EZEKELA 17:18 - Jinghpaw Common Language Bible 2009

¹⁸ Shi galaw tawn da ai dagam ga hte ga shaka hpe jahten kau nu ai. Shi gaw dai amu ni yawng hpe galaw nu ai rai nna, ya shi lawt lu na ra ai n rai,” ngu nna tsun nga ai.

Jinghpaw Hanson Version Bible

¹⁸ Kaning rai nme law, shi gaw, ga shaka hpe run kau nna, dagam ai ga hpe n kaw n law di kau nu ai; yu u, shi gaw lata matut nhtawm, dai lam mahkra hpe galaw nu ai: shi lawt lu na, n rai.

EZEKELA 17:18 ပူးပေါင်းရင်းမြစ်များ

2 HKAWHKAM 10:15

Yehu bai pru sa wa wu yang, Rehkab a kasha Yonadab hte hkrun lam e hkrum wu ai. Yehu mung shi hpe shakram la nhtawm, “Nang hte ngai myit mang ai lam langai sha rai nga ga ai majaw nang ngai hpe madi shadaw lu na n ni?,” ngu nna tsun wu ai. Yonadab mung, “Karum lu na nngai,” ngu nna htan wu ai. Yehu gaw, “Dai rai yang na a lata ngai hpe jaw e,” ngu nna tsun htang wu ai shaloi shan gaw lata matut nna Yehu mahtang shi hpe leng ntsa de woi jashawn la let,

1 HKAWHKAM LABAU 29:24

Du salang ni yawng hte hpyenla ni, kaga Dawi a shadang sha ni yawng du hkra pyi hkawhkam rai nga sai Shawlumon hta sadi dung nga na lam ga sadi jaw ma ai.

2 HKAWHKAM LABAU 30:8

Shanhte zawn myit hkum ja nga myit; dai Madu a ga hpe madat mara nga mu. Dai Madu nanhte a Karai Kasang gaw htani htana a matu shachyoi shapra da ai Yerusalem mare na Nawku Htingnu de sa nhtawm shi hpe nawku mu, shaloi shi nanhte hpe galoi mung pawt bu na ra ai n rai.

HPAJI NINGLI 8:2

Hkawhkam wa hkang ai hte maren galaw u; Karai Kasang hpe tin shapun re ai ga sadi hpa mung hkum jaw et.

SHARUNG SHAYAWT 5:6

Lusha alaw mi lu na matu hte asak hkrung nga lu na matu, anhte gaw Egutu hte Asuri mung de sa hpyi lajin ga ai.

EZEKELA 17:15

Rai ti mung, Yuda hkawhkam wa gaw gumlau ai hte gumra hte hpyen luksuk kaba karum hpyi na matu Egutu mung de kasa shangun dat sai. Shi awng dang na rai wu ni? Shi gaw dai zawn re ai amu galaw nga ai kaw nna hprawng lawt lu na rai wu ni? Shi gaw ga shaka hpe n run lu ai hte ari ahpri n hkrum na rai wu ni!

EZEKELA 17:16

“Ngai gaw ahkrung nga ai Karai Kasang rai nga nngai, dai majaw dai Tsaw Htum ai Madu gaw, “Ndai hkawhkam wa gaw shi hpe hkawhkam tingnyang shadun da ai Babelon hkawhkam hte shaka da ai hte dagam da ai ga shaka hpe jahten kau nu ai majaw shi gaw Babelon mung e si mat na ra ai.

EZEKELA 17:19

Tsaw Htum ai dai Madu gaw, “Ngai gaw ahkrung nga ai Karai Kasang rai nga nngai, dai majaw, shi hpe nye a mying hta agrin nga na matu shi dagam da nu ai ga shaka hpe jahten kau nu ai rai nna shi hpe ari jaw na we ai.

EZEKELA 21:23

Yerusalem hta shanu nga ai amyu masha ni gaw shanhte galaw da lu sai jinghku ga shaka ni a majaw ndai tsun shadum ai ga ni hpe n kam ma ai. Rai ti mung, ndai zawn jau nna hkaw tsun tawn ai ga gaw shanhte galaw ai yubak ni hpe dum shangun ai hte shanhte rim la hkrum na mara ai lam ni hpe shadum jahprang ai lam rai nga ai.