EZEKELA 12:2 - Jinghpaw Common Language Bible 2009

² Shi gaw, “Si chye ai masha wa e, nang gaw gumlau ai masha ni a lapran e nga nga ndai. Shanhte gaw na tu ti mung hpa tsun ai hpe n na ma ai, hpa majaw nga yang, shanhte gaw gumlau chye ai masha ni rai ma ai.

EZEKELA 12:2 ပူးပေါင်းရင်းမြစ်များ

2 HKAWHKAM 17:14

Rai ti mung shanhte mahtang n madat n mara nga ma ai hte, dai Madu shanhte a Karai Kasang hpe n kam n sham ai shanhte a kaji kawa ni zawn du ja nga ma ai.

2 HKAWHKAM 17:15

Shanhte gaw shi a matsun maroi ga ni hpe madat mara na matu ningdang kau nhtawm shi hte shanhte a kaji kawa ni hte tawn da ai ga shaka hpe n hkan shatup ai hte shi a shadum jahprang ai ga ni hpe shanhte n kaw n law di kau ma ai. Shanhte gaw manu n dan ai hpara sumla ni hpe nawku nhtawm tinang hkum hpe manu shagrit kau ma ai; shanhte gaw grup yin masha amyu baw ni a htung lailen ni hta hkan nhtawm shanhte a arawn alai ni hpe len n la na matu dai Madu a hkang da ai ga ni hpe mung n madat nga ma ai.

SHAKAWN KUNGDAWN 78:40

Shanhte nam mali hkan e, shi hpe kade lang wa gumlau kau nga ma ai; kade lang wa shi hpe myit shayawn kau nga ma hka!

ESAIA 1:23

Na a ningbaw ni gaw gumlau ni hte lagu lagut ni a jinghku ni rai nga ma ai; shanhte gaw kumhpa ni hte mayun kumhpa ni hpe galoi mung hkap la nga ma ai. Shanhte gaw tara rung hta jahkrai ma ni hpe galoi mung n makawp n maga ai hte gaida gaina ni shanhte a amu shawn ai shaloi galoi mung n madat ya nga ma ai.

ESAIA 30:1

Dai Madu gaw ning nga tsun nu ai: “Yuda mung hpe up ai ni gaw dingnye hkrum ma ai, hpa majaw nga yang shanhte ngai hpe gumlau ma ai. Shanhte gaw ngai n hpajang lawm ai maw mawn lam ni hta hkan ma ai, nye a myit ra ai hte nhtan shai ai ga shaka ni hpe myit hkrum ta masat galaw let yubak kahtap kala galaw ma ai.

ESAIA 30:9

Shanhte gaw Karai Kasang hpe tut nawng gumlau ma ai, tut nawng masu magaw ma ai, dai Madu a sharin shaga ga ni hpe madat na matu tut nawng ningdang nga ma ai.

ESAIA 43:8

Karai Kasang gaw, “Nye a amyu masha ni hpe tara rung de shaga dat mu. Shanhte gaw myi tu ti mung myi n mu ma ai; shanhte gaw na tu ti mung na lahpang ma ai.

ESAIA 44:18

Dai zawn re ai masha ni gaw shanhte hpa galaw nga ai amu hpe chye na na matu nau wa myit n su nga ma ai. Shanhte gaw shanhte a myi ni hpe mung, teng man ai lam hpe chye na shangun ai myit hpe mung pat da nga ma ai.

ESAIA 6:5

Ngai gaw, “Nye a matu myit mada shara n nga sahka! Nye a nten kaw nna pru ai ga hkum shagu gaw yubak ga ni rai nna, ga hkum shagu yubak ga tsun shaga ai amyu masha ni a lapran e ngai nga nga nngai majaw, ngai gaw dingnye hkrum nga nngai. Ti mung, nye myi hte chyaw, Chyahtum Chyalai N-gun rawng ai dai Madu Hkawhkam wa hpe ngai mu se ai.

ESAIA 65:2

Shut hpyit amu hpe du ja ja hte galaw nna shanhte a lam hku sha hkawm nga ai nye a amyu masha ni hpe hkalum la na matu ngai tut nawng jin jin rai nga nngai.

YEREMIA 4:17

Shi a amyu masha ni gaw dai Madu hpe gumlau manu ai majaw sun sin nga ai masha ni zawn dai masha ni Yerusalem hpe wang da na mara ai. Dai Madu nan tsun nu ai.

YEREMIA 5:21

Myi tu ti mung myi n mu lu, na tu ti mung na n na lu ai angawk angak re ai hte myit n su ai amyu masha ni e, madat mu.

YEREMIA 5:23

Rai ti mung, amyu masha ni e, nang gaw du ja ai hte gumlau nga ndai; nang gaw ngai kaw nna kayin mat wa ai hte ngai hpe kau da nit dai.

YEREMIA 7:26

Rai tim, marai langai mi pyi madat ai n rai, dai lam hpe hpa zawn n nawn ya nga ma ai. Dai zawn madat ya na malai, nanhte gaw du grau ja wa ai hte nanhte a nji nwa ni hta grau nna pyi gumlau nga myit dai.

EZEKELA 12:1

Dai Madu gaw ngai hpe ga shaga wu ai.

EZEKELA 12:25

Dai Madu ngai nan shanhte hpe tsun na nngai. Ngai tsun ai hte maren dik wa na ra ai. Dai gaw galoi mung aten la, htingnai nga na ra ai n rai. Gumlau chye ai ni e, nanhte asak hkrung nga ai laman, ngai galaw na ngu nna nanhte hpe shadum jahprang da ni ai hte maren ngai shadik na nngai. Ngai nan dai ga hpe tsun ni ai, nga nna Tsaw Htum ai dai Madu nan tsun ai.

EZEKELA 17:12

“Dai gumlau chye ai ni hpe shanhte dai ga shadawn a lachyum chye na ai rai yang, tsun dan na matu san yu u. Babelon hkawhkam gaw Yerusalem mare de du nna, hkawhkam wa hte shi a mung du salang ni hpe rim la nhtawm, shi hte rau Babelon mung de woi wa manu ai.

EZEKELA 2:3

“Si chye ai masha wa e, ngai gaw nang hpe Israela amyu masha ni hpang de shangun dat nga nngai. Shanhte gaw ngai hpe gumlau nna hpyen tai ma ai, shanhte a kaji kawa ni zawn ya du hkra naw gumlau ma ai.

EZEKELA 24:3

Ngai hpe gumlau ai amyu masha ni hpe Tsaw Htum ai dai Madu ngai nan shanhte a matu ning nga ai ngu nna ndai ga shadawn hpe htawn tsun u: Wan mang ntsa e di dun u dai hpe hka hte jahpring u.

EZEKELA 3:9

Ngai gaw nang hpe ngang ai lunghkrung hte ja ai lung seng zawn shaja ya na nngai; ndai gumlau ai masha ni hpe hkum hkrit et,” nga nna tsun wu ai.

EZEKELA 44:6

“Gumlau chye ai Israela amyu masha ni hpe Tsaw Htum ai dai Madu ngai nan shanhte galaw lai mat wa sai matsat shabat amu ni hpe loi mi pyi hkam sharang sana n re ai lam htawn tsun u.

MARKU 4:12

Hpa majaw nga yang, ‘Shanhte gaw yu layu e n mu na ma ai, na lana e n chye na ma ai. Lama wa shanhte gaw, tinang yu ai arai hpe mu nna, na ai ga hpe chye na shajang ma ai rai yang gaw, shanhte Karai Kasang hpang de kayin wa na ma ai rai nna, Shi gaw shanhte a yubak mara dat kau ya na rai nga ai,” nga nna Chyum Laika ni hta tsun nga ai,” ngu nna shanhte hpe tsun mu ai.

LUKA 8:10

Shi gaw, “Karai Kasang a Mungdan a sung htum ai lam ni hpe chye na na ahkang nanhte hpe jaw da manit dai, masha gale ni chyawm gaw, yu layu e n mu mu ga, na lana e n chye na mu ga, ga shadawn hku ngai tsun nga nngai.

YAWHAN 12:40

Karai Kasang gaw, shanhte a myi hpe magap kau ya nna, myit masin ni hpe mung shaja kau ya wu ai, nga ai ga hte maren shanhte n kam n sham lu ma ai.

2 KORINHTU 3:14

Israela amyu masha ni a myit masin ni gaw kaja wa pat shinggang da nga malu ai. Dai ni du hkra pyi gaw ga shaka dingsa laika ni hpe hti ai ten shagu shanhte a myit masin ni hpe man magap dai hte naw magap htinggrum nga malu ai. Masha langai mi gaw Hkristu hta asak hkrung ai shaloi she dai man magap hpe gun kau lu nga ai.

EHPESU 4:18

Shanhte a chye chyang ai nyan sin mak nga nna tsep kawp angawk angak re ai hte du ja nga ma ai majaw, Karai Kasang jaw ai asak kamhtaw hta n lawm mat ai ni rai nga ma ai.

TARA JAHPRANG 29:3

Dai Madu galaw dan sai hkrit hpa htawkdang ana, lamik kumla hte mauhpa amu kaba ni hpe nanhte mu manit dai.

TARA JAHPRANG 29:4

Rai ti mung dai ni du hkra nanhte hkrum hkra yu manit dai, dai mahkrum madup nanhte hpe chye na hkawn hkrang shangun ai n rai.

TARA JAHPRANG 31:27

Shanhte kade wa mi myit ja nna gumlau ai myit rawng nga ma ai hpe ngai chye nga nngai. Ngai naw hkrung nga ai hte yang pyi, dai Madu hpe shanhte gumlau ma ai rai nna, ngai si mat wa ai hpang dai hta grau nna pyi shanhte gumlau na mara ai.

TARA JAHPRANG 9:24

Nanhte hpe ngai chye ai aten kaw nna pyi dai Madu hpe gumlau nga manit dai.

TARA JAHPRANG 9:7

“Nam mali kata e dai Madu nanhte a Karai Kasang hpe nanhte kaning rai masin shapawt nga myit dai hpe galoi mung hkum malap kau myit. Nanhte Egutu mung kaw na pru wa ai shani kaw nna ndai yang du wa ai aten du hkra nanhte shi hpe gumlau nga myit dai.