EZEKELA 32:27 - Jinghpaw Common Language Bible 2009

²⁷ Shanhte gaw katsan ga de hpyen laknak hkum dingnum hte yu hkrat wa nna, shanhte a nhtu ni hpe bunghkum hkum da let shanhte a moi mang ntsa ni hta ninggang ni hte magap da nga ai moi shawng de na share ninghkrin ni zawn shagrau hkam nna lup makoi da hkrum nga ma ai n rai. Ndai share ninghkrin ni gaw asak hkrung nga ai dinghta ga hpe jahkrit shama na matu lang mi daru magam n-gun hpring hkra rawng yu masai.

Jinghpaw Hanson Version Bible

²⁷ Shan gaw moi si wa ai, matu gadoi n hkam ai share ninghkrin ni hte rau pyi taw nga lu na n rai: dai ni gaw, katsan ga de tinang a ri nhtu hte rau yu wa nna, tinang a nhtu hpe bunghkum ma ai: shan a n hkru n hkra ai amu chyawm gaw, shan a nrut nra ni hpe magap na ma ai; kaning rai nme law, shan gaw dinghta ga a daru magam ni a hkrithpa rai nga ma ai.

EZEKELA 32:27 ပူးပေါင်းရင်းမြစ်များ

YOBA 20:11

Shanhte a hkum hkrang ni shabrang zawn n-gun rawng ma ai; rai ti mung shanhte gaw kade n na yang ga nhpu tai mat na mara ai.

SHAKAWN KUNGDAWN 109:18

Shi bu hpun palawng hpun man nga ai zawn dagam dala ga hpe man man atsun nga u ga; shi a dagam dala ga gaw hka zawn hkum kata de madi shang wa nna, sau zawn shi a nrut nra de du hkra tsim shang wa u ga!

SHAKAWN KUNGDAWN 49:14

Shanhte gaw sagu ni zawn si na matu dingnye lu ma ai, Si du gaw shanhte hpe rem ai sagu rem wa rai na ra ai. Shanhte a hkum tsawp ni gaw shanhte a dum nta hte tsan ai Katsan ga kaw alawan yat mat wa yang; dai ding hpring ai masha ni gaw shanhte hpe padang dip lu na mara ai.

SHAKAWN KUNGDAWN 92:7

Tara n lang ai ni gaw tsingdu ni zawn tu wa lu nna, shut hpyit ai amu galaw let ngamu ngamai lu ma ti mung; shanhte yawng hte gaw tsep kawp jahten kau ai hkrum na mara ai.

SHAKAWN KUNGDAWN 92:9

Na a gumlau hpyen ni si mat wa na mara ai hte; tara n lang ai ni yawng hte mung, sum mat ai hkrum na mara ai gaw, anhte chye nga ga ai.

GA SHAGAWP 14:32

Tara n lang ai masha ni gaw shanhte a n hkru ai bungli hta hkrat sum ai lam hpe shabyin ya nga ai; mai kaja ai masha ni gaw shanhte a ding hpring ai amu hpe makawp maga da nga ai.

ESAIA 14:16

Si hkrung si htan gaw azi yu nna mau mahka na ra ai. Shanhte gaw, “Ginding aga hpe ashun awam di nna de a mungdan ni hpe gari shangun ai gaw ndai masha wa rai nga a ni?

ESAIA 54:17

Rai ti mung hpyen laknak hpa mung nang hpe machyi shangun lu na n rai; nang gaw nang hpe mara shagun ai ni yawng a matu mahtai lu na ra ai. Ngai gaw nye a shangun ma ni hpe makawp maga nna shanhte hpe awng padang jaw na nngai.” Dai Madu tsun nu ai.

EZEKELA 18:20

Yubak galaw ai wa gaw si na ra ai. Kawa galaw ai yubak ni a majaw kasha hkam ra na n rai, kasha galaw ai yubak ni a majaw kawa hkam na ra ai n rai. Mai kaja ai masha wa gaw shi galaw ai mai kaja ai amu a majaw shagrau sha-a hkrum nna, n hkru ai masha wa gaw shi galaw ai n hkru ai amu a shabrai hpe hkam la na ra ai.

EZEKELA 26:17

Shanhte gaw na a matu ndai makoi mayang mahkawn hkawn na mara ai: Gumhkawng ai mare gaw hten byak mat sahka! Shi a sanghpaw li ni panglai hka kaw nna yawng mat wa nga masai. Ndai mare masha ni gaw panglai ni hpe up ma ai, Hkin-gau mayan hku nga ai masha ni yawng hkrit gari nga ma ai.

EZEKELA 32:21

N-gun ja htum ai share ninghkrin ni hte Egutu masha ni maga de majan gasat lawm nga ai ni gaw katsan ga de yu wa na matu Egutu masha ni hpe hkalum la nga ma ai. Shanhte gaw, ‘Majan hta sat kau hkrum sai dai n kam n sham ai ni gaw ndai shara de du nga sai hte kaleng taw nga ma hka!,’ ngu nna jahtau tsun ma ai.

EZEKELA 32:28

“Ndai gaw Egutu masha ni mung matu gadoi n hkam ai hte majan e sat kau hkrum ai ni a lapran e kaning rai agrawp taw mat na lam rai nga ai.

YAWHAN 8:24

Dai re ai majaw, nanhte gaw tinang a yubak hta si wa na marin dai ngu nna ngai nanhte hpe tsun ni ai. ‘Ngai gaw ngai wa rai nga nngai,’ hpe nanhte n kam n sham myit yang gaw, nanhte tinang a yubak hta si na marin dai,” ngu mu ai.

2 KORINHTU 10:4

Anhte a majan gasat ai hta lang ai laknak ni gaw mungkan shinggyim masha ni lang ai baw laknak n rai, ngang kang ai hpyen dap ni hpe jahten kau lu ai Karai Kasang a n-gun atsam hte hpring ai laknak ni rai nga ai. Anhte gaw n teng n man ai ndang kalang ga ni hpe jahten kau ga ai.