EZEKELA 24:21 - Jinghpaw Common Language Bible 2009

²¹ Israela masha ni hpe ndai mungga jaw ya na matu ngai hpe tsun wu ai: Nang gaw Nawku Htingnu a n-gun atsam hta gumrawng gumtawng nga ndai. Nang gaw dai hpe yu sharawng nna dai de sa chyai nga ndai, rai ti mung, dai Madu gaw dai shara hpe awu asin di kau na ra ai. Yerusalem hta jahti da ai na a dinghku ni hta na shayi shadang sha ni gaw hpyen majan hta sat kau ai hkrum na mara ai.

Jinghpaw Hanson Version Bible

²¹ Madu Yehowa ning nga ai, Yu mu, nanhte a n-gun atsam gumrawng gumtawng shara, nanhte a nja nhpra nta hte, grai lahpawt dum ai shara ngu ai, nye a chyoi pra ai shara hpe, ngai awu asin di kau na nngai; nanhte jahti da ai shayi shadang sha ni mung, nhtu hte si na mara ai.

EZEKELA 24:21 ပူးပေါင်းရင်းမြစ်များ

1 HKAWHKAM 9:7

shanhte hpe ngai jaw da ai mungdan kaw nna nye a amyu masha ni hpe yeng kau nna, ngai hpe nawku na shara ngu nna ngai majai da sai ndai Nawku Htingnu hpe mung ngai kau da na nngai. Shara shagu hkan nga nga ai masha amyu baw ni mung Israela hpe asawng asang rai nna n gawn n sawn di kau na mara ai.

SHAKAWN KUNGDAWN 105:4

Karum hpyi na matu, dai Madu hpang de sit shang wa mu, shi hpe n sim n sa nawku daw jau nga mu.

SHAKAWN KUNGDAWN 132:8

Madu e, na a daru magam n-gun a kumla rai nga ai Sakse Sumpu nga ai Nawku Htingnu de sa wa nna; dai shara hta htani htana shanu nga u.

SHAKAWN KUNGDAWN 27:4

Ngai gaw ngai ra sharawng ai lam langai mi hpe dai Madu kaw hpyi se ai; dai gaw, ngai ahkrung nga dingsa dai Madu a nta hta shanu nga lu nna; shi a mai kaja ai lam hpe dai shara hta mu lu nga ai; shi a lam woi ai hpe hpyi lajin na matu chyu sha ngai ra nga nngai.

SHAKAWN KUNGDAWN 74:7

Shanhte gaw na a Nawku Htingnu hpe agrawp daw kau nna wan hte nat kau nga masai; shing rai, nang hpe nawku daw jau ai shara hpe shanhte awu asin di kau manu ai.

SHAKAWN KUNGDAWN 79:1

O Karai Kasang e, maigan amyu ni na a lamu ga hpe shang gasat ma ai; na a chyoi pra ai Nawku Htingnu hpe shanhte awu asin di kau nga manu ai; Yerusalem mare hpe mung jahten sharun kau da manu ai.

SHAKAWN KUNGDAWN 84:1

Chyahtum Chyalai n-gun rawng ai Madu e, na a Nawku Htingnu hpe ngai kade wa tsaw ra nga a hka!

SHAKAWN KUNGDAWN 84:3

Nye a hkawhkam hte nye a Karai Kasang Chyahtum Chyalai n-gun rawng ai Madu e, u tsa ni pyi, na a tawn hkungri ni a makau e, shanhte a tsip galaw nga ma ai, pilan ni mung shanhte a matu nta lu nga ma ai, shing rai, shanhte a u hkalung ni hpe dai shara ni hta tawn da nga ma ai.

SHAKAWN KUNGDAWN 96:6

Hpung shingkang hte galu kaba ai hpung shingkang gaw shi hpe shinggrup da nna; daru magam n-gun hte tsawm htap ai lam gaw shi a Nawku Htingnu hta hpring nga ai.

ESAIA 65:11

“Rai ti mung, ngai hpe kau da nna nye a chyoi pra ai Bum ngu ai Ziun hpe hpa zawn n nawn nhtawm Gad hte Meni ngu ai Gam hte Auba a karai ni hpe nawku ai dai amu gaw nanhte a matu kaga ga shai wa na ra ai.

YEREMIA 6:11

Madu e, shanhte hpe hkru shangun ai na a myit kahtet ai gaw ngai hta mung hkru nga ai; ngai gaw dai hpe loi mi mung n sharang lu nga nngai,” ngu nna htan ni ai. Dai hpang, dai Madu gaw ngai hpe, “Nmaw lam ntsa hkan e nga ai ma kaji ni a ntsa e mung, zup hpawng nga ai shabrang ni a ntsa de mung, nye a myit kahtet ai hpe ru dat u. Madu wa ni hte madu jan ni gaw woi la hkrum nna aprat kaba u-gut gu sai ni pyi ngam tawn da hkrum na mara ai n rai.

YEREMIA 7:14

Dai rai nna, ngai gaw Shilo shara hpe di kau we ai zawn nang kam hpa nga ai ndai nye a Nawku Htingnu hpe mung di kau na we ai. Na a nji nwa ni hte nang hpe jaw ai ndai shara hpe mung Shilo shara e ngai di kau ai zawn di na we ai.

YEREMIA 9:21

Si Du gaw anhte a hkuwawt hku tawt bang nna anhte a hkawhkam htingnu ni hta shang nga ai; ma kaji ni hpe lam nmaw hkan, shabrang ni hpe shawa gat ginra ni hkan sat sharu kau da nga ma ai.

SHARUNG SHAYAWT 1:10

Gumlau hpyen ni gaw shi a sut gan yawng hpe kashun la kau manu ai. Shi gaw maigan masha ni n shang na matu dai Madu hkum da ai Nawku Htingnu de Shanhte shang wa ai hpe shi mu wu ai.

SHARUNG SHAYAWT 2:1

Dai Madu gaw shi a masin kahtet ai majaw, Ziun hpe nsin hte ka-up da nga wu ai. Shi gaw sumsing lamu a hkik hkam ai hpung shingkang hpe jahten sharun kau nu ai. Shi a masin kahtet ai shani e, shi gaw shi a Nawku Htingnu hpe pyi kabai kau nga ai.

SHARUNG SHAYAWT 2:21

Shabrang ni hte numsha ni n nga nmaw lam hkan e si kadawng taw nga ma ai, Shabrang ni hte numsha ni mung gumlau hpyen wa a nhtu ni hte sat kau hkrum nga masai. Na a pawt sindawng ai shani e, shanhte hpe matsan n dum ai sha, nang htau sat kau nit dai.

EZEKELA 23:25

Ngai gaw nang hpe pawt sindawng nga nngai majaw, shanhte a masin kahtet ai hta ngai nang hpe hkrup sha shangun na nngai. Shanhte gaw na a ladi hte ana ni hpe kahtam di kau nna, na a kashu kasha ni hpe sat kau na mara ai. Rai sa, shanhte gaw na a shayi shadang sha ni hpe na a lata kaw nna gare la nhtawm shanhte hpe jahkrung nat kau na mara ai.

EZEKELA 23:47

Dai masha wunawng wuwa gaw shan hpe nlung hte kabai nna, nhtu ni hte htim mu ga; ma ni hpe mung sat kau nna nta ni hpe nat kau ya mu ga.

EZEKELA 24:16

Shi gaw, “Si chye ai masha wa e, nang tsaw ra htum ai wa hpe ngai kalang dat woi la na nngai. Shi gaw akajawng sha si mat na ra ai. Nang gaw aput angun ai mung, hkrap shabam ai mung, myi prwi hkrat ai mung galaw lu na n rai.

EZEKELA 24:20

Dai rai nna, ngai gaw shanhte hpe, “Dai Madu gaw ngai hpe ga shaga ai hte

EZEKELA 24:22

Dai hpang, ngai galaw ni ai zawn nanhte galaw na marin dai. Nanhte gaw myi man magap lu na myit dai n rai, sharung shayawt ai ni a lusha hpe mung sha lu na myit dai n rai.

EZEKELA 24:25

Dai Madu gaw, “Yu u, si chye ai masha wa e, ngai gaw shanhte yu sharawng nna sa chyai nga ai dai shanhte a gumrawng gumtawng shara hte kabu gara shara ngu ai Nawku Htingnu hpe shanhte a man kaw na la kau na we ai. Shanhte a shayi shadang sha ni hpe mung la kau na we ai.

EZEKELA 33:28

Ngai gaw dai mungdan hpe katsi katsang shara shatai kau nna shanhte a gumrawng ai daru magam n-gun hpe jahtum kau ya na nngai. Israela a bum ni gaw grai htat ai mali tai mat nna kadai mung dai lam hku n lai lu na mara ai.

EZEKELA 7:24

Ngai gaw gumshem htum ai amyu ni hpe ndai mung de jashawn dat nna nanhte a dum nta ni hpe madu la shangun na nngai. Nang nawku ai shara ni hta masha amyu baw ni hpe awu asin di kau shangun ai shaloi, na a n-gun ja htum ai masha ni gaw kam ai myit htum mat na mara ai.

EZEKELA 9:7

Karai Kasang gaw shanhte hpe, “Nawku Htingnu hpe awu asin di kau mu! Wang ni hta moi mang ni hte jahpring da mu! Bungli galaw manu!,” ngu nna tsun wu ai. Dai rai nna shanhte gaw mare hta nga ai amyu masha ni hpe sat hpang manu ai.

Daniela 11:31

Shi a hpyenla nkau mi mahtang Nawku Htingnu hpe awu asin di na mara ai. Shanhte gaw shani shagu na shagu hkungga hpe pat shingdang kau ya nna, dai Hkrit Si na zawn re ai wa hpe sharawt da na mara ai.

HOSEA 9:16

Israela amyu masha ni gaw aru hkraw mat ai hpun bawng langai hte bung nga ma ai majaw asi n si lu nga ai. Shanhte hta kashu kasha shaprat lu na n rai; shangai wa ai rai yang, shanhte grai tsaw ra ai kashu kasha ni hpe ngai sat kau na we ai,” ngu nna tsun wu ai.

JAW JAU 26:19

Ngai gaw nanhte a gumrawng kawng shadaw kau ya na made ai; lamu marang htu na ra ai n rai; nanhte a lamu ga gaw hkun hkraw mat nna ahpri zawn ja mat na ra ai.

MALAHKI 2:12

Israela masha wuhpung kaw na ndai zawn re ai amu galaw ai ni hpe dai Madu yeng seng kau u ga; anhte a amyu baw ni dai Chyahtum Chyalai N-gun rawng ai dai Madu hpang de la sa ai shagu hkungga ni hta shanhte hpe galoi mung bai n shang lawm shangun u ga.