EZEKELA 37:5 - Jinghpaw Common Language Bible 2009

⁵ Tsaw Htum ai dai Madu ngai nan nrut nra ni hpe ning ngu nna tsun nga ai ga shanhte hpe htawn tsun u: Ngai gaw nanhte hpe nsoi nsa bang ya na nngai, shaloi nanhte asak bai hkrung nga na marin dai.

Jinghpaw Hanson Version Bible

⁵ ndai nrut nra ni hpe Madu Yehowa ning nga ai: Yu u, ngai nanhte a kata de nsoi nsa bang ya nna, nanhte asak hkrung na myit dai.

EZEKELA 37:5 ပူးပေါင်းရင်းမြစ်များ

NINGPAWT NINGHPANG 2:7

Dai hpang dai Madu Karai Kasang gaw aga kaw nna ga loi mi hpe la nhtawm dai hte shinggyim hkrang shachyaw wu ai; shi a ladi hta hkrung ai nsoi nsa hpe shi kawut bang ya wu ai hte dai shinggyim masha gaw hkrung hpang wa nga ai.

ESAIA 26:19

Si mat sai anhte a amyu masha ni bai hkrung wa na mara ai! Shanhte a hkum hkrang ni hta asak bai rawng wa na ra ai. Shanhte a lup sung hku ni hta yup pyaw nga ai ni yawng hprang wa nna kabu gara mahkawn mangoi wa na mara ai. Htoi tu kabrim ai numri gaw ginding aga hpe n-gun awai ya ai zawn, dai Madu gaw moi chyaloi nhkoi kaw nna si mat sai ni hpe jahkrung la na ra ai.

EZEKELA 37:14

Nye a nsoi nsa shanhte hta bang ya ai hte rau, shanhte asak bai hkrung wa nhtawm shanhte a mungdan hta ngai shanu nga shangun na nngai. Shaloi, ngai nan dai Madu rai nga nngai hpe shanhte chye lu na mara ai. Ngai gaw ga sadi tawn da sai hte maren, ngai myit ai hku ndai amu hpe shatup na we ai. Dai Madu ngai nan tsun ni ai,” ngu nna tsun wu ai.

YAWHAN 20:22

Shing nga tsun nhtawm, sape ni a ntsa e shi kawut nna, “Chyoi Pra ai Wenyi hpe hkap la mu.

ROMA 8:2

Hpa majaw nga yang Hkristu Yesu hte rau langai sha tai shangun ai asak jahkrung ya ai Wenyi hte seng ai tara gaw yubak a tara hta na mung si mat ai tara hta na mung ngai hpe shalawt dat ni ai.

EHPESU 2:5

anhte a n madat mara nna tawt lai ai lam a majaw wenyi hta chyasi naw rai nga ai ni hpe Hkristu hta asak bai jahkrung dat mi ai. Dai gaw Karai Kasang a chyeju hte sha nanhte hkye hkrang la hkrum manit dai rai nga ai.

SHINGRAN 11:11

Ya dai nhtoi masum ya e chyingdaw mi lai jang, Karai Kasang kaw nna jahkrung ya ai nsoi nsa shan hta shang wa nna, shan gaw jan rai, rawt tsap ma ai; shan hpe mu mada ai ni gaw, nachying hkrit gari nga ma ai.