG SHAYAWT 1:4

Ya chyawm gaw chyoi pra ai shani ni hta nawku na matu Nawku Htingnu de kadai mung n sa nga ai. Dai shara hta mahkawn shakawn ai mahkawn ma ni nni nkri hkrum ma ai, hkinjawng ni mung madai sharung nga ma ai. Mare chyinghka ni gaw katsi katsang rai nna, Ziun gaw tsin-yam tsindam hkrum nga ai.

SHARUNG SHAYAWT 5:14

Asak kaba salang ni gaw mare chyinghka hta galoi mung n sa dung masai; shabrang ni mung sumpyi loi mi sha pyi n dum ma ai.

EZEKELA 16:12

Na a ladi hta shanghkawng, na a na hta lakan ngai bang ya nna, na a baw ntsa e tsawm htap ai janmau shagup ya nngai.

EZEKELA 16:17

Nang gaw ngai nang hpe ya da ai aja gumhpraw ni hpe la nna, dai ni hte la sumla ni galaw lang nhtawm shanhte hte shut hpyit ai amu galaw nit dai.

EZEKELA 22:12

Amyu masha nkau mi gaw gumhpraw a jaw e masha sat ma ai. Nkau mi gaw shanhte a kahpu kanau Israela masha ni hpe gumhpraw amyat tam sha nna, sut su wa na matu shanhte hpe mawp sha nga ma ai. Shanhte gaw ngai hpe mung malap kau manu ai.” Dai Tsaw Htum ai Madu tsun nu ai.

EZEKELA 23:35

Yu u, ndai gaw Tsaw Htum ai dai Madu tsun nga ai mungga rai nga ai: “Nang gaw ngai hpe malap kau nit dai, ngai hpe shingdu dat kau nit dai majaw na a ngang gayut ai amu hte shawa num amu galaw ai nni nkri hpe hkam sha na rai ndai.”

HOSEA 11:2

Rai ti mung shi hpe ngai shaga magang, ngai kaw na shi kayin mat wa magang rai nga ai. Nye a amyu masha ni Bala hpe shagu hkungga nawng ya ma ai; shanhte gaw hpara sumla ni hpe manam pyaw ai baw nat nawng ma ai.

HOSEA 13:1

Lai sai aten ni hta, Ehprim amyu bawsang ni ga shaga yang, kaga Israela amyu bawsang ni hkrit ma ai; shanhte gaw Ehprim hpe mahtang sharawt mada ma ai. Rai ti mung dai amyu masha ni Bala hpara hpe nawku let yubak galaw shut kau ma ai majaw shanhte si na rai ma ai.

HOSEA 13:6

Rai ti mung nanhte gaw dai ningru ningja ai mungdan de shang myit dai shaloi, nanhte sha hkru nna myit pyaw nga myit dai; dai hpang nanhte gumrawng gumtawng wa nna ngai hpe malap kau myit dai.

HOSEA 2:7

Shi gaw shi a sumtsaw ni a hpang hkan mat wa na ra ai rai ti mung shanhte hpe hkan dep lu na n rai. Shi gaw shanhte hpe tam na ra ai rai ti mung shanhte hpe mu na ra ai n rai. Dai hpang shi gaw, “Ngai gaw nye a shawng na madu wa hpang de nhtang wa na nngai-dai gaw ya na zawn ngai nga nga ai hta grau kaja nga ai,” ngu nna tsun wu ai.

HOSEA 4:13

Shanhte gaw bum pungding ntsa na chyoi pra ai shara ni hta shagu hkungga ni nawng ya nhtawm, kawng ntsa ni hte shingnip grai tsawm ai hpun kaba npu hkan manam pyaw ai baw nat nga ma hka! “Dai lam a majaw nanhte a shayi sha ni shawa num tai nna, nanhte a kanam ni la shaw ai amu galaw ma ai.

HOSEA 4:6

Nye a amyu masha ni gaw ngai hpe n chye yin la nga ma ai majaw dingnye hkrum nga masai. Nanhte hkinjawng ni mung ngai hpe yin la na matu ningdang kau myit dai, nye a sharin achyin ai hpe n madat nga myit dai, dai rai nna ngai gaw nanhte hpe ningdang ai hte nanhte a shadang sha ni hpe mung nye a hkinjawng ni hpe zawn yin la na nngai n rai.

HOSEA 8:14

“Israela amyu masha ni hkawhkam htingnu ni gap ma ti mung, shanhte a htingnu Gap Ya Ai Wa hpe malap kau manu ai. Yuda masha ni mare bunghku ni kum da ma ai; rai ti mung ngai gaw wan hpe dat dat nna dai gaw shanhte a hkawhkam htingnu ni hte mare ni hpe hkru kau na ra ai.”

HOSEA 9:7

Ari jaw na aten du sai, amyu masha ni galaw ai hte maren shanhte hkam la na aten du ra ai. Dai lam byin jang, Israela gaw de a lam chye lu na mara ai! Nanhte gaw, “Ndai myihtoi wa gaw mana ai wa she rai nga a hka! Ndai wenyi n-gun rawng ai wa gaw sai n gring sam ai,” nga nna tsun myit dai. Nanhte ngai hpe grai wa n ju nga myit dai majaw nanhte a yubak gaw grai kaba nga malit dai.

AMO LAIKA (AMOS) 8:10

Ngai gaw nanhte a poi ni hpe makoi mayang poi shatai kau nna, nanhte a kabu gara ai mahkawn mangoi ni hpe sharung shayawt ai hte galai kau ya na made ai. Ngai gaw nanhte a baw ni hpe shakrin kau shangun nhtawm lachyit nba hpun shangun na made ai. Nanhte gaw kasha shingtai si mat ai majaw kanu yan kawa yawn hkyen hkrum nga ai zawn tai na myit dai. Dai shani gaw ahkup ahka nga nna htum mat wa na ra ai.

TARA JAHPRANG 32:18

Shanhte hpe asak jaw ai wa, chyalai n-gun hte hpring ai hkye la Madu, shanhte a Karai Kasang hpe nan malap kau manu ai.

TARA JAHPRANG 6:12

mayam tai nga ai Egutu mung kaw na nang hpe hkrang shaw wa ai dai Madu hpe n malap kau myit ga, sadi nga mu.

TARA AGYI 10:6

Israela masha ni gaw Bala hpara hte Ashtarot hpara hpe mung, Suri hpara ni, Sidon hpara ni, Moba hpara ni, Amon hpara ni hte Hpilisti masha ni a hpara ni hpe nawku let dai Madu hpe lang mi bai yubak galaw shut kau manu ai. Shanhte gaw dai Madu hpe kau da nhtawm shi hpe nawku ai lam jahkring kau ma ai.

TARA AGYI 3:7

Israela amyu masha ni gaw dai Madu shanhte a Karai Kasang hpe yubak galaw shut kau nhtawm malap kau manu ai rai nna Bala hte Ashera hpara sumla ni hpe nawku nga ma ai.

1 SAMUELA 12:9

Rai ti mung amyu masha ni mahtang dai Madushanhte a Karai Kasang hpe malap kau mu ai; dai rai nna shi gaw Hpilisti masha ni a lata de mung, Moba hkawhkam a lata de mung, Hazora mare na hpyen luksuk ni a dap hpe up hkang ai Sisera a lata de mung ap kau shangun ai majaw, nanhte a kaji kawa ni hpe htim gasat ai hte shanhte hpe dang kau mu ai.