EZEKELA 23:23 - Jinghpaw Common Language Bible 2009

²³ Ngai gaw Babelon masha ni hte Hkalde masha ni yawng hpe mung, Peku, Shoa hte Koa masha ni hte hpawn Asuri masha ni yawng hte hpe woi sa wa na nngai. Dai hkum shingyan tsawm ai du magam shabrang ni hte du salang ni, ahkyak ai du salang ni yawng hte gumra dap na arawng aya kaba hkam la ai du ni hpe ngai jahpawng da na nngai.

Jinghpaw Hanson Version Bible

²³ Asuri masha ni hte hpawn, Babelon masha ni hte Hkalde masha ni yawng, Peku, Shoa hte Koa masha ni du na mara ai: nlang hte gaw shing-yan tsawm ai shabrang ni, munggyi ni, du salang ni, hkawhkam kasha ni hte daru magam rawng ai ni rai nga ma ai; shanhte yawng gumra jawn ma ai.

EZEKELA 23:23 ပူးပေါင်းရင်းမြစ်များ

NINGPAWT NINGHPANG 2:14

Masum ngu na hka nu gaw Asuri mung a sinpraw maga de lwi mat wa ai Tigri hka nu rai nga ai; mali ngu na hka nu gaw Uhprat hka nu rai nga ai.

NINGPAWT NINGHPANG 25:18

Ishmaela a matu mara ni gaw Egutu mung a sinpraw maga, Asuri mung de sa wa ai lam hta nga ai Hawila hte Shura lapran na lamu ga hkan e shanu nga ma ai. Shanhte gaw Abraham a amyu bawsang ni hte kaga san rai ma ai.

2 HKAWHKAM 24:2

Dai Madu gaw shi a shangun ma myihtoi ni a n-gup aga hte tsun sai hte maren, Yehoiakim hpe ninghkap nna Yuda mung hpe shamyit kau na matu Babelon hpyen hpung mi, Suri masha hpyen hpung mi, Moba masha hpyen hpung mi hte Amon masha hpyen hpung ni hpe dai Madu shangun dat wu ai.

EZRA 6:22

Shanhte gaw Matsi N Rawng ai Muk Sha Poi hpe mung kabu gara ai myit hte sanit ya tup galaw ma ai. Dai rai nna shanhte kabu gara ai myit hte hpring nga ma ai; hpa majaw nga yang, dai Madu gaw Asuri hkawseng wa hpe shanhte hpang de myi man kayin shangun nga ai rai nna Israela Karai Kasang a Nawku Htingnu bai gaw gap ai amu hta shanhte hpe karum ya nga ai.

YOBA 1:17

Dai wa ga shaga garai n htum yang, kaga shangun ma langai bai hkan du nang nna, “Hkalde hpung masum htim lung wa nna anhte hpe sa gasat ma ai; shing rai gawla-uk ni hpe la mat wa nhtawm ngai hta lai kaga shangun ma ni yawng hpe mung sat kau ma ai. Nang hpe shiga wa tsun dan na matu sha hprawng lawt wa lu ai gaw ngai chyu sha rai nga nngai, ngu nna tsun wu ai.

ESAIA 23:13

(Matse labye dusat ni hpe Turu de shingle shang shangun ai gaw Asuri masha ni n rai, Babelon masha ni she rai ma ai. Babelon masha ni gaw langchyi ni hpe sharawt tawn nhtawm Turu a ngang ai hpyen dap ni hpe sharun shabyak kau ya let mare hpe jahten sharun kau da ma ai.)

YEREMIA 50:21

Dai Madu gaw, “Merahtam hte Pekod masha ni hpe gasat mu. Shanhte hpe sat shamyit kau mu. Ngai hkang da mada hte maren galaw mu; dai Madu ngai nan tsun ni ai.

EZEKELA 16:1

Dai Madu ngai hpe bai ga shaga wu ai.

EZEKELA 23:12

Shi mung Asuri du magam ni, du salang ni, kabrim ai hpun palawng bu hpun da ai hpyenla ni hte gumra dap na du ni hpe ra gasit ai myit hpring nga ai; shanhte yawng gaw hkum shingyan tsawm ai shabrang ni hkrai rai ma ai.

EZEKELA 23:14

“Shi gaw n shawp n kap ai amu hta grau grau lup shang mat wa nga ai. Nshang ni hta shingkyit kyit nna bunghkaw hkaw da nhtawm kaba ai arawng aya hkam la ai Babelon du salang ni a hkrang bung sumla ni hpe shakum hta tawk da nna dai hpe hkyeng mang ai tsi hte chya da ai sumla ni a majaw, shi a myit gang la hkrum nga wu ai.

EZEKELA 23:22

“Dai rai nna, Oholiba e, ndai gaw Tsaw Htum ai dai Madu ngai nan nang hpe tsun nga ai ga rai nga ai. Ndai sumtsaw ni hpe nang yu jin mat ti mung, shanhte hpe ngai pawt sindawng shangun nna nang hpe wang da na matu shanhte hpe woi sa wa na nngai.

EZEKELA 23:6

Dai ni gaw shaba pu nsam rawng ai hpyen hking hpun palawng ni bu hpun da ai hpyenla ni rai ma ai, du magam ni hte arawng aya kaba ai du ni, shanhte yawng gaw hkum shingyan tsawm nna gumra dap hta lawm ai du shabrang ni rai ma ai.

KASA 7:4

Shaloi Hkalde mung na shi pru nna Haran mare e wa shingbyi nga ai. Abraham a kawa si mat ai hpang, ya nanhte nga nga ai ndai mung de Karai Kasang shi hpe woi htawt wa wu ai.