GALATI 5:3 - Jinghpaw Common Language Bible 2009

³ Dai hta n ga, matu gadoi hkam ai wa gaw jep ai Tara nlang hte hpe shatup shadik lu na ra ai ngu nna, matu gadoi hkam ai masha yawng hpe ngai kalang mi bai sadi jaw nngai.

Jinghpaw Hanson Version Bible

³ Dai hta n-ga, matu gadoi hkam ai wa gaw, jep ai tara nlang hte hpe shatup la na ra ai, ngu nna matu gadoi hkam ai masha yawng hte hpe, ngai sakse bai hkam nga nngai.

GALATI 5:3 ပူးပေါင်းရင်းမြစ်များ

NEHEMIA 9:34

Anhte a kaji kawa ni, anhte a hkawhkam ni, ningbaw ni hte hkinjawng ni na a Tara hkan shatup nga ma ai n rai. Shanhte gaw na a hkang da ai ga ni hte shadum jahprang ga ni hpe madat ma ai n rai.

MAHTE 23:16

Myi kyaw let lam madun ai ni e, nanhte dingnye lu myit dai! ‘Kadai rai ti mung, Nawku Htingnu mying gang nna dagam yang gaw, dai ga hpe shi n hkan shatup ra ai. Rai ti mung dai Nawku Htingnu na ja hpe lakap nna dagam ai wa gaw, shi a dagam da ai ga n shatup n mai rai na rai nga ai, nga nna nanhte sharin myit dai.

MAHTE 23:18

Bai nna nanhte gaw, ‘Kadai rai ti mung, dai hkungri hpe lakap nna dagam yang, dai dagam da ai ga hte maren n shatup ti mung hpa n ra ai. Rai ti mung, hkungri ntsa na kumhpa hpe lakap nna dagam yang gaw, dai hpe shi n hkan shatup n mai rai na rai nga ai,’ nga nna sharin myit dai.

LUKA 16:28

Ngai nau ni manga naw nga ma ai majaw, shanhte mung ndai nni nkri hkrum ai shara de n du mu ga, shanhte hpe wa shadum jahprang sadi jaw shangun ya rit law,’ ngu nna hpyi wu ai.

KASA 15:1

Ya Yuda mung na ni nkau mi Antioki mare de sa du nna, kam sham ai hpu nau ni hpe, “Nanhte Mawshe a jep ai Tara hte maren matu gadoi lam n hkan myit yang gaw, hkye hkrang la ai kaw n du lu na myit dai,” ngu nna sa sharin mu ai.

KASA 2:40

Petru gaw ga kaga law law hte mung sakse hkam nna, “Nanhte gaw nanhte a hkum hpe ndai n hkru ai masha ni hkrum sha nga ai ari hta na lawt pru lu myit ga law!,” ngu nna shanhte hpe shadut shadum jahprang wu ai.

KASA 20:21

Yuda masha ni hpe mung, maigan masha ni hpe mung, shanhte a yubak mara ni kaw na Karai Kasang hpang de myit malai kayin wa nna, anhte a Madu Yesu hpe kam sham na matu mung, ngai aja awa sadi jaw shadum shahprang ni ai.

ROMA 2:25

Dai jep ai Tara hpe hkan shatup myit yang gaw, matu gadoi hkam ai lam akyu rawng nga ai; rai ti mung tara hpe tawt lai ai wa nang rai nga n yang gaw, matu gadoi ai hking galoi mung n hkam la ai mahtang grau kaja nga ai.

GALATI 3:10

Dai jep ai tara hkan sa shadik ai lam hpe kam hpa nga ai ni kadai rai ti mung dagam dala a npu e rai nga ma ai. Hpa majaw nga yang, Chyum Laika gaw, “Dai tara hta ka da mada hte maren n hkan shatup nga ai wa kadai rai ti mung, dagam dala hkrum na mara ai,” nga nna ka da nga ai.

GALATI 5:2

Madat mu! Nanhte matu gadoi hkam myit yang gaw, Hkristu gaw nanhte a matu hpa akyu n nga ai, ngu nna ngai Pawlu nan nanhte hpe tsun dan made ai.

GALATI 5:6

Kaning rai nme law, anhte gaw Hkristu Yesu hta e rai nga ga yang gaw, matu gadoi hkam ai n hkam ai ngu ai gaw hpa ahkyak n rai nga ai; ra ahkyak ai lam gaw tsaw ra myit dan dawng hkra amu galaw ai dai makam masham she rai nga ai.

EHPESU 4:17

Manu n rawng ai myit mang ai lam lu ai maigan masha ni zawn matut nna asak n hkrung na matu Madu a mying ningsang hte ngai nanhte hpe sadi jaw made ai.

TARA JAHPRANG 27:26

“ ‘Karai Kasang a tara hte sharin shaga ai ga ni yawng hpe n hkan shatup ai wa kadai mung Karai Kasang jaw ai dagam dala hkrum u ga law.’ “Shaloi, amyu masha ni yawng gaw, ‘Amen!,’ ngu nna htan na mara ai.

TARA JAHPRANG 31:21

shaloi hkrit hpa ru yak tsin-yam tsindam law law shanhte hkrum kadup na mara ai. Rai ti mung ndai mahkawn mangoi ga hpe naw mahkawn na ra ai rai nna dai gaw shanhte a matu sakse tai nga na ra ai. Shanhte hpe jaw na ngu nna ga sadi jaw da sai mungdan de garai n woi shang ai kaw nna pyi, shanhte kaning rai myit mang nga ma ai hpe ngai chye nga nngai,” ngu nna tsun wu ai.

TARA JAHPRANG 8:19

Dai Madu nanhte a Karai Kasang hpe galoi mung hkum malap kau myit; kaga karai ni hpe nawku daw jau na dai de galoi mung hkum kayin mat myit. Nanhte rai nna hkan nang myit yang chyawm gaw teng teng shamyit kau ai hkrum na rai myit dai ngu nna, dai ni ngai nanhte hpe sadi jaw nga nngai.

1 HTESALONI 4:6

Ndai zawn re ai amu hta nanhte kadai wa mung, tinang a Hkristan hpu nau wa hpe shut hpyit ai lam shing n rai, hpu nau wa a ntsa e ahkaw ahkang la ai lam n mai galaw myit dai. Ndai lam shawng de nanhte hpe anhte tsun dan yu saga ai rai nna Karai Kasang gaw shut hpyit tawt lai ai ni hpe ari jaw na ra ai lam nanhte hpe aja awa sadi jaw dat ga ai.

1 YAWHAN 4:14

Mungkan ga a hkye hkrang la ai Madu tai u ga, Kawa gaw dai Kasha hpe shangun dat wu ai lam anhte mu lu sagaw ai hte sakse hkam ga ai.