HEBRE 1:3 - Jinghpaw Common Language Bible 2009

³ Shi gaw Karai Kasang a hpung shingkang ningja shapraw nna, Karai Kasang shi nan a gawng shingyan hkrang sumla hpe dagraw ai hte mungkan jan shata shagan nga yawng danghta hpe shi a hpung shingkang rawng ai mungga atsam hte bau sin da nga ai. Shi gaw shinggyim masha ni a yubak mara ni hpe raw dat jasan jaseng ai lam galaw ngut ai hpang, sumsing lamu e daru magam n-gun atsam rawng ai Karai Kasang a hkra maga de dung nga ai.

Jinghpaw Hanson Version Bible

³ shi gaw Karai Kasang a hpung shingkang a ningchya hte, shi a gawng shing-yan a hkrang sumla rai nga ai rai nna, shi a mungga atsam hte yawng mayawng hte hpe bau sin da ai: yubak mara hpe jasan jaseng kau ngut jang, matsaw ningtsang na daru magam a hkra maga de shi dung nga ai rai nna,

HEBRE 1:3 ပူးပေါင်းရင်းမြစ်များ

1 HKAWHKAM LABAU 29:11

Nang gaw galu kaba nna daru magam n-gun hte hpung shingkang mung, hkik hkam ai hte arawng aya kaba hkam la ai wa rai nga ndai. Sumsing lamu hte ginding aga ntsa na nga manga hte gaw na a rai nga ai; nang gaw hkawhkam wa rai nna yawng mayawng a ntsa na tsaw dik htum ai up hkang ai wa rai nga ndai.

YOBA 37:22

Dingdung maga de aja zawn htoi gala nga ai hpe mu lu nga ai, Karai Kasang a hpung shingkang gaw anhte hta hkrit hpa hte hpring nga ai.

SHAKAWN KUNGDAWN 110:1

Dai Madu gaw, “Na a gumlau hpyen ni hpe na a lagaw kabye lahkum ngai shatai kau ai aten du hkra, ndai nye a hkra maga de, dung nga u,” nga nna nye a Madu hkawhkam wa hpe tsun nga ai.

SHAKAWN KUNGDAWN 75:3

Mungkan ga hte dai hta nga ai hkrung mahkrung mahkra hte gari ashun awam wa ti mung; de a npawt nhpang ni hpe ngai shangang shakang da na nngai.

HPAJI NINGLI 8:4

Hkawhkam wa gaw daru magam ahkang aya hte galaw ai rai nna shi galaw ai amu hpe kadai mung dakat lu ai n rai.

JAW JAU 15:15

Hkinjawng wa mung htingrai hkungga a matu langai, wan nat hkungga a matu langai shatai nna nawng ya na rai wu ai. Ndai hku nna dai wa a matu jasan jaseng ai amu shi hkan shatsup ya na rai wu ai.

MIHKA 5:4

Shi du sa ai shaloi, shi gaw dai Madu kaw nna n-gun atsam hte Madu Karai Kasang shi hkum nan a daru magam hpung shingkang hte shi a amyu masha ni hpe up hkang wa na ra ai. Shi a amyu masha ni mung shim lum ai hte nga lu na mara ai; hpa majaw nga yang, aga ting na masha ni yawng shi a galu kaba ai magam amu hpe yin la na mara ai,

MAHTE 22:24

Shanhte gaw, “Sara e, masha langai ngai kasha garai n kap ai si mat wa ai rai yang, shi a kanau gaw karat hpe lu la na rai nna, shan kasha lu ai hte kahpu a matu htinggaw shachyaw u ga, nga nna Mawshe htet da mi ai.

MARKU 16:19

Shing rai Madu gaw, shanhte hpe ga tsun da ai hpang, sumsing lamu de shalun la ai hkrum nna, Karai Kasang a hkra maga de dung nga ai.

YAWHAN 1:14

Mungga gaw shinggyim hkum hkrang dagraw la nna, chyeju hte teng man ai hpring let anhte hta nga nga yu sai. Anhte gaw shi a hpung shingkang hpe mu lu sagaw ai. Dai hpung shingkang gaw Kawa Karai Kasang a Kasha shingtai ngu ai hpe shi hkam la lu ai lam rai nga ai.

YAWHAN 1:29

Hpang shani e Yawhan gaw, shi hpang de Yesu sa wa ai hpe mu wu yang, “Mungkan masha ni a yubak gun kau ya ai, Karai Kasang a Sagu Kasha rai nga ai law!

YAWHAN 1:4

Mungga gaw asak a npawt daju rai nga ai; dai asak gaw masha ni a matu nhtoi rai nga ai.

KASA 2:33

Shi hpe Kawa Karai Kasang a hkra maga de dung nga lu ai ahkang aya hte shagrau da nu ai hpang, Kawa Karai Kasang ga ndat jaw da ai Chyoi Pra ai Wenyi hpe hkam la nhhtawm ya nanhte mu lu na lu ai Wenyi hpe anhte a ntsa e ru jaw dat wu ai.

KASA 7:56

Dai shaloi Stehpan gaw “Yu mu! Ngai gaw sumsing lamu hpaw malang nga ai hpe mung, Karai Kasang a hkra maga dai Masha Kasha tsap nga ai hpe mung, ngai mu se ai,” ngu nna tsun mu ai.

ROMA 1:16

Hpa majaw nga yang, dai Kabu Gara Shiga hta awm dawm kam sham myit hkut nga nngai, Dai gaw shawng nnan e Yuda ni dai hpang e maigan masha ni hta kam sham ai ni kadai hpe mung hkye hkrang la hkrum shangun lu ai Karai Kasang a atsam rai nga ai.

ROMA 8:34

Daw dan lu ai wa gaw kadai wa mi rai nga a ta? Si hkam ai hta n ga, si mat ai ni hta na hkrung sharawt la hkrum nhtawm Karai Kasang kaw hpyi htinglu ya ai wa Hkristu Yesu shi nan rai nga ai.

2 KORINHTU 4:4

Ndai mungkan ga a n hkru n kaja ai karai wa ngu ai Nat Satan wa gaw shanhte a myit ni hpe ningsin hte ka-up shamak tawn kau ya manu ai majaw, shanhte n kam n sham ma ai. Shi gaw dai Karai Kasang a hkrang bung sumla nan rai nga ai. Hkristu a hpung shingkang a lam dai Kabu Gara Shiga kaw na pru ai nhtoi hpe n mu lu shangun mu ai.

KOLOSE 3:1

Nanhte gaw Hkristu hte rau hkrung sharawt la ai hkrum manit dai rai nna, Karai Kasang a hkra maga e dung ningngai nga ai Hkristu nga ai sumsing lamu na arai ni hpe ra marit nga mu.

TITU 2:14

Anhte hpe tara tawt lai ai n hkru n kaja ai mara yawng mayawng hta na hkye hkrang shaw la na matu mung, anhte gaw myit masin san seng nna shi hte chyu sha seng ai amyu tai let, kaja reng ai magam bungli galaw na myit katu sharawng ai amyu tai na matu mung, Hkristu gaw anhte a matu mara shi hkum dai hpe ap ya kau nu ai.

HEBRE 1:13

Karai Kasang gaw, “Na a gumlau ni hpe, na a lagaw na kabye lahkum ngai shatai ai du hkra, nye a hkra maga de naw adung nga u,” nga nna gara lamu kasa hpe mung galoi n tsun yu ai.

HEBRE 10:12

Hkristu chyawm gaw yubak mara raw dat na matu, prat dingsa na matu akyu nga ai hkungga langai sha hpe nawng ya ngut jang, Karai Kasang a hkra maga de wa dung nga sai.

HEBRE 12:2

Anhte a makam masham hpe npawt ndung hkren jahkum shatsup ya ai wa Yesu hpe azi yu nga ga, Madu gaw shi hkam la na rai nga ai shi hpe ala nga ai dai kabu gara ai lam a majaw, dai wudang hta si hkam ai kaya kahpa hpe hpa zawn n nawn ai sha wudang lam hpe lata la nna ya Karai Kasang a tingnyang hkra maga de wa dung nga sai.

HEBRE 4:14

Dai rai nna anhte yin la kam sham nga ai nawku htung makam masham hta maju jung nga ga, hpa majaw nga yang, Karai Kasang a man de hkrang shang wa sai Karai Kasang a Kasha Yesu ngu ai Hkinjawng Agyi Kaba langai mi hpe anhte lu nga ga ai.

HEBRE 7:27

Shi gaw kaga hkinjawng agyi ni zawn shawng e tinang lu ai yubak mara ni a matu shani shagu hkungga nawng ya ra ai n rai. Shi gaw shi hkum nan hpe hkungga shatai nna nawng ya ai shaloi kalang mi hte ngut hkra nawng kau nu ai.

HEBRE 8:1

Ya anhte tsun dan nga ai lam ni a ahkyak ai ga madung gaw: anhte gaw Sumsing Lamu na Daru Magam hte hpring ai tingnyang a hkra maga de dung nga ai Hkinjawng Agyi Kaba lu ga ai.

HEBRE 9:16

Sali wunli hte seng ai ga ndat hpe shabyin na matu gaw, ga madat da ai wa kaja wa si sai lam sakse madun lu ra nga ai.

HEBRE 9:26

Shing rai nawng ya ra ai rai yang gaw, ginding aga nnan lat kaw nna law law lang si hkam hkam rai na nu ai; ya chyawm gaw, mungkan ga prat htum na ni wa ai ten hta kalang mi hte ngut hkra du sa nna shi hkum dai nawng ya kau ai hte yubak mara hpe yeng seng kau nu ai.

1 PETRU 1:21

Madu Yesu hpe si ai kaw na bai hkrung sharawt la nna hpung shingkang ap ya hkrum ai wa a marang e, nanhte Karai Kasang hpe kam sham nga manit dai; shing rai nanhte a makam masham hte myit mada ai lam gaw, Karai Kasang hta jung noi nga ai.

1 PETRU 3:22

Yesu Hkristu gaw sumsing lamu de lung mat wa nhtawm, Karai Kasang a hkra maga de anga nga ai rai nna lamu kasa ni yawng hte sumsing lamu na ahkang aya lu ai ni hte, hpung dagu rawng ai ni yawng hpe up hkang nga ai.

2 PETRU 1:16

Anhte a Madu Yesu Hkristu a hpung shingkang atsam hte du sa ai lam nanhte hpe chye shangun na matu anhte gaw masha e gyin shalat la ai maumwi hta shamyet shanat ai lam n galaw saga ai. Anhte a myi hte nan shi a galu kaba hkik hkam ai lam hpe mu lu saga ai.

2 PETRU 1:17

Shi hpe Kawa Karai Kasang kaw na arawng sadang hte hpung shingkang jaw ya ai shaloi mung grau htum ai hpung shingkang kata nna shi kaw du ai nsen, “Ndai wa gaw ngai sharawng awng nga ai, ngai tsaw ra ai, ngai sha rai nga li ai!,” nga nna tsun ai shaloi mung, anhte dai kaw shi hte rau nga ga ai.

1 YAWHAN 1:7

Rai ti mung shi gaw nhtoi hta nga nga ai zawn, anhte mung Nhtoi hta asak hkrung hkawm sa nga ga yang gaw, anhte langai hte langai shada da kanawn mazum ai ni rai nga ga ai hte shi Kasha Yesu a asai gaw anhte hta na yubak nlang hte hpe jasan jaseng kau ya mi ai.

1 YAWHAN 3:5

Hkristu gaw shinggyim masha ni a yubak mara ni hpe la kau na matu dan pru nga ai hpe nanhte chye myit dai: shi hta e yubak n rawng nga ai.

YUDA 1:25

anhte a langai sha rai nga ai Karai Kasang hkye hkrang la ai Madu kaw anhte a Madu Yesu Hkristu a marang e, hpung shingkang daru magam hpung dagu hte ahkang aya, chyi nma pri npra aten kaw nna, ya e rai ti mung, htani htana prat dingsa e rai ti mung anga nga u ga law. Amen.

SHINGRAN 3:21

Ngai awng padang lu nna nye Wa a tingnyang makau e shi hte rau dung nga lu ai zawn, awng padang lu ai wa gaw nye a tingnyang makau e ngai hte rau dung nga lu na ahkang ngai jaw na we ai.

SHINGRAN 4:11

“Anhte a Madu Karai Kasang e! Nga yawng nga pra hte hpe nang hpan tawn da nna, dai hte gaw na a myit ra ai hku sha grin nga ma ai hte asak hkrung nga ma ai. Dai majaw nang gaw, hpung shingkang arawng sadang hte, hpung dagu lu la na gingdan nga ndai law!,” nga nna tsun ma ai.