EZEKELA 16:13 - Jinghpaw Common Language Bible 2009

¹³ Nang gaw manu dan ai aja gumhpraw ni hte mawn sumli nhtawm, mani tsawm ai lachyit sumpan, alai hte maka ka ai hpun palawng ni hpe tut nawng bu hpun nga ndai. Nang gaw kaja htum ai hkaulan mam shadung hte galaw ai muk sha nhtawm, dwi ai lagat ntsin hte sau ai tsanlun sau hpe lu nga ndai. Na a ahpraw nsam gaw tsawm htap htoi kabrim nga nna hkawhkam jan tai wa nit dai.

Jinghpaw Hanson Version Bible

¹³ Shing rai aja gumhpraw hte nang mawn sumli nga ndai; na a hpun palawng gaw, mani ai lachyit sumpan, alai hte maka ka ai sumpan rai nga ai; mani ai shadung, lagat jahku hte sau sha let, grai tsawm htap ai ahpraw nsam pru nna, nang gaw hkawhkam jan aya hkam la nga ndai.

EZEKELA 16:13 ပူးပေါင်းရင်းမြစ်များ

NINGPAWT NINGHPANG 17:6

Ngai nang hpe amyu matu law law jaw na we ai; dai ni hta nkau mi hkawhkam hkawseng pru shajang na mara ai. Nang hta amyu matu grai law htam wa nna dai ni gaw amyu baw ni tai wa na mara ai.

2 SAMUELA 8:15

Dawi gaw Israela mung ting hpe up hkang nga ai rai nna shi a amyu masha ni hpe tut nawng teng man rap ra ai hku jeyang ya nga ai.

1 HKAWHKAM 4:21

Shawlumon a mungdan chyawm gaw Uhprat hka nu kaw nna Hpilisti hte Egutu mung a lamu ga jarit du hkra masha amyu ni yawng nga ai shara ni lawm nga ai. Shanhte gaw Shawlumon a prat htum hkra shi a up hkang ai npu hta taw nna shi hpe ahkun hkanse ni jaw ya nga ma ai.

EZRA 4:20

Daru magam n-gun rawng ai hkawhkam ni dai yang e hkaw dung nna Uhprat a Sinna maga a mungdaw ting hpe up hkang let, ahkun hkanse ni lahkawn la yu nga masai.

EZRA 5:11

“Shanhte gaw, ‘Anhte gaw sumsing lamu hte ginding aga a Karai Kasang a shangun ma ni rai nga ga ai. Daru magam n-gun rawng ai Israela hkawhkam langai mi gaw lai sai shaning law law kaw nna shawng gap hpang da sai Nawku Htingnu hpe bai gap nna ra ai arung arai ni hpe jahting da ga ai.

YOBA 29:6

Nye a dumsu kanu ni hte bainam ni nga chyu law law jaw ma ai, nye a tsanlun hpun ni mung lunghkrung ga hta tu nga ma ai.

SHAKAWN KUNGDAWN 147:14

Shi gaw na a lamu ga jarit ni hpe shim nga shangun nna; sau ai hkaulan mam hta nang hpe shakat ya nga ai.

SHAKAWN KUNGDAWN 48:2

Karai Kasang a bum ngu ai Ziun gaw tsaw nga nna, tsawm htap nga ai; galu kaba ai hkawhkam wa a mare gaw mungkan amyu masha ni yawng hte hpe, kabu gara shangun nga ai.

SHAKAWN KUNGDAWN 50:2

Karai Kasang gaw shi a hkum tsup tsawm htap nga ai Ziun mare kaw nna, nhtoi shatu dat wu ai.

SHAKAWN KUNGDAWN 81:16

Rai ti mung, kaja htum ai hkaulan mam hte ngai shanhte hpe bau nna, nam na lagat jahku hte shanhte hpe myit dik hkra jahkru na mawe ai.”

ESAIA 64:11

chyoi pra ai hte tsawm htap nna anhte a kaji kawa ni nang hpe shakawn kungdawn ai anhte a Nawku Htingnu mung wan a majaw hten mat sai. Anhte tsaw ra manoi ai shara ni yawng hten run mat sai.

YEREMIA 13:20

Yerusalem e, yu u! Na a gumlau hpyen ni gaw dingdung maga de nna sa wa na mara ai! Nang hpe kam hpa ai amyu masha ni hte nang grai gumrawng lu ai na a amyu masha ni kanang rai nga ma ta?

SHARUNG SHAYAWT 2:15

Dai mare hku lai wa ai masha ni gaw nang hpe yu nna jahpoi asawng nga ma ai. “Ndai mare gaw yu tsawm na zawn rai nga a ni? Ndai mare gaw mungkan ting a gumrawng shara rai nga a ni?,” nga nna shanhte a baw ni kanga nhtawm Yerusalem mare a hten run mat ai hpe yu nna ashu nga ma ai.

EZEKELA 16:10

Ngai gaw nang hpe maka ka ai hpun palawng ni hpe jahpun nna, kaja htum ai shanhpyi hkyepdin shadin nngai. Lachyit sumpan bunghkaw hte hkaw ya nna, lai hte da ai hpun palawng jahpun nngai.

EZEKELA 16:17

Nang gaw ngai nang hpe ya da ai aja gumhpraw ni hpe la nna, dai ni hte la sumla ni galaw lang nhtawm shanhte hte shut hpyit ai amu galaw nit dai.

EZEKELA 16:19

Na a matu lusha tai na kaja htum ai muk shadung, tsanlun sau hte lagat ntsin ni nang hpe jaw ti mung, nang gaw dai ni hpe hpara sumla ni myi man pa lu na matu, shagu hkungga zawn nat nawng kau nit dai.” Ndai gaw Tsaw Htum ai dai Madu tsun ai mungga rai nga ai.

EZEKELA 23:40

“Shan gaw kasa ni hpe lang hte lang shangun dat nna, sumtsan mung na lasha ni hpe saw shaga ga rai ma ai, dai lasha ni mung du sa wa ma ai. Dai kanau yan kana mung hka shin nna shan a myi hpe tsi chya nhtawm ja lung seng hte mawn sumli da ma ai.

EZEKELA 27:16

Suri masha ni mung gun rai hte nang galaw shapraw ai hpaga gun rai ni mari la ma ai. Shanhte gaw mya lung seng tsit, shaba pu nsam rawng ai sumpan, maka ka ai sumpan, mani ai lachyit nba, tanda ngu ai chyahkat nlung hte lung seng hkyeng ni hpe la sa nna na a gun rai ni hte galai la nga ma ai.

TARA JAHPRANG 8:8

hkaulan mam, muk-yaw mam, sabyi si, maihpang si, hkainu si, tsanlun si hte lagat ntsin ni hpe shapraw ya ai ga de nanhte hpe woi wa nga ai.

1 SAMUELA 10:1

Dai hpang Samuela gaw tsanlun sau rawng ai di bu langai la nna Shawlu a baw ntsa e ru jaw nna shi hpe pup let, “Shi a amyu masha Israela hpe up hkang ai du tai na matu, dai Madu gaw nang hpe namman jaw ya nga ai. Dai rai nna shi a amyu masha ni hpe nang up hkang nna shanhte a gumlau hpyen ni yawng a lata kaw nna mung shanhte hpe makawp maga ya na rai ndai. Ndai gaw dai Madu nang hpe lata la nna shi a amyu masha ni hpe up hkang na du tai na matu nang hpe madun ai sakse rai nga ai.

1 SAMUELA 12:12

Rai ti mung nanhte hpe htim gasat hkyen nga ai Amon Hkawhkam Nahasha hpe nanhte mu myit dai shaloi, nanhte a hkawhkam rai nga ai dai Madu hpe ningdang kau nhtawm ngai hpe mahtang, ‘Anhte hpe up hkang na hkawhkam langai ra ga ai,’ nga nna tsun myit dai.