EZEKELA 38:11 - Jinghpaw Common Language Bible 2009

¹¹ Makawp maga lam hpa mung n nga ai hte mare bunghku n kum da ti mung, ngwi pyaw sim sa ai hte shim lum ai hku amyu masha ni tinang hkrai asan apan rai shanu nga ai mungdan hpe shang gasat na matu nang myit daw dan na rin dai.

Jinghpaw Hanson Version Bible

¹¹ nang gaw, Mare kahtawng bunghku n kum ai mung de ngai lung wa na nngai; gaja wa, asan apan shanu nga nna, shakum n kum ai, htinggrang n grang ai hte chyinghka pyi n ra ai mung de ngai lung gasat na nngai;

EZEKELA 38:11 ပူးပေါင်းရင်းမြစ်များ

SHAKAWN KUNGDAWN 10:9

Shi gaw hkanghkyi langai zawn lagyim shara hta la nga nhtawm; matsan mayan ni hpe gamu rim la na shi la nga let, shi gaw shi a mahkam hta shanhte hpe rim bang ai hte shanhte hpe tsan tsan de garawt mat wa wu ai.

PRU MAT 15:9

Gumlau hpyen wa gaw, ‘Ngai shanhte hpe hkan shachyut nna rim la na we ai; ngai gaw shanhte a sut gan hpe garan kau nna, ngai ra ai yawng la kau na we ai; Nye a nhtu shaw nna shanhte lu ai arai yawng hte hpe htawm la na we ai,’ ngu nna tsun wu ai.

EZEKELA 30:9

Dai nhtoi du ai shaloi, Egutu gaw jahten shaza kau hkrum nga sai, ngai gaw hpa n nawn ai Ehtiopi masha ni hpe myit shalau ya na matu kasa ni hpe sanghpaw li ni hte shangun dat na nngai. Shanhte gaw hkrit gari na mara ai. Dai nhtoi gaw du wa ra ai!”

EZEKELA 34:27

Hpun ni asi si wa nna yi sun hkauna ni nsi naisi ni shapraw ya na mara ai; kadai mung tinang a lamu ga hta shim lum ai hte shanu nga lu na mara ai. Nye a amyu masha ni a hpri saidawng ni hpe agrawp daw kau ya nna shanhte hpe mayam shatai nga ai ni a lata kaw na shalawt dat ai shaloi, ngai nan dai Madu rai nga nngai hpe shanhte chye lu na mara ai.

EZEKELA 38:14

Dai rai nna, Tsaw Htum ai dai Madu gaw Goga hte seng nna tsun ai mungga shi hpe htawn tsun na matu, ngai hpe shangun dat wu ai: “Ya chyawm gaw, nye a amyu Israela ni shim lum ai hte shanu nga ma yang,

EZEKELA 38:8

Shaning law law lai mat wa ai hpang, masha amyu baw ni law law a lata kaw na rau sha woi nhtang wa nna hpyen majan hpa mung n hkrit n tsang ra sai hte amyu masha ni shanu nga ai mungdan hpe shang gasat na matu ngai shi hpe ahkang jaw ya na nngai. Shi gaw aten na na katsi katsang tai mat nna jahkam da sai rai ti mung, ya, dai mungdan hta amyu masha ni yawng shim lum ai hte shanu nga sai Israela bum ni hpe shang gasat na ra ai.

ZEHKARIA 2:8

Nanhte hpe adup ai wa kadai mung nye a matu manu dan htum ai hpe adup ai wa rai nga ai,” ngu nna tsun wu ai. Dai rai nna, Chyahtum Chyalai N-gun rawng ai dai Madu gaw shi a amyu masha ni hpe hpya ayai kau ai masha amyu baw ni a matu ndai mungga hte hpawn ngai hpe shangun dat wu ai:

ROMA 3:15

Shanhte gaw masha hpe machyi shangun na hte sat na matu lawan ma ai.

TARA JAHPRANG 12:10

Ya nanhte Yawdan hka rap jang, dai Madu nanhte hpe mungdan madu la shangun nhtawm dai yang e nga lu na rai myit dai. Shaloi nanhte a gumlau hpyen ni yawng a lata kaw na shim lum hkra shi nanhte hpe bau sin ya ai a majaw ngwi pyaw sim sa ai hte nga lu na rai myit dai.

TARA AGYI 18:27

Dan a masha ni dai hkinjawng wa hte Mihka galaw ai arai ni hpe woi mat wa ai hpang, ngwi pyaw sim sa ai mare, Betrehob kadit na Laisha mare hta atsin sha nga ai masha ni hpe htim gasat kau ma ai. Shanhte gaw mare masha ni hpe sat kau nhtawm mare hpe mung nat kau ya ma ai. Laisha mare gaw Sidon mare hte tsan ai majaw mung, kaga masha ni hte makyit mahkai n nga ai majaw mung shanhte hpe hkye la na masha kadai mung n nga nga ai. Dan a masha ni mung mare hpe bai de nna dai yang e nga nga ma ai.

TARA AGYI 18:7

Dai marai manga hte gaw pru mat wa nhtawm Laisha mare de sa wa ma ai. Dai yang e nga ai masha ni gaw Sidon masha ni zawn kade sha shim ai hte nga nga ma ai hpe shanhte sa mu ma ai. Shanhte gaw kadai hte mung ga li ga law, ndang kalang n nga ai sha, ngwi pyaw sim sa ai hte nga nga ai masha ni rai nga ma ai; shanhte hta ra kadawn ai lam hpa mung n nga ma ai. Shanhte gaw Sidon masha ni hte tsan gang ai shara hta nga nga ma ai rai nna kaga masha kadai hte mung makyit mahkai ai lam n nga ma ai.