EZEKELA 9:4 - Jinghpaw Common Language Bible 2009

⁴ “Yerusalem ting de dinghkren hkawm nna, mare kata e galaw ai matsat shabat amu yawng a majaw myit ru yawn hkyen ai hte tsin-yam tsindam hkrum sha nga ai masha shagu hte a kahtan ntsa e masat shakap da u,” ngu nna tsun wu ai.

Jinghpaw Hanson Version Bible

⁴ Yehowa gaw, “Yerusalem mare ka-ang hku lai wa nna, mare kata e galaw ai matsat shabat amu majaw madai nna, hkrap ngu hkrap ngoi ai ni a lahtan hpe, mahkret matsing u,” ngu nna shi hpe tsun wu ai.

EZEKELA 9:4 ပူးပေါင်းရင်းမြစ်များ

NINGPAWT NINGHPANG 4:15

Rai ti mung, dai Madu gaw, “N rai law, marai langai ngai nang hpe sat ai rai yang, yubak ari htang sanit jaw ai hkrum na wu ai,” ngu nna shi hpe tsun wu ai. Dai majaw dai Madu gaw Ka-in hpe mu ai ni kadai mung shi hpe n sat lu mu ga, shi hpe masat shakap tawn da ya wu ai.

2 HKAWHKAM 22:13

“Ndai laika a sharin achyin ai ga ni hte seng nna, nye a matu mung, Yuda amyu masha ni yawng a matu mung, dai Madu hpe sa san ya mi. Ndai laika hta tsun da ai hte maren galaw ang ga ti mung, anhte a kaji kawa ni n hkan galaw nga ma ai majaw dai Madu anhte hpe pawt sindawng nga ai.”

SHAKAWN KUNGDAWN 119:136

Masha ni na a tara hpe n madat n mara nga ma ai majaw, nye a myi prwi ni gaw hka nu zawn lwi nga li ai.

SHAKAWN KUNGDAWN 119:53

Tara n lang ai ni na a tara hpe n hkan ai sha, jahten nga ma ai hpe ngai mu ai shaloi; ngai masin kahtet nga nngai.

PRU MAT 12:13

Chyinghka hkadun ni hta kap ai asai gaw nanhte rawng nga ai nta hpe matsing na matu kumla tai na ra ai. Dai asai hpe ngai mu ai shaloi, nanhte hpe ngai shalai kau da na we ai. Egutu masha ni hpe ari jaw ai shaloi nanhte hta machyi shoichyum hkrum na myit dai n rai.

PRU MAT 12:23

Dai Madu gaw Egutu masha ni hpe sat na nga, Egutu mung de dinghkren hkawm mat wa ai shaloi, chyinghka hkadun hte hkanoi ni hta arut shakap da sai asai hpe mu jang, Si Du a lamu kasa hpe nanhte a nta de shang nna nanhte hpe sat kau shangun na nngai n rai.

PRU MAT 12:7

Dai amyu masha ni gaw asai loi mi la nna yam nga shan sha na nta ni a chyinghka hkadun ni hte hkanoi ni hta chya da lu na rai myit dai.

ESAIA 57:15

“Ngai gaw htani htana agrin nga ai matsaw ntsa na chyoi pra ai Karai Kasang rai nga nngai. Ngai gaw tsaw nna chyoi pra ai shara hta nga nngai, rai ti mung ngai gaw shagrit shanem ai hte myit malai lu ai ni hte rau mung nga nngai, shaloi ngai gaw shanhte a kam hpa shara hte myit mada shara hpe bai jaw ya lu nngai.

YEREMIA 13:17

Dai ga ni hpe nang n madat ai rai yang, na a gumrawng gumtawng ai myit a majaw, ngai gaw n dan n leng ai shara hta hkrap na nngai; Dai Madu a amyu masha ni gaw bawng dung hkrum ai ni zawn rim hkrum nga ma ai majaw, ngai gaw ahkup ahka nga hkra hkrap ai hte nye a myi prwi lwi na ra ai.

EZEKELA 21:6

“Si chye ai masha wa e, na a myit masin gaw myit daw myit hten nga ai zawn madai nga u. Masha shagu nang hpe mu mada ai shara ni hta yawn hkyen ai hte madai nga u.

EZEKELA 6:11

Tsaw Htum ai dai Madu gaw, “Israela amyu masha ni galaw ai n hkru n shawp ai hte matsat shabat amu yawng a majaw, na a lata hpe manat jum da u! Na a lagaw hkindit u! Yawn hkyen ai hte marawn jahtau u. Shanhte gaw hpyen majan hta mung, kawsi kyet ai hte ana zinli ni hta si mat na mara ai.

EZEKELA 9:5

Karai Kasang gaw kaga masha ni hpe, “Shi a hpang hkan nhtawm mare ting hta dinghkren hkawm let kahtam sat kau mu. Langai mi hpe mung asak a hkyamsa lam hkum jaw myit; kade a ntsa e mung matsan hkum yu dum myit.

EZEKELA 9:6

Dingla ni hte shabrang ni hpe mung, mahkawn ni hte kanu ni, ma kaji ni hpe htau sat kau mu. Rai ti mung, kahtan ntsa e masat shakap da hkrum ai ni kadai hpe mung hkum hkra myit. Dai amu hpe nye Nawku Htingnu shara hta galaw hpang mu,” ngu nna tsun ai ga hpe ngai na nngai. Shanhte gaw dai Nawku Htingnu ndaw e tsap nga ai ningbaw ni hpe shawng sat hpang ma ai.

AMO LAIKA (AMOS) 6:6

Nanhte gaw sabyi ntsin hpe gawm hta lu nna manam pyaw htum ai sau jet ni lang nga myit dai, rai ti mung nanhte gaw Israela a hten run lam hpe sharung shayawt nga myit dai n rai.

ZEHPANI 1:12

Dai aten e ngai gaw pyengdin lang let, Yerusalem hpe sawk yu na nngai. Dai Madu gaw lam langai hku shing n rai lam kaga hku nna mi rai rai, lama mi hpe galoi mung galaw na n rai, nga nna shanhte hkum shanhte tsun let tinang dai myit dik nga ai ni hte madu hkum madu kam hpa nga ai masha ni hpe ngai ari jaw na we ai.

ZEHPANI 3:18

nanhte yawng a ntsa e mahkawn mangoi let kabu gara na ra ai. Dai Madu gaw, “Ngai gaw nanhte hpe jahkrit shama daw dan ai amu hte nanhte a sari jahpoi kau ya ai amu ni hpe ngai jahtum kau ya ni ai.

MALAHKI 3:16

Dai hpang, dai Madu hpe hkrit kamyin ai ni gaw shada da tsun nga ma ai, dai Madu hpe hkrit kamyin ai hte shi hpe hkungga ai ni ka matsing laika buk langai hta ka jahkrat da nga ai.

2 KORINHTU 1:22

Karai Kasang shi nan anhte hpe kaga san di lata la nna, shi a amyu masha ni re ai lam masat dazik dawk shakap da mani ai hte, du na ra ai ten hta anhte hkam la na chyeju nlang a matu hkam dahka galaw ai hku nna anhte a myit masin ni hta dai chyoi pra ai Wenyi ru jaw bang ya mi ai.

2 KORINHTU 12:21

Nanhte hpang de ngai bai du ai shaloi Karai Kasang gaw ngai hpe nanhte a man e shagrit kau ai hkrum shangun na hpe ngai tsang nngai. Ya du hkra pyi myit malai n lu ai sha arawn alai hten nna ngang kayut ai hte nse nsa lam hkan nga ai ni law law a majaw, ngai hkrap myi prwi pru na hpe tsang nga nngai.

GALATI 6:17

Ya kaw nna kadai mung ngai hpe hkum sharu shatsang manu ga, hpa majaw nga yang nye a hkum hta kap ai nma hkang ni gaw ngai Hkristu a mayam re ai lam sakse hkam nga ma ai.

EHPESU 4:30

Dai hta n ga Chyoi Pra ai Wenyi hpe hkum shayawn kau nga myit; hpa majaw nga yang dai Chyoi Pra ai Wenyi gaw nanhte hpe Karai Kasang madu nga ai lam sakse masat dazik rai nna hpang jahtum nhtoi e nanhte hpe Karai Kasang shalawt dat hkrum na ra ai hpe pahkam hkam ya ai lam langai mi mung rai nga ai.

2 TIMOHTI 2:19

Rai ti mung Karai Kasang e jahkrat da sai ngang kang ai npawt nhpang hkridun chyawm gaw shamu shamawt shangun lu ai n rai; dai npawt nhpang a ntsa e dai Madu gaw, “Shi a masha rai nga ai ni hpe chye chyap nga ai,” nga nna mung, “Madu hte seng ai wa rai nngai nga nna tsun matsun yawng hte gaw shut hpyit ai amu hpe tawn kau da mu ga,” nga nna masat dazik ka shakap da nga ai.

SHINGRAN 14:1

Dai hpang ngai yu dat yang, Ziun bum ntsa e dai Sagu Kasha tsap nga ai hpe ngai mu nngai. Shi a mying hte shi a Kawa a mying hpe shanhte a lahtan ni hta shakap da ai masha 144,000 hte gaw Sagu Kasha hte rau rai nga ma ai.

SHINGRAN 20:4

Dai hpang, tingnyang ni hpe ngai mu nngai; dai tingnyang ni hta dung nga ai ni gaw, tara dara na ahkang aya ap ya da hkrum ai ni rai nga ma ai. Dai hta kaga, Madu Yesu shadan dan ai teng man ai lam hpe mung, Karai Kasang a mungga hpe mung hkaw tsun sakse hkam ai majaw, sat kau hkrum ai ni hte, dai matse labye hpe mung, shi a hkrang sumla hpe mung, n naw n ku ai hte, tinang a lahtan hte lata ni hta dai matse labye a masat dingsat ni hpe n hkam la ai ni a tsu ni hpe mung, ngai mu nngai. Shanhte gaw asak bai hkrung wa nna, hkawhkam ni zawn Madu Yesu hte rau shaning hkying mi tup up nga na mara ai.

SHINGRAN 9:4

Shanhte gaw, ga ntsa na tsingdu hpe mung, tsit lali ai baw magup hpe mung, hpun magup hpe mung, hkra lu na n rai, ngu nna hkang da ai hkrum ma ai. Tinang a lahtan ni hta Karai Kasang a dazik n kap ai masha ni hpe sha zingri lu na ngu nna jep da mu ai.