EZEKELA 11:21 - Jinghpaw Common Language Bible 2009

²¹ Rai ti mung, awu asin re ai hte matsat shabat re ai hpara sumla ni hpe nawku na myit manoi tsaw ra nga ai ni hpe chyawm gaw ngai ari jaw na nngai. Shanhte galaw lai wa sai amu hte maren, shanhte hpe ngai ari jaw na nngai,” ngu nna dai Tsaw Htum ai dai Madu nan tsun wu ai.

Jinghpaw Hanson Version Bible

²¹ Rai timung, shanhte a awu asin re ai matsat shabat nyan hpe, myit masin hte hkan sharau ai ni a yubak, shanhte a baw ntsa e ngai shapraw na nngai,” nga nna Madu Yehowa tsun ai.

EZEKELA 11:21 ပူးပေါင်းရင်းမြစ်များ

HPAJI NINGLI 11:9

Ramma ni e, nanhte a ram prat hpe kabu gara nga mu. Ramma naw rai nga yang kabu gara nga mu. Nang galaw mayu ai amu hpa hpe mung galaw u. Na a myit sharawng awng ai hku hkan u. Rai ti mung nang galaw ai lam a majaw Karai Kasang nang hpe jeyang na ra ai hpe adum nga u.

YEREMIA 1:16

Shanhte gaw yubak shut hpyit masai; shanhte ni ngai hpe kau da masai, kaga karai ni hpe shagu hkungga nawng ya masai, hpara sumla ni galaw nna dai ni hpe nawku nga masai majaw nye a amyu masha ni hpe ngai ari jaw na nngai.

YEREMIA 16:11

Dai hpang, dai Madu gaw ning nga ai nga nna shanhte hpe tsun u: ‘Na a nji nwa ni gaw ngai kaw nna kayin mat wa nna kaga hpara ni hpe nawku ai hte daw jau ma ai. Shanhte gaw ngai hpe kau da nhtawm nye a sharin shaga ai ga ni hta n hkan nga ma ai.

YEREMIA 16:18

Shanhte gaw nye a mungdan hpe asak n rawng ai si mang zawn re ai hpara sumla ni hte awu asin di nhtawm shanhte a n teng n man ai hpara sumla ni hte jahpring da ma ai majaw, ngai gaw shanhte hpe shanhte a yubak hte n hkru ai a matu ari htam lahkawng jaw na we ai,” ngu nna tsun ai.

YEREMIA 17:9

“Masha a myit masin hpe kadai chye lu nga a ni? Grai masu magaw ai hta jan nna hpa mung n nga nga ai; dai gaw shamai shatsai la na matu nau wa machyi sawng mat nga ai.

YEREMIA 2:20

Tsaw Htum ai dai Madu gaw, Israela e, nang gaw moi kaw nna nye a ahkang aya hpe ningdang kau ndai; nang gaw nye a ga madat na matu hte ngai hpe nawku na matu ningdang kau ndai. Tsaw ai kawng shagu a ntsa hte tsit lali ai hpun npu shagu hta mayat maya ai karai ni hpe nang nawku ndai.

EZEKELA 11:18

Shanhte bai nhtang wa ma ai shaloi, shanhte lu da ai awu asin re ai hte matsat shabat re ai hpara sumla ni yawng hpe shanhte htawm kabai kau na mara ai.

EZEKELA 14:3

Shi gaw, “Si chye ai masha wa e, ndai masha ni gaw shanhte a myit masin ni hpe hpara sumla ni kaw ap ya ma ai; dai hpara sumla ni gaw shanhte hpe yubak kata de woi sa wa ma ai. Ngai gaw shanhte hpe mahtai langai jaw na re ngu, shanhte myit nawn da ma ni?

EZEKELA 16:43

Nang naw kaji nga yang, ngai nang hpe kade lakawn ai hpe mung nang malap kau nhtawm, nang galaw ai amu yawng hte nang ngai hpe pawt sindawng shangun nit dai. Dai lam a majaw, ngai gaw dai amu ni yawng a matu nang hpe matai htang jaw ni ai. Nang galaw ai kaga matsat shabat amu ni yawng hta ngang gayut ai nse nsa amu hpe nang hpa majaw shut hpyit nit ta?” Tsaw Htum ai dai Madu nan tsun nu ai.

EZEKELA 20:16

Shanhte gaw shanhte a hpara sumla ni hpe nawku na matu sharawng awng nga ma ai; nye a hkang da ai matsun maroi ga ni hpe kau da nhtawm nye a tara ni hpe jahten kau ai hte Bansa Nhtoi hpe awu asin di kau mu ai majaw ngai dagam kau ni ai.

EZEKELA 20:31

Nanhte gaw dai ni du hkra pyi, dai zawn re ai kumhpa ni hte nawng jau nhtawm, dai zawn re ai hpara sumla ni a man e nanhte a kashu kasha ni hpe wan nat hkungga nawng jau ai hte nanhte hkum nanhte awu asin di myit dai. Israela amyu masha nanhte gaw ya du hkra nye a myit ra sharawng ai lam hpa rai nga a ni?, nga nna sa san nga myit dai! Ngai gaw Tsaw Htum ai dai Madu, ahkrung nga ai Karai Kasang rai nga nngai, dai majaw hpa lam hte seng nna mung, nanhte ngai hpe san yu lu na myit dai n rai.

EZEKELA 20:38

Nanhte a lapran na gumlau ai ni hte yubak galaw ai ni hpe ngai tsan kau na nngai. Ngai gaw dai ni hpe shanhte shanu nga ai mungdan kaw nna shapraw kau na nngai, rai ti mung dai ni hpe Israela mungdan de ngai bai nhtang wa shangun na n rai. Shaloi nanhte gaw ngai nan dai Madu rai nga nngai ai hpe chye na mara ai.

EZEKELA 22:31

Dai re ai majaw, ngai gaw nye a masin kahtet ai hpe shanhte a ntsa e ru bun dat nna, shanhte galaw dan sai arawn alai hte maren, shanhte hpe wan zawn shamyit kau na we ai.” Tsaw Htum ai dai Madu tsun nu ai.

EZEKELA 7:3

“Israela e, jahtum ai gaw du nit dai. Nang galaw dan sai amu hte maren ngai nang hpe tara jeyang nga nngai majaw nang gaw nye a sindawng kahtet ai hpe hkam sha na rai ndai. Ngai gaw nang galaw ai matsat shabat amu yawng a matu nang hpe htang jaw na nngai.

EZEKELA 7:4

Ngai gaw nang hpe lahpawt dum na n rai, matsan dum ai lam loi mi mung madun na nngai n rai. Nang galaw shapraw dan sai matsat shabat re ai arawn alai ni a majaw, ngai nang hpe ari jaw na nngai, shaloi ngai nan dai Madu rai nga nngai hpe nang chye wa na rai ndai.”

EZEKELA 7:8

“Kade mi n na yang, nang gaw nye a sindawng kahtet ai n-gun yawng hpe hkam sha na rai ndai. Nang galaw lai wa sai amu a matu ngai nang hpe tara jeyang nga nngai; nang galaw dan lai wa sai matsat shabat arawn alai yawng a matu ngai nang hpe bai htang jaw na nngai.

EZEKELA 9:10

Rai ti mung, ngai gaw shanhte a ntsa e matsan yu dum na n rai; kaga masha ni hpe shanhte galaw ai hte maren shanhte hpe galaw dan na nngai,” ngu nna htan wu ai.

HEBRE 10:38

Nye a ding hpring ai masha ni chyawm gaw, kam sham ai hte hkrung nga na mara ai. Rai ti mung shanhte hta na langai ngai sit htingnut htak mat wa a yang gaw, ngai shi hta sharawng awng na nngai n rai,” nga nna tsun nga ai.

YUDA 1:19

Ndai masha ni gaw hpung kata hta hka bra wa ai lam hpe shabyin ai ni, tinang a hkum shan ra marin ai lam ni hta hkan sa ai lam ni, Wenyi n lu la ai ni rai ma ai.