EZEKELA 20:13 - Jinghpaw Common Language Bible 2009

¹³ Rai ti mung, shanhte gaw ngai hpe nam mali hkan e pyi nye a hkang da ai ga hpe ninghkap lale nga ma ai. Shanhte gaw nye a tara ni hpe jahten kau ma ai; dai lam ni hpe hkan sa madat mara ai ni kadai rai ti mung asak hkrung nga shangun na, nye a hkang da ai matsun maroi ga ni hpe kau da mu ai. Shanhte gaw Bansa Nhtoi hpe awu asin di kau ma ai. Shanhte hpe jahten shaza kau na matu dai nam mali hkan e nye a sindawng kahtet ai n-gun hkam sha shangun lu na matu ngai shajin da ni ai.

Jinghpaw Hanson Version Bible

¹³ Rai timung, Israela dap gaw nam mali hkan e ngai hpe gumlau nga ai: shanhte gaw nye a matsun maroi ga hpe n hkan, nye a tara dara ai lam hpe kau da ma ai: dai lam ni chyawm gaw hkan nang ai wa a hkrung nga na lam rai nga ai; nye a laban nhtoi ni hpe mung shanhte grau awu asin di kau mu ai. Dai rai nna, shanhte hpe shamyit kau na matu, nye a pawt bu ai hpe, nam mali hkan e shanhte a ntsa e ru dat na, ngai tsun nngai.

EZEKELA 20:13 ပူးပေါင်းရင်းမြစ်များ

2 SAMUELA 12:9

Dai rai yang, nye a hkang da ai ga ni hpe nang hpa majaw n madat kau n ta? Ndai zawn n hkru ai amu hpe nang hpa majaw galaw kau hkrup n ni? Nang gaw Uria hpe majan pa e sat kau nit dai; Amon masha ni a lata hte shi hpe sat kau shangun nit dai; dai hpang shi a madu jan hpe nang la kau nga nit dai!

2 HKAWHKAM LABAU 30:7

Dai Madu shanhte a Karai Kasang hpe n kam n sham ai nanhte a kaji kawa ni hte hpu nau Israela masha ni zawn hkum rai nga myit. Nanhte mu lu myit dai hte maren, shi shanhte hpe laja lana ari jaw nu ai.

NEHEMIA 13:17

Ngai mung Yuda ningbaw ni hpe, “Nanhte galaw nga ai n hkru ai amu hpe yu yu mu! Nanhte gaw Bansa Nhtoi hpe n chyoi n pra shangun nga myit hka!

PRU MAT 32:10

Ya chyawm gaw, ngai hpe hkan jahkring na hkum shakut sa. Ngai shanhte hpe masin yu pawt nga nngai majaw shanhte hpe shamyit kau na mawe ai. Dai hpang nang hte na a amyu matu ni hpe ngai amyu kaba shatai na we ai,” ngu nna tsun wu ai.

PRU MAT 32:8

Shanhte hkan sa na matu ngai hkang da ai lam hta na dam mat wa nhtawm ja shabyawng la let dumsu usu kasha langai galaw la nna dai hpe nawku ai hte shagu hkungga nawng jau ya nga masai. Shanhte gaw dai gaw Egutu mung kaw na shanhte hpe woi shapraw wa ai shanhte a hpara rai nga ai ngu tsun nga masai.

GA SHAGAWP 1:25

Nang gaw nye a hpaji jaw ai lam hpe hpa zawn n nawn kau nga ndai, nang hpe shading sharai ai lam hpe mung, nang n ra sharawng nga ndai.

GA SHAGAWP 13:13

Nang lama, mai kaja ai hpaji jaw ga hpe, ningdang kau ai rai yang, ru yak tsin-yam hkrum na ndai; nang dai hta hkan sa ai rai yang chyawm, gaw nang shim nga na ndai.

ESAIA 56:6

Dai Madu gaw shi hpe tsaw ra nna shi hpe daw jau nga ai shi a amyu masha ni a daw chyen mi tai nna, Bansa Nhtoi hpe hkan nang ai hte, shi a ga shaka hpe sadi sahka hte shatup nga ai maigan masha ni hpe ning ngu tsun wu ai:

ESAIA 63:10

rai ti mung, shanhte gaw shi hpe gumlau nna shi a chyoi pra ai wenyi hpe yawn shangun ma ai. Dai rai nna dai Madu gaw shanhte a gumlau tai mat nhtawm shanhte hpe gasat wu ai.

YEREMIA 7:24

Rai ti mung, shanhte gaw madat mara ma ai n rai, hpa zawn mung n nawn ya nga ma ai. Dai zawn hkan sa na malai, shanhte gaw du ja ai hte n hkru ai myit masin shanhte hpe shadut matsun ai hku galaw nga ma ai majaw, shanhte gaw kaja wa na malai n kaja ai masha ni tai wa nga masai.

EZEKELA 20:11

Ngai gaw shanhte hpe nye a hkang da ai matsun maroi ga ni jaw ya ni ai; dai lam ni hpe hkan sa madat mara ai ni kadai rai ti mung, asak hkrung nga shangun lu na, nye a tara ni shanhte hpe sharin achyin ya ni ai.

EZEKELA 20:14

Rai ti mung, dai hku ngai n galaw nngai, hpa majaw nga yang, Egutu mung kaw na Israela amyu masha ni hpe ngai woi wa sai lam mu ai masha amyu baw ni a man e nye a amying jahpoi kau ai lam n tai shangun nngai.

EZEKELA 20:16

Shanhte gaw shanhte a hpara sumla ni hpe nawku na matu sharawng awng nga ma ai; nye a hkang da ai matsun maroi ga ni hpe kau da nhtawm nye a tara ni hpe jahten kau ai hte Bansa Nhtoi hpe awu asin di kau mu ai majaw ngai dagam kau ni ai.

EZEKELA 20:21

“Rai ti mung, dai ban na masha ni mung ngai hpe gumlau ninghkap ma ai. Shanhte gaw nye a tara ni hpe jahten kau ma ai hte dai lam ni hpe hkan sa madat mara ai ni kadai hpe mung asak hkrung shangun lu ai nye a hkang da ai matsun maroi ga ni hpe n hkan ma ai. Shanhte gaw dai Bansa Nhtoi hpe awu asin di kau ma ai. Shanhte yawng hpe dai nam mali e jahtum kau na matu nye a sindawng kahtet ai a n-gun hkam sha lu mu ga, ngai shajin da ni ai.

EZEKELA 20:24

Shanhte gaw nye a hkang da ai matsun maroi ga ni hpe n hkan, nye a tara ni hpe jahten, Bansa Nhtoi hpe awu asin di nhtawm shanhte a kaji kawa ni nawng jau ai hpara sumla ni hpe nawku ma ai majaw, ndai amu hpe ngai galaw ni ai.

EZEKELA 20:36

Nanhte a kaji kawa ni hpe Sina Nam mali e ngai daw dan ni ai zawn, ya mung nanhte hpe ngai daw dan na nngai,” ngu Tsaw Htum ai dai Madu tsun ai.

EZEKELA 20:8

Rai ti mung, shanhte gaw ngai hpe ninghkap ma ai hte nye a ga hpe n madat mara nga ma ai. Shanhte gaw shanhte a matsat shabat re ai hpara ni hpe n kabai kau ma ai; Egutu hpara ni hpe mung n kau da lu ma ai. Nye a masin kahtet ai n-gun gaw dai Egutu mung hta hpring tup hkam sha shangun na, ngai shajin da ni ai.

EZEKELA 22:8

Nang gaw dai chyoi pra ai shara ni hpe n hkungga nga ndai; Bansa Nhtoi hpe awu asin di nga ndai.

EZEKELA 23:38

Shanhte galaw sai amu gaw dai yawng rai nga sai n rai. Shan gaw nye a Nawku Htingnu hpe awu asin di kau ma ai hte ngai shagrin da ni ai dai Bansa Nhtoi hpe mung n gawn n sawn di nga ma ai.

JAW JAU 18:5

Ngai nanhte hpe jaw da ai hkan sa lam ni hte tara ni hta hkan nang lu na rai myit dai. Dai hpe hkan galaw ai a jaw e, nanhte asak hkrung nga lu na rai myit dai; ngai gaw dai Madu nan rai nga nngai.”

JAW JAU 26:15

Nye a tara ni hte hkang da ai ga matsun ni hta hkan sa na matu nanhte lale kau nna nanhte hte ngai shagrin da sai ga shaka hpe jahten kau myit dai rai yang, nanhte hpe ari jaw na made ai.

JAW JAU 26:43

Shawng nnan e, dai mung na amyu masha ni hpe yeng seng kau ai hpang sha, tsep kawp bansa lu ai hte kabu gara lu na ra ai, shanhte gaw nye a tara hte hkang da ai ga ni hpe ningdang kau nga masai majaw ari hpring hkra hkrum sha ai lam hpe yin la lu na rai ma ai.

AMO LAIKA (AMOS) 2:4

Dai Madu gaw, “Yuda amyu masha ni gaw lang hte lang yubak galaw shut kau manu ai, dai lam a majaw, ngai shanhte hpe teng teng ari jaw na nngai. Shanhte gaw nye a sharin shaga ai ga matsun ni hpe n kaw n law di ma ai, nye a hkang da ai ga ni hta n hkan sa ma ai. Shanhte gaw shanhte a kaji kawa ni hkan nang yu sai akyu n rawng ai hpara sumla ni hta nan lam yit nga masai.

BU HKAWM 14:22

ndai amyu masha ni kadai mung dai mung de shang lu na ma ai n rai, ngu nna ngai ga sadi tawn da nngai. Shanhte mahtang Egutu mung hte nam mali hkan ngai galaw dan sai mauhpa lamik kumla ni hte htoi tu ai nye a hpung shingkang hpe mu lu ma ti mung, nye a galu kaba ai myit hpe shanhte lang hte lang chyam dinglik yu nna nye a ga hpe n madat ya ma ai.

BU HKAWM 14:29

Nanhte mung si mat nhtawm nanhte a si mang ni gaw ndai nam mali hkan ayai taw nga na malit dai. Nanhte ngai hpe aput shatsang manit dai majaw, asak hkun ning lai sai ni kadai mung dai mung de shang lu na myit dai n rai.

BU HKAWM 16:45

“Ndai amyu masha ni kaw na shingdu de htingnut tsap mat mu; ndai masha ni hpe ndai shara hta nan shamyit kau na we ai!,” ngu nna tsun wu ai. Shan chyawm gaw ga de dingnyawm gum dagup nhtawm,

BU HKAWM 26:25

Ndai lakung lakying ni hta na hti lawm ai lasha ni gaw 64,300 hte rai ma ai.

ROMA 10:5

Jep ai Tara hkan shatup ai hte Karai Kasang a man e ding hpring ai masha tai lu ai lam hte seng nna Mawshe gaw, “Jep ai Tara hkan shatup ai wa gaw hkrung nga na ra ai,” nga nna ka da nu ai.

TARA JAHPRANG 31:27

Shanhte kade wa mi myit ja nna gumlau ai myit rawng nga ma ai hpe ngai chye nga nngai. Ngai naw hkrung nga ai hte yang pyi, dai Madu hpe shanhte gumlau ma ai rai nna, ngai si mat wa ai hpang dai hta grau nna pyi shanhte gumlau na mara ai.

TARA JAHPRANG 9:7

“Nam mali kata e dai Madu nanhte a Karai Kasang hpe nanhte kaning rai masin shapawt nga myit dai hpe galoi mung hkum malap kau myit. Nanhte Egutu mung kaw na pru wa ai shani kaw nna ndai yang du wa ai aten du hkra nanhte shi hpe gumlau nga myit dai.

TARA JAHPRANG 9:8

Nanhte gaw dai Madu hpe Sina Bum e pyi pawt shangun myit dai rai nna nanhte hpe shamyit kau na daram pawt kau nu ai.

1 HTESALONI 4:8

Dai rai nna, ndai sharin shaga ai lam hpe ningdang kau ai wa kadai mung, masha hpe n rai, Chyoi Pra ai Wenyi jaw ya ai Karai Kasang hpe mahtang ningdang kau ai wa rai nga ai.

1 SAMUELA 8:8

Ngai shanhte hpe Egutu mung kaw nna woi shapraw wa ai shani kaw na shanhte ngai kaw na kayin mat wa nhtawm kaga hpara ni hpe nawku ma ai; ngai hpe galoi mung shanhte dai hku galaw ma ai zawn ya mung nang hpe dai hku galaw nga ma ai.