EZEKELA 16:10 - Jinghpaw Common Language Bible 2009

¹⁰ Ngai gaw nang hpe maka ka ai hpun palawng ni hpe jahpun nna, kaja htum ai shanhpyi hkyepdin shadin nngai. Lachyit sumpan bunghkaw hte hkaw ya nna, lai hte da ai hpun palawng jahpun nngai.

Jinghpaw Hanson Version Bible

¹⁰ Maka ka ai hpun palawng hte ngai nang hpe jahpun nna, tahkisha hpyi kyepdin shadin nngai; mani ai lachyit sumpan hte ngai nang hpe lawai nna, lai palawng jahpun nngai.

EZEKELA 16:10 ပူးပေါင်းရင်းမြစ်များ

NINGPAWT NINGHPANG 41:42

Hkawhkam wa mung hkawhkam dazik tawk ka da ai lachyawp hpe shi a lata hta chyawp ya wu ai. Dai hta kaga, reng ai lachyit palawng galu hpe mung jahpun ya nhtawm shi a du hta ja saidawng mung gali ya wu ai.

SHAKAWN KUNGDAWN 45:15

Kabu gara re ai myi man hte shanhte pru sa wa nna; hkawhkam wa a hkaw de shang sa wa ma ai.

PRU MAT 25:5

jaw jahkyeng da ai sagu la hpyi, tsawm ai shanhpyi; shaji hpun;

PRU MAT 26:14

“Sum galup na matu magap lahkawng hpe naw galaw na rai nga ai; langai mi hpe sagu la hpyi hpe jaw jahkyeng da nga ai; kaga langai mi hpe mani tsawm ai shanhpyi hte Sum ntsa de galup na rai nga ai.

PRU MAT 26:36

“Sum a shang wa chyinghka lam a matu sawm tsit ai ri, shaba pu nsam pru ai ri hte hkyeng ai ri ni hte mani tsawm ai lachyit sumpan hpe da nna, maka ka shatsawm da ai nba grang langai galaw na rai nga ai.

PRU MAT 28:5

Lata hpaji kungkyang ai masha ni mung sawm tsit ai, shaba pu nsam rawng ai hte hkyeng ai sagu ri hte ja ri ni hte hpawn mani tsawm ai lachyit sumpan ni lang na rai ma ai.

GA SHAGAWP 31:22

Shi gaw yup ra panep nep da ai hte hkyeng sawm nsam pru nna tsawm ai lachyit sumpan hte hpun sumli da nga ai.

ESAIA 3:23

shanhte a kata palawng ni, lachyit hpajet du gyit sumpan hte shanhte a baw ni hpe magap ai za sumpan galu ni hpe la kabai kau ya ai nhtoi du wa na ra ai.

ESAIA 61:10

Dai Madu galaw sai amu a majaw Yerusalem gaw kabu gara nga ai. Yerusalem gaw hkungran poi a matu mawn sumli da ai num nnan hte bung nga ai. Karai Kasang gaw hkye hkrang la ai hte awng dang ai lam hte hpun da nga nu ai.

ESAIA 61:3

Ziun hta sharung shayawt nga ai ni hpe yawn madai na malai Kabu gara ai hte kabu pyaw ai lam, Yawn hkyen ai a malai mahkawn shakawn na lam jaw ya na matu shangun dat ni ai. Shanhte gaw dai Madu shi nan hkai da sai Hpun ni zawn tai na mara ai. Shanhte gaw ding man ai amu yawng mayawng hpe galaw na mara ai, Karai Kasang gaw shi galaw sai amu ni a majaw shakawn kungdawn ai hkrum na ra ai.

EZEKELA 16:13

Nang gaw manu dan ai aja gumhpraw ni hte mawn sumli nhtawm, mani tsawm ai lachyit sumpan, alai hte maka ka ai hpun palawng ni hpe tut nawng bu hpun nga ndai. Nang gaw kaja htum ai hkaulan mam shadung hte galaw ai muk sha nhtawm, dwi ai lagat ntsin hte sau ai tsanlun sau hpe lu nga ndai. Na a ahpraw nsam gaw tsawm htap htoi kabrim nga nna hkawhkam jan tai wa nit dai.

EZEKELA 16:18

Nang gaw ngai nang hpe jaw da ai maka ka ai sumpan ni hpe la nna, la sumla ni a ntsa e jahpun nhtawm, ngai nang hpe jaw tawn ai tsanlun sau hte manam pyaw ai baw hpe shanhte a man e, nang nawng jau ya nit dai.

EZEKELA 16:7

Ngai nang hpe kung dam wa ai hpun zawn tu kaba shangun nngai. Nang galu kaba wa nna num mahkawn tai wa nit dai. Na a madoi chyu hpang grai gawng tsawm nna, na a kara ni tu nga lit dai, rai ti mung, nang gaw singgu krin naw rai nga ndai.

EZEKELA 26:16

Panglai ntsa bu hkawm ai masha amyu baw ni a hkawhkam ni yawng gaw shanhte a tingnyang kaw nna yu mat na mara ai. Shanhte gaw palawng galu hte maka ka da ai palawng ni hpe raw kau nna hkrit gari ai hte ga e dung nga na mara ai. Shanhte gaw nang hta byin ai gam maka a majaw, nau hkrit mat nna gari ai pyi n hkring hkraw na mara ai.

EZEKELA 27:16

Suri masha ni mung gun rai hte nang galaw shapraw ai hpaga gun rai ni mari la ma ai. Shanhte gaw mya lung seng tsit, shaba pu nsam rawng ai sumpan, maka ka ai sumpan, mani ai lachyit nba, tanda ngu ai chyahkat nlung hte lung seng hkyeng ni hpe la sa nna na a gun rai ni hte galai la nga ma ai.

EZEKELA 27:7

Na a li sumpan ni hpe lachyit sumpan, Egutu mung na maka ka ai lachyit sumpan ni hte galaw da nga ndai; Dai hpyan sharawt da ai sumpan li ni hpe tsan tsan kaw na aloi sha yu matsing lu nga ai. Na a li magap ni hpe Kupru zunlawng na pru ai shaba pu nsam rawng nna ngang ai sumpan ni hte galaw da nga ai.

LUKA 15:22

Rai ti mung kawa gaw, shi a shangun ma ni hpe shaga nna, ‘Reng htum ai hpun palawng alawan la sa nna shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru,

SHINGRAN 18:12

Shanhte a gun rai ni gaw: ja arai, gumhpraw arai, hpu ging ai lungseng ni, pale, lachyit sumpan, shaba pu nsam rawng ai sumpan, lai hte da ai sumpan, hkyeng kabrim ai sumpan, manam pyaw ai baw hpun amyu myu, magwi kawng hte galaw ai arai amyu myu, manu rawng ai hpun arai, magri mang arai, hpri arai, lunghpraw arai amyu myu,

SHINGRAN 19:8

hpraw tu nna san seng ai lachyit hpun nba hte tinang hkum hpe mawn sumli na ahkang shi lu da nu ai.” (Dai lachyit hpun nba gaw, Karai Kasang a masha ni a kaja ai arawn alai, amu bungli hpe ngu ai rai nga ai.)

SHINGRAN 21:2

Shaloi Chyoi Pra ai Mare ngu ai Yerusalem mare ningnan gaw, la ningnan a matu mawn sumli da ai num ningnan zawn, lajang shachyip ngut nna, Karai Kasang shanu nga ai sumsing lamu de nna yu hkrat wa ai hpe, ngai mu nngai.