EZEKELA 45:9 - Jinghpaw Common Language Bible 2009

⁹ Tsaw Htum ai dai Madu gaw, “Israela a up hkang du ni e, nanhte yubak mara galaw shut ai gaw nau wa na la manit dai! Nanhte galaw ai kashun kashe du daw sai hkaw amu hte dip gamyet sha ai amu ni hpe kau da manu. Ding hpring ai hte teng man ai amu hpe galaw nga mu. Nye a amyu masha ni hpe shanhte a mungdan kaw nna galoi mung bai hkum gau shapraw myit. Tsaw Htum ai dai Madu ngai nan nanhte hpe dai lam hkang da nga nngai.

Jinghpaw Hanson Version Bible

⁹ Madu Yehowa ning nga ai: Israela du ni e, ram manu ga; adip arip hte kashun kashe amu kau da nna, tara hte dinghpring ai lam hkan galaw mu: nye a amyu masha ni hpe zingri zingrat hkum rai myit,” nga nna Madu Yehowa tsun ai.

EZEKELA 45:9 ပူးပေါင်းရင်းမြစ်များ

YOBA 20:19

hpa majaw nga yang, shanhte gaw matsan mayan masha ni hpe dip gamyet sha nna n sawn n sang di ma ai, marai langai ngai e gap da ai nta ni hpe zing la ma ai.

YOBA 22:9

Nang gaw gaida ni hpe karum na ningdang kau ai sha n-ga; jahkrai ma ni hpe mung hpya lu hpya sha ai hte n kaja ai hku galaw nga ndai.

ESAIA 1:17

teng man ai amu galaw na hpe sharin la mu, teng man rap ra ai amu yu la nna, dip gamyet sha hkrum nga ai ni hpe karum mu, jahkrai ma ni a ahkaw ahkang hpe jaw mu; gaida gaina ni hpe makawp maga nga mu.”

YEREMIA 22:3

“Dai Madu ngai nan teng man ai hte ding hpring ai amu galaw na matu nang hpe hkang da ni ai. Shi hpe maw sha mawp sha nga ai wa kaw nna maw sha mawp sha n hkrum mat hkra dai masha wa hpe makawp maga nga u. Malet nhprang manam ni, chyahkrai nmai ni hte gaida gaina ni hpe lam hkum shadam myit, adip arip mung hkum rai myit; ndai chyoi pra ai shara hta mara n kap ai masha ni hpe hkum sat myit.

YEREMIA 6:7

Hka htung gaw dai kaw na mu ai hka shapraw ya ai zawn, Yerusalem shi a n hkru ai amu hpe shapraw nga ai. Ngai gaw dai mare na kashun kashe du daw sai hkaw amu hte jahten shaza lam hpe na nngai; machyi makaw hte hkala nba lam yawng hpe mung ngai mu nngai.

EZEKELA 44:6

“Gumlau chye ai Israela amyu masha ni hpe Tsaw Htum ai dai Madu ngai nan shanhte galaw lai mat wa sai matsat shabat amu ni hpe loi mi pyi hkam sharang sana n re ai lam htawn tsun u.

EZEKELA 7:11

Kashun kashe du daw sai hkaw amu gaw grau nna n shawp ai amu hpe shadan shapraw ya nga ai. Shanhte a ngamu ngamai ai sut gan, hkik hkam ai arawng sadang hte shanhte a hpung ningja dan hkung ai hpa mung shanhte hta nga na ra ai n rai.

EZEKELA 7:23

“Lam shagu kashuk kashak byin nga sai-mungdan gaw masha sat ai amu ni hte hpring nga nna mare ni mung kashun kashe du daw sai hkaw amu ni hte hpring chyat nga ai.

EZEKELA 8:17

Dai Madu gaw ngai hpe, “Si chye ai masha wa e, dai amu hpe nang mu nu ni? Ndai Yuda amyu masha ni gaw ndai yang e nang mu nit dai shanhte galaw ai matsat shabat amu ni yawng hte mungdan ting hta kashun kashe du daw sai hkaw amu shachyam shabra ai hta pyi myit dik dum nga ma ai n rai. Shanhte gaw ndai Nawku Htingnu kata hta nan sa nna ngai hpe grau nna masin pawt shangun nga ma ai. Shanhte gaw ngai hpe dang lu ai made n rawn n wawm ai hku kade daram n kaw n law di ma ai hpe mada yu u!

AMO LAIKA (AMOS) 5:15

N hkru ai amu hpe n dawng nga mu, teng man ai amu hpe tsaw ra nga mu, teng man rap ra ai tara gaw tara rung ni hta dang nga ai hpe mu lu nga ai. Dai Madu gaw naw hkrung ngam nga ai ndai amyu baw a amyu masha ni hpe mahkoi matsan chye dum la mai nhten.

AMO LAIKA (AMOS) 5:24

Shing rai na malai, teng man rap ra ai tara gaw hka shi zawn lwi nga u ga; ding man ai gaw galoi mung hkyet mat n chye ai hka shi zawn tai nga u ga.

MIHKA 2:9

Nanhte gaw nye a amyu masha num ma ni hpe shanhte myit manoi nga ai dum nta kaw na shaden kau nga myit dai; shanhte a ma kaji ni hpe jaw ya ai nye a htani htana shaman chyeju hpe nanhte hpya kau ya myit dai.

MIHKA 6:10

N hkru ai masha ni a dum nta kata na sut gan ni gaw n ding n man ai hku nna lu tawn ai arai ni rai nga ai. Shanhte gaw n teng n man ai dang hte bye ni hpe lang ma ai; dai zawn re ai mawp sha ai arai hpe ngai matsat nngai.

ZEHKARIA 7:9

“Moi shawng de nye a amyu masha ni hpe ning ngu ai hkang da ai ga ngai jaw ni ai: ‘Teng man ai hku amu daw dan ai hpe nanhte mu lu na myit dai. Langai hte langai matsan dum ai myit hte n-gaw n wai ai myit madun hkat nga mu;

ZEHKARIA 8:16

Ndai gaw nanhte galaw ang myit dai amu ni rai nga ai: langai hte langai teng man ai ga tsun nga mu. Tara daw dan ai rung ni hta kaja wa teng man rap ra ai hte ngwi pyaw sim sa lam jaw ya lu ai hku matsan dum hkat nga mu.

LUKA 3:14

Hpyenla ni mung, “Anhte wa gaw kaning rai na rai ta? Anhte hpa rai ta?,” nga nna shi hpe san ma ai. Shi gaw, “Kadai wa kaw na mung adip arip di nna, gumhpraw hkum kashun la myit, n tara ai hku mara hkum shagun myit, nanhte lu ai shabrai hte myit dik dum nga mu,” ngu nna shanhte hpe tsun mu ai.

1 PETRU 4:3

Nanhte gaw lai wa sai aten hta ram ram wa na hkra maigan masha ni galaw mayu ai baw hkan galaw lai wa manit dai. Nanhte a asak hkrung lam hpe tara n hkan ai n htap n htuk ai amu, marin marit ai amu, chyaru nang ai, n se n sa galaw ai, nang ai baw malu masha sha ai, tsa lu poi ni galaw ai, hta jai lang manit dai. Dai ni hta grau matsat shabat hkyet rung hpa gaw, sumla ni hpe nawku ai lam rai nga ai.