EZEKELA 18:30 - Jinghpaw Common Language Bible 2009

³⁰ “Ya chyawm gaw, nanhte galaw dan sai arawn alai hte maren, nanhte langai hte langai hpe tara jeyang na nngai, nga nna dai Tsaw Htum ai Madu ngai nan Israela amyu masha ni hpe tsun nga nngai. Nanhte galaw shut kau ai yubak gaw nanhte hpe n jahten kau u ga, nanhte galaw shut hpyit kau ai n hkru n shawp ai amu yawng kaw nna kayin wa marit.

Jinghpaw Hanson Version Bible

³⁰ Dai rai nna, Israela dap e, nanhte langai hte langai a arawn alai hte maren, ngai nanhte hpe jeyang na nngai,” nga nna Madu Yehowa tsun ai. “Kayin marit; nanhte a tawt lai ai lam mahkra hta na kayin marit: shing rai nanhte gaw, yubak mara majaw, ahtu kataw hkrum na n rai.

EZEKELA 18:30 ပူးပေါင်းရင်းမြစ်များ

EZRA 10:11

Dai re ai majaw, dai Madu nanhte a kaji kawa ni a Karai Kasang hta nanhte a yubak mara ni hpe yin la nna, shi sharawng awng ai amu hkan galaw nga mu. Anhte a mungdan hta nga nga ai maigan masha ni hte nanhte kaga san san rai nga nna nanhte a maigan madu jan ni hpe yeng seng kau mu,” ngu nna tsun wu ai.

HPAJI NINGLI 12:14

Karai Kasang gaw anhte galaw ai amu magup hpe kaja ai rai ti mung, n kaja ai rai ti mung, makoi magap da ai amu ni hpe pyi, jeyang na ra ai.

HPAJI NINGLI 3:17

Ngai gaw nye hkum hpe, “Karai Kasang gaw ding man ai hte n hkru ai amu hpe mung jeyang na ra ai, hpa majaw nga yang, amu shagu, arawn alai shagu gaw shi a masat da ai aten hta byin wa na ra ai,” ngu nna tsun nngai.

ESAIA 21:12

Ngai gaw, “Jahpawt manap gaw du wa ra ai, rai ti mung shana bai du na ra ai. Nang bai san mayu ai rai yang, nhtang sa wa nna san u,” ngu nna htan we ai.

ESAIA 59:20

Dai Madu gaw shi a amyu masha ni hpe, “Ngai gaw nanhte hpe makawp maga na matu mung, yubak kaw na kayin wa ai nanhte yawng hpe hkye la na matu mung Yerusalem de sa wa na nngai.

YEREMIA 25:5

Shanhte gaw nang hpe dai na a n hkru ai asak hkrun lam hte nang galaw nga ai n shawp n kap ai amu ni kaw na kayin wa na matu tsun nga ai. Dai Madu gaw na a nji nwa ni hpe prat tup jaw lup madu sha lu na nang hpe jaw da sai mungdan hta nang matut shanu nga lu na rai ndai.

YEREMIA 3:22

Dai Madu kaw na kayin mat wa ai nanhte yawng hte e, nhtang wa marit; shi gaw nang hpe shamai shatsai nna nang hpe sadi dung shangun na ra ai. Nang gaw, “Rai sa, shi gaw anhte a Karai Kasang rai nga ai majaw, anhte dai Madu hpang de sa wa nga ga ai.

YEREMIA 35:15

Ngai gaw nanhte hpang de nye a shangun ma ni rai nga ai myihtoi ni yawng hpe matut shangun dat ni ai; shanhte gaw nanhte hpe nanhte a n hkru ai amu ni koi kau na matu hte, ding hpring ai amu galaw na matu tsun shadum manu ai. Shanhte gaw kaga hpara sumla ni hpe nawku daw jau ai lam n galaw na matu nanhte hpe tsun shadum manu ai, shing rai jang, ngai gaw nanhte hte nanhte a nji nwa ni hpe jaw da ai mungdan hta nanhte matut shanu nga lu na myit dai. Rai ti mung, nanhte gaw nye a ga hpe n madat myit dai hte hpa zawn n nawn ya nga myit dai.

EZEKELA 14:6

“Dai re ai majaw, Tsaw Htum ai dai Madu ngai nan shanhte hte seng nna tsun ai ga, Israela amyu masha ni hpe htawn tsun u: Kayin wa marit, nanhte a matsat shabat re ai hpara sumla ni hpe kau da mu.

EZEKELA 18:21

“N hkru ai masha wa gaw yubak lam hpe kau da nna, nye a tara ni hpe hkan shadik nhtawm teng man ai hte mai kaja ai amu hpe galaw ai rai yang, shi si na ra ai n rai; teng teng hkrung nga na ra ai.

EZEKELA 18:29

Nanhte Israela amyu masha ni gaw, ‘Dai Tsaw Htum ai Madu galaw ai amu gaw n teng n man nga ai,’ ngu nanhte myit nawn myit dai n rai ni? Dai nanhte hkan ai lam mahtang n ding n man nga malit dai.

EZEKELA 24:14

Dai Madu ngai nan dai ga hpe tsun ni ai. Dai amu galaw shadik na matu, nye a aten gaw du nga sai. Ngai gaw na a yubak mara ni hpe malap kau ya na n rai, n-gaw n wai ai myit madun dan na n rai, matsan dum la na n rai. Nang galaw dan sai arawn alai hte maren ari jaw hkrum na rai ndai.” Tsaw Htum ai dai Madu nan tsun nu ai.

EZEKELA 33:11

Tsaw Htum ai dai Madu ngai gaw ahkrung nga ai Karai Kasang rai nga nngai, dai majaw yubak kap ai wa si mat wa na hpe yu kabu nga nngai n rai. Yubak galaw ai hpe kau da nna hkrung nga na hpe ngai yu sharawng nga nngai ngu shanhte hpe htawn tsun u. Israela e, nang galaw nga ai dai n hkru n shawp ai amu hpe kau da u. Nang hpa majaw si mayu nga n ta?

EZEKELA 33:20

Rai ti mung, Israela e, nang gaw ngai galaw ai amu teng man nga ai n rai, nga nna tsun myit dai. Dai re ai majaw, nang galaw ai amu hte maren, ngai nang hpe jeyang na nngai.”

EZEKELA 33:9

Nang gaw n hkru ai wa hpe shadum jahprang ai lam galaw ti mung, yubak galaw ai lam hpe shi n jahkring ai rai yang, yubak kap ai wa naw rai nga ai majaw, shi si na rai wu ai, rai ti mung na a asak gaw lawt lu na ra ai.”

EZEKELA 34:20

“Dai rai nna, ya chyawm gaw, n-gun ja ai sagu ni hte gawng kya ai sagu ni hpe ngai tara jeyang na nngai ngu nna Tsaw Htum ai dai Madu ngai nan tsun nngai.

EZEKELA 36:19

Shanhte a ngasat ngasa lam hte shanhte galaw ai arawn alai hte maren, ngai daw dan ni ai, shing rai shanhte hpe maigan mungdan ni de shabra kau dat nngai.

EZEKELA 43:9

Ya chyawm gaw, karai shaje ni hpe nawku ai lam hpe shanhte jahkring kau nhtawm shanhte a hkawhkam ni a si mang ni hpe htawm kau lu na rai ma ai. Shanhte dai hku hkan galaw ai rai yang, ngai gaw shanhte a ka-ang e htani htana anga nga na nngai,” ngu nna tsun nngai.

EZEKELA 7:27

Hkawhkam wa gaw sharung shayawt na ra ai; hkawhkam kasha ni gaw myit mada shara n nga ai hte mak mat na mara ai; amyu masha ni gaw hkrit gari mat na mara ai. Nang galaw lai wa sai amu yawng mayawng a matu ngai nang hpe ari jaw na nngai, shaloi nang gaw masha ni hpe tara daw dan ai zawn, ngai mung dai hte maren, nang hpe tara daw dan na nngai. Dai gaw dai Madu ngai nan rai nga nngai hpe madun dan na ra ai.”

EZEKELA 7:3

“Israela e, jahtum ai gaw du nit dai. Nang galaw dan sai amu hte maren ngai nang hpe tara jeyang nga nngai majaw nang gaw nye a sindawng kahtet ai hpe hkam sha na rai ndai. Ngai gaw nang galaw ai matsat shabat amu yawng a matu nang hpe htang jaw na nngai.

Daniela 9:13

Mawshe a Tara hta ka da ai ari ahpri yawng anhte hpe jaw nga ndai. Rai ti mung, ya chyawm gaw, O Madu anhte a Karai Kasang e, anhte a yubak ni kaw nna kayin mat wa nhtawm na a teng man ai lam hta hkan sa ai hku nang hpe awng sharawng shangun ga ai n rai.

HOSEA 12:6

Dai rai nna ya chyawm gaw, Yaku a amyu matu mara ni e, nanhte a Karai Kasang hpe kam hpa nga mu; shi kaw nhtang wa mu. Teng man ai hte sadi dung nga let, nanhte a Karai Kasang galaw na amu hpe myit n yaw ai sha ala nga mu.

ZEHKARIA 1:4

Nanhte a nji nwa ni zawn hkum rai myit. Myihtoi ni gaw moi prat e shanhte hpe n hkru n hkra ai hku asak n hkrung na matu mung, yubak kap ai asak hkrun lam ni hpe kau da na lam mung, ndai nye a mungga hte shanhte hpe tsun ma ai. Rai ti mung shanhte mahtang nye a ga hpe n na ya ai hte n madat n mara ma ai.

MALAHKI 3:18

Nye a amyu masha ni gaw ding hpring ai wa hte tara n lang ai wa a lapran ngai hpe daw jau ai wa hte n daw jau ai wa a lapran e shai ai hpe lang mi bai chye ginhka mu lu na mara ai,” ngu nna tsun wu ai.

MAHTE 16:27

Hpa majaw nga yang, dai Masha Kasha gaw Kawa a hpung shingkang hte shi a lamu kasa ni hte nawng, du na ra ai; dai shaloi e, tinang galaw ai hte maren langai hte langai hpe htang na ra ai.

MAHTE 25:32

amyu baw shagu hpe shi a man e jahpawng tawn da na ra ai. Dai shaloi shi gaw, sagu rem wa gaw, sagu ni hte bainam ni hpe garan ginhka da ai zawn shanhte hpe garan ginhka da na ru ai.

MAHTE 3:2

shi gaw, “Sumsing lamu a mungdan du magang ra ai majaw, nanhte a yubak mara ni kaw na myit malai lu mu!” nga nna hkaw tsun hpang wu ai.

MAHTE 3:8

Dai majaw, nanhte a yubak mara ni kaw na myit malai lu nna kayin wa sai lam nanhte a arawn alai hte madun dan mu!

LUKA 13:3

Kaja wa dai hku n rai! Ngai nanhte hpe tsun made ga, Nanhte mung, yubak mara ni kaw na myit malai n lu myit yang gaw, nanhte yawng shanhte zawn si wa na marin dai.

LUKA 13:5

Kaja wa dai hku n rai! Ngai nanhte hpe tsun made ga, Nanhte mung, yubak mara ni kaw na myit malai n lu myit yang gaw, shanhte zawn, yawng si wa na marin dai,” ngu mu ai.

KASA 26:20

Dai lam hpe shawng nnan Damasku mare, dai hpang Yerusalem mare hte Yuda mung ting na masha ni hte maigan amyu masha ni myit malai lu nna Karai Kasang hpang de kayin wa nhtawm myit malai hte gingdan ai arawn alai shachyen mu ga, ngai hkaw dan nngai.

ROMA 2:5

Rai ti mung nang gaw myit ja ai hte myit malai n lu ndai majaw, Karai Kasang a pawt bu nga ai hpe ding man ai hku tara dara ai lam dan pru ai nhtoi e nang gaw grau nna kaba ai ari hkrum lu na rin dai.

YAKU 1:15

Shi a myit kayut ai gaw na-um na sin rai wa jang yubak mara hpe shangai dat wu ai; dai yubak mara kaba wa jang si ai hpe shangai dat wu ai.

1 PETRU 1:17

Dai hta kaga masha yawng hte hpe myi man n lata ai sha langai hte langai tinang galaw ai hte maren tara jeyang chye ai Karai Kasang kaw nanhte akyu hpyi myit yang, shi hpe, “Wa e,” ngu nna hpyi myit dai, Dai rai nna ndai mungkan hta nanhte asak hkrung nga ai laman hta shi hpe hkrit hkungga nga mu.

SHINGRAN 2:16

Dai re ai majaw ya jang na a yubak mara ni kaw na kayin wa rit! Dai n rai yang, ngai alawan nang kaw du nna, nye a n-gup hta na pru ai ntawng nhtu hte shanhte hpe gasat kau na mawe ai.

SHINGRAN 2:5

Dai rai nna nang gade daram di hkrat yu mat wa sai lam hpe myit yu u! Na a yubak mara ni kaw na kayin wa nna shawng de na zawn bai hkan sa galaw u. Na a yubak mara ni kaw na bai n kayin wa yang gaw, ngai nang kaw du nna na a pyengdin hpe de a shara na sit kau ya na de ai.

SHINGRAN 20:12

Si mat wa sai ni mung, kaji kaba n nga, tingnyang a man e tsap nga ma ai hpe ngai mu nngai. Laika ni hpe hpaw tawn nga ai. Asak laika ngu ai kaga Laika hpe mung hpaw tawn nga ai. Si mat wa sai ni gaw, shanhte galaw lai wa sai amu hte maren, laika ni hta ka da nga ai hta hkan nna tara daw dan ai hkrum ma ai.)

SHINGRAN 22:12

“Madat u! ngai alawan du na ring ngai! Langai hte langai hpe tinang galaw sai amu hte maren htang jaw na shabrai ni hpe ngai hte rau la sa na nngai.