EZEKELA 8:17 - Jinghpaw Common Language Bible 2009

¹⁷ Dai Madu gaw ngai hpe, “Si chye ai masha wa e, dai amu hpe nang mu nu ni? Ndai Yuda amyu masha ni gaw ndai yang e nang mu nit dai shanhte galaw ai matsat shabat amu ni yawng hte mungdan ting hta kashun kashe du daw sai hkaw amu shachyam shabra ai hta pyi myit dik dum nga ma ai n rai. Shanhte gaw ndai Nawku Htingnu kata hta nan sa nna ngai hpe grau nna masin pawt shangun nga ma ai. Shanhte gaw ngai hpe dang lu ai made n rawn n wawm ai hku kade daram n kaw n law di ma ai hpe mada yu u!

Jinghpaw Hanson Version Bible

¹⁷ Dai rai nna shi gaw, “Masha kasha e, dai amu hpe nang mu nu ni? Yuda dap ni gaw, ndai yang e galaw ai matsat shabat amu, kaji nga a ni? shanhte gaw mung ting hpe kashun kashe hte jahpring nna, ngai hpe bai pawt bu shangun ma ni ai: yu mu, shanhte gaw tsabyi ru lakung hpe ladi nchyun e lang ma ai.

EZEKELA 8:17 ပူးပေါင်းရင်းမြစ်များ

NINGPAWT NINGHPANG 6:11

Rai ti mung shinggyim masha shagu gaw Karai Kasang a man e n hkru nga ma ai hte kashun kashe du daw sai hkaw amu gaw shara shagu hkan chyam bra nga ai.

NINGPAWT NINGHPANG 6:13

Karai Kasang gaw Noa hpe, “Ndai shinggyim masha ni yawng hpe jahtum kau na matu, ngai daw dan da se ai. Shanhte a kashun kashe du daw sai hkaw amu ni gaw ndai mungkan hta hpring chyat nga ai majaw, shanhte hpe ngai atsai awai shamyit kau na nngai.

2 HKAWHKAM 21:16

Manashe gaw mara n kap ai amyu masha law law hte hpe sat kau wu ai majaw Yerusalem nmaw lam hkan sai hka lwi nga ai. Yuda amyu masha ni hpe hpara sumla nawku ai lai de woi sa wa nna dai Madu hpe shut kau na lam shanhte hpe jat nna shi woi galaw nga ai.

YEREMIA 19:4

Ngai gaw ndai amu hpe galaw na nngai, hpa majaw nga yang, amyu masha ni gaw ngai hpe kau da manu ai; shanhte mung, shanhte a kaji kawa ni mung, Yuda hkawhkam ni mung n chye ai kaga karai ni hpe ndai shara ni hta shagu hkungga ni nawng jau ai hte matsat shabat di kau manu ai. Shanhte gaw ndai shara hta mara n kap ai amyu masha ni a asai ni hte jahpring manu ai,

YEREMIA 20:8

Ngai ga tsun ai aten shagu, ngai gaw marawn jahtau ai hte, “Kashun kashe du daw sai hkaw lam! Hten byak lam!,” ngu nna marawn garu nngai. Madu e, ngai gaw na a mungga hkaw tsun nngai majaw, ngai gaw asawng hkrum ai hte aten shagu jahpoi hkrum nga nngai.

YEREMIA 44:3

hpa majaw nga yang, shanhte a amyu masha ni gaw n hkru ai amu galaw nna ngai hpe masin pawt shangun nga ma ai. Shanhte gaw shanhte mung, nanhte mung, nanhte a nji nwa ni galoi mung n nawku yu ai kaga karai ni hpe shagu hkungga nawng ya nna daw jau nga ma ai.

YEREMIA 6:7

Hka htung gaw dai kaw na mu ai hka shapraw ya ai zawn, Yerusalem shi a n hkru ai amu hpe shapraw nga ai. Ngai gaw dai mare na kashun kashe du daw sai hkaw amu hte jahten shaza lam hpe na nngai; machyi makaw hte hkala nba lam yawng hpe mung ngai mu nngai.

SHARUNG SHAYAWT 1:5

Shi a gumlau hpyen ni awng padang lu ma ai; shanhte gaw shi hpe daru magam n-gun hte ka-up da ma ai. Dai Madu gaw shi a law la ai yubak ni yawng a matu shi hpe nni nkri hkrum shangun wu ai; Shi a ma kaji ni rim hkrum nna woi la hkrum nga ma ai.

EZEKELA 11:6

Nanhte gaw ndai mare hta amyu masha law law hpe sai jahkaw ai amu galaw manit dai majaw nmaw lam ni hta si mang ni hte hpring nga ai.

EZEKELA 16:26

Nang gaw na a ngang gayut ai htingbu ni ngu ai Egutu masha ni hte rau yup nhtawm na a shawa num amu ngu ai hpye ai amu galaw nna, ngai hpe pawt bu shangun nit dai.

EZEKELA 18:12

Shi gaw matsan mayan ni hpe adip arip di nna maw lu maw sha ai hte hpya lu hpya sha nga ai. Hkoi la ai wa shi hpe tang da ai arung arai hpe mung mazing la kau ya nga ai. Shi gaw maigan htung tara hkan ai ni galaw da ai htingnu shara hkan sa nna matsat shabat re ai hpara sumla ni hpe nawku ai hte,

EZEKELA 23:25

Ngai gaw nang hpe pawt sindawng nga nngai majaw, shanhte a masin kahtet ai hta ngai nang hpe hkrup sha shangun na nngai. Shanhte gaw na a ladi hte ana ni hpe kahtam di kau nna, na a kashu kasha ni hpe sat kau na mara ai. Rai sa, shanhte gaw na a shayi shadang sha ni hpe na a lata kaw nna gare la nhtawm shanhte hpe jahkrung nat kau na mara ai.

EZEKELA 28:16

Nang gaw gun rai dut mari ai hpaga amu ni hte law la nga ndai, dai amu gaw nang hpe kashun kashe du daw sai hkaw amu hte yubak lam ni de woi sa nga ai. Dai rai nna, ngai gaw nang hpe nye a chyoi pra ai bum kaw na pru mat wa na matu shaden kau dat ni ai, nang hpe sin ai lamu kasa mung nang hpe dai htoi kabrim ai lung seng ni a ka-ang kaw na yeng seng kau nu ai.

EZEKELA 45:9

Tsaw Htum ai dai Madu gaw, “Israela a up hkang du ni e, nanhte yubak mara galaw shut ai gaw nau wa na la manit dai! Nanhte galaw ai kashun kashe du daw sai hkaw amu hte dip gamyet sha ai amu ni hpe kau da manu. Ding hpring ai hte teng man ai amu hpe galaw nga mu. Nye a amyu masha ni hpe shanhte a mungdan kaw nna galoi mung bai hkum gau shapraw myit. Tsaw Htum ai dai Madu ngai nan nanhte hpe dai lam hkang da nga nngai.

EZEKELA 7:11

Kashun kashe du daw sai hkaw amu gaw grau nna n shawp ai amu hpe shadan shapraw ya nga ai. Shanhte a ngamu ngamai ai sut gan, hkik hkam ai arawng sadang hte shanhte a hpung ningja dan hkung ai hpa mung shanhte hta nga na ra ai n rai.

EZEKELA 7:23

“Lam shagu kashuk kashak byin nga sai-mungdan gaw masha sat ai amu ni hte hpring nga nna mare ni mung kashun kashe du daw sai hkaw amu ni hte hpring chyat nga ai.

EZEKELA 8:6

Karai Kasang gaw ngai hpe, “Si chye ai masha wa e, hpa byin nga ai hpe nang mu n ni? Ngai hpe nye a chyoi pra ai shara kaw na tsan hta tsan ai shara de shaden kau let, Israela ni ndai yang e galaw ai matsat shabat amu ni hpe yu yu u. Nang gaw ndai amu hta grau n tsawm n htap ai matsat shabat amu ni hpe pyi mu na rin dai,” ngu nna tsun wu ai.

EZEKELA 9:9

Karai Kasang gaw, “Israela hte Yuda amyu masha ni gaw hkrit hpa yubak hte shut hpyit ai mara lu nga ma ai. Shanhte gaw mungdan ting hta sai kap amu shut hpyit kau manu ai hte Yerusalem mung ru hka amu ni hte hpring chyat nga sai. Dai Madu ngai nan shanhte a mungdan hpe kau da nna, shanhte hpe n mu lu sai, nga nna shanhte tsun shajang ma ai.

AMO LAIKA (AMOS) 3:10

Dai Madu gaw, “Ndai masha ni gaw shanhte a nga shara ni hta ru hka amu hte kashun kashe du daw sai hkaw amu ni hte jahpring da nga ma ai. Shanhte pyi gara hku ding man na lam hpe n chye nga ma ai.

AMO LAIKA (AMOS) 6:3

Nanhte gaw tsin-yam tsindam a nhtoi du wa ra ai hpe yin la na matu ningdang kau nga myit dai, rai ti mung nanhte hkum nan galaw ai amu gaw dai nhtoi hpe grau shani la nga myit dai.

MIHKA 2:2

Shanhte gaw hkauna pa ni hpe ra marit wa ai shaloi, dai ni hpe kashun la ma ai; shanhte gaw dum nta ni hpe ra marit wa ai shaloi, dai ni hpe la kau ma ai. Kade a dinghku mung, sut gan mung shim nga ai n rai.

MIHKA 6:12

Nanhte a sut su ai masha ni gaw matsan mayan masha ni hpe n-gun makru shadaw ya nga ma ai; buga masha yawng hte mung masu magaw masha ni hkrai rai ma ai.

ZEHPANI 1:9

Maigan nawku htung hkan ai ni zawn nawku ai ni hte shanhte a madu ni a nta hpe arung arai lagu, masha sat amu jahpring ya ai ni mahkra hte hpe ngai ari jaw na we ai.