EZEKELA 12:12 - Jinghpaw Common Language Bible 2009

¹² Shanhte up hkang nga ai mung du gaw shi a arung arai majaw hpe lahpa hta hpai nna htat ai nsin aten e, shanhte gaw shi a matu bunghku htu waw ya ai hte dai lam hku hprawng lawt mat wa na ra ai. Shi gaw shi a myi hpe htinggrum magap da wu ai majaw shi hkawm sa nga ai shara hpe pyi n mu lu nga ai.

Jinghpaw Hanson Version Bible

¹² Shanhte hpe up ai du gaw, tinang a lahpa hta hpai nna, nsin htat ai aten e pru na ra ai; shanhte gaw bunghku hpe htu waw nna, arung arai hpe shapraw na mara ai: shi gaw ga n mu lu hkra, tinang myi man hpe htinggrum na ra ai.

EZEKELA 12:12 ပူးပေါင်းရင်းမြစ်များ

2 HKAWHKAM 25:4

mare bunghku ni hpe tawk waw pru wa ma ai. Babelon masha ni gaw dai mare hpe wang shinggrup da nga ma ti mung, share shagan ai hpyenla ni yawng gaw hkawhkam wa a sun makau na bunghku lahkawng a lapran na chyinghka lam hku shana e shanhte pru nhtawm Yawdan Kadit ang ang de hprawng pru mat wa ma ai.

2 HKAWHKAM 7:5

Dai rai nna nsin sin wa mahka, Suri dap de shanhte sa wa ma ai. Rai ti mung dai shara de shanhte shang wa yang, dai yang e kadai mung n nga nga masai.

YOBA 24:16

Lagu lagut ni gaw shana e nta kata de hpya shang ma ai; shanhte gaw shana e mahtang dai nhtoi hpe yen nga ma ai.

YEREMIA 24:8

“Yuda Hkawhkam Zedekia, shi hte rau nga ai mung masa ninghkrin ni hte ndai mung hta naw ngam nga ai Yerusalem mare masha ni hte Egutu mung de na sa htawt nga ai ni hpe dai Madu ngai nan n sha mai hkra, n kaja ai lakum si ni zawn shanhte yawng hte hpe ngai shatai kau na mawe ai.

YEREMIA 32:5

Zedekia gaw Babelon mung de woi la hkrum na ra ai, shi gaw dai mung hta ngai hte hkrum kanawn ai aten du hkra, dai shara hta shi naw nga nga na ra ai. Shi gaw Babelon mung masha ni hpe gasat ti mung, awng dang na ra ai n rai. Dai Madu ngai nan tsun ni ai,” nga ai.

YEREMIA 37:17

Dai hpang, kade n na yang, Hkawhkam Zedekia gaw ngai hpe shaw la na matu masha shangun dat wu ai; dai hkaw htingnu kata hta, “Dai Madu kaw nna mungga naw nga a ni?,” ngu nna ngai hpe alak mi san wu ai. Shing rai, ngai mung, “Nga ai,” dai gaw, “Nang Babelon hkawhkam wa a lata de ap kau ai hkrum na rai ndai,” ngu nna htan ai hte kahtap tsun ni ai.

YEREMIA 39:4

Hkawhkam Zedekia hte shi a share shagan hpyen masha ni mahkra dai byin nga ai masa hpe mu ma ai shaloi, shanhte gaw dai shana jang mare kaw nna hprawng pru mat wa na matu shakut nga ma ai. Shanhte gaw hkawhkam wa a sun de sa wa ai lam hku pru mat wa nhtawm bunghku lahkawng hpe matut da ai lapran chyinghka lam hku Yawdan Kadit de hprawng mat wa ma ai.

YEREMIA 42:7

Nhtoi shi ya na ai hpang, dai Madu a mungga ngai kaw ning nga du ai:

YEREMIA 52:7

Mare bunghku ni mung daw agrawp mat nga ai. Babelon masha ni dai mare hpe wang da nga ma ti mung, hpyenla ni yawng gaw hkawhkam wa a sun makau na bunghku lahkawng a lapran na chyinghka lam hku shana e pru mat wa nhtawm Yawdan Kadit ang ang de hprawng pru mat wa ma ai.

EZEKELA 12:4

Shani aten naw rai nga yang, bawng dung ai a matu, na a arung arai majaw hpe makai shajin da u, shaloi shanhte nang hpe mu lu na mara ai. Shanhte gaw nang hpe azi yu lu mu ga, nang nan bawng dung hkrum mat wa ai wa zawn shana de na aten e nang pru mat wa u.

EZEKELA 12:6

Shanhte nang hpe azi yu lu mu ga, na a arung arai majaw hpe na a lahpa ntsa e hpai mara nhtawm na a myi man htinggrum kau let htat ai nsin kata de hkawm sa wa su. Nang kade hkawm sa nga ai hpe nang n mu lu na ndai. Ya nang hpa galaw nga ai lam gaw Israela masha ni hpe sadi jaw ai kumla tai na ra ai,” ngu nna tsun ai.