EZEKELA 3:17 - Jinghpaw Common Language Bible 2009

¹⁷ Shi gaw, “Si chye ai masha wa e, ngai nang hpe Israela amyu masha ni a matu sin langa shatai nngai. Dai re ai majaw, ngai nang hpe tsun dan ai shadum jahprang ga ni hpe shanhte hpang de htawn shalai ya lu na rai ndai.

EZEKELA 3:17 ပူးပေါင်းရင်းမြစ်များ

2 HKAWHKAM LABAU 19:10

Mare kahtawng hkan nga ai nanhte a nhpu nnau ni gaw nanhte a man de masha sat ai amu, tara shing n rai hkang da ai ga, langai ngai hpe tawt lai ai amu sa shawk ma yang, shanhte gaw dai Madu a man e mara n kap mat hkra dai tara jeyang nga ai laman shanhte hkum kaning rai nga na lam sadi sahka hte shanhte hpe lam madun matsun ra na rai myit dai. Dai zawn n shadum ai rai yang, nanhte hte nanhte a nhpu nnau ni dai Madu a pawt sindawng ai n-gun hte wa hkrum kadup na rai myit dai. Rai ti mung nanhte gun hpai na lit hpe n hprai kau myit dai rai yang nanhte mara n kap na rai myit dai.

Shawlumon A Mahkawn Ga 3:3

Mare gawan hkawm ai sin langa ni ngai hpe mu ma ai. Ngai gaw shanhte hpe, “Nye a tsaw ra wa hpe mu myit ni?,” ngu nna san we ai.

Shawlumon A Mahkawn Ga 5:7

Mare sin hkawm ai ni ngai hpe mu nna, ngai hpe kayat jahpye mi ai; mare bunghku sin langa ni nye a palawng hpe gang je kau ya ma ai.

ESAIA 21:6

Dai hpang Madu gaw ngai hpe, “Sa nna sin langa langai tawn u, shi hpa mu ai lam shiga jaw na matu shi hpe tsun u.

ESAIA 21:8

Dai sin langa wa gaw, “Madu e, Ngai gaw nye a sin shara hta shani shana tsap let sin nngai,” ngu nna jahtau tsun wu ai.

ESAIA 52:8

Mare sin langa ni jahtau nga ma ai, kabu gara ai hte rau sha jahtau nga ma ai. Shanhte gaw dai Madu Ziun de nhtang wa ai hpe shanhte a myi hte chyaw mu lu ma ai.

ESAIA 56:10

Shi gaw, “Nye a amyu masha ni hpe sadi jaw na zawn nawn ai ningbaw ni yawng, myi kyaw nga ma hka! Shanhte gaw hpa mung n chye ma ai. Shanhte gaw n wau ai sha, sin yu nga ai gwi ni hte bung ma ai-shanhte gaw hpum yup nga nna yup mang mu ma ai. Shanhte yup nga ai gaw kade sha yu tsaw ra hpa rai nga a hka!

ESAIA 58:1

Dai Madu gaw, “Nang shaja lu ai daram jahtau u! Shanhte a yubak mara ni hte seng nna nye a amyu masha Israela ni hpe tsun dan u!

ESAIA 62:6

Yerusalem e, ngai gaw na a bunghku ntsa hkan e sin langa ni hpe tawn da ni ai; Shanhte gaw shani shana galoi mung atsin sha nga nga ma ai n rai. Shanhte gaw dai Madu shi a ga sadi ni hte Shi shanhte hpe galoi mung n malap kau u ga, shadum nga na rai ma ai.

YEREMIA 1:7

Rai ti mung dai Madu gaw ngai hpe, “Nang naw kaji nga nngai ngu nna hkum tsun et, rai ti mung ngai nang hpe shangun dat ai amyu masha ni hpang de sa nna ngai nang hpe tsun shaga na matu hkang dat ai lam shagu, shanhte hpe tsun na rai ndai.

YEREMIA 31:6

Rai sa, Ehprim bum ntsa hkan e sin nga ai masha ni gaw, ‘Ziun bum e nga ai dai Madu anhte a Karai Kasang hpang de anhte rawt lung wa saga, nga nna marawn tsun ai aten du wa na ra ai,’” nga ai.

YEREMIA 6:10

Ngai gaw, “Ngai shanhte hpe ga shaga nna sadi jaw ai rai yang, nye a ga hpe kadai madat ya na rai ta? Shanhte gaw du ja ai hte na a mungga hpe n kam madat ma ai; nang ngai hpe tsun shangun ai lam hpe shanhte mani asawng kau ya nga ai.

YEREMIA 6:17

Dai hpang, dai Madu gaw pahtau hte sadi jaw ai nsen hpe madat na matu sin langa masha ni hpe lit jaw da nu ai. Rai ti mung shanhte gaw, “Anhte n madat na ga ai,” ngu nna bai tsun ma ai.

EZEKELA 11:25

ngai gaw dai Madu ngai hpe madun lai wa sai lam yawng mayawng, bawng dung masha ni hpe tsun dan ni ai.

EZEKELA 11:4

Ya chyawm gaw, si chye ai masha wa e, shanhte hpe jahpoi kau u,” ngu nna tsun wu ai.

EZEKELA 2:7

Shanhte madat ai rai tim, n madat ai rai tim, shanhte hpe htawn tsun na matu ngai nang hpe tsun ai lam hpa hpe rai tim, nang shanhte hpe tsun na rai ndai. Shanhte gaw gumlau ai ni rai nga ma ai hpe adum nga u.

HABAKU 2:1

Ngai gaw nye a langchyi ntsa de lung wa nhtawm Madu ngai hpe hpa lam tsun dan na hte nye a lajin ai ga hpe shi kaning ngu htan ya ai hpe chye lu hkra, la mada yu nga na nngai.

HAGI 1:13

Dai hpang, Hagi gaw dai Madu a mungga hpe amyu masha ni a man e ning ngu hkang dat wu ai: “Ngai gaw nanhte hte rau nga nga na nngai; dai gaw nye a ga sadi rai nga li ai.”

MAHTE 3:7

Hparishe ni hte Saduke ni law law wa hkalup hkam la na nga nna shi kaw sa wa ma ai hpe Yawhan mu wu yang, shi shanhte hpe, “Pu htum amyu ni e, Karai Kasang kaw na du magang ra ai ari hta na hprawng lawt mat lu myit ga, nanhte hpe kadai tsun shadum da myit ta?,” ngu nna tsun mu ai.

1 KORINHTU 12:28

Karai Kasang gaw dai Hpung hta e, langai ngu na shara hta Kasa ni, lahkawng ngu shara hta myihtoi ni, masum ngu na shara hta sara ni, dai hpang e lamik kumla galaw ai ni, dai hpang machyi makaw shamai shatsai na atsam lu ai ni, masha kaga ni hpe karum madi shadaw lam madun chye ai atsam lu la ai ni, lam woi ningshawng ni hte, laklai ai ga amyu myu chye shaga ai ni hpe mung shi shara hte shi san tawn da manu ai.

1 KORINHTU 4:14

Nanhte hpe kaya jahkrum na matu ndai lam ngai ka nngai n rai; ngai tsaw ngai ra ai nye a kashu kasha ni hpe zawn ngai nanhte hpe shadum jahprang made ai.

2 KORINHTU 5:11

Anhte gaw dai Madu hpe hkrit kang ai ngu ai hpa rai nga ai hpe chye ga ai majaw kaga masha ni hpe lau la lu na matu shakut shaja ga ai. Karai Kasang anhte a lam akri akrai chye nga ai, nanhte mung nanhte a myit masin ni hta nye a lam atsawm sha chye nga myit dai ngu nna ngai myit mada nga nngai.

2 KORINHTU 5:20

Dai rai nna anhte gaw Hkristu a lam htinglet ya ai kasa ni tai let, Karai Kasang shi nan anhte a n-gup aga hku nna nanhte hpe lajin nga ai. Nanhte gaw shi hpe hpyen ai ni tai nga ai kaw nna shi a jinghku ni tai wa mu ngu, Hkristu a malai anhte hpyi nem nga ga ai.

KOLOSE 1:28

Dai majaw anhte gaw masha shagu hpe Hkristu a lam hkaw dan ga ai. Masha shagu hpe Hkristu hta myit su kunghpan ai Hkristan masha langai hkrai hku nna Karai Kasang a man de shashawn lu u ga, anhte gaw hpaji byeng-ya nga manga hte shanhte hpe sadi jaw, sharin achyin nga ga ai.

1 HTESALONI 5:14

Bai hpu nau ni e, lagawn ai ni hpe sadi jaw mu, myit kaji ai ni hpe shadaw shalan nga mu, n-gun kya ai ni hpe karum la mu, yawng mayawng a ntsa e hkam sharang nga mu.

HEBRE 13:17

Nanhte a lam woi ningshawng ni a ga hpe madat mara nna shanhte a hkang da ai ga ni hpe hkan sa galaw mu. Shanhte gaw shanhte galaw daw ai amu a jahpan hpe Karai Kasang kaw dan lu na rai nna, shanhte gaw nanhte a myit masin ni hpe n hkring n sa sin ya nga ma ai. Shanhte a ga hpe nanhte madat mara myit yang gaw shanhte galaw ai bungli hpe kabu gara ai hte galaw na mara ai: dai n rai yang shanhte myit yawn let galaw na mara ai rai nna na a matu hpa akyu mi rawng na n rai.