EZEKELA 28:16 - Jinghpaw Common Language Bible 2009

¹⁶ Nang gaw gun rai dut mari ai hpaga amu ni hte law la nga ndai, dai amu gaw nang hpe kashun kashe du daw sai hkaw amu hte yubak lam ni de woi sa nga ai. Dai rai nna, ngai gaw nang hpe nye a chyoi pra ai bum kaw na pru mat wa na matu shaden kau dat ni ai, nang hpe sin ai lamu kasa mung nang hpe dai htoi kabrim ai lung seng ni a ka-ang kaw na yeng seng kau nu ai.

Jinghpaw Hanson Version Bible

¹⁶ Rai timung, na a law la ai hpaga majaw, kashun kashe amu hte nang hpring chyat nga nna, nang yubak galaw ndai; dai re ai majaw n san n seng ai wa hpe zawn, Karai Kasang a bum de na, ngai nang hpe kabai kau nngai: yawng hpe ka-up ai Hkerub e, htoi kabrim ai lungseng ni a ka-ang na, ngai nang hpe yeng kau nngai.

EZEKELA 28:16 ပူးပေါင်းရင်းမြစ်များ

NINGPAWT NINGHPANG 3:24

Dai hpang shi gaw sun a sinpraw maga de ahkrung nga ai hkrung kanu ni hte man maga shagu de shi chyu nwat shadang chye ai wan nhtu hpe tawn da wu ai. Dai gaw asak jahkrung ya ai hpun de ni sa wa ai kadai hpe mung hkap shingdang na matu rai nga ai.

NINGPAWT NINGHPANG 6:11

Rai ti mung shinggyim masha shagu gaw Karai Kasang a man e n hkru nga ma ai hte kashun kashe du daw sai hkaw amu gaw shara shagu hkan chyam bra nga ai.

ESAIA 22:19

Dai Madu gaw nang hpe amu kaw na shapraw kau nhtawm na a tsaw ai arawng aya kaw nna mung jahkrat kau na ra ai.”

ESAIA 23:9

Chyahtum Chyalai N-gun rawng ai dai Madu gaw dai lam hpe shabyin dat nu ai. Shanhte galaw ai amu hta, shanhte a gumrawng gumtawng ai hpe jahtum kau na hte arawng sadang hte hpring ai shanhte a masha ni hpe shagrit kau na matu dai lam shabyin dat nu ai.

EZEKELA 28:14

Ngai gaw dai shara hta e nang hpe sin na matu sharim ai lamu kasa langai san da ya ni ai. Nang gaw nye a chyoi pra ai bum ntsa e nga lu nna, htoi kabrim ai lung seng ni a lapran e hkawm chyai nga ndai.

EZEKELA 8:17

Dai Madu gaw ngai hpe, “Si chye ai masha wa e, dai amu hpe nang mu nu ni? Ndai Yuda amyu masha ni gaw ndai yang e nang mu nit dai shanhte galaw ai matsat shabat amu ni yawng hte mungdan ting hta kashun kashe du daw sai hkaw amu shachyam shabra ai hta pyi myit dik dum nga ma ai n rai. Shanhte gaw ndai Nawku Htingnu kata hta nan sa nna ngai hpe grau nna masin pawt shangun nga ma ai. Shanhte gaw ngai hpe dang lu ai made n rawn n wawm ai hku kade daram n kaw n law di ma ai hpe mada yu u!

HOSEA 12:7

Dai Madu gaw, “Israela amyu masha ni gaw Hkanan masha ni zawn n ding n man nga ma ai; shanhte gaw n man ai joi jang ni hte shanhte a arai mari hkyawt la ai ni hpe maw sha na sharawng nga ma ai.

AMO LAIKA (AMOS) 3:9

Egutu hte Ashdod na hkawhkam htingnu ni hta nga ai ni hpe ning ngu tsun ndau mu: “Samari makau grup yin na kawng ni hta hpawng shinggyin ai hte dai shara na kaba ai kabring kabrawng amu hte shut hpyit kau ai ru hka amu ni hpe yu yu mu.”

OBEDIA 1:3

Na gumrawng gumtawng ai myit gaw nang hpe hkalem kau nga sai. Na a mare daju gaw ngang ai lunghkrung hta gap da ai hpyen dap rai nga ai; na a dum nta gaw bum ni hta tsaw nga ai, dai rai nna nang gaw na a kraw kata e, ‘Kadai wa ngai hpe gang kadang lu na i?,’ nga nna tsun nga ndai.

MIHKA 2:10

Rawt sa wa su; ndai shara hta bansa shim lum ai lam hpa mung n nga nga sai. Ndai shara hten run mat na matu, nanhte galaw ai yubak ni gaw tara jeyang ai hkrum nga manit dai.

MIHKA 2:2

Shanhte gaw hkauna pa ni hpe ra marit wa ai shaloi, dai ni hpe kashun la ma ai; shanhte gaw dum nta ni hpe ra marit wa ai shaloi, dai ni hpe la kau ma ai. Kade a dinghku mung, sut gan mung shim nga ai n rai.

MIHKA 6:12

Nanhte a sut su ai masha ni gaw matsan mayan masha ni hpe n-gun makru shadaw ya nga ma ai; buga masha yawng hte mung masu magaw masha ni hkrai rai ma ai.

HABAKU 2:17

Nanhte gaw Lebanon a nam maling ni hpe kran kau manit dai; ya chyawm gaw nanhte mung kran kadang hkrum na rai myit dai. Nanhte gaw dai shara yam nga ni hpe sat kau manit dai; ya chyawm gaw yam nga ni nanhte hpe jahkrit na mara ai. Ndai amu byin wa na ra ai, hpa majaw nga yang nanhte gaw sai hkaw ai ru hka amu galaw shut kau manit dai, nanhte galaw ai kashun kashe du daw sai hkaw amu ni hte mungkan ga a masha ni hte de a mare ni hpe ninghkap manit dai.

HABAKU 2:8

Nanhte gaw masha amyu baw law law a masha ni hpe hpya lu hpya sha manit dai, rai ti mung ya chyawm gaw naw hkrung nga ai ni nanhte hpe hpya lu hpya sha na mara ai hpa majaw nga yang, nanhte shut kau ai ru hka amu ni hte masha nga ai mungkan hte de a mare ni hpe kashun kashe du daw sai hkaw amu galaw manit dai.

ZEHPANI 1:9

Maigan nawku htung hkan ai ni zawn nawku ai ni hte shanhte a madu ni a nta hpe arung arai lagu, masha sat amu jahpring ya ai ni mahkra hte hpe ngai ari jaw na we ai.

YAWHAN 2:16

Hkrudu dut ai ni hpe mung, “Ndai ni hpe ndai kaw na la pru mat wa mu! Nye Wa a nta e gat dut shara hkum shatai mu,” ngu nna tsun mu ai.

SHINGRAN 12:9

Shaloi, mungkan ting hpe masu hkalem kau ai Nat Satan ngu ai, moi na lapu rai nga ai baren numraw kaba gaw, shi a ali ama ni hte rau ga de jahkrat kau ai hkrum wu ai.